WI KRESTEN LIBI
Fa fu preiki moro bun—Skrifi bun brifi
FU SAN EDE A PRENSPARI: A Bijbel buku 1 Korentesma na wan fu den 14 brifi di na apostel Paulus skrifi fu gi den Kresten brada nanga sisa fu en deki-ati. Te wan sma skrifi wan brifi, dan a abi a ten fu gebroiki den yoisti wortu èn a sma di kisi a brifi kan leisi en ibri tron baka. Wi kan skrifi brifi gi famiriman noso gi sma di wi sabi. Dati na wan moi fasi fa wi kan preiki gi den. Noso wi kan skrifi brifi fu preiki gi sma di wi no man miti. Fu eksempre, wan sma kan sori taki a wani sabi moro, ma kande a muilek fu miti a sma na oso. Wi no man miti son sma fu wi gebied fu di den e libi na ini apartement pe wi no mag go, na presi pe wi no man doro so makriki, noso na farawe presi. San na wan tu sani di wi musu hori na prakseri te wi e skrifi brifi, spesrutu gi wan sma di wi no sabi?
FA FU DU DATI:
Skrifi san yu ben o taigi a sma te yu ben o miti en. Taki suma na yu na a bigin fu a brifi èn fruteri en krin fu san ede yu skrifi a brifi. Kande yu kan poti wan aksi gi a sma fu meki a prakseri dati èn taigi en taki a kan go na a website fu wi. Fruteri en fa wi e studeri Bijbel nanga sma na den oso, noso kari den nen fu wan tu fu den kapitel na ini den buku di wi e gebroiki fu studeri nanga sma. Yu kan poti wan kontakti karta, wan kari gi den gemeente konmakandra, noso wan traktaat na ini na enveloppe tu
A brifi no musu langa tumusi, fu di a sma di e kisi en kan kon weri fu leisi en.—Luku na eksempre na tapu bladzijde 8
Luku efu fowtu de na ini a brifi èn efu a makriki fu leisi. Sorgu taki den sani di yu skrifi e sori taki yu abi switifasi èn taki yu wani gi a sma deki-ati