Pristeri a boen njoensoe — Gi famirman èn persoonlek kompe
1 A de wan sani di no kan trafasi dati wan sma di e teki na waarheid sa wani foe prati en nanga trawan, spesroetoe nanga famirman èn boen kompe. Bakadi Andréas ben kisi wan kari foe tron wan bakaman foe Jezus, a „tra mamanten frokoe!” a ben feni en brada Simon èn a ben taki: „Wi ben feni na Messias.” Na a srefi fasi Filippus ben soekoe en mati Nathanaël èn a ben aksi en tranga foe ’kon loekoe’. — Joh. 1:41, 45, 46; loekoe voetnoot Rbi-8 nanga Tori foe den Apostel 10:24.
2 Fa a de nanga joe? Joe e soekoe okasi foe taki nanga joe famirman nanga kompe foe na waarheid? Kande joe ben e sjensjen foe doe disi te now ete foe di joe e frede taki kande den bo trowe na boskopoe èn dati den bo kon de tra fasi nanga joe. No tapoe joesrefi foe doe so. Lobi gi joe birti e aksi dati joe taki na waarheid nanga prisiri èn sondro frede (Luk. 10:27). Foedi joe famirman sabi joe kaba, kande den sa klari foe arki moro esi na joe leki na wan freemde sma di e kon na joe doro.
FOE SAN-EDE? FA?
3 Hori na ini prakseri dati ala sma di no e dini Jehovah, no „sabi” Gado èn foe dat’ede e loekoe den leki „feanti”. Den libi de na ini kefar (Kol. 1:21) Jehovah abi na faja winsi dati ala sma jere na waarheid èn „kon kisi beraw” (2 Petr. 3:9). Wi abi na frantwortoe foe ferteri ibrisma san na ten di de na wi fesi sa tjari kon (Ezech. 33:7-9). Joe kan prakseri foe wantoe fasi foe jepi joe famirman nanga kompe foe kon leri sabi na waarheid? Moeiti di joe e tan meki go doro èn di de tactvol nofotron sa tjari bakapisi di sa meki wi firi boen.
4 Na Ingrisi Jariboekoe foe 1985 e ferteri na ondrofeni foe wan oema ini Japan di ben kon na ini na waarheid foe di wan spesroetoe pionier ben e tjari nanga pasensi go-baka na en. Ini a kerki pe a ben de fosi a ben de fajafaja èn a ben abi foeroe famirman di ben de ete na ini a kerki dati. A bigin gi den kotoigi èn ini féfi jari ten moro leki 50 foe den ben tron Kotoigi.
5 No las’ati te biginbigin joe moeiti no e tjari wéniki ofoe srefi no wan bakapisi. Na foeroe okasi pas den e handri boen bakadi foeroe moen noso kande srefi jari e psa di ala sortoe moeiti e doe. Jezus ben taki dati en skapoe ben sa arki en sten. Ma wi no abi foe ferwakti dati den sa reageer tapoe wi fosi kari (Joh. 10:16). Kande jari langa na owroe grontapoe disi ben naki den èn a kan dati foeroe oli di e safoe skin foe bijbel waarheid moesoe gebroiki bifo den reageer.
6 Filippi 2:15 e sori dati foe kan skijn leki ’sma di e skijn den leti’, wi moesoe de sondro fowtoe èn krin, pikin foe Gado, ’sondro flaka’. Wi famirman nanga kompe moesoe kan si taki na waarheid tyari wan bigi kenki kon na ini wi libi. Na apostel Petrus ben sori tranga na tapoe na srefi punt. — 1 Petr. 2:12.
7 Ma efoe wi famirman wani foe kisi réde foe dini Jehovah, dan foe dati moro de fanowdoe leki soso poti wa boen eksempre. Wi moesoe gi kotoigi (Rom. 10:14; Tori. 8:31). Foe kan miti famirman di e libi farawe foe wi, wi kan skrifi brifi foe di wi prakseri boen a fesi èn di skrifi moi, kan de wan heri boen wrokosani foe prati na boen njoensoe. Joe brifi no moesoe de kritis, ma positief, den moesoe bow op èn e sori switifasi. Den moesoe meki na prisiri nanga na howpoe di e foeroe joe ati foe sensi a ten di joe ben leri sabi na waarheid skijn kon na doro.
DE POSITIEF
8 Son sisa ben frede taki den masra bo gi den boen foeroe gens èn foe dat’ede den no ben ferteri den masra san den e doe soboen ini na gemeente. Leki fa a de dan ibriwan sma foe ensrefi sa moesoe teki bosroiti ini na afersi disi. Ma noiti wi moesoe loekoe psa na waarde foe wan faja begi na Jehovah te wi e soekoe wan okasi foe gi wi famirman noso kompe kotoigi (Fil. 4:6; 1 Tim. 2:1). Meki wan positieve fasi foe prakseri gro. Jehovah sa blesi joe opregti moeiti foe meki a boen njoensoe bekenti na joe famirman èn persoonleke kompe sekerseker.