Meki a nen fu yu lezing kon na fesi

BUN takiman sabi o warti a de te wan lezing abi wan nen. Te den e sreka wan lezing, dan a nen fu a lezing e yepi den fu poti prakseri na wán spesrutu sani nomo, èn fu den go prakseri moro dipi fu a spesrutu sani disi. Fu dati ede, na presi fu den taki frafra fu wan lo sani, dan safrisafri den e tyari wan heri tori kon na krin so taki den arkiman e feni winimarki fu dati. Te ibri prenspari sani di a takiman e taki, abi langalanga fu du nanga a nen fu a lezing, dan dati e yepi den arkiman fu memre den prenspari sani disi èn fu si o warti den sani disi de.

Te yu e luku en bun, dan yu kan taki dati a nen fu yu lezing na a tori fu san yu e taki. Aladi dati de so, toku yu sa si taki den lezing fu yu sa kon moro bun, efu yu e si a nen fu yu lezing leki a sani di musu yepi yu fu taki moro fara fu tra penti na ini a lezing. Wan lo tori de fu taki fu a Kownukondre, a Bijbel, nanga na opobaka. Yu kan teki difrenti nen fu hori wan lezing fu den dri tori disi. Dyaso na wan tu eksempre: „A Kownukondre na wan trutru tiri”, „Gado Kownukondre sa meki grontapu tron wan Paradijs”, „Bijbel skrifi nanga yepi fu Gado en santa yeye”, „Bijbel na wan buku di wi kan gebroiki bun na ini a ten disi”, „Na opobaka e trowstu sma di e sari”, èn „A howpu fu na opobaka e yepi wi fu tan tanapu kánkan te wi e kisi fu du nanga frufolgu”. Nanga ala den nen disi yu ben sa kan meki wan lezing, ma fu di den no de a srefi, dati meki yu sa musu tyari den kon na krin na difrenti fasi tu.

A moro prenspari tori fu san Bijbel e taki, na a Kownukondre. Di Yesus ben du a preikiwroko na grontapu, dan a ben poti krakti tapu a prenspari tori disi fu di a ben taki: „A kownukondre fu hemel kon krosibei kaba” (Mat. 4:17). Fa a tori dati ben tyari kon na krin? Den skrifiman fu den fo Evangelietori ben sori go na a Kownukondre dati moro leki 110 tron. Ma Yesus ben du moro leki fu kari a wortu „kownukondre” ibri tron nomo. Nanga den sani di a ben leri trawan èn nanga den wondru di a ben du, Yesus ben sori krinkrin taki na en ben de a Manpikin fu Gado, a Mesias, a wan di Yehovah ben o gi a Kownukondre. Yesus ben sori sosrefi taki nanga yepi fu en, trawan ben o man abi wan prati na a Kownukondre dati. A ben sori sortu fasi den sma ben musu abi, di ben sa kisi a grani dati. Nanga den sani di a ben leri trawan èn nanga den krakti wroko di a ben du, Yesus ben sori krinkrin san Gado Kownukondre ben o du gi libisma. Yesus ben sori tu taki fu di a ben yagi ogri yeye puru nanga yepi fu Gado en yeye, dan dati ben de wan buweisi taki ’a kownukondre fu Gado trutru kon na den sma tapu’ di ben arki en (Luk. 11:20). Yesus ben taigi den bakaman fu en fu go preiki fu a Kownukondre dati.​—Mat. 10:7; 24:14.

Gebroiki wan nen di fiti. A no de fanowdu fu taki fu wan nen fu wan lezing soleki fa Bijbel e du dati te a e taki fu a Kownukondre. Ma toku, a de prenspari fu abi wan nen di fiti gi den sani di yu o taki, neleki fa Bijbel abi wan nen di fiti gi den sani di skrifi na ini.

Efu na yusrefi musu suku wan nen gi yu lezing, dan prakseri fosi san na a marki di yu wani doro nanga a lezing fu yu. Baka dati, te yu teki den moro prenspari penti nanga san yu sa meki yu lezing, dan sorgu taki den prenspari penti disi trutru e horibaka gi a nen di yu teki gi a lezing.

Efu a no yusrefi teki a nen fu a lezing ma efu a nen de kaba, dan luku finifini na sortu sani a nen dati e sori go, so taki yu kan sabi fa fu meki a lezing. Sontron yu musu meki muiti fu frustan o prenspari a nen dati de, èn o furu sani yu kan taki fu a nen dati. Efu yusrefi musu go luku sortu sani yu musu taki, dan teki soso den sani di sa yepi yu fu tyari a nen fu a lezing kon na krin. Na a tra sei, efu yu kisi ala sani kaba di yu musu taki na ini a lezing, dan toku yu musu luku fa yu o gebroiki den sani dati so taki a nen fu a lezing e kon krin na fesi. Yu musu go prakseri tu fu san ede a tori de prenspari gi den arkiman fu yu èn san yu wani doro nanga a lezing di yu sa hori. Disi sa yepi yu fu si tapu sortu sani yu musu poti krakti te yu e hori yu lezing.

Fa fu poti krakti tapu a nen fu a lezing. Efu yu wani poti a yoisti krakti tapu a nen fu yu lezing, dan yu musu seti wan fondamenti te yu e suku san yu o taki èn te yu e orga den sani di yu feni fu taki. Efu yu e gebroiki soso den sani di e horibaka gi a nen fu yu lezing èn efu yu meki wan bun schema, dan yu sa poti krakti tapu a nen fu a lezing sondro fu yu sabi dati srefi kande.

Efu yu e kari a nen fu yu lezing ibri tron, dan dati kan yepi yu fu poti krakti tapu a nen fu a lezing. Meki wi teki na eksempre fu wan lobi singi. Na ini a heri singi a singiman e kari a nen fu a singi, dati na a lobi di a e firi gi a sma di a lobi so furu. Na difrenti fasi a kan kari a nen fu a singi disi ibri tron baka. A kan taki wan tu tra sani nanga a wortu „lobi” na ini. Boiti dati, a kan kari tra wortu di wani taki a srefi sani, a kan kari wan puwema, noso wan tra eksempre. Toku a heri singi e taki fu „lobi”. Na a srefi fasi a musu de nanga a nen fu wan lezing. Neleki fa a wortu ’lobi’ ben de fu yere na ini a heri singi, na so yu kan taki ibri tron baka fu wan tu prenspari wortu di abi fu du nanga a nen fu yu lezing. Efu yu wani taki sani pikinso tra fasi, dan yu kan gebroiki tra wortu di abi fu du nanga a nen. Efu yu e du dati, dan a nen fu yu lezing sa de a moro prenspari sani di den arkiman sa memre.

Yu kan gebroiki den sani di wi kari dyaso no wawan te yu de na tapu a podium fu hori wan lezing, ma sosrefi te yu e taki nanga wan sma na ini a preikiwroko. Wan syatu takimakandra kan tron wan takimakandra di na arkiman sa memre moro bun, te yu e taki fu wán prenspari sani nomo. Te yu e gi leri tapu wan bijbelstudie, dan a studenti sa memre sani moro bun efu yu e poti krakti tapu a nen fu a kapitel fu a buku di unu e studeri. Te yu e du muiti fu suku wan nen di fiti èn te yu e tyari a nen dati kon na krin te yu e taki, dan dati sa yepi yu furu fu tron wan moro bun takiman èn wan moro bun leriman fu Gado Wortu.