PISI 9
A tru bribi kan meki yu kisi wini fu têgo!
1. San o pasa te wi e „kon krosibei na Gado”?
YEHOVAH lobi den wan di e dini en. Efu yu e anbegi Yehovah, a o blesi yu nownow èn na ini a ten di e kon. Bijbel e taki: „Kon krosibei na Gado, èn a sa kon krosibei na unu.”—Yakobus 4:8.
2. Fa wi kan kon krosibei na Gado, èn fa disi o abi krakti tapu den begi fu wi?
2 Efu yu wani kon krosibei na Gado, dan yu musu studeri en Wortu èn yu musu du san en Wortu e taki. Te den begi fu yu e kruderi nanga a wani fu Yehovah, dan a o arki èn piki den begi fu yu. A Kresten apostel Yohanes ben skrifi: „Disi na san wi sabi seiker fu [Gado], taki awansi san wi e aksi akruderi a wani fu en, a e yere wi. Boiti dati, efu wi sabi taki a e yere wi, awansi san wi e aksi en, dan wi sabi taki wi sa kisi den sani di wi aksi, fu di wi aksi en den sani disi.”—1 Yohanes 5:14, 15.
3-7. Fa wi kan kisi a koni fu Gado, èn fa dati kan yepi wi?
3 Boiti dati, a de so taki te yu e kon krosibei na Gado, dan a o gi yu koni fu teki bun bosroiti na ini yu aladei libi. Bijbel e taki: „Efu wan fu unu e mankeri koni, meki a tan aksi Gado.”—Yakobus 1:5.
4 Fa a koni fu Gado kan yepi yu? Wan fasi, na taki a kan yepi yu fu sabi sortu sani no e plisi Yehovah. Yu kan kon sabi tu fu san ede den sani disi no bun èn san yu kan du fu wai pasi gi den. A sabi disi kan meki taki son problema di e miti furu sma, no e miti yu. Fu eksempre, Gado gi en pipel a rai fu tyari densrefi na wan fasi di fiti. Fu di den e du dati meki den no e kon de nanga bere somarso, èn den no e kisi siki di sma kan kisi te den abi seks nanga trawan. Den no e du sani di o pori a trowlibi fu den èn den no e broko trow fu pikinpikin sani ede.
5 Sortu tra sani a sabi fu Gado kan du gi yu? A kan meki yu gebroiki yu libi na a moro bun fasi. A kan yepi yu fu teki koni bosroiti, soleki san yu musu du nanga yu moni. Yu o man du sani di sa tyari wini kon gi yu fu ala ten, èn yu no o poti prakseri na sani di e lasi gowe.
6 A koni fu Gado kan yepi yu tu nanga a banti di yu abi nanga trawan. Yu kan abi wan moro koloku osofamiri-libi. Yu kan meki trutru mati di o tan yu mati fu ala ten. Sma o lespeki yu sosrefi, awinsi sonwan fu den no e dini Gado.
7 Wan tra sani sosrefi, na taki a koni fu Gado o meki yu si a libi tra fasi. A koni fu Gado o yepi yu te problema e kon, noso te yu e firi brokosaka. Sosrefi, yu no o bruya makriki, èn yu no o frede a tamara fu yu. Disi o abi wan bun krakti tapu yu frustan èn tapu yu gosontu.—Odo 14:30; Yesaya 48:17.
8. San yu no o frede te yu e dini Gado?
8 Te yu e dini a tru Gado, dan yu no o frede gi den sani di e frede tra sma di no e dini Gado. Fu di yu sabi taki den dedewan no de na libi èn taki den de na ini a grebi, meki yu no o frede den. Fu di yu e bribi a pramisi fu Gado taki a sa gi den dedewan wan opobaka, meki yu no o frede dede. Èn fu di yu sabi taki Gado abi ala makti, meki yu no o frede nowan sani di abi fu du nanga bonu noso wisi.—Yohanes 8:32.
Den regtfardikiwan sa abi grontapu
9-11. Suma sa libi na ini a Paradijs, èn suma no sa libi drape?
9 Te yu e kon krosibei na Gado, dan yu no o frede san o pasa na ini a ten di e kon. Soleki fa wi ben si, dan Bijbel ben taki na fesi kaba fu someni fu den problema di e pasa na ini a ten disi. Yehovah e taigi wi taki den sani disi de fu wan syatu pisi ten nomo, fu di heri esi Gado Kownukondre o meki grontapu tron wan paradijs.—Lukas 21:10, 11, 31; 23:43.
10 Soso den wan di e kon krosibei na Yehovah èn di e dini en, sa libi na ini a Paradijs. Bijbel e taki: „Ete wan syatu pisi ten èn na ogrisma no sa de moro; èn yu sa luku seiker na a presi pe a ben de, èn a no sa de. Ma den safri-atisma srefi sa abi grontapu leki a gudu fu den, èn trutru den sa feni switi prisiri na ini vrede di sa de pasa marki.”—Psalm 37:10, 11.
11 Den sma di e weigri nomonomo fu gi yesi na den regtfardiki wet fu Gado, sa lasi den libi fu têgo (2 Tesalonikasma 1:8, 9). Den no sa de moro. Den sa dede fu têgo, neleki Satan nanga den ogri yeye fu en (Openbaring 20:10, 14). Ma den wan di kon leri sabi Yehovah èn di e dini en, sa prisiri srefisrefi na ini a Paradijs na grontapu.
Wan tumusi moi tamara!
12. San Bijbel e taki fu a tamara fu libisma?
12 Yehovah abi tumusi moi sani na prakseri gi den wan di lobi en! Luku nomo san en Wortu e taki fu a libi na ini a Paradijs grontapu:
Bun furu sani sa de fu nyan: „Aleisi [noso nyanyan] sa de bogobogo na grontapu; na tapu na ede fu den bergi sani sa gro pasa marki.”—Psalm 72:16.
Sma sa abi bun oso fu tan: „Den sa bow oso trutru èn libi na ini.”—Yesaya 65:21.
Wroko o de di e gi prisiri: „Den sma di mi kari sa nyan bun dorodoro fu a wroko fu den eigi anu. Den no sa wroko tranga fu soso.”—Yesaya 65:22, 23.
Nowan sma o siki: „Nowan sma di e libi drape sa taki: ’Mi siki.’”—Yesaya 33:24.
Nowan sma o abi mankeri: „Na a ten dati den ai fu den breniwan sa kon opo, èn srefi den yesi fu den dofuwan sa kon opo. Na a ten dati a malengriwan sa kren neleki wan dia, èn a tongo fu a babaw-wan sa bari fu prisiri ede.”—Yesaya 35:5, 6.
Nowan pen, nowan sari, nowan dede o de: „[Gado] o figi ala watra puru na den ai, èn dede no sa de moro; nowan sari, noso krei, noso pen no sa de moro. Den fositen sani pasa gowe.”—Openbaring 21:4.
Nowan feti o de: „[Gado] e meki feti kon na wan kaba te na a moro farawe presi fu grontapu.”—Psalm 46:9.
Têgo libi: „Den regtfardikisma srefi sa abi grontapu leki a gudu fu den, èn den sa libi na tapu fu têgo.”—Psalm 37:29.
13. Suma na a wan-enkri sma di kan meki a grontapu disi tron wan paradijs, èn fu san ede na en wawan kan du dati?
13 Noiti libisma ben o man du den sani disi, ma Yehovah abi a makti fu du iniwan sani di a taki dati a o du. Noti no kan tapu en fu du san a wani du. Bijbel e taki: „Gado man du ala san a taki.”—Lukas 1:37.
14. Fa yu kan kon tapu a pasi di e tyari sma go na têgo libi?
14 Nanga yepi fu den Kotoigi fu en, Yehovah e gi sma na alape na okasi fu „pasa go na ini a smara doro” èn fu waka a pasi di e tyari sma go na têgo libi. Meki a de so taki yu na wan fu den koloku sma di teki a kari disi. Meki a de so taki yu tan na ini a tru bribi, èn taki Yehovah blesi yu fu têgo!—Mateyus 7:13, 14.