Yonguwan—San unu o du nanga un libi?
„MI WANI taki mi libi musu tyari bun furu winimarki kon gi mi.” Na so wan tini meisje e taki. A no de fu taki, dati yu wani dati tu. Ma fa yu kan meki taki yu libi e tyari „bun furu winimarki” kon gi yu? Radio, telefisi, koranti nanga tijdschrift, èn sosrefi den speri nanga den leriman fu yu, kan sori yu taki te yu wani taki yu libi e tyari bun furu winimarki kon gi yu, dan yu musu meki furu moni noso yu musu abi wan kefalek bun wroko. Dati wani taki dati, a libi fu yu e tyari furu winimarki kon gi yu te yu e kon gudu noso te yu e kisi biginen!
Ma Bijbel e warskow yongusma taki a feti di sma e feti fu kon gudu na a srefi leki te sma „e strei fu kisi a winti” (Preikiman 4:4). Fu taki en leti, wan tu yongusma nomo e kon tron gudusma di abi biginen. Den sma disi furu tron e kon si taki so wan libi de heri tra fasi leki san den ben fruwakti. Wan yongusma fu Ingrisikondre di ben e wroko tranga fu kan kisi biginen, e taki: „Wan gudu libi de leki wan leigi dosu. Te yu e luku fu si san de na inisei, dan noti no de na ini.” A tru taki son leisi wan wroko kan meki yu tron wan gudusma di trawan e lespeki. Ma a no man satisferi yu „nowtu na yeye fasi” (Mateyus 5:3). Boiti dati, 1 Yohanes 2:17 e warskow wi taki „grontapu e pasa gowe”. Srefi efu sani ben o waka bun gi yu na ini a grontapu disi, toku dati no ben o de fu langa.
Fu dati ede Preikiman 12:1 e gi yonguwan a deki-ati: „Memre yu Gran Mekiman na ini yu yongu yari.” Iya, a moro bun sani di yu kan du nanga yu libi, na fu tron wan futuboi fu Yehovah Gado. Ma yu musu doro spesrutu markitiki fosi fu man tron wan futuboi fu Gado. Fa yu kan doro den markitiki dati? Èn san a wani taki fu de wan futuboi fu Gado?
Fa yu kan tron wan Kotoigi fu Yehovah
A fosi sani na taki, yu musu kweki wan angri fu dini Gado. Awansi yu papa nanga mama na Kresten, toku na angri dati no e kon fu ensrefi. Yusrefi musu kisi wan matifasi nanga Yehovah. „Te yu e begi, dan dati e yepi yu fu abi yu eigi matifasi nanga Yehovah”, na so wan tini meisje e taki.—Psalm 62:8; Yakobus 4:8.
Romesma 12:2 e poti krakti tapu wan tra sani di yu musu du. A tekst disi e taki: „Kon sabi gi unsrefi san na a bun, yoisti èn volmaakti wani fu Gado.” Yu abi muiti fu bribi wan tu fu den sani di yu e leri? Efu dati de so, dan teki a rai fu Bijbel, èn ’kon sabi gi yusrefi’ taki den sani disi tru! Ondrosuku sani yusrefi. Leisi Bijbel nanga den buku di e taki fu Bijbel. Ma te wi e kisi sabi fu Gado, dan a no wani taki dati wi e gebroiki wi frustan soso fu kon sabi tru tori. Yu musu teki ten fu denki dipi fu den sani di yu e leisi, so taki den e kisi rutu na ini yu ati. Disi sa meki taki yu sa kisi moro lobi gi Gado.—Psalm 1:2, 3.
Wan tra sani di yu musu du, na fu fruteri trawan den sani di yu e leri, soleki den skoromati fu yu. Te yu e du dati kaba, dan yu musu teki prati now na a oso-fu-oso preikiwroko. Wanwan leisi yu kan miti wan skoromati te yu e preiki, èn a sani disi kan meki taki yu e syen na ini a bigin. Ma Bijbel e gi wi a deki-ati fu no „syen gi a bun nyunsu” (Romesma 1:16). Yu e tyari wan boskopu di kan gi sma howpu nanga libi! Fu san ede yu ben sa musu syen gi a boskopu dati?
We, efu yu papa nanga mama na Kresten, dan a kan de so taki yu e teki prati na a preikiwroko kaba, makandra nanga den. Ma yu man du moro leki fu tanapu nomo na den doro fu sma sondro fu taki wan sani? Noso yu e gi sma soso tijdschrift nanga traktaat? Yusrefi e taki nanga sma na ini na oso-fu-oso preikiwroko, èn yu e gebroiki Bijbel fu gi den sma disi leri? Efu dati no de so, dan suku yepi na yu papa nanga mama noso na wan lepi brada noso sisa na ini a gemeente. Aladi yu no dopu ete, toku yu kan suku fu tron wan preikiman fu a bun nyunsu!
Baka wan pisi ten, yu sa wani gi yusrefi abra na Gado, san wani taki dati yu sa pramisi Gado taki yu wani de wan futuboi fu en now (Romesma 12:1). Ma wi no musu gi wisrefi abra na Gado sondro fu meki trawan kon sabi fu dati. Gado wani taki ibriwan sma musu meki „dati bekènti na publiki fu kan kisi frulusu” (Romesma 10:10). Te a ten doro fu teki dopu, dan yu musu sori nanga den piki di yu e gi, taki yu wani tron wan futuboi fu Gado. Baka dati, yu e teki dopu na ini watra (Mateyus 28:19, 20). A no de fu taki, dati a teki di wan sma e teki dopu na wan seryusu sani. Ma no meki a frede di yu e frede kande taki sani no sa waka bun, tapu yu fu teki dopu. Te yu e poti yu frutrow tapu Gado taki en sa gi yu tranga, dan a sa gi yu „a krakti di bigi pasa marki” fu yepi yu fu tanapu kánkan.—2 Korentesma 4:7; 1 Petrus 5:10.
Yu e tron wan Kotoigi fu Yehovah te yu teki dopu (Yesaya 43:10). A sani disi e tyari wan bigi kenki kon na ini yu libi. Te yu gi yusrefi abra na Gado, dan dati wani taki dati yu ’no e teri yusrefi moro’ (Mateyus 16:24). Kande yu musu libi wan tu sani di yu wani du gi yusrefi, so taki yu kan ’suku fosi a kownukondre fu Gado’ (Mateyus 6:33). Yu sa man du dati na furu difrenti fasi, te yu e gi yusrefi abra na Gado èn te yu e teki dopu. Meki wi luku wan tu fu den fasi disi.
Difrenti fasi fa yu kan du furuten diniwroko gi Gado
● A pionierwroko na wan fu den fasi disi. Wan preikiman di e du pionierwroko, na wan dopu Kresten di de wan bun eksempre gi trawan. A preikiman disi e preiki a bun nyunsu 70 yuru ibri mun. Te yu abi wan moro bigi prati na a preikiwroko, dan dati sa yepi yu fu tron wan moro bun preikiman èn wan moro bun leriman. Furu pionier kisi prisiri fu di den yepi den Bijbelstudenti fu den fu tron dopu Kotoigi. Sortu grontapuwroko de di e gi so furu prisiri?
Furu pionier e du grontapuwroko wan tu dei na ini a wiki, fu man pai gi den sani di den abi fanowdu. Fu man du disi, dan furu fu den e bigin fosi fu leri wan wroko na skoro, noso fu a papa nanga a mama fu den. Efu yusrefi, makandra nanga yu papa nanga mama, feni taki a ben o de moro bun gi yu fu teki pikinso moro leri baka di yu klari a middelbaar skoro, dan yu musu luku bun taki yu no e du dati soso fu man meki furu moni bakaten. Na presi fu dati, a leri disi musu de fu yepi yu fu du a diniwroko fu yu moro bun, èn fu man dini kande leki wan dinari na ini a furuten diniwroko.
Ma a moro prenspari sani na ini a libi fu wan pionier a no a grontapuwroko fu en, ma a diniwroko fu en. A e du a diniwroko disi fu yepi trawan fu kisi libi! Fu san ede yu no e suku fu tron wan pionier? Furu tron, a pionierwroko e tyari moro grani kon. Fu gi wan eksempre, son pionier e froisi go tan na ini kontren pe moro Kownukondre preikiman de fanowdu. Tra pionier e leri wan tra tongo fu man dini na ini wan gemeente pe sma e taki wan tra tongo, noso den e go dini na wan tra kondre srefi. Iya, pionierwroko e gi prisiri trutru!
● A Skoro gi Kownukondre preikiman na wan tra fasi fa yu kan du diniwroko gi Yehovah. A skoro disi e hori tu mun langa. A de spesrutu gi pionier di abi furu ondrofeni èn di de klariklari fu gowe libi a kontren fu den fu dini na wan kontren pe moro yepi de fanowdu. Te yu luku en bun, dan den pionier disi e taki: „Dya mi de! Seni mi.” Na so den e sori taki den e denki leki Yesus Krestes, a moro bigi Preikiman di ben de na grontapu (Yesaya 6:8; Yohanes 7:29). Te wan pionier e froisi go na wan farawe presi, dan a musu fiti ensrefi na a fasi fa den sma drape e libi. A kulturu, a weer nanga a nyanyan kan de heri tra fasi leki san a gwenti. Kande a musu leri wan tra tongo srefi. A skoro disi e yepi brada nanga sisa di no trow èn trowpaar di de na mindri 23 te go miti 65 yari fu leri fa den musu tyari densrefi te den de na ini a kontren fu den èn san den kan du so taki Yehovah nanga en organisâsi kan gebroiki den moro bun.
● Betel diniwroko de gi sma di de klariklari fu dini na wan fu den bijkantoro fu Yehovah Kotoigi. Wan tu memre fu a Betelfamiri e meki buku nanga tra sani di e taki fu Bijbel. Fu man horibaka gi a wroko disi, dan tra memre fu a Betelfamiri e sorgu den gebow nanga den wrokosani di den e gebroiki, noso den e sorgu gi den memre fu a Betelfamiri. Ala den wroko disi na grani di sma e kisi fu du santa diniwroko gi Yehovah. Boiti dati, den sma na Betel e prisiri fu di den sabi taki iniwan wroko di den e du, e tyari wini kon gi ipi-ipi Kresten brada nanga sisa fu den na heri grontapu.
Son ten brada nanga sisa di abi koni fu du spesrutu wroko, e kisi kari fu dini na Betel. Ma furu fu den brada nanga sisa di e kon na Betel e kisi leri fu man du a wroko di den kisi fu du baka di den kon drape. Den sma na Betel no e dini fu kon gudu, ma den de tevrede nanga a nyanyan, a tanpresi, nanga a yepi di den e kisi fu tapu den kostu fu den. Wan yongu memre fu a Betelfamiri ben taki fu a diniwroko fu en: „Mi lobi en srefisrefi! A diniwroko disi no makriki, ma mi kisi furu blesi fu di mi e dini dyaso.”
● Bow-wroko: Wan tra sani di yonguwan kan du, na fu yepi bow bijkantoro nanga Kownukondre zaal. Den e kari den brada nanga sisa di e du a sortu bow-wroko disi, bow dinari. A wroko disi na wan santa diniwroko di wi kan agersi nanga a wroko fu den sma di ben bow a tempel fu Salomo (1 Kownu 8:13-18). Den seti di de fu sorgu den sma disi, na den srefi seti di de fu sorgu a Betelfamiri. Den brada nanga sisa disi trutru abi wan tumusi moi grani fu du a diniwroko disi di e gi Yehovah prèise!
Dini Yehovah nanga yu heri sili
A moro bun sani di yu kan du nanga yu libi, na fu dini Yehovah. Fu san ede yu no e prakseri fa yu man du furuten diniwroko gi Gado? Taki a tori disi nanga yu papa nanga mama, nanga den owruman ini yu gemeente èn nanga yu kringopziener. Efu yu wani go na Betel noso na a Skoro gi Kownukondre preikiman, dan yu kan go na den konmakandra di e hori gi sma di abi na okasi fu du disi. Den konmakandra disi e hori na den Dri Dei Kongres.
A no de fu taki, dati ala sma no man du furuten diniwroko. Son ten, sma no man du furu gi Yehovah fu di den e siki, fu di den abi moni problema, noso fu di den musu sorgu na osofamiri fu den. Awansi fa a no fa, ala Kresten di gi densrefi abra na Yehovah musu gi yesi na a komando di skrifi na ini Bijbel: „Yu musu lobi Yehovah, yu Gado, nanga yu heri ati èn nanga yu heri sili èn nanga yu heri frustan” (Mateyus 22:37). Yehovah wani taki yu e du ala san yu man du fu dini en. Sobun, awansi sortu situwâsi yu de na ini, meki a diniwroko fu Yehovah de a moro prenspari sani na ini yu libi. Suku fu dini Yehovah so bun leki yu man du dati. Iya, „memre yu Gran Mekiman na ini yu yongu yari” èn yu sa kisi blesi fu têgo fu di yu du dati!
Te a no taki tra fasi, dan ala den bijbeltekst teki fu a New World Translation of the Holy Scriptures.