Rebeka ben wani meki Yehovah prisiri

Rebeka ben de wan uma di ben lobi Yehovah. En masra ben nen Isak. Isak ben lobi Yehovah tu. Fa Rebeka ben kon leri sabi Isak? Fa Rebeka sori taki a ben wani meki Yehovah prisiri? Meki wi leri wan tu sani fosi fu Isak, a masra fu Rebeka.

Isak en papa ben nen Abraham èn en mama ben nen Sara. Den ben libi na ini a kondre Kanan. Den sma drape no ben e dini Yehovah. Ma Abraham ben wani taki Isak trow nanga wan uma di ben e dini Yehovah. Dati meki Abraham seni Eliyeser, wan wrokoman fu en, fu go suku wan frow gi Isak. A ben musu go suku en na a presi di nen Haran, pe wan tu famiri fu Abraham ben e libi.

Eliyeser ben go nanga tra wrokoman fu Abraham. Den ben musu waka bun fara. Den ben go nanga tin kameili di ben e tyari nyanyan nanga kado. Fa Eliyeser ben o sabi sortu frow a ben musu teki gi Isak? Di Eliyeser nanga den tra wrokoman doro Haran, dan den stop na wan watrapeti. Den du dati fu di Eliyeser ben sabi taki den umasma ben o kon teki watra drape. Eliyeser ben begi Yehovah: ’Efu mi aksi wan yongu uma fu gi mi watra, ma a gi mi nanga den kameili fu mi watra, dan mi o sabi taki yu wani dati na en musu trow nanga Isak.’

Ne a yongu uma Rebeka kon na a watrapeti. Bijbel e taki dati a ben moi srefisrefi. Eliyeser aksi en watra fu dringi èn Rebeka taigi en: ’Mi o gi yu watra èn mi o go teki watra gi den kameili fu yu tu.’ Yu sabi san dati wani taki? Te watra e kiri wan kameili, dan a e dringi bun furu watra. Dati meki Rebeka ben musu lon go teki watra ibri tron baka. Yu e si tapu a prenki fa Rebeka e wroko tranga?​— Eliyeser no ben man bribi taki na so Yehovah ben piki a begi fu en.

Eliyeser gi Rebeka furu moi kado. Rebeka aksi Eliyeser nanga den tra wrokoman fu Abraham fu kon na en papa oso. Eliyeser fruteri den famiriman fu Rebeka fu san ede Abraham seni en kon èn fa Yehovah piki a begi fu en. A famiri fu Rebeka ben breiti fu meki a trow nanga Isak.

Ma yu denki taki Rebeka ben wani trow nanga Isak?​— Rebeka ben sabi taki na Yehovah ben seni Eliyeser kon. Dati meki di a famiri fu Rebeka aksi en efu a ben wani go na Kanan fu trow nanga Isak, dan a taki: ’Iya, mi wani go.’ Dan a gowe nanga Eliyeser. Di den doro Kanan, a trow nanga Isak.

Rebeka ben du san Yehovah wani. Dati meki Yehovah blesi en. Furu yari baka dati Yesus gebore èn Rebeka ben de wan fu den afo fu Yesus! Efu yu de leki Rebeka èn yu e meki Yehovah prisiri, dan a o blesi yu tu.