Den ben doe a wani foe Jehovah

Feni wan wefi gi Isak

NA OWROE MAN di ben e sidon na a peti ben weri srefisrefi. En nanga den foetoeboi foe en makandra nanga den tin kameili foe den ben teki waka go a heri pasi foe a birti foe Berseiba te na a noordsei foe Mesopotamia — a pasi langa pikinmoro 800 kilometer.a Now di den ben doro a presi pe den ben moesoe de, a man disi di ben teki waka, ben weri èn ben stòp foe prakseri foe a moeilek wroko di a ben moesoe doe. Soema ben de a man disi, èn foe san ede a ben teki a moeilek waka disi?

A man ben de a foetoeboi foe Abraham, „a moro owroewan foe en osofamiri” (Genesis 24:2). Ala di den no e kari en nen na ini a tori, soleki fa a sori, disi ben de Eli-eser, di Abraham ben kari wan leisi ’wan manpikin foe en osofamiri’ èn di a ben taki foe en leki ’a sma di ben sa de na en baka leki erfgenaam’ (Genesis 15:2, 3). A no de foe taki, dati ben de so di Abraham nanga Sara no ben abi pikin. Now a manpikin foe den, Isak, ben abi 40 jari, èn ala di Eli-eser no ben de a fosi erfgenaam foe Abraham moro, tokoe a ben de en foetoeboi ete. Foe dati ede, a ben gi jesi di Abraham ben aksi en a moeilek sani disi. San ben de a sani?

Wan moeilek wroko

Na ini den dei foe Abraham wan trow no ben abi krakti na tapoe a famiri wawan, ma so srefi na tapoe a heri lo, noso a heri libimakandra foe a famiri-edeman. Foe dati ede a ben de wan gwenti taki den papa nanga mama e teki wan trowpatna gi den pikin foe den. Ma Abraham ben abi wan problema foe soekoe wan wefi gi en manpikin Isak. Den godelowsoefasi foe den Kanansma di ben libi drape, ben meki taki a no ben wani foe a trow nanga wan foe den srefisrefi (Deuteronomium 18:9-12). Èn ala di a ben de wan gwenti taki wan man e trow nanga wan sma foe en eigi lo, den famiri foe Abraham ben libi hondrohondro kilometer moro fara na a noordsei foe Mesopotamia. A no ben kan meki Isak go tan drape, bika Jehovah ben pramisi: „Mi sa gi joe siri a kondre disi”, a kondre Kanan (Genesis 24:7). Foe dati ede Abraham ben taigi Eli-eser: „Go na mi kondre èn na den famiri foe mi, èn joe sa moesoe teki wan wefi gi mi manpikin, gi Isak.” — Genesis 24:4.

Di Eli-eser ben klari a langa waka di a ben teki, a ben rostoe na a peti èn a ben prakseri dipi foe a wroko foe en. A ben froestan taki heri esi den oema ben sa kon na a peti foe go hari watra gi teneti. So boen a ben begi Jehovah tranga: „A jongoe oema di mi sa taigi: ’Grantangi, saka joe watrakan, so taki mi kan dringi pikinso’, èn di sa taki troetroe: ’Dringi pikinso, èn mi sa gi joe kameili watra toe’, dan na en na a wan di joe moesoe teki gi joe foetoeboi, gi Isak; èn meki mi sabi nanga disi taki joe sori loyaal lobi gi mi masra.” — Genesis 24:14.

Ala di a ben e begi ete, wan moi jongoe oema di ben nen Rebeka ben doro. „Grantangi gi mi wan mofo watra foe joe watrakan”, Eli-eser ben taigi en. Rebeka ben doe dati, èn dan a ben taki: „So srefi gi den kameili foe joe mi sa kisi watra te leki den kaba dringi.” Disi ben de wan bigi sani di a ben pristeri en, foe di wan kameili di watra e kiri en, kan dringi 95 liter watra na ini soso tin miniti! Awansi watra ben kiri den kameili foe Eli-eser ofoe no, Rebeka ben moesoe sabi taki a wroko di a ben pristeri foe doe, ben sa tranga. Ija, „esi-esi [a] ben leigi en watrakan na ini a dringibaki èn ibri tron a ben waka go baka na a peti foe kisi watra, èn a ben tan kisi watra gi ala den kameili foe en”. — Genesis 24:15-20.

Foe di Eli-eser ben firi taki Jehovah ben tiri sani, a ben gi Rebeka wan gowtoe nosolinga nanga toe gowtoe boei, di abi a waarde foe 1400 Amerkan dala na ini a ten disi. Di Rebeka ben taigi en taki a ben de a granpikin foe Nahor, a brada foe Abraham, Eli-eser ben begi foe taigi Gado tangi. „Jehovah tjari mi go na a oso foe den brada foe mi masra”, a ben taki (Genesis 24:22-27). A ben tjari Eli-eser go na a famiri foe Rebeka. Baka ten, Rebeka ben kon tron a wefi foe Isak, èn a ben abi a grani foe tron wan afo foe a Mesias, Jesus.

Lès gi wi

Jehovah ben blesi a moeiti di Eli-eser ben doe na ini begi foe feni wan trowpatna di abi frede gi Gado, gi Isak. Ma hori na prakseri taki a trow foe Isak ben abi langalanga foe doe nanga a pramisi foe Gado foe meki wan siri nanga jepi foe Abraham. So boen, a tori disi no moesoe meki wi denki taki ibri sma di e begi gi wan trowpatna, sa kisi dati na wan wondroe fasi. Ma tokoe, te wi e hori wisrefi na den gronprakseri foe Jehovah, a sa gi wi a krakti foe horidoro na ondro den tjalensi di e kon nanga ibriwan foe den situwâsi disi na ini a libi — trow noso a tan di wan sma e tan en wawan. — 1 Korentesma 7:8, 9, 28; teki gersi Filipisma 4:11-13.

Eli-eser ben moesoe doe foeroe moeiti foe doe sani na a fasi fa Jehovah wani. Wi srefi kan feni taki a no makriki ala ten foe fiti wisrefi na den markitiki foe Jehovah. Foe eksempre, a kan de wan moeilek sani foe feni wroko di no e hendri theokrasia aktiviteit, wan trowpatna di abi frede gi Gado, kompe di e bow wi, prisiri-ten di no pori (Mateus 6:33; 1 Korentesma 7:39; 15:33; Efeisesma 4:17-19). Ma tokoe Jehovah kan horibaka gi den wan di e weigri foe skeki nanga bijbel gronprakseri. Bijbel e pramisi: „Froetrow tapoe Jehovah nanga joe heri ati èn no froetrow tapoe joe eigi froestan. Poti prakseri na tapoe en na ini ala joe pasi, èn ensrefi sa meki joe pasi kon reti. — Odo 3:5, 6.

[Foetoewortoe]