Now a de na vaste tem foe bari odi gi na universele Soeverein
1, 2. Na fesi foe soema dem e tjari na glori „Soemapikin” go leki fa Daniël kapitel seebi e taki en san a de kisi?
NA UNIVERSELE SOEVEREIN de na „Owroewan foe dee”, Jehovah. Hem de na wan pe na glori „Soemapikin”, Jezus Kristus, ini 1914 foe wi teri ben go foe kisi wan prati ini na „koonoekondre foe grontapoe”.
2 Na profeeti Daniël ben taki disi na fesi nanga dem woortoe: „Loekoe! nanga dem wolkoe foe hemel wan soema di ben gersi wan soemapikin ben kon; en a ben kisi pasi go na a Owroewan foe dee, en dem ben tjari hem krosibee foe hem, ja fesi Disi. En na hem dem ben gi rigerimakti nanga waartifasi nanga wan koonoekondre, dati dem pipel, nationaal groepoe nanga tongo ala ben sa dini hem. Hem rigerimakti de wan rigerimakti foe tem di no habi marki, di no sa pasa, en hem koonoekondre, wan di no sa broko kon tron noti.” — Dan. 7:13, 14.
3. Soema leki fa Daniël 7:27 taki e teki poti ini na koonoekondre dati?
3 Bakatem, ini na tem disi foe „na kaba” 144000 discipel foe Kristus di gebore njoen nanga geest ben teki poti ini na Koonoekondre dati, soleki ben taki na fesi ooktoe ini Daniël 7:27: „Na koonoekondre nanga na rigerimakti nanga na bigi foe na koonoekondre ondro na heri hemel ben gi na a pipel foe dem santawan foe na Moro Heewan. Na koonoekondre foe dem de wan koonoekondre di no habi marki, en ala rigerimakti sa dini en gi jesi na dem.” — Dan. 12:4; Openb. 14:1-3; 20:4, 6.
4. Foe soortoe hemel rigeri dem memre foe na „bigi ipi” de now borgoe?
4 Foedi na Owroewan foe dee de teki hem Salfoe Manpikin makandra nanga hem ini „na koonoekondre foe grontapoe”, disi de tron „na koonoekondre foe wi Masra nanga foe hem Kristus” (Openb. 11:15). Na so fasi dem memre foe na heri libisoema-famiri de tron grontapoe, libisoema borgoe foe na universele Soeverein Jehovah en foe hem Kristus. Ini dem borgoe disi, de toe dem memre foe na „bigi ipi”, di wi e kisi foe si ini na visioen ini Openbaring 7:9-17. Na visioen disi pas ini 1935 wi ben verstan hem.
5. Na soortoe sani dem discipel foe Jezus di ben gebore njoen nanga geest ben moe loekoe foe kon 63 jari baka Pinksteren, akroederi nanga na tranga di dem ben kisi ini Openbaring 3:21?
5 Na „bigi ipi” e verstan now heri boen, dati toe prenspari soema de ini na „koonoekondre foe wi Masra en foe hem Kristus”, en dati de na Masra Jehovah en hem Manpikin, Kristus Jezus; ooktoe dati na spesroetoe rigeri disi di dem moe saka demsrefi na hem ondro, no bigin foe sensi Pinksteren ini na jari 33 foe wi teri, ma foe sensi 1914 foe wi teri. Akroederi nanga disi „na bigi ipi” e si dati Kristus Jezus ben gi tranga na hem discipel di ben gebore njoen nanga geest 63 jari baka Pinksteren ete foe loekoe na a kon foe na koonoekondre dati nanga dem woortoe: „Soema wini, hem mi sa gi foe teki presi nanga mi tapoe mi troon, soleki mi ben wini en ben teki presi nanga mi Tata tapoe hem troon” (Openb. 3:21). Dem ben moesoe kisi ete na koonoekondre dati di ben moe kon, leki „erfgenaam foe Gado, ma medeërfgenaam foe Kristus” (Rom. 8:17). Jezus Kristus de na moro prenspari Erfgenaam foe Gado, en hem discipel de dem erfgenaam na ondro hem. — Hebr. 1:1, 2.
6. Akroederi nanga 1 Petrus 1:10, 11 dem discipel di gebore njoen nanga geest ben de kaba ofoe ben moe go ete ini na koonoekondre dati?
6 Na koonoekondre, di dem discipel di ben gebore njoen nanga geest ben de „medeërfgenaam nanga Kristus”, no de wan sani di sensi na iti trowe foe santa jeje tapoe Pinksteren ini na jari 33 foe wi teri dem ben teki poti na ini. Foe datede na apostel Petrus, di ben skrifi hem tweede brifi so wan 64 foe wi teri ofoe 30 jari baka Pinksteren gi hem kompe-kristen na tranga di e kon: „Efoe oen de tan doe dem sani disi oen no sa fadon nooiti. Efoe wi taki reti oen sa go heri boen ini na teego koonoekondre foe wi Masra nanga Jepiman Jezus Kristus.” — 2 Petr. 1:10, 11.
7. Nanga jepi foe san dem sa kisi pasi foe go ini na koonoekondre en soortoe matifasi di dem ben habi nanga Jezus foe wan pisi tem, no sa de moro?
7 Tapoe na vaste tem foe Gado dem 144000 medeërfgenaam foe Kristus sa kisi pasi boen foe go ini na hemel koonoekondre nanga jepi foe na „fosi opobaka”. Dem no sa de moro langa dem grontapoe borgoe di gebore njoen nanga jeje ondro na „Manpikin foe (Gado) lobi”. Na matifasi dati foe wan pisi tem nanga na glori Jezus Kristus sa gwe foe teego. Makandra nanga hem dem sa de hemel koonoe, di no kan dede ofoe pori moro (2 Tim. 2:11, 12; Openb. 20:4, 6). Disi wani taki, dati na kondisi pe dem ben moe saka demsrefi foe wan pisi tem ini na jari 33 foe wi teri nanga aladi dem ben de ete na grontapoe ini skin, en di ben de foe dem, sa gwe foe alatem (Kol. 1:13). Foedi dem ben libi tapoe grontapoe wan krin en getrow libi, dem de kisi „na koonoekondre foe na Kristus nanga foe Gado”. — Ef. 5:5.
8. Na doesoen-jari rigeri foe Kristus ben bigin ini 1914, en san na „marki” di ben taki na fesi e sori?
8 Na 1000-jari rigeri foe Jezus Kristus nanga hem 144000 mede-erfgenaam no ben begin na 1914 nanga na opo foe na „koonoekondre foe grontapoe . . . na koonoekondre foe wi Masra nanga foe hem Kristus”. Ma san ben bigin wel gi Jezus kristus, ben de hem officiële „de noja” leki koonoe ofoe parousia, di dem apostel foe hem ben aksi foe hem leki fa Matteus 24:3 e taki. Hem „de noja” ini Koonoekondre-makti no ben bigin di Gado ben gebroiki hem tapoe Pinksteren ini na jari 33 foe wi teri foe iti trowe santa jeje (2 Thess. 2:2). Pas baka di dem tem foe dem heiden ini 1914 ben kon na wan kaba, na „marki” di ben taki na fesi ben de foe si, san ben de leki wan bewijsi dati na Manpikin foe Gado ben de noja, sondro foe ben si nanga ai, ini Koonoekondre-makti, ini na „koonoekondre foe grontapoe”.
9. San ben sa de krosibee te dem discipel ben sa si na „marki” en foe sainde dem no ben moe lasi ati?
9 Na Koonoekondre disi kisi na wroko foe pori na ogri seti foe sani foe now. Di Jezus ben kari ini na profeeti-tori foe hem dem sani di ben sa de na prenspari „marki”, a ben sori na a koonoekondre te a ben de tapoe na punt foe doe na poriwroko disi en a ben taki gi hem apostel: „So toe, te oen si dem sani pasa, sabi dan dati na koonoekondre foe Gado de krosibee kaba” (Luk. 21:31). Foe doe na wroko di a habi foe doe, na koonoekondre disi sa fri dem getrouw discipel foe Kristus di de ete na grontapoe foe moro kwinsi foe dem heiden naatsi. Disi e meki wi verstan foe sainde Jesus ben taki gi hem discipel: „Te ala dem sani disi de bigin foe pasa now, opo tanapoe letopoe en opo joe ede go na loktoe, bikasi na fri foe joe de krosibee.” — Luk. 21:28.
10. Otem na „fri” de kon foe na fikapisi di gebore njoen nanga geest en san na „fri” foe dem wani taki?
10 Na fika-pisi foe dem discipel foe Kristus di, ben gebore njoen nanga geest ben si fa „dem sani disi” ben bigin foe pasa ini 1914. Na fri foe dem foe na ogri seti foe sani foe now de kon te na koonoe „ston”, di e koti poeroe foe na bergi foe Gado soevereiniteit, de naki na „popki” foe grontapoe politiek rigerimakti tapoe grontapoe en pori hem ini na „feti foe na bigi dee foe Gado na Almakti wan” ini Harmageddon (Dan. 2:44, 45; Openb. 16:14, 16). Na „fri” foe dem wani taki toe, dati bakatem dem de teki dem poeroe foe grontapoe en nanga jepi foe na „fosi opobaka” dem de tjari dem go ini na „teego koonoekondre foe wi Masra nanga Jepiman Jezus Kristus” (2 Petr. 1:11; Openb. 20:4, 6). Na so fasi dem sa kan rigeri makandra nanga Jezus leki koonoe ini dem doesoen jari — te Satan nanga dem ogri jeje foe hem sa tai en sroto ini na peti di no habi gron, san sa meki dati dem no kan tiri libisoema afersi moro langa sondro joe kan si dem. — Openb. 20:1-3.
11. Soema moro sa kisi „fri”, ma foe di dem no loekoe soortoe „wet” dem heiden naatsi no sa habi wan prati ini na „fri” dati?
11 Fri e kon toe krosibee gi na „bigi ipi” soema di gersi skapoe, di now e teki na see foe „na koonoekondre foe wi Masra nanga foe hem Kristus” makandra nanga na fika-pisi di ben gebore njoen nanga geest. Dem heiden naatsi no ben teki na ati na koonoekondre „wet” di dem ben kisi foe jere, soleki e kon na krin ini Psalm 2:1-9: „Foe sainde dem naatsi de ini sekseki (sensi 1914) en dem nationaal groepoe tan taki foe wan sososani? Dem koonoe foe grontapoe opo dem ede en dem heeman poti demsrefi leki wan man foe go feti nanga Jehovah nanga hem Salfoewan (hem Kristus) . . . Meki mi verteri foe na wet foe Jehovah: a ben taki gi mi (Kristus): Joe de mi Manpikin; tide mi ben tron joe papa. Aksi foe mi, foe mi gi joe naatsi leki joe goedoe en dem oekoe foe grontapoe leki joe eegi goedoe. Joe sa broko dem nanga wan isri koonoe-tiki, leki dem ben de stonpatoe, joe sa naki dem broko pisi pisi.’” — Openb. 7:9, 10; 11:15.
NEUTRALITEIT DE GO MAKANDRA NANGA KOONOEKONDREPREEKI
12. Soortoe see Jehovah Kotoigi e teki, winsi dem tem foe dem heiden kon na wan kaba ini 1914, tapoe grontapoe politiek?
12 Sensi 1914 na „koonoekondre foe wi Masra nanga foe hem Kristus” ben kisi na reti foe loekoe fa sani de ini dem naatsi. Disi wani taki dati Jehovah kristen kotoigi habi na reti foe moksi demsrefi ini grontapoe politiek? Dem kan teki, leki dem loomsoe nanga anitri, partij gi wan ofoe tra politiek partij, ofoe srefi foe meki mofo tegen na rigeri di de ofoe gi faja foe bigin nanga revolutie? Nono! Sondro foe boigi dem de waka baka na eksempel foe na Lam, Jezus Kristus, foe „no de wan pisi foe grontapoe”. Dem e tan getrouw na a koonoekondre di ben gebore ini 1914 ini hemel (Joh. 17:14, 16; Openb. 12:1-12). Aladi dem de tanapoe na fesi tranga vervolgoe foedi dem de hori dem neutraliteit ini grontapoe trobi, dem de doe na profeeti woortoe foe dem Tiriman ini hemel, Jezus Kristus, di a ben taki: „Na boen njoensoe disi foe na koonoekondre sa preeki tapoe na heri grontapoe pe soema e libi leki wan kotoigi gi ala naatsi en dan na kaba sa kon”. — Matt. 24:14; Mark. 13:10.
13. Foe sainde na kaba foe dem tem foe dem heiden nanga na bigin foe Kristus doesoen-jari rigeri no ben de na wan tem?
13 Na koonoekondre-kotoigi disi moe gi bifo na seti foe sani disi kon na wan kaba en Kristus doesoen-jari rigeri bigin. Na geboortoe foe Gado koonoekondre ini hemel ini 1914 no ben wani taki na bigin foe Kristus doesoen-jari rigeri. Akroederi nanga dem bijbel profeeti-tori dan foeroe sani moe pasa bifo na seti foe sani disi kon na wan kaba en na pasi opo gi Kristus doesoen-jari rigeri nanga dem 144000 discipel di gebore njoen nanga geest. — Openb. 20:4, 6.
14. San Satan habi leki na vaste bosroiti foe doe nanga dem naatsi bifo dem iti hem ini na peti di no habi gron? en foe sainde?
14 Satan Didibri habi na vaste bosroiti foe meki ala naatsi go ini pori, bifo hem nanga hem ogri jeje bifo na doesoen-jari iti go ini na peti di no habi gron, en sorgoe na so wan fasi dati ini na 1000 jari foe Kristus rigeri dem naatsi no kan de borgoe foe hem. Nanga dati na prakseri a de tjari ala grontapoe naatsi go na a slagtigron na Har-mágeddon foe seti drape nanga Jehovah Gado nanga hem Kristus (Openb. 16:13-16). Satan Didibri sa de frantwoortoe foe na „teego heloe” di sa miti dem heiden naatsi drape (Openb. 12:12; 19:11-21). Fa wi kan komoto foe na ongolokoe pori makandra nanga dem naatsi?
15. San Jehovah kotoigi ben ondrofeni foedi dem de weegri foe waka makandra nanga dem naatsi di de ondro Satan en foe sainde?
15 Wi moe weegri foe waka makandra nanga dem heiden naatsi leki mati foe dem ini na stree-waka foe dem foe go feti nanga Jehovah Gado na Almaktiwan ini Harmageddon. Na weegri disi ben tjari bigi moeilijkheid gi Jehovah kristen kotoigi. Spesroetoe sensi na tem di Satan Didibri nanga hem ogri jeje ben iti poeroe foe hemel, na fika-pisi foe dem medeërfgenaam foe Kristus foe a tem di e kon, ben tron na prenspari marki foe Satan Didibri di de nanga bigi atibron (Openb. 12:13-17). A poti ini hem prakseri foe broko dem getrouwfasi na Gado. Na so fasi a ben sa meki dem no de boen moro foe rigeri leki koonoe ini dem doesoen jari te ala ogri jeje sa sroto ini na peti di no habi gron. Satan habi na vaste bosroiti foe meki dati Kristus no sa habi ini na hemel grontapoe-rigeri ala 144000 kompe-koonoe. Satan sa man foe doe dati? Nooiti!
16. Fa wan doesoen-jari rigeri sondro ogri jeje sa bigin en leki wan sori foe san Gado grontapoe-rigeri ini anoe foe Kristus sa doe rigeriwroko?
16 Net soleki wan woron ini doti no man foe tapoe wan tractor di wani rij tapoe hem, na so Satan nanga ala grontapoe naatsi di a de dem Tiriman di dem no de si, no sa man foe tapoe Gado grontapoe-rigeri di e kon! Boiti na lasi di Satan ben kisi fosi kaba ini hemel, a sa si a lasi ini Harmageddon foe hem naatsi di a ben kori. A sa si Kristus gebroiki hem „isri koonoe-tiki” sondro wan soema kan tapoe hem en a sa naki broko ala naatsi pisi pisi leki dem de stonpatoe (Ps. 2:8, 9; Openb. 12:5). Na Victori Kristus sa graboe Satan nanga hem ogri jeje en nanga boei a sa iti dem go ini na doengroe-oso peti di no habi gron, di sa tapoe steevi 1000 jari langa. Ini na doesoen jari dati pe ogri jeje no sa de, dan Gado grontapoe-rigeri ini anoe foe Kristus sa de leki wan sori foe hem reti universele soevereiniteit foe doe rigeriwroko. — Openb. 20:1-6.
BARI ODI GI „NA GLORI KOONOE”!
17. San wi moe doe now leki wan bewijsi foe wi bribi ini na sekerfasi foe na grontapoe-rigeri di e kon, en te wi e teki na eksempel foe soema?
17 Wan Gado grontapoe-rigeri foe tjari verlekti nanga blesi gi na libisoema-famiri di e kisi kwinsi en di e dede, de seker. Wi de bribi dati? Wi bribi ini na prisiri sani disi, e aksi dati wi doe wan sani now! San? Dati wi doe leki dem doopoe „bigi ipi” di gi demsrefi abra na Gado en di twenti jari baka na geboortoe foe Gado Koonoekondre ini 1914 ben bigin foe kon makandra. Dem e prisiri foe „na koonoekondre foe wi Masra nanga foe hem Kristus” leki na wan enkri hoopoe tapoe teego fri! Akroederi nanga na profeeti visioen di ben gi ini Openbaring 7:9-17, dem memre foe na „bigi ipi” e krin dem libi en dem e dini Jehovah Gado now ini hem jeje tempel! Efoe wi e waka na pasi disi, dan disi sa de wan djaranti gi wi dati ini na „feti foe na bigi dee foe Gado na Almaktiwan” ini Har-mágeddon, wi sa de na a wini see (Openb. 16:14, 16; 19:11-21). Na wi fesi na pasi sa opo dan foe go na a Paradijs na grontapoe ondro na moro boen rigeri di libisoema ooiti ben sa habi. Na lostoe foe wi foe kisi san moro boen, e gi wi tranga foe sreka wisrefi now tapoe na kon foe hem!
18. San na Soeverein Masra Gado e tjari nanga hem, en san wi moe erken leki wan sani di de foe hem?
18 Loekoe now nanga ai foe bribi na a wini-waka foe na Soeverein Masra foe ala sani di meki. A de meki grontapoe-rigeri ini anoe foe Kristus kon de leki blesi foe ala famiri na grontapoe, dem libiwan nanga dem dedewan. Meki wi teki hem reti soevereiniteit en taki nanga dem woortoe foe Psalm 24:1, 2: „Na grontapoe na foe Jehovah nanga dem sani di foeroe hem, na kondre di e gi froktoe nanga dem wan di e libi na tapoe. Bikasi tapoe dem se hemsrefi ben poti hem fundamenti en tapoe dem liba a de hori hem steevi.” Ai, nooiti dem ondrogron watra sa kon na tapoe foe soengoe na grontapoe, aladi di Jehovah ben poti skotoe gi dem seebi grontapoe se.
19, 20. Nanga soortoe okasi, leki fa Psalm 24 e sori wan akroederi de mindri na situatie foe dem borgoe foe Jeruzalem ini owroetem nanga di foe wi?
19 Wi habi reden now, foe de leki dem soema foe na owroe Jeruzalem ini na jari 1070 bifo wi teri. Koonoe David ben meki dem leviet priester tjari na a tem dati na ark foe na verbontoe go na a foto-doro. Di na prisiri foto ben si na optocht e kon, pe dem ben tjari na gersi sani dati Gado ben de noja, dem ben jere na babari:
20 „Opo oen ede, o oen doro en oen opo go na tapoe, o oen owroe doro, foe na glori Koonoe kan go na inisee!”
21. (a) Foe sainde dem ben taki gi dem doro nanga dem owroe doro dati dem moe opo demsrefi go na tapoe? (b) Foe sainde a ben fiti foe meki bekenti na a tem dati dati Jehovah „ben bigi ini feti”?
21 Foe na nem foe na Koonoe moe bari na alape, dem waktiman na dem doro e piki: „Soema de dan na glori Koonoe dati?” Sondro drai drai nanga sondro sjen na piki foe dem priester e kon: „Jehovah, tranga en bigi, Jehovah, bigi ini feti” (Ps. 24:7, 8). Ai, a no de wan gewoon soema di wani go ini na koonoe foto. A de na moro hee soema foe na heri universum, Jehovah, „na glori Koonoe”. Foe datede a ben gersi dati dem doro nanga dem owroe doro ben de toemsi lagi. Foe datede dem moe opo demsrefi go na tapoe foe so wan hee koonoe waka pasa. A ben moro hee leki koonoe David, di ben sidon tapoe „Jehovah troon” ini Jeruzalem (1 Kron. 29:23). A kan de dati ini boen owroe tem tra koonoe ben waka pasa dem doro foe na foto, ma no wan soema ben de so glori ofoe so makti leki Jehovah Gado. A ben de troe troe na soema di ben feti en di ben gi koonoe David na wini tapoe dem fositem heiden soema di ben libi ini na foto, dem Jebusiet soema. A ben de ooktoe na soema di ben gi koonoe David na wini tapoe dem Filistijn soema, di ben proberi te toe tron foe poeroe David ini na foto Jeruzalem di a ben wini pas pas. — 2 Sam. 5:4-25.
22. San ben agersi „Jehovah foe dem legre” na a tem dati, en nanga soortoe prakseri a ben kon moro krosibee foe dem doro foe Jeruzalem?
22 A ben de nanga vreede prakseri dati na Fetiman-Koonoe, di na ark foe na verbontoe ben de wan agersi fasi foe hem, ben kon krosibee foe na foto ini 1070 bifo wi teri. Foe na respeki foe na hee di a hee dem e bari baka na mindri na optocht di e kon moro krosbee: „Opo oen ede, o oen doro; ja opo dem go na tapoe, o oen owroe doro, foe na glori Koonoe kan kon na inisee!” Baka dem de aksi: „Soema hem de dan, na glori Koonoe dati?” Dan na korostoe piki e kon: „Jehovah foe dem legre — hem de na glori Koonoe.” — Ps. 24:7-10.
23. (a) Foe sainde Jehovah foe dem legre sensi 1914 spesroetoe de „na glori Koonoe”? (b) San a sa hori hee ini Har-mageddon, en san a sa doe baka dati gi na libisoema-famiri?
23 Now, ini disi jari 1978 „na Feti foe na bigi dee foe Gado na Almaktiwan” ini Harmageddon de kon krosibee. Now, di na kaba foe dem tem foe den heiden de boen langa kaba na wi baka, „Jehovah foe dem legre” de moro spesroetoe „na glori Koonoe”. Foe sainde? Foedi, soleki ben taki na fesi ini Psalm 47:8, „Gado . . . ben tron Koonoe tapoe dem naatsi”, san e meki a de doe sani baka gi na grontapoe foe wi leki na Soeverein foe na universum. A sa sori hem makti foe hori „na koonoekondre foe grontapoe . . . na koonoekondre foe wi Masra nanga foe hem Kristus” hee (Openb. 11:15-18). Na Kristus foe Jehovah, na Manpikin di bigi moro koonoe David, hem poti tapoe na troon foe teki presi gi hem ini na grontapoe-rigeri. Fosi Jehovah foe dem legre nanga jepi foe hem Manpikin Jezus Kristus nanga dem legre foe hemel engel, sa soifri na universum foe na seti foe sani foe now. Baka dati a sa blesi na libisoema-famiri nanga wan regvaardiki grontapoe-rigeri nanga jepi foe hem Manpikin, Jezus Kristus. Na bigi verwakti disi foe dem sani disi di moe kon heri esi sa kon troe.
24. San na Jehovah foe dem legre disi de verdini now foe wi?
24 Na „glori Koonoe” disi, Jehovah foe dem legre, no e verdini now foe wi wan lobi switi-kon? Foe troe! Kon dan, o glori Koonoe!