Na nem foe Gado moesoe de santa
„Wi tata na ini hemel, joe nem moesoe de santa”. — Matth. 6:9.
1. Foe san wi sa begi leki na moro prinspari sani?
ALLA soema die e taki dati hem de wan christen leesi of jere na begi die Jezus gi leki wan eksempel die dem disipel aksi hem taki: „Masra, leri wi fa foe begi”. Leki na moro prinspari punt Jezus ben taki: „Tata, joe nem moesoe de santa”. — Lukas 11:1, 2.
2. Foe soortoe sani na nem foe Gado e tanapoe?
2 Foe alla nem na ini na universum, na nem foe na tata, Jehovah, pasa alla trawan na ini mooi, waarti fasi nanga bekenti foe boen wroko. No wawan dati hem de na Meki-man, na almakti wan nanga wan koni sondro kaba, wan die e kroetoe nanga volmaakti reti, na moro ete so na lobihati boenfasi nanga sarihatti fasi foe hem e meki dati hem nem de waarti foe kisi na moro bigi grani nanga prijze, ja lespeki. Die Mozes ben aksi foe si na glori foe Gado, dem ben tiri hem foe go na ini na bergi Sinaï en „Jehovah saka kom na ondro na ini wan wolkoe en go tanapoe nanga hem dape en bari na nem foe Jehovah. En Jehovah pasa na hem fesi en a bari taki: ’Jehovah, Jehovah, wan Gado foe sarihatti fasi nanga boenfasi, die no e hattibron hesi en die foeroe te a pasa marki na ini lobi-boenhatti fasi en waarheid die e kibri lobi-boenhatti fasi gi doesoend doesoend, die e gi pardon foe na lasi foe na reti pasi en na pasa foe wet en zondoe, ma a no sa gi fri foe strafoe kwitkwiti, foe die a de tjari na strafoe foe na zondoe foe papa tapoe dem manpikien en tapoe dem bakapikien, tapoe na di foe dri geslacht en tapoe na di foe fo geslacht.’” — Ex. 33:18-23; 34:4-7.
3. San na dem moro prinspari egi fasi foe Jehovah en foe sainde ai taki dati a no sa gi pardon foe wi strafoe?
3 Ai sori djaso dati na lobi en sarihati fasi foe Jehovah na dem moro prinspari egi fasi foe hem. Ma na Moro Hee Wan no sa meki na wan die e doe hogri draai pori hem sarihati fasi leki wan ekskuus foe wan jajo libi. Efoe so dan hem no ben sa man foe tiri na universum foe na tan boen foe dem di wani doe san boen. Wan foe dem apostel foe Christus e sori foe son soema taki: „En di dem no ben ke foe kom sabi Gado, foe dati hede Gado libi dem abra na ini wan verkeerti jeje toestand foe doe dem sani di no fiti, dem foeroe nanga ala soortoe ongeregtigheid” (Rom. 1:28, 29), Dem fasi foe libi, nanga dem afkodrei nanga jajo libi ben moesoe foe habi wan baka pisi tapoe dem baka pikien foe dem (Rom. 1:21-23). Ma srefi dem pikien disi kan kisi na sarihati fasi foe Gado efoe dem sa draai go na Hem foe jepi. — Ezechiel 18:21, 22.
NA DOEL FOE WI LIBI
4. San wi, leki getoigi foe Jehovah moesoe meki wi troe troe goedoe nanga na sani foe meki-bigi?
4 Dati meki gi wi Jehovah e skrivi san wi moesoe meki wi troetroe goedoe. A taki: „No meki na koni-wan skepi foe hem koni ede en no meki na wan nanga makti skepi foe hem makti. No meki na goedoe-man skepi foe hem srefi foe hem goedoe ede. Ma meki na wan die e skepi foe hem srefi doe disi foe na sani disi, na habi foe na koni foe si sani na fesi nanga na habi foe sabi foe mi, dati mi na Jehovah, na wan die e sori lobi-boenhati fasi, reti en retidoe fasi na grontapoe; bikasi na ini dem sani disi mi habi prisiri”. — Jer. 9:23, 24.
5. Fa Jezus ben hori na meki santa foe na nem foe Jehovah na moro prinspari sani na ini hem ati?
5 Dati meki na nem foe Jehovah nanga alasani di habi te make nanga na nem disi, moesoe kom na tapoe na fosi presi na ini wi hatti. Di Jezus ben de na grontapoe, dem sani di ben e hatti hem moro ben de dem kosi-kosi di ben e kon tapoe na nem foe Gado, spesroetoe foe na see foe na pipel foe Gado srefi, dem Djoe. A taki: „Bikasi mi e doe alatem, sani di boen na hem”. Na ini hem benawtoe na ini na Djari foe Gethsémane, hem moro bigi broko-ede no ben de dati a bo dede. A ben kom na grontapoe, di a gebore leki libisoema nanga na spesroetoe marki foe dede wan oferandi dede, en a waka sondro foe draai-draai foe doro na marki dati. Ma na sani di ben de so wan hebi gi hem na laatste neti bifo hem dede ben de na sjem die hem dede, na ondro na klage foe kosi tegen Gado, ben sa tjari tapoe na nem foe Jehovah — hem, na Manpikien foe Gado en na Takiman foe Gado, ben sa dede na so wan sjem fasi na fesi foe heri grontapoe. Foe hem dem ben skrivi: „Dem koskosi foe dem, di e kosi joe, ben kom fadom na mi tapoe”. — Rom. 15:3.
6. Leki fa na apostel Paulus sori, fa san skrivi na ini Rom. 15:3 habi krakti tapoe wi leki christen?
6 Na apostel Paulus e gebroiki na woortoe disi foe gi christen dikhatti foe habi allatem na prakseri wan sani boiti foe prisiri dem egi srefi — dati dem moesoe wani foe doe moeiti foe jepi trawan (Rom. 15:1, 2). Na foe disi Jezus ben libi en dede, teki alla dem sjem, sodati soema ben kan habi na juisti fasi foe si hem Tata, en sodati dem ben kan kom sabi en prijze Gado. Te ai taki nanga christen soema Paulus e begi taki: „Ma na Gado foe ala pasensi nanga troostoe moe helpi oenoe foe oen habi wan hatti nanga wan memre makandra leki fa Jezus Christus ben gi wi na eksempel”. — Rom. 15:5, 6.
NA FESI FOE SOEMA DI DE KROSIBEE EN FARAWE
7. Fa na christen kan santa na nem foe Gado (a) na ini hem privé libi (b) na ini hem famiri nanga (c)na ini na gemeente?
7 Fa wan christen tapoe soema na nem foe Jehovah ben kari, kan de seker dati allatem ai santa na nem foe Gado? A no de foe taki dati ai doe disi srefi na ini hem libi di no wan tra soema no e si, foe di ai hori na nem foe Gado santa na ini hem hatti nanga hem prakseri. Ai doe disi na ini hem famiri foe di ai taki foe dem juisti sani en foe di ai sori wan lobi belangstelling gi ibri memre, te ai sori dem egi fasi di Gado e sori na ini hem famiri. Na fesi foe hem brada na ini na christen gemeente ai santa na nem foe Gado foe di ai helpi dem na ala okasi, te ai tjari dem zwakki fasi foe dem di no tranga so na jeje fasi leki hem. Foe di na nem foe Jehovah ben kari na hem tapoe, a sabi taki san ai taki en doe sa kom tapoe na Gado nem.
8. Fa wan soema kan santa na nem foe Gado na ini na ai foe dem di de na dorosee en soortoe egi fasi foe Gado a moesoe habi?
8 Ma soortoe fasi a de santa na nem foe Gado na ini dem ai foe soema na dorosee? Na te a de doe san Gado e doe e te a de meki trawan sabi foe san ede a de doe so. Dus a moesoe lobi dem leki fa Gado lobi dem. Gado ben kan si na heri libisoema famiri leki soema sondro waarde, gridi fasi, sondoe soema di e tegoe hem. Nanga reti a ben kan sori hem srefi moro hee, e loekoe tapoe dem doti fasi en lagi fasi, dem dong fasi nanga dem law doe foe dem. Tokoe Gado no teki na fasi disi. A ben e si dem sani disi di a no ben lobi. Ma „Gado ben lobi na grontapoe so meni dati a gi hem egi Manpikien, sodati ala soema di poti bribi na ini hem no sa go pori ma habi na libi foe teego” (Joh. 3:16). En Christus dede gi wi „di wi ben zwaki ete, di wi ben de sondoe soema ete, . . . di wi ben de vijanti”. — Rom. 5:6-10
9. Fa wan christen kan santa na nem foe Gado te ai taki nanga trawan di no de na ini na waarheid?
9 Wan foe dem moro direkt fasi foe santa na nem foe Gado na te wi sa verteri trawan foe san Gado sreka gi libisoema nanga jepi foe Christus. Te na christen e taki nanga dem soema disi, efoe dem habi of no habi belangstelling, a moesoe hori na prakseri na meki santa foe na nem foe Jehovah. Disi wani taki na fasi fa wi sa tjari wi srefi nanga na taki foe wi moesoe de so dati efoe a kan, a sa gi na soema wan dikhatti foe habi wan moro matifasi foe si Gado. Wi moesoe hori na prakseri dati na soema nanga soema wi e taki no e si sani na a fasi di wi e si sani. A de si moro esi na manieri fasi foe wi nanga wi switi fasi, na lobi foe jepi trawan, opregti fasi foe wi, leki a de si dem woortoe foe wi. Efoe a no e si dem sani disi, a no sa arki san wi e taki.
10. Te wi e taki nanga dorosee soema, san na dem sani di wi no wani doe, en tapoe san wi wani poti tranga?
10 A sa de toe, te wi e go oso foe oso, a sa boen foe wi habi wan positief fasi foe doe. Foe kroetoe san na oso soema e bribi of dem sani di ai doe no sa jepi hem. Wi moesoe proberi foe helpi hem foe si dati san wi e pristeri hem na ini na nem foe Jehovah dati a boen. A moesoe go si hem leki wan sani di moro boen of leki wan sani di sa jepi hem, no kroetoe hem.
11. (a) Wi moesoe habi na prakseri dati foe di wi de na ini na waarheid dati wi boen moro (. . .)?
11 Na fasi toe, di wi sa handel nanga hem en nanga ala soema foe grontapoe, a moesoe de na fasi di na apostel Paulus ben sori. A no foe di a ben habi na grani foe kon sabi na waarheid dati hemsrefi ben kom si hemsrefi moro boen leki wan onvolmaakti soema, leki dem soema gi soema a ben preeki. A taki: „Mi sabi dati ini mi, dati wani taki, ini mi skin, no wan boen sani no de” (Rom. 7:18). A taigi dem kompe wrokoman Timótheüs: „En mi taki Christus Jezus, wi Masra, grantangi, disi hem ben gi mi tranga, en disi hem ben finni mi getrouw, foe a potti mi na da wroko, mi, disi ben kosi Gado fositem, en disi ben vervolgoe en kwinsi soema. Ma hem boenhatti ben sari foe mi, bikasi mi ben doe dati, di mi no ben sabi moro betre en di mi no ben bribi ete. Troe, na genade foe wi Masra ben de toemoesi bigi, nanga na bribi en na lobi, di de na ini Christus Jezus. Dati de wan troe tori en a waarti foe ala soema teki hem taki: Christus Jezus ben kom na grontapoe foe meki zondari kom boen nanga Gado, disi mi de na moro bigi wan na dem mindri. Ma foe dati ede Masra ben sari foe mi, foe na mi fosi Jezus Christus sori ala hem pasensi foe wan eksempel gi dem disi sa bribi na hem bakatem, meki dem libi foe teego”. — 1 Tim. 1:12-16.
NA FESI FOE FAMIRI
12. San kan de na situatie na ini wan famiri te wan foe dem memre tron wan Getoigi foe Jehovah?
12 Wan bradi doro opo gi na moro bigi pisi foe wi foe na meki santa foe na nem foe Jehovah habi foe doe nanga wi famiri di no de kotoigi foe Jehovah. A kan dati wi de opregti na ini na pristeri foe na waarheid, ma kande wi no habi na juisti firi gi wi famiri, di no sabi of si en teki sani foe na bijbel na a srefi fasi leki wi.
13. San wan wefi, leki wan eksempel, kan doe te a kom sabi na waarheid fosi hem masra nanga famiri?
13 Foe teki wan eksempel, kande wan wefi leri sabi na waarheid en kande a kom si dati wan toe sani di hem of hem masra of hem famiri ben e doe fositem, no boen. Hem masra nanga dem famiri e go si hem moro leki wan fanatiek soema efoe a sa proberi foe poti hem prakseri tapoe dem. Kande a kom direkt na dem tapoe en taigi dem dati ala dem sani di dem e doe, so leki na hori foe son feesti dee, no boen, en kande draai dem foe no arki moro. San kan de wan moro boen fasi?
14. San na a juisti fasi foe doe en houding foe wan foe dem Getoigi foe Jehovah nanga hem famiri di no de na ini na waarheid?
14 Sori pasensi, prakseri en firi gi trawan! Prakseri na tem di joe e teki foe go na vreemde soema mofo doro, na tem di joe e teki foe studeer nanga dem, jepi dem nanga sorgoe foe dem kisi wan boen fundamenti bifo joe proberi foe meki dem kenki dem fasi foe doe, dem mati en so moro fara. Dus foe sainde joe sa de toemsi esi en meki moeiti foe poesoe na fasi fa joe e si sani tapoe joe famiri? Bifo joe broko mati fasi nanga dem of meki dem hari dem srefi poeroe foe joe, foe sainde joe no sa si na sani disi leki wan okasi foe dieni Gado aladee joe e go doro foe sori mati fasi, switi fasi, lobi foe gi jepi nanga lobi fasi leki na fesi? Na a fasi disi joe e sori dem egi fasi foe Gado en e meki hem nem kon santa sodati te joe habi na okasi foe tjari kon na dem prakseri dem boen sani di Gado seti gi wi, dem sa de klari foe arki, bikasi dem e si dem egi fasi foe Gado na ini joe.
NO PRAKSERI TOEMSI FOE JOE SREFI
15, 16. Na ini soortoe fasi di no e sori koni Mozes meki hem srefi go na ini na woestijn foe Zin?
15 Nanga dem soema di no de na ini na waarheid, net leki nanga wi kristen brada, alatem wi moesoe prakseri fosi taki: Na sani di mi e doe of di mi poti foe doe, a de santa na nem foe Gado na ini na fosi presi? A esi foe lasi pasensi en foe ati bron of foe tron pikienso regtvaardiki na ini joe egi ai, aladi wi e vergiti foe vertrouw helemaal tapoe Jehovah. Disi na wan fasi foe no sori koni. Mozes meki na srefi fowtoe disi wantron. Dem Israeliet soema ben opo dem srefi toemsi tegen Mozes en dem ben e soekoe trobi nanga hem. Na ini na woestijn foe Zin dem ben bigin foe kroetoe nanga Mozes bikasi watra no ben de. Jehovah taigi Mozes dan foe taki nanga na ston-bergi foe gi watra. Ma Mozes taigi na pipel: „Oen jere now, oenoe di e opo oen srefi! Ma foe na ston-bergi disi wi sa poeroe watra gi oenoe”? Prefoe a taki nanga na ston-bergi, a naki hem toe tron baka di a poti dem prakseri tapoe hemsrefi en di a kari na pipel „oenoe di e opo oen srefi” en watra kon na doro. — Num. 20:1, 2, 7-11.
16 Mozes ben man foe kisi watra gi na pipel. Ma san Jehovah taki? „Bikasi joe no ben sori bribi na ini mi foe santa mi na fesi foe dem ai foe dem manpikien foe Israël, dati meki joe no sa tjari na gemeente disi na ini na kondre di ma sa sondro mankeri gi dem”. — Num. 20:12.
TRON WAN PRATIMAN FOE NA BOEN NJOENSOE
17. (a) Wi leki Getoigi foe Jehovah, wi moesoe pai dem soema na dorosee wan sani? (b) Tja kom na fesi san Paulus ben taki na 1 Kor. 9:19-27 en tjari na gronprakseri kon tapoe den Getoigi foe Jehovah.
17 Foe di wi kisi na grani foe kon sabi na waarheid, Gado poti wi na ondro wan verpligti foe na pipel na dorosee, en toe foe wi brada. Na apostel Paulus ben taki foe na sani disi gi dem christen na ini Rome na a fasi disi: „Mi verpligti foe helpi ala toe, dem Grieki nanga dem di no de Grieki, dem di sabi sani, nanga dem di no sabi sani (dem di no kisi leri). Foe dati ede so meni leki mi kan mi sa doe moeiti foe preeki na boen njoensoe gi oenoe toe na Rome” (Rom. 1:14, 15). Paulus ben taki toe: „Bikasi alwasi mi no de na wan soema ondro, tokoe mi srefi meki mi srefi leki wan knegti foe ala soema, foe mi kan wini moro foeroe soema. Te mi ben de nanga Djoe, mi ben hori mi srefi leki Djoe, foe mi kan wini dem Djoe. Te mi ben de nanga dem, disi de na ondro na wet, mi ben hori mi srefi, leki mi toe de na ondro na wet, foe mi kan wini dem di de na ondro na wet. Te mi ben de nanga dem di de zondro na wet, mi ben hori mi srefi leki mi toe de zondro na wet, foe mi kan wini dem di de zondro wet, alwasi na Gado fesi mi no de zondro iniwan wet, ma mi de na ondro na wet foe Christus. Te mi ben de nanga dem zwakiwan, mi toe ben de leki wan zwakiwan, foe mi kan wini dem zwakiwan. Nanga ala soema mi ben hori mi srefi na alafasi foe na alafasi mi meki wan toe zieli feni na boen libi. Ma mi doe dati foe na Boen Njoensoe ede foe mi toe moe kisi mi presi foe hem.” Paulus no ben wani foe den trowe hem en lasi dem blesi foe na „boen njoensoe” baka te a ben preeki gi trawan. — 1 Kor. 9:19-27.
18. Fa wi kan doe san wi e begi taki „Meki na nem foe Gado kon santa”?
18 Dat meki, te wi e begi: „Tata, meki joe nem kom santa”, wi e aksi Gado foe jepi wi foe poti ala tra sani na wan see sodati san wi e doe alatem sa prijze hem nem en meki dati a tron santa. Dan wi sa doe leki fa wi e begi, te wi sa proberi foe no poti no wan sani na fesi foe trawan foe meki dem naki foetoe te dem e soekoe na waarheid. Wi sa sorgoe foe sori moro lobi en foe habi moro minder kritiek. Alatem wi sa habi na prakseri dati wi marki no de foe kroetoe, ma foe tron soema di e prati na boen njoensoe nanga hem blesi nanga trawan.