„Dinari foe wi Gado” leki pionier e doe toemsi prenspari wroko foe bow sani kon boen baka
„En vreemde soema sa kon tanapoe troe troe en loekoe dem skapoe foe oen, en tra kondre soema sa de dem wrokoman na dem gron nanga dem droifidjari foe oen. En foe taki foe oen, priester foe Jehovah dem sa kari oen; dem dinari foe wi Gado dem sa kari oen.” — Jes. 61:5, 6.
1. Soortoe moeiti „fosi kondre-dinari” e doe now, en nanga soortoe firi?
MINISTER, ofoe „fosi kondre-dinari”, ben teki prati na a moro bigi wroko foe meki sani kon boen, di ben kon de fanoodoe nanga na Fosi Grontapoe-feti. Foeroe foe dem sani di dem ben jepi foe bow baka, ben pori baka nanga na moro takroe feti foe 1939-1945. Ete wan tron wroko foe bow sani kon boen baka ben de fanoodoe, ma now moro bigi. Ini disi tem publiki dinari e doe moeiti faja faja foe sani no broko en pori. Dem kantoro foe dem minister de nanga brokoskin.
2, 3. (a) Soortoe tra prenspari wroko foe bow sani kon boen baka ben go doro aladi na Tweede grontapoe-feti ben de? (b) Nanga soortoe woortoe a ben taki na fesi ini Jesaja 61:4-6?
2 Ini na jari baka na feti, na jari 1919 wan moro prenspari nanga wan heri tra soortoe wroko foe bow sani kon boen baka ben bigin. Aladi joe ben habi na pori krakti foe na Tweede Grontapoe-feti, na wroko ben go doro, sondro dati wan soema ben kan tapoe hem. A ben de wan jeje wroko foe bow sani baka, di ben habi wan krakti di dem minister kantoro foe libisoema rigeri no ben habi. Akroederi nanga san tanapoe ini Romeini 13:4, dan dem moro hee makti foe disi grontapoe e wroko troe troe leki Gado publiki dinari, srefi foe na boen foe kristen soema. Dem soema di leki pionier ben teki prati na a jeje wroko foe bow sani kon boen baka, de tapoe wan moro hee plan dinari foe Gado. Na wroko leki pionier di dem dinari disi ben teki foe doe, na profeeti foe Gado, Jesaja, di Gado jeje ben de tapoe hem, ben taki na fesi:
3 „En dem moe bow dem owroe broko presi kon boen baka; srefi dem brokopresi foe fositem dem sa opo baka, en dem foto di ben pori en broko dem sa meki kon njoen baka, disi ben de leki wan hipi brokosani sensi langa tem kaba. En vreemde soema sa kon tanapoe troe troe en loekoe dem skapoe foe oen, en tra kondre soema de dem wrokoman na dem gron nanga droifidjari foe oen. En foe taki foe oen, priester foe Jehovah dem sa kari oen; dem dinari foe wi Gado dem sa kari oen.” — Jes. 61:4-6.
4. Ini soortoe tem foe kenki na profeeti-tori foe Jesaja ben sa kon troe en fa en pe Jezus ben sori disi?
4 Na fosi eeuw wrokoman foe bow sani baka, Jezus Kristus ben sori otem dem woortoe dati foe na profeeti-tori foe Jesaja ben sa bigin foe kon troe. Na tem foe dati ben sa kon, te wan naatsi di ben de someni eeuw ben brokosaka en wan njoen en betre naatsi ben moe kon foe de. Na njoen naatsi ben sa habi ini hem dem discipel foe Jezus Kristus, di santa jeje foe Gado ben meki kon njoen gebore. A ben sa de wan jeje lsraël. Ma fa Jezus ben meki bekenti na tem foe na kon troe foe na profeeti tori foe Jesaja di wi kari dja na tapoesee? A ben doe disi di a teki woortoe di ben de na fesi foe na profeeti-tori disi, en a ben tjari dem woortoe kon tapoe hemsrefi. Jezus ben visiti na a tem dati, wan pisi tem baka na Pascha ini na jari 30 foe wi teri, na djoe-kerki foe na libipe foe hem Nazareth. A ben opo tanapoe foe leesi. A ben loesoe na lolo foe na profeeti-tori foe Jesaja te na san de now leki Kapiter 61 en a ben leesi wan pisi san de now bekenti leki vers wan nanga toe. Dan a ben taki gi hem arkiman: „Tide dem woortoe disi, di oenoe ben jere djonsro, kon troe.” — Luk. 4:16-21.
5, 6. (a) Ini soortoe woortoe for soortoe vertaling na historia-skrifi-man Lukas, di ben skrifi ini Griki tongo ben poti Jezus woortoe di a ben teki ini Jesaja? (b) Fa Jesaja 61:1-3 de ini na oorspronkelijke tekst?
5 Lukas, na historia-skrifiman di ben skrifi foe na sani disi, ben skrifi Jezus woortoe di a ben teki in Jesaja profeeti-tori, akroederi nanga na fasi fa a de ini na Griki vertaling di de bekenti leki na Septuaginta-vertaling. Ma fa na profeeti-tori de ini na oorspronkelijke hebreeuw tekst, di Jezus ben leesi leki wan djoe foe Palestina? So:
6 „Na geest foe na (Soeverein) Masra Jehovah de tapoe mi, foedi Jehovah ben salfoe mi foe verteri boen njoensoe na dem safri-ati-soema. A ben seni mi foe tai dem wan di ati ben broko, foe bari fri gi dem wan di dem ben teki leki strafoeman en na opo bradi foe dem ai srefi foe dem strafoeman; foe bari tranga na jari foe na boen wani foe na see foe Jehovah en na dee foe teki revensi foe na see foe wi Gado; foe troostoe ala dem di de sari; foe prati gi dem wan di de sari foe Sion, foe gi wan ati foe weri na ede na presi foe asisi, na oli foe bigi prisiri na presi foe low, na djakti foe prijse na presi foe wan broko geest; en dem moe kari dem, bigi bon foe na retidoe, na sani di Jehovah prani, foe dem kisi glori.” — Jes. 61:1-3; herziene Engelse uitgave van 1971.
7. Soortoe woortoe foe na wroko foe bow sani e kon now?
7 Dan e kon now dem woortoe foe na wroko foe bow sani kon boen baka: „En dem moe bow dem owroe broko presi kon boen baka; srefi dem brokopresi foe fositem dem sa opo baka, en dem foto di ben pori en broko dem sa meki kon njoen baka, disi ben de leki hipi brokosani sensi langa tem kaba.” — Jes. 61:4.
8. Ini soortoe jeje-fasi soema ben sa de te na profeeti-tori ben sa kon troe, en foe sainde boen prakseri moe poti na dem?
8 Meki wi hori na prakseri dati na a tem foe na kon troe foe Jesaja profeeti-tori „safri-ati-wan” ben sa de, ooktoe „dem wan di ati ben broko”, „dem wan di dem teki leki strafoeman”, „strafoeman” nanga „dem di e sari foe Sion”. Joisti prakseri ben moe poti tapoe dem disi. Na tem ben sa lepi foe disi, foedi a ben de na pisi tem di ben kari „na jari foe na boen wani foe na see foe Jehovah”. Na jari dati foe hem boen wani ben sa bigin nanga na kon foe na soema di ben kisi salfoe nanga na „geest foe na (Soeverein) Masra Jehovah”, en baka na agersi „jari” disi ben sa kon na „dee foe teki revensi foe na see foe wi Gado”. Na wroko foe na wan di ben sa meki bekenti fri en di ben salfoe nanga geest, ben kon de now tranga fanoodoe.
9. Soortoe kenki Jezus ben meki bekenti na hem publiki ini Nazareth en fa dem ben sori dati dem no ben habi safri-ati nofo foe teki na boen njoensoe?
9 Jezus ben kenki hem wroko na grontapoe. Te leki hem dri-tenti jari a ben de temreman ini Nazareth, Galiléa. Drape na djoe-kerki ben de pe Jezus ben leesi dem betekenisvolle woortoe foe Jesaja. Di a ben leesi Jesaja 61:1, 2, a ben verteri hem publiki ini Nazareth na kenki foe wroko nanga dem woortoe: „Tide dem woortoe disi, di oenoe ben jere djonsro, kon troe.” Baka dati a sori dati disi de so di a hori wan bijbel-lezing, di dem kondreman foe hem fositem nooiti ben prakseri dati a ben sa man foe doe. Dem ben jere dati Jezus ben dresi soema. Foe datede dem ben wani dati a „dresi hemsrefi” foe meki soema kon gosontoe ini „hem eegi gebied”. Nanga jepi foe bijbel agersi tori Jezus verteri foe sainde a no ben doe disi. Disi ben meki dem no firi demsrefi so boen, dati dem ben wani kiri hem. Dem ben sori tapoe wan ogri fasi dati dem no ben habi „safri-ati” nofo foe teki boen njoensoe. — Luk. 4:21-30.
10. Na soortoe okasi Jezus ben salfoe nanga santa jeje?
10 Aladi dem doe so nanga hem ini hem libipe, tokoe Jezus ben go doro foe handri akroederi na marki foe salfoe nanga „na geest foe na Soeverein Masra Jehovah.” Ini na herfst foe 29 foe wi teri a ben libi Nazareth en a ben go na a liba Jordaan foe na manpikin foe na priester Zacharia, Johannes, ben doopoe hem. Wantron wantron, baka di Jezus ben komoto ini na watra kon na tapoe, Johannes na Doopeman ben si na santa jeje saka tapoe hem leki wan doifi. Na a srefi tem a ben jere Jehovah sten komoto foe hemel taki: „Disi na mi Manpikin, na lobiwan, di mi ben feni boen” (Matt. 3:13-17; Luk. 3:21, 22; Joh. 1:29-34). Na srefi geest ben poesoe Jezus foe go tan 40 dee ini na sabana foe Judea.
11. Foe sainde Jezus ben habi ete na geest di a ben salfoe, di a ben hori hem lezing ini na djoe-kerki in Nazareth?
11 Baka dem 40 dee dati foe vaste nanga de krosbee nanga Jehovah, Satan Didibri ben poti hem ondro dri tesi. Efoe Jezus ben fadon ondro dem tesi dati, dan a ben sa lasi na geest, di ben salfoe hem. Foedi a ben kaka foetoe gi na Tesiman, a ben hori hem jeje salfoe. Soboen, a ben habi disi ete di a ben hori hem lezing ini na djoekerki foe Nazareth. — Matt. 4:1-13; Luk. 4:1-21.
12. Soortoe aksi e kon na fesi foe dem djoe ini na tem foe na salfoe foe Jezus, te joe loekoe san ben pasa sensi 537 bifo wi teri ini na kondre foe dem djoe?
12 Na salfoe foe Jezus nanga santa jeje ini 29 foe wi teri ben pasa 565 jari baka na pipel foe Jezus ben kon fri ini 537 bifo wi teri foe katibo foe Babylon, en baka dati dem ben drai go baka na dem broko kondre, na provincie Juda. „Dem broko foto” foe na kondre, makandra nanga Jeruzalem, pe dem ben bow na tempel baka, dem ben meki kon njoen baka. Dem „brokopresi”, di ben doe kon foedi ini dem 70 jari ben didon pori, ben opo baka en ben meki na kondre kon de wan sani di ben gersi wan paradijs. Ini dem tem foe dem dri fesa foe dem djoe ini wan jari, Sion ofoe Jeruzalem, ben foeroe nanga miljoen miljoen aanbegiman. We, foe sainde ini na tem foe na salfoe foe Jezus, djoe ofoe Israël soema sa ben de „di ati ben broko”? Foe sainde joe ben habi „strafoeman”? Foe sainde joe ben habi soema „di ben sari foe Sion”? Foe sainde joe ben habi pôti, sakafasi, „safri-ati” soema, di ben habi fanoodoe foe „boen njoensoe”? Foe sainde ini 29 foe wi teri joe ben habi dem soortoe soema dati?
DEM SOEMA DI HABI „BOEN NJOENSOE”, FRI NANGA TROOSTOE FANOODOE
13. Ini soortoe katibo dem djoe „strafoeman” ben kon, baka di dem ben kon fri foe Babylon en ben drai go baka na oso?
13 Disi doe kon foe na jeje fasi pe na naatsi lsraël ben kon na ini. A troe dati Jehovah ben meki „wan dee foe teki revensi” kon tapoe na koonoekondre foe Babylon, di dem rigeriman foe dem ben weegri „foe opo na pasi foe go na oso gi dem strafoeman” (Jes. 14:17; Jer. 50:15, 29; 51:6, 11, 36). Di dem djoe „strafoeman” baka tem ben drai go baka ini dem kondre, dem no ben kon ini katibo foe afkodree foe troe troe popki di ben meki nanga anoe, ma ini wan moro bigi katibo, en dati ben de kerki seti foe na judaïsme. Disi ben de wan seti foe sani pe wetti nanga gwenti foe libisoema ben pree basi, sani di ben meki na Wet nanga komando foe Gado lasi krakti. Dem meester foe Wet nanga dem Farizeeman ben teki wan prenspari presi ini na kerki seti disi. Dem ben breni dem soema foe no si na waarheid en poeroe „na sroto foe na sabi”, en na so fasi dem ben tapoe dem soema foe go ini na koonoekondre foe Gado, aladi dem ben poti tapoe na gewoon pipel hebi lai, di dem srefi no ben meri. — Luk. 11:52.
14. Foe sainde wan fika pisi foe dem djoe ini Jezus tem ben habi reden „foe sari foe Sion”?
14 Boiti dati, dem tiriman foe na judaïsme, leki breni tjariman, ben tjari dem breni djoe tapoe na pasi di ben sa kon ini na gotro foe pori foe na naatsi. Dem ben tjari Sion ofoe Jeruzalem tapoe wan kori fasi foe trowe na troe troe Messias, Jezus en kiri hem na wan postoe, leki a ben de wan falsi Kristus. Dem kerki tiriman dati ben sorgoe dati a foto Jeruzalem ben go doro foe kiri profeeti nanga ston dem wan di Gado ben seni go na dem (Matt. 23:1-37). Dem „safri-ati-,wan” foe na naatsi ben habi fanoodoe dati dem verteri boen njoensoe na dem? Dem „wan di dem ben teki leki strafoeman” ben habi fanoodoe dati dem ben meki fri bekenti na dem? „Strafoeman” ben de di „ai ben moe opo bradi” foe di dem ben moe komoto foe na doengroe-oso foe jeje doengroe? Sion ofoe Jeruzalem ben de leki na centrum foe Jehovah aanbegi ini so wan pori fasi ini na dini foe Gado, dati troe troe reden ben de foe ben sari? Ja, troe troe. En na salfoe Jezus ben si dati wan fika pisi foe dem soortoe „sariman” dati ben de mindri dem djoe a tem dati.
15. Na soortoe fasi Johannes na Doopoeman ben doe diniwroko leki wan voortrekker ofoe pionier? en fa Jezus ben tron wan pionier di ben sreka na pasi foe libi nanga jepi?
15 Jezus ben habi sani foe na fanoodoe foe dem „sariman” dati, „dem wan di dem ben teki go na strafoe”, dem „strafoeman”, „dem pôti safri-atiwan” dati. A ben troostoe dem sariman dati foedi a ben preeki na boen njoensoe foe na „koonoekondre foe hemel”, en ooktoe foedi a ben dresi dem sikiman en srefi wiki dem dedewan (Matt. 4:17; 11:4-6). Wan moro bigi fri nanga troostoe ben de ete ini na tem di ben kon gi dem sariman foe Sion. Na fri nanga troostoe disi ben kon gi dem nanga Jezus dede en opobaka nanga go na hemel, foe pristeri na Gado na waarde foe na ofrandi foe hem di kan verzoen zondoe. Foe meki dem bijbel profeeti-tori kon troe tapoe hem na so wan fasi, Jezus Kristus ben tron wan soema di e teki fesi ofoe pionier, di ben sreka na pasi foe libi nanga jepi gi dem wan di e teki hem diniwroko di e gi libi. Johannes na Doopoeman ben waka na fesi foe Jehovah Messias, sodati Johannes toe joe ben kan kari wan soema di e teki fesi ofoe pionier (Luk. 1:76 NW) Jezus ben doe wan wroko foe broko pasi opo tapoe libi nanga jepi, di ben bigi moro di foe Johannes.
16. Fa Petrus ben kari Jezus ini na tempel ini Jeruzalem, leki na vertaling foe Moffat foe Tori foe dem Apostel 3:15 e sori?
16 A ben de precies leki san Petrus ben taki wan toe wiki baka na go na hemel foe Jezus gi djoe ini na tempel ini Jeruzalem: „Joe ben kiri na pionier foe na libi. Ma Gado ben wiki hem poeroe foe dede, soleki wi (Petrus nanga Johannes) kan kotoigi.” — Tori foe dem Apostel 3:15 Moffatt.
17. Fa dem 12 apostel ben kari Jezus, leki tanapoe ini Tori foe dem Apostel 5:31, di dem ben tanapoe fesi na Sanhedrin ini Jeruzalem?
17 Bakatem dem 12 apostel foe Jezus Kristus ben kotoigi na fesi foe na Sanhedrin ini Jeruzalem di ben habi broedoe-paiman, en pe ini na tem dati Saducceesoema, Fariseesoema nanga Meester foe wet ben de na ini: „Gado ben hee hem na hem reti-anoesee leki wi pionier (Griki: archègos) nanga jepiman foe gi Israël berouw nanga pardon foe sondoe.” — Tori foe dem apostel 5:31, Mo.
18, 19. Fa na apostel Paulus ben kari Jezus ini Hebr. 2:10 en 12:2?
18 Ini hem brifi na a fika pisi foe dem hebree-soema (djoe), di ben teki Jezus leki Messias ofoe Kristus en di ben tron jeje manpikin foe Gado, na Hebreeuw apostel Paulus ben skrifi: „Bikasi a ben fiti, dati hem, gi soema en nanga soema ala sani de, ini a tjari kon na glori foe foeroe manpikin, ben sa meki na pionier (archègos) foe dem jepi kon volmaakti nanga pina.”. — Hebr. 2:10, Revised Standard Version; Moffatt.
19 So toe: „Loekoe na Jezus, na pionier (archègos) nanga na volmaker foe wi bribi, foe a prisiri di ben poti na hem fesi ede, ben verdrage na kruisi, en no ben ke foe da sjem, en a ben sidon na a reti-anoesee foe na troon foe Gado.” — Hebr. 12:2, RS, Mo.
20. Ini soortoe fasi Jezus ben tron na „pionier . . . foe wi bribi” nanga na volmaker foe dati?
20 Na so fasi na bijbel e verteri foe Jezus dati a ben de wan pionier ofoe voortrekker gi hem discipel, „na pionier foe na libi”, „na pionier foe jepi”, „na pionier foe wi bribi”. Hondro hondro profeeti-tori foe na Messias ofoe Kristus a ben meki kon troe. Tapoe na fasi disi a ben tjari wan njoen en fanoodoe pisi kon ini wi bribi ini Jehovah Gado. A ben tron soboen na pionier foe na heri bribi di troe kristen habi now. Nanga reti dem de kari hem toe „na pionier . . . foe wi bribi” (Hebr. 12:2, RS; Gal. 3:24, 25). Na a srefi tem wi bribi foe na Messias foe Jehovah e kon moro volmaakti en boen ini Jezus Kristus. Dem djoe di ben trowe Jezus Kristus, en di ben hori demsrefi soso na a Wet foe Mozes, ben meki na bribi foe dem ben de onvolledig.
„BIGI BON FOE RETIDOE”
21. O fara Jezus discipel ben sa ondrofeni wan jeje gro, foedi Jezus ben sori hemsrefi na dem, baka hem opobaka en ben troostoe dem?
21 Foe bow na bribi foe hem discipel, Jezus Kristus ben sori hem srefi foeroe na dem ini dem 40 dee baka hem opobaka. A ben troostoe dem wan di ben sari foe na Messias di dem ben poti dem hoopoe na tapoe. San ben pasa nanga dem soema di na Jezus Kristus di ben opobaka foe dede ben troostoe? Leki fa na proofeeti-tori foe Jesaja 61:1-3 e sori, dan na salfoe Jezus ben sa gi dem „wan ati foe weri na ede na presi foe asisi, na oli foe bigi prisiri na presi foe low, na djakti foe prijse na presi foe wan broko geest”. Leki bakapisi foe disi, dem ben sa ondrofeni wan jeje gro, sodati dem ben sa kari dem „bigi bon foe retidoe”, „na sani di Jehovah prani foe dem kisi glori”.
22. Fa wi moe verstan ini na profeeti tori foe Jesaja dem woortoe „ati foe weri na ede”, „asisi”, „oli”, nanga „djakti” en fa dem ben de van toepassing tapoe dem discipel sensi Pinksteren?
22 Na tori no e verteri ofoe wan toe foe Jezus apostel ofoe discipel ben poti asisi tapoe dem ede en ben weri saka krosi. Soleki a de sori, dan dem profeeti woortoe „asisi”, „oli”, nanga „djakti”, en „ati foe weri na ede” ben de na agersi fasi. Na sori di Jezus ben sori hemsrefi baka hem opobaka ben tjari troe troe wan kenki kon ini na firi foe dem discipel. Seker, na tapoe na pinksterdee, di kon na baka dati, na Soevereine Masra Jehovah ben gebroiki hem Manpikin Jezus Kristus ooktoe foe kanti trowe santa jeje tapoe dem wakti discipel ini Jeruzalem. Leki wan bewijsi foe na kanti trowe foe santa jeje, wondroe faja-tongo ben de tapoe dem ede. Na sani disi ben de foe wan pisi tem, en no ben de „na ati foe weri na ede” di ben sa ten en di Jesaja profeeti-tori ben taki na fesi. Na ede foe dem moro foeroe ben kisi wan kroon foe na prisiri dati Gado e feni dem boen, soleki na prisiri foe wan priester-bruidegom tapoe wan trowdee (Jes. 61:10). A ben gersi leki wan safoe oli ben kanti tapoe dem ede, di ben gi dem so wan kowroe ati, dati disi ben meki dem firi bigi prisiri. Na geest di ben meki dem lasi ati ben pasa en dem prijse foe Jehovah Gado ben marki dem leki wan „djakti foe prijse”. Soema di ben loekoe na a pinksterdee dati, ben taki: „Wi de jere dem taki foe dem bigi wroko foe Gado ini wi tongo”. — Tori foe dem Apostel 2:1-11.
23. (a) Soortoe pionierwroko foe opo njoen sani Jezus ben doe gi hem discipel? (b) Soortoe komando dem discipel ben kisi nanga na salfoe foe dem nanga jepi foe dem?
23 San e kon krin gi wi foe ala dem sani disi now? Dati Jezus Kristus, akroederi nanga na salfoe foe hem, leki pionier ben doe wan wroko foe bow sani baka tapoe dem soema di ben tron hem discipel. Jehovah ben gebroiki hem foe kanti trowe santa jeje tapoe hem doopoe discipel, sodati dem soema disi di ben kisi santa jeje demsrefi ben tron soema, di ben salfoe nanga na geest foe na Soevereine Masra Jehovah (2 Kor. 1:21; 1 Joh. 2:20, 27). Now demsrefi ben kisi na komando foe verteri boen njoensoe na dem „safri-ati-wan” ini na naatsi Israël, foe bari tranga fri gi dem wan di dem ben teki go na strafoe en wan kon fri gi dem strafoeman en foe troostoe ala soema di ben sari foe Sion. Tapoe so fasi dem ben kan jepi dem di dem ben troostoe en fri foe habi bigi prisiri foe na „jari foe boen wani foe na see foe Jehovah”, en foe prijse hem, foedi a ben sreka dem kon boen baka ini hem boen-ati en ini hem diniwroko nanga jepi foe hem salfoewan.
24. Fa na jeje kondre foe Jezus discipel sensi Pinksteren ben meki moi leki na Paradijs ben meki moi, en foe soema ben kisi glori?
24 Na kanti trowe foe na geest dati ben tjari wan heri kenki kon ini na situatie foe dem wan di ben kisi salfoe foe hem. Na presi dati dem ben de swaki bon, di ben dree foe di dem mankkeri njanjan, dem ben tron leki „bigi bon foe retidoe”, di Jehovah wawan ben kan prani en meki gro nanga jepi foe Kristus. Na fosi Paradijs foe libisoema, difrenti soortoe bon moi hem (Gen. 2:7-9). Ma foe sensi Pinksteren Jehovah ben prani „bigi bon” ini na jeje kondre foe hem pipel, di dem feejanti ben pori en poeroe soema tjari gwe. Dem soortoe agersi „bigi bon” ben de krakti, vaste kristen di no ben kan seki en di opo demsrefi hee foe na retidoe foe Jehovah Gado. Hem, leki na Soema di Prani, ben de na Soema di kisi glori nanga na de foe dem ini na njoen kristen gemeente.
25. Ondro soortoe verplekti dem soema ben kon di ben doopoe tapoe Pinksteren, en ini soortoe wroko dem ben moe doe wroko leki pionier?
25 Boiti na fosi gemeente foe 120 discipel tapoe na pinksterdee doesoen doesoen moro ben salfoe ete. Disi ben pasa baka dem berou na teki foe dem foe na Messias nanga dem doopoe ini watra nanga jepi foe dem 12 apostel (Tori foe dem Apostel 2:37-42). Dem disi toe ben kon ondro na verplekti foe na salfoe nanga Jehovah geest nanga jepi foe Jezus Kristus. Na Tiriman foe dem, Jezus, leki pionier, ben sreka na pasi gi dem, sodati dem ben sa kisi na bribi di ben kon volmaakti, sotoe libi nanga jepi. Dem ben tron „dinari foe wi Gado” (Jes. 61:6). Leki so wan soema, dem ben moe sreka na pasi leki pionier gi trawan di ben wani kon ini wan boen matifasi nanga Gado, sodati dem disi nanga jepi foe Kristus ben sa kon verzoen nanga hem (2 Kor. 5:20). Tapoe na fasi disi dem ben sa habi wan prisiri prati ini Gado wroko foe bow ala sani kon boen baka.