Reden foe de nanga prisiri en foe prisiri joesrefi toemsi ini Gado

1. Foe sainde na fika pisi foe dem jeje Israël soema, leki wan kon troe foe Jesaja 61:10, e prisiri now?

A DE gi wan toemsi bigi prisiri foe de fri foe katibo foe na Bigi Babylon, na grontapoe makti foe falsi religie. Wan soema habi troe troe reden foe bigi prisiri te a kon baka ini na boen-ati nanga boen wani foe na Gado foe troe religie. Te dem memre foe na salfoe fika pisi foe na jeje Israël ini disi tem e prakseri foe dem fri nanga kon boen baka nanga jepi foe Hem, dem e prisiri srefi srefi. Na profeeti Jesaja di ben habi Gado geest e poti dem woortoe ini dem mofo te a de taki: „Sondro mankeri mi sa prisiri toemsi ini Jehovah. Mi sili sa breti ini mi Gado. Bikasi hem ben weri krosi foe redding gi mi; a tapoe mi nanga na skowroe-djakti foe retidoe, soleki na bruidegom di tapoe wan priester fasi e tai wan ati na hem ede en soleki na bruid di e meki hemsrefi moi nanga gowtoe sani.” — Jes. 61:10.

2. Dem memre foe na salfoe fika pisi e weri te now ete „dem krosi foe redding”, en foe sainde dem no sa poeroe dem nooiti ini na jeje paradijs?

² Sensi na jari baka na feti ini 1919 Jehovah ben sorgoe foe „redding” gi na salfoe fika pisi foe dem jeje Israël soema foedi a fri dem foe Bigi Babylon nanga hem lobiman foe grontapoe. Aladi dem memre foe na salfoe fika pisi sensi na tem dati ben ondrofeni ala kerki vervolgoe, ete dem e weri dem „krosi foe redding”. Na fika pisi habi na vaste bosroiti, foe tan weri dem marki krosi disi, te leki na Bigi Babylon nanga hem hoeroedoe lobiman pori ini na „bigi benawtoe” di e kon. Foedi dem e doe dati, nooiti dem sa poeroe dem ini na jeje paradijs, pe Jehovah ben tjari dem go na ini sensi 1919.

3. Foe sainde a ben de fanoodoe gi na salfoe fika pisi dati dem ben weri wan „skowroe-djakti foe retidoe”?

³ Tapoe dem „krosi foe redding” di Jehovah ben weri gi hem fika pisi di ben kon boen, a ben poti wan „skowroe-djakti foe retidoe”. Ini dem ai foe grontapoe, spesroetoe foedi dem fesiman foe na kristenheid ben blaka na fika pisi foe dem jeje Israël soema, a ben gersi na ini na dini foe Gado dati dem troe kristen disi ben de onregvaardiki. Dem ben kari dem ketter, falsi profeeti, falsi kristus, koriman nanga pikin foe Didibri. Dati dem ben tron na marki foe vervolgoe tapoe na heri grontapoe, ben gersi dati a ben de wan bewijsi foe dem kragi di ben kon tapoe dem, spesroetoe ini na kristenheid. Ma fa Jehovah ben si dem?

4. Fa Jehovah sori dati a ben si a fika pisi di ben habi berouw en di ben soekoe Gado leki regvaardiki, sodati a ben gi dem reti?

⁴ Na bigi Kroetoebakra foe ala soema no ben strafoe dem en no ben weri strafoe-oso krosi gi dem, bikasi dati ben sa wani taki dati a ben poti dem na dorosee foe hem organisaatsi. Foedi dem ben soekoe hem nanga hem woortoe, a ben teki na fika pisi di ben habi berouw baka ini hem boen-ati. A ben gi dem na bigi grani foe de hem kotoigi, hem boskopoeman foe preeki „na boen njoensoe disi foe na Koonoekondre” leki wan kotoigi na heri grontapoe pe soema e libi, te leki na ogri seti foe sani disi ben sa kon na wan kaba. A ben sorgoe dati hem nem Jehovah, ben kari poti tapoe dem (Matt. 24:14; Jes. 43:10). Baka dati a ben gebroiki dem tapoe wan makti fasi foe meki bekenti hem nem nanga prakseri te na dem fo oekoe foe grontapoe. Na fika pisi kisi reti nanga disi!

5. Soortoe kenki ini krosi na fika pisi ondrofeni foe datede na agersi fasi, nanga wan prisiri leki disi e de na soortoe okasi?

⁵ A ben gi na fika pisi na fesi foe na heri grontapoe reti nanga disi. Foe taki hem na agersi fasi dem ben kon weri „na skowroe-djakti foe retidoe”. Tapoe na fesi disi dem ben ondrofeni dati dem krosi ben kenki foe wan sani di ben morsoe kon tron wan sani di ben dini leki wan gowtoe sani (Jes. 52:1, 2). No langa na baka dati na prisiri foe dem ben skrifi ini na ede-artikel ini na uitgave foe na Watch Tower foe 1 januari 1925, di ben teri siksi bladzijde en di ben nem „Na djakti foe retidoe” en a ben habi Jesaja 61:10 leki fundamenti. Na prisiri foe dem ben de leki di foe wan bruidegom nanga hem bruid tapoe wan trowdee!

6. Fa a ben sori dati na prisiri disi ben sa tan foe na fika pisi di ben kisi reti, en soema ben prisiri makandra nanga dem en nanga soortoe praktische demonstratie?

⁶ Foe taki foe prisiri, we, san ben taki na fesi ini na profeeti-tori foe Jesaja, ben kon troe: „Prisiri foe, alatem sa de foe dem” (Jes. 61:7). Now, 43 jari sensi 1935 foe wi teri, na fika pisi di ben kisi redding nanga reti e prisiri troe troe, ma moro leki dati, na „bigi ipi” jepiman foe dem, e teki prati toe ini na prisiri disi. Foe wi taki hem nanga dem woortoe foe na bijbel, dem ben go si na salfoe fika pisi leki „dem priester foe Jehovah” nanga „dem dinari foe wi Gado”. Dem e si, dati na salfoe fika pisi dati ben weri na „krosi foe redding” nanga na „skowroe-djakti foe retidoe”. Dem e sori dem eegi prisiri foe disi gi Jehovah foe dini makandra nanga na fika pisi foe priester nanga publiki dinari. Aladi dem de kari dem memre foe na „bigi ipi” „vreemde soema” nanga „tra kondre soema” en dem e agersi dem nanga herder, gronman nanga soema di e sorgoe foe droifidjari, dem ben tjari foeroe lekti nanga jepi gi na salfoe fika pisi. Na jeje paradijs kisi wini nanga na de foe dem na ini. — Matt. 25:31-46.

7. Foe sainde na wondroe disi foe na twintigste eeuw no ben kan tan gwe, net soleki na bigin foe na jari ini Palestina no ben kan tan gwe?

⁷ Na wondroe disi ini na twintigste eeuw no ben kan tan gwe leki wan kon troe foe bijbel profeeti-tori, net so leki na bigin foe na jari ini na kondre Palestina ben kan tan gwe. Na profeeti-tori foe Jesaja 61:11 nooiti no ben kan tan sondro foe kon troe: „Bikasi soleki na grontapoe e meki sproiti kon, en soleki wan djari e meki ala sani di ben sai na ini sproiti, so Jehovah srefi sa meki retidoe nanga grani sproiti meki ala naatsi si.”

8. Foe sainde Jehovah no ben kan libi na situatie sondro foe a ben doe wan sani foe boen, en o fara a ben gi hem dienstknegti dem „paiman”?

⁸ Fa Jehovah ben handri srefi srefi akroederi nanga hem eegi woortoe! A no ben kan libi na situatie sondro foe doe wan sani foe boen. Hem de na Gado di „lobi reti-fasi en no de verdrage foefoeroe nanga onregvaardiki fasi” (Jes. 61:8). Tapoe na dee foe pai a ben moe gi hem tranga-wroko dienst-knegti „getrouw dem paiman”. A ben meki na pramisi „njoen verbontoe” nanga hem salfoe dienstknegti en nanga disi na „bigi ipi” e feni wini toe (Jer. 31:31-34). A ben meki hem kristen kotoigi leki hem dienstknegti di a de feni boen kisi reti en a sa meki dem kisi reti moro na fesi foe dem naatsi. Nanga disi hem eegi retidoe na fesi foe na heri universum sa kon na fesi. Disi sa kon toe gi hem eegi grani, foedi dem mofo-boeba foe ala soema di lobi waarheid, retidoe nanga soifri aanbegi, sa taki foe dati.

9. Nanga jepi foe soortoe djakti wi moe meki soema kon sabi wi?

⁹ „Na brokosaka geest” moe komoto na pasi! Meki dem kon sabi wi nanga „na djakti foe prijse” en prisiri wisrefi toemsi ini Jehovah Gado nanga jepi foe hem salfoe Heepriester, Jezus Kristus. — Jes. 61:1-3.