Fa na dee foe pai sa dini foe na tan-boen foe wi
1. Foe sainde dem naatsi no sa wini ini Har-mageddon, en fa na paiman foe dem sa pai tapoe na dee foe pai?
NA „Feti tapoe na bigi dee foe Gado Almakti” na Harmageddon e kon gi dem naatsi foe grontapoe sondro dati dem kan kenki disi. Aladi dem habi now foeroe fetisani leki sortoe tem en dem de klari foe wan grontapoe feti, tog wan sma no kan verwakti dati dem sa wini na Almakti Gado. Leki na moro Hee-sroedati man foe ala legre a sa gebroiki hem veldmaarsschalk Jezus Kristus foe wini, foedi disi de „na Kownoe foe dem kownoe en Masra foe dem masra”. A sa sorgoe dati na kriboi dee foe pai gi ala naatsi kon. Te a wegi dem tapoe na wegi foe gado geregtigheid, dan dem sa wegi lekti. Na paiman foe dem sa pai foedi dem sa pori foe teego. — Openb. 19:11-21; 17:14.
2. Foe sainde meki dem wortoe foe Psalm 45:6, 7 ben taki gi na kownoe baka na feti en san na gebroiki foe hem rigeri-tiki wani taki gi libisoema?
2 Na wini na Har-mágeddon sa poti na universele soevereiniteit foe Gado kon reti. Foedi a de gebroiki Jezus Kristus tapoe wan boen fasi foe wini, dan Gado sa feni hem warti foe a hori hem hemel troon. Solanga Gado de, na troon foe hem salfoe kownoe Jezus Kristus sa de ooktoe. Krakti e poti tapoe na prenspari sani disi nanga dem wortoe foe Psalm 45:6, 7 di na psalmsingiman e taki gi na kownoe en di de so: „Gado de joe troon foe teego; na rigeri-tiki foe joe kownoekondre de na rigeri-tiki foe getrouwfasi. Joe ben lobi retidoe en ogridoe joe no man si na ai. Foe datede meki Gado, joe Gado, salfoe joe nanga na oli foe toemsi bigi prisiri, moro leki joe patna.” Wi e herken dem wortoe disi leki dem wortoe di na apostel Paulus ben teki foe bewijsi na hee di Jezus Kristus hee moro leki dem engel (Hebr. 1:7-9). Foedi a lobi retidoe en a no man si ogridoe na ai, dan a no kan trafasi ofoe Kristus rigeri-tiki moe gebroiki foe na boen foe getrouwfasi. Disi e sori tapoe boen sani gi na libisoema famiri.
3. Soema ben de dem „patna” foe Jezus Kristus, en foe sainde a ben salfoe pasa marki nanga na „oli foe toemsi bigi prisiri” moro leki dem?
3 Leki libisoema tapoe grontapoe Jezus ben habi fositenpapa di ben de kownoe. Na psalmsingiman e taki dati a ben sa habi grontapoe fositempapa. Foe dem disi, te joe go baka foe kownoe Jojachin te kownoe David, ben de hem „patna” foe di dem ben habi wan prati ini na kownoekondre di Gado ben poti en dem ben sidon tapoe „Jehovah troon” (1 Kron. 29:23; 2 Kron. 13:5, 8; Matt. 1:6-12). Dem kownoe en fositempapa dati ben prisiri toemsi bigi ini na kownoekondre foe dem tapoe na pipel di Gado ben teki foe hemsrefi. Ma no wan foe dem kownoe „patna” disi ben kan firi wan toemsi bigi prisiri ini na fasi di na glori Jezus Kristus e firi dati. Na kownoekondre foe hem hee krin krin moro leki di foe dem, foedi a de ini hemel, ja, a de hee tapoe dem engel. Jehovah, na Gado foe Jezus Kristus, ben salfoe hem pasa marki nanga na „oli foe toemsi bigi prisiri” foe na volmaakti teego dini foe hem di a dini Gado retidoe.
TROW NANGA PIKIN
4, 5. San na victori kownoe e doe moro fara leki fa Psalm 45:8-14a e sori en foe sainde disi e gersi gi wi wan froewondroe sani?
4 Baka te Jezus Kristus feti wan victori oorlog nanga hem feejanti tapoe grontapoe, dan a kan poti hem prakseri tapoe wroko foe vreede. Na psalmsingiman, di de ondro Gado geest e skrifi foe hem leki wan soema di e trow en di e habi wan osofamiri. Disi kan gersi kande wan froewondroe sani, foedi na Pikin foe Gado no ben kon na grontapoe leki wan man foe trow nanga wan foe dem oemapikin foe libisoema. A no ben waka na pasi foe seker wan foe dem hemel „pikin foe Gado” ini dem dee foe Noach (Gen. 6:1-4). Wan soema ben sa kan aksi hemsrefi fa dem tra wortoe foe Psalm 45 ben sa kan de troe:
5 „Ala joe krosi de mirre nanga aloë-oedoe nanga kassia; joe komoto foe na toemsi bigi paleis, di meki nanga asauboon, pe harpoe ben meki joe prisiri. Kownoe-oemapikin de na mindri dem diri oema. Na oema foe kownoe poti hemsrefi na joe reti-anoe ini gowtoe foe Ofir. Arki, o oemapikin, en loekoe, poti jesi; en frigiti joe pipel nanga na oso foe joe tata, en na kownoe sa wani na moifasi foe joe, bikasi a de joe masra, soboen boigi na fesi hem. Dem oemapikin foe Tyrus ooktoe nanga wan presenti — dem goedoeman foe na pipel sa kon na joe eegi fesi foe begi joe. Na kownoe-oemapikin de soso glori drape na inisee ini na oso; hem krosi wroko nanga gowtoe. Dem sa tjari hem go na a kownoe nanga moi krosi.” — Ps. 45:8-14a.
6. Soema de na „kownoe-oemapikin” di dem e tjari go na a kownoe, en san Johannes na Dopoeman ben mag doe gi hem?
6 Soema de na „kownoe-oemapikin” di dem e tjari go na a kownoe di e trow nanga hem aladi pokoe nanga harp di fiti, e moi na okasi disi? Hem de troe troe na oemapikin foe wan kownoe, na foe taki Jehovah Gado, na „Kownoe foe teego” (Openb. 15:3). Soboen, hem de wan prinses. Hem de na glori gemeente di habi 144000 memre, di dem e si leki wan wanfasi, wan skin nanga leden. Johannes na Doopoeman ben habi na bigi grani foe sori Jezus Kristus dem fosi leden foe na trow-gezelschap disi. Johannes ben taki: „Hem di habi na bruid, de na bruidegom. Ma na mati foe na bruidegom, de tanapoe en jere hem, habi bigi prisiri foe jere na sten foe na bruidegom. Foe dati meki na prisiri disi foe mi kon reti.” — Joh. 3:29; 1:35-42; Openb. 14:1-5.
7. Nanga soema dem apostel ben trow dem soema di dem ben meki tron discipel en san dem alamala makandra sa de ini hemel?
7 Na so Paulus nanga tra apostel ben meki soema tron discipel foe Kristus en trow dem leki wan „krin wendje” nanga Jezus leki na „wan man” (2 Kor. 11:2). Soleki wan meisje di dem pramisi foe trow e libi na oso foe hem papa nanga mama foe trow nanga hem man en foe libi na hem, na so dem discipel, di dem pramisi foe trow nanga na hemel bruidegom, moe libi dem eegi grontapoe pipel en grontapoe tata-oso en poti dem lobi tapoe dem hemel Verloofde, Jezus Kristus. Efoe dem grontapoe waka nanga libi kon na wan kaba getrouw ini den krin wendjefasi, dan dem moe wakti tapoe na stem foe dem bruidegom te a sa kari dem foe opo komoto foe dede ini wan opobaka (1 Thess. 4:16, 17; Joh. 6:54). Ini hemel, dan ala dem 144000 makandra de na „oemapikin” foe Jehovah na Kownoe, bikasi nanga jepi foe hem geest a meki dem kon njoen gebore leki dem Kweki-papa. Makandra dem de na Njoen Jeruzalem, di de „na bruid, na oema foe na Lam.” Na a okasi dati a de „klari leki wan bruid di weri moi gi hem man”. — Openb. 21:2, 9.
8. Leki fa Psalm 45 e sori, soema ben sa de drape nanga reti en soema sa de drape leki wan kon troe foe na Psalm?
8 A de wan kownoe afersi, na trow disi foe wan Kownoe-manpikin nanga wan Kownoe-oemapikin. Disi e meki a fiti dati hee soema de drape, wan kownoe „oema” nanga prinses. Na heri organisaatsi foe Gado leki wan kownoe „oema” foe na „Kownoe foe teego” disi, e prisiri leki wan mama, aladi ala engel-leden foe na organisaatsi dati e prisiri makandra leki dem de prinses. Ala dem hemel mekisani disi e hori na prakseri, dati Jehovah Gado meki disi kan de so en foe dat-ede dem e taki: „Meki wi prisiri en meki wi gi hem glori, bikasi na trow foe na Lam ben kon en hem oema ben meki hemsrefi klari.” — Openb. 19:7.
9. Pe na prisiri-babari sa de foe dem „wendje di e waka baka hem leki hem mati” en foe sainde drape?
9 Wan soema tapoe grontapoe sa prisiri nanga dem santa hemel foe na moi sani disi di de foe hemel en grontapoe? Ja! Psalm 45:14b, 15 e sori disi, pe e taki moro fara: „Dem wendje (foe na bruid) di e waka na hem baka leki hem mati, dem e tjari kon gi joe (na Kownoe-Bruidegom). Dem sa tjari dem nanga prisiri babari nanga breetifasi; dem sa go ini na paleis foe na kownoe.” Pe na prisiri babari foe dem wendje en mati foe na bruid sa de? A de troe dati dem e taki foe dem dati dem e go na a paleis foe na hemel kownoe, ma dem toe e trow nanga na kownoe? Nono! Bikasi dem no e pramisi dem foe trow nanga hem. Soboen, na geest no de meki dem kon njoen gebore foe kisi libi ini hemel. — Joh. 3:3, 5.
10. Soema dem „wendje di e waka na hem baka leki hem mati” e agersi ini disi tem, en fa a doe kon dati dem de tapoe grontapoe efoe na trow sa waka ini hemel?
10 Dem memre foe na „kownoe-oemapikin”-groepoe, dja na ondrosee tapoe grontapoe dem ben trow dem nanga Kristus, soboen, aladi dem de ete leki libisoema. Foe dat meki dem bruidsmeisjes, di de soso „e waka baka hem” en di no habi na okasi foe trow nanga na Bruidegom-Kownoe, de wan grontapoe groepoe. Dem e kon na fesi tapoe grontapoe efoe na hemel trow de foe kon troe. Dem wendje en mati dati de agersi foe dat-ede na „bigi ipi”, di ini na „tem disi foe na kaba” ben bigin foe kon na fesi en di go moksi demsrefi nanga na fika pisi foe na bruid-groepoe bifo dem disi libi grontapoe foe go moksi demsrefi nanga na Bruidegom Jezus Kristus ini hemel. Akroederi nanga disi, na „bigi ipi” ben bigin, soleki ben taki na fesi ini Openbaring 7:9-17, foe kon de wan groepoe en foe moksi demsrefi nanga dem laatste memre foe na bruid-groepoe di ben gebore njoen nanga geest. Foedi dem sa tan na libi te na „bigi benawtoe” sa kon, dan dem sa de dja na grontapoe te na hemel trow sa trow. Dem sa prisiri toemsi foe na sani dati. — Ps. 45:15.
„GRANMAN . . . TAPOE NA HERI GRONTAPOE”
11. Na glori foe Kristus ini disi tem en ini na tem di e kon e komoto foe wan bari-nem foe hem grontapoe fositentata en fa Psalm 45:16 e sori dati na trow foe hem nanga na gemeente ini hemel sa meki froktoe?
11 Di Jezus ben de na grontapoe, a ben habi barinem fositem-tata. Ma na glori foe hem now nanga na tem di e kon no sa komoto foe no wan enkri foe dem sortoe fositen-tata disi. Ini hem na kownoe-lin foe kownoe David e tan, bikasi hem de na Teego Erfgenaam foe kownoe David en hem kownoekondre nooiti wan soema sa teki hem presi (Luk. 1:31-33). Ini Psalm 45:16 wan agersi fasi de, dati na trow foe hem nanga na gemeente foe 144000 glori discipel sa de wan tai-makandra di sa meki froktoe, soleki de na bedoeling foe wan trow. Foe dat meki na vers disi di taki gi na Bruidegom Kownoe e taki disi: „Ini na presi foe joe fositem-tata, joe pikin sa de, di joe sa meki de granman tapoe na heri grontapoe.”
12. San de na moro hee presi di dem „manpikin” disi kan kisi tapoe grontapoe, en foe sainde na Kownoe sa habi nofo „manpikin” foe poti dem tapoe na heri grontapoe?
12 No wan foe dem „manpikin” disi sa go teki na presi foe na hemel kownoe. Wan presi leki granman tapoe grontapoe de na moro hee sani, di wan foe dem „manpikin” disi sa kan kisi. Efoe „granman moe poti tapoe na heri grontapoe”, dan foeroe foe dem sa moe de. Na Kownoe sa habi nofo „manpikin” foe na sani disi, bikasi boiti na titel „Makti Gado”, dan wan foe den tra titel foe hem sa de „Teego Tata” (Jes. 9:6). Na volmaakti libisoema ofrandi foe hem gi na heri libisoema famiri ben meki a kan de disi. Nanga na verloesoe-ofrandi dati a ben bai dem alamala.
13. Fa na Kownoe sa tron na Tata di e gi libi na ala dede soema di ben bai fri en fa den fosi „granman” foe na Kownoe kan kon foe na „bigi ipi”?
13 Foe dati ede meki na Kownoe kan tron na Soema di e gi libi na „bigi ipi” bruidsmeisjes, di sa tan na libi te na „bigi benawtoe” sa kon, en di sa kon ondro hem doesoen-jari kownoekondre. A kan tron ooktoe na Tata foe na heri libisoema famiri di dede nanga den grontapoe fositemtata foe hem. Fa? Te a wiki dem opo foe dede foe kon baka na libi dja tapoe grontapoe (Joh. 5:28, 29). Dem man di frede Gado ondro ala dem grontapoe pikin disi a kan meki de „granman . . . tapoe na heri grontapoe”, efoe dem de boen foe dati. Tapoe na fasi disi na tiri foe hem sa de tapoe na heri grontapoe. Na wan logisch sani, dati na mindri foe na „bigi ipi” di pasa na „bigi benawtoe” en di sa de na fosi groepoe foe grontapoe borgoe foe hem kownoekondre, dem fosi „granman” foe na kownoe sa kon foe dini leki grontapoe vertegenwoordigers.
14. Fa dem „granman” disi sa tjari kon wan nanga dem trawan di sa dini tapoe grontapoe ini wan officiële positie en san na seti disi foe rigeri sa wani taki gi na heri libisoema famiri?
14 Fa disi sa de wan bigi grani! Dem „granman” disi foe na „bigi ipi” sa tjari kon wan makandra nanga trawan di sa dini ini wan officiële positie, bikasi dem fositentata foe Jezus Kristus en ala tra getrouw man foe Abel te go miti Johannes na Doopoeman, sa opo komoto foe dede en a sa meki dem de hem granman di e teki presi foe hem. Fa disi sa gi na heri grontapoe wan djaranti foe wan rigeri di sma no kan bai nanga tjoekoe! Disi de na toemsi fanowdoe rigeri di leki fa Jehovah ben prakseri sa opo foe teki na presi foe dem nationaal rigeri disi, di djonsrode na victori Kownoe Jezus Kristus sa aksi frantwortoe na dem.
15, 16. (a) Foe sainde na psalmsingiman leki fa Psalm 45:17 taki, ben wani libi langa? (b) Soema sabi na troe troe nem foe na Kownoe, en disi de warti foe kari en prijse ini so wan langa tem?
15 Na ati foe oenoe no e seki nanga dem switi sani disi di de na wi fesi ini na tem di e kon, soleki na ati foe na psalmsingiman ben seki? Ja, nanga prisiri wi mofo-boeba e teki dem laatste wortoe foe na psalmsingiman di a taki gi na Kownoe, disi na rigeri foe hem Gado eegi troon e hori baka gi hem: „Mi wani taki foe joe nem ini ala dem geslacht di e kon. Foe dati meki pipel sa prijse joe foe tem di no habi marki, ja, foe teego.” — Ps. 45:17.
16 Na psalmsingiman ben wani libi langa — „ini ala geslacht di e kon” — foe kan taki nomo foe na nem foe na Kownoe. A no ben kari na nem foe na Kownoe. A no ben sabi srefi na nem foe na Kownoe di a ben skrifi foe hem na profeetifasi en ondro krakti foe Gado geest. Ma wi ini disi tem kan sabi na Kownoe di na psalmsingiman ben skrifi foe hem na profeeti fasi en wi sabi hem nem. A de Jezus Kristus, na Pikin foe Jehovah Gado. Na nem foe hem de warti foe dem taki foe hem ini „ala geslacht di e kon”? Na psalmsingiman ben taki na fesi dati „pipel” sa de di ben sa feni disi troe troe en di foe datede ben sa prijse „foe tem di no habi marki, ja foe teego” na soema di e tjari na nem disi.
17. Foe sortoe doe foe wi see a de now na boen tem, en san disi sa wani taki gi wi te wi doe disi?
17 Wi e kisi na okasi now foe pasa libi libi na dee foe pai di e kon gi ala naatsi en foe wi prisiri wisrefi ini dem blesi foe Gado kownoekondre, di sa kon ini ala dem presi foe dem naatsi. Srefi now nanga bribi wi kan prisiri toemsi nanga hem Salfoe Kownoe, bikasi na wini foe na Kownoe disi na Har-mageddon de seker en na doesoen-jari rigeri foe hem de vaste. Ai, dat meki a de now — tide — na boen tem gi wi foe poti wi srefi na mindri dem „pipel” di sa prijse na victori Kownoe „foe tem di no habi marki, ja, foe teego”. Disi sa tjari bigi nem gi Jehovah Gado, hem hemel Tata, di hemsrefi de na moro hee „Kownoe foe teego” nanga na „Kownoe foe dem naatsi”. Te wi de doe disi, dan disi sa wani taki gi wi, dati wi sa kan libi wan libi pe wi sa prijse „foe teego” Hem salfoe Kownoe. Disi sa meki na libi de warti foe libi. Disi sa meki na teego libi foe wi de nanga wan hee marki.