Wan krosibé matifasi nanga Gado e jepi wi now?
„Jehovah de krosibé foe ala den soema di e kari hen . . . en na kré-babari foe den a sa jere, en a sa jepi den”. — Psalm 145:18, 19.
1, 2. Fa den wortoe foe David e sori ini sortoe toemsi boen situatie na man de di kon ini wan krosibé matifasi nanga Gado?
KOWNOE DAVID, di ben de ooktoe wan proféti, ben taki foe na kolokoe foe na man „di Gado meki kon regtvaardiki, sondro a ben wroko foe dati”, di a ben taki: „Kolokoe foe na soema, di kisi pardon foe hen takroe doe en di den sondoe foe hen ben tapoe; kolokoe foe na soema, di Jehovah no de soekoe hen sondoe moro” (Rom. 4:6-8; Ps. 32:1, 2). Na sondoe foe son wan man kisi pardon — a de wan krin soema ini Gado ai. Jehovah e teki hen leki wan krosibé kompe en ai si hen leki wan soema di onregtvaardiki fasi no de na hen, bikasi onregtvaardiki fasi, e meki wan soema kon de aparti foe Gado.
2 Foe taki foe na toemsi moi positie disi na a fesi foe Gado, David taki moro fara: „Prijse Jehovah, joe, mi sili, no frigiti ala den boen di a ben doe gi joe; foe ala joe sondoe a ben gi joe pardon en ala joe siki a de dresi, a verloesoe joe libi foe na olo, a meki hen lobi boen-ati en sari-ati de na joe tapoe leki wan kroon tapoe joe ede, a de foeroe joe heri libi nanga boen, a meki joe kon jongoe baka, leki wan arend.” — Ps. 103:2-5.
3. (a) Nanga sortoe lobi wortoe, den soema, di kisi pardon foe den sondoe nanga jepi foe Kristus slagti-ofrandi, kan kari Gado? (b) Fa wan soema e tan hori hen joisti positie na fesi foe Gado?
3 So wan soema kan kari Gado hen Tata (Matt. 6:9). Te a meki wan fowtoe en sondoe, soleki ala onvolmaakti soema e sondoe, den a kan aksi Gado pardon en foe kon krin, te a si dati disi pasa, sodati a tan hori na joisti positie na Gado fesi. Na apostel Johannes ben skrifi foe disi: „Efoe wi e taki, wi abi sondoe, dan wi e kori wisrefi en na waarheid no de na wi ini. Ma efoe wi bekenti wi sondoe, dan hen de getrouw en regtvaardiki foe gi wi pardon foe wi sondoe en krin wi foe na ongeregtigheid.” — 1 Joh. 1:8, 9.
4. Fa Jezus ben sori sortoe krosbé banti a abi nanga den soema di de hen discipel?
4 Fa wi kan taki ini na aladé libi, dati wan krosibé matifasi nanga Gado „foeroe wi libi nanga boen”? En sortoe matifasi na disi? Jezus ben tjari kon na krin sortoe krosbé banti ben de mindri hen nanga hen getrouw apostel, di a ben taki gi den: „Mi no e kari oenoe, moro langa srafoe, bikasi wan srafoe no sabi san hen masra e doe. Ma mi ben kari oenoe mati, bikasi ala sani, di mi ben jere foe mi Tata mi ben meki bekenti gi oenoe” (Joh. 15:15). Boiti dati, a „no e sjen foe kari den ’hen brada’” (Hebr. 2:11). A de troe dati na bijbel e taki foe kristen soema, dati den de srafoe foe Gado nanga Kristus. Ma foeroe tron na bijbel e gebroiki libisoema wortoe, dati wani taki wortoe di wi sabi, foe meki bepaalde afersi kon krin gi wi. Disi e doe gi wi foe wi onvolmaaktifasi ede en son tron foedi wi no lepi ini kristen sabi nanga kristen inzicht. (Loekoe Romeini 6:19; 1 Kor. 3:1, 2; loekoe toe Lukas 17:7-10.) Soboen, aladi na wortoe „srafoe” e gebroiki, tog na lobi di Jezus Kristus abi gi wi, troe troe de moro bigi leki na lobi di sortoe masra ben sa abi oiti gi wan srafoe, en a wani dati wi abi na overtoigi, dati a de si wi leki hen Mati.
5. Fa Jezus ben sori tapoe na tranga banti nanga lobi foe Gado gi den soema di lobi hen?
5 Jezus ben meki kon na krin, dati Gado tai hensrefi net so krosibé na den soema di e kon na Kristus, di a ben taki: „Efoe wan soema lobi mi dan a sa hori mi wortoe, en mi Tata sa lobi hen, en wi sa kon na hen en go libi nanga hen” (Joh. 14:23). Sortoe moro krosibé matifasi wan soema ben sa wani abi moro leki dati? (Loekoe Openbaring 3:20). Baka di Jezus ben taigi hen discipel, dati a ben e gwe foe de na hen Tata, a ben sori dati Gado ben de ini wan moro krosibé matifasi nanga hen leki den ben prakseri, di a ben taki: „Tapoe na dé dati oen no sa aksi mi no wan aksi. Foe troe, mi taki gi oen: Efoe oen aksi na Tata foe wan sani, a sa gi oen hen ini mi nen. Te leki now oen no ben aksi no wan sani ini mi nen. Aksi en oen sa kisi, sodati na prisiri foe oen moe de reti. Ala den sani disi mi ben taki gi oen ini gersitori. Na joeroe e kon, dati mi no sa taki moro langa nanga oen ini gersitori, ma mi sa sori oen krin foe na Tata. Tapoe na dé dati, oen sa aksi ini mi nen en mi no e taki gi oen, dati mi sa aksi na Tata wan sani gi oen. Bikasi na Tata srefi lobi oen, foedi oen ben abi lobi gi mi en oen ben bribi dati mi ben kon leki na soema di e teki presi foe na Tata.” — Joh. 16:23-27.
KISI KIBRI FOE OGRIDOE
6, 7. (a) Gado e kori wan soema troe troe go ini sondoe? (b) Fa a de loekoe en kibri wi?
6 Wan soema di de ini wan krosibé matifasi nanga Gado, troe troe sa kisi kibri foe no fadon go ini ogri-doe. Jezus ben taki dati wi ben moe begi Gado: „No tjari wi go ini tesi, ma poeroe wi foe na ogriwan” (Matt. 6:13). Disi e kon akroederi nanga na begi foe na psalmsingiman: „Poti tog wan waktiman gi mi mofo; poti tog wan wakti na a doro foe mi mofoboeba. No meki mi ati anga go na wan sani di ogri.” — Ps. 141:3.
7 Srefi aladi a ben gi pasi, dati tesi miti Kristus en disi e miti ala soema, tog Gado no e tesi soema nanga ogri sani (Jak. 1:13). Na a tra sé a no sa tapoe wan soema foe waka wan verkeerti pasi. Te korifasi nanga tesi e kon, dan Gado e kibri na soema di de ini wan krosibé matifasi nanga hen moro foeroe nanga na opo krin en srapoe foe hen ai gi na gevaar pe a de na ini. A de loekoe en kibri hen. Wan soema di e de makandra nanga Gado sa kisi krakti signal di e warskow hen.
8. Fa Gado e piki na begi: „No tjari wi go ini tesi”?
8 Wan soema di foe eksempel e kon ini na tesi foe foefoeroe ofoe foe gongosa, wantron wantron sa kisi wan toe sani na prakseri: na ogridoe sa pori na matifasi foe hen nanga Gado; den sortoe doe dati no e akroederi nanga na wet foe lobi; den e trowe sjen tapoe na boen nen foe Gado nanga Kristus, foedi wan Kristen e taki dati a de teki presi foe den; efoe a gi hensrefi abra na den sortoe verkeerti lostoe dati, a sa tjari sjen nanga sari kon gi den lobiwan foe hen. Na boen konsensi, di a ben aksi foe hen, di a ben sori bribi ini Kristus slagti-ofrandi foe sondoe, sa pori srefsrefi. Den prakseri disi, di e warskow wan kristen e kon ini hen foedi a de lési alaten na bijbel en foedi ofoe son tron wan tra kompekristen e sori hen tapoe wan sani. Den sa meki a skreki foe go doro en waka wantron wantron baka wan lostoe foe na skin, soleki a ben sa de nanga wan soema, di no abi na kibri foe wan boen matifasi nanga Gado. — Loekoe Spr. 7:22, 23 en 1 Sam. 25:32-35.
NA FRI FOE PRAKSERI EN FOE TAKI SANI
9. Fa na krakti foe na Wortoe foe Gado e kon na fesi te wi loekoe den naatsi di wi e kari na „kristenheid”?
9 Wan prenspari blesi, di e kon foe wan krosibé matifasi nanga Gado, de na bigi fri, di wan soema abi foe prakseri en foe taki sani. Loekoe leki wan bewijsi foe na krakti foe Gado Wortoe ini na tori disi den naatsi di den de kari na „kristenheid”. Aladi noiti den ben de ini wan krosibé matifasi nanga Gado, den ben gi pasi ini den toe hondro jari di pasa kaba, dati na Wortoe foe Gado ben kan panja fri sondro foe tapoe dati. Na bijbel ben tron wan oso-famiri-boekoe en aladi foeroe soema e trowe hen, tog joe ben abi soema, srefi di ben de rigeriman, di ben doe moeiti foe waka baka den toemsi moi moreel gronprakseri foe na bijbel. Disi ben tjari fri foe prakseri nanga taki sani en disi ben fri soema foe den boei foe kerki gwenti nanga bijgeloof sani foe den Doengroe Middeleeuwen. O moro nanga moro bijbel ben panja ini den kondre disi, o moro na standaard foe libi foe den soema ben go na loktoe.
10. (a) O fara den koniman nanga trawan di e studeri den wondroe foe den sani di Gado meki, e leri sabi Gado moro betre? (b) San wan soema moe doe, di wani kon ini wan krosibé matifasi nanga Gado?
10 Aladi so wan fra fra demakandra nanga Gado nanga jepi foe hen Wortoe e tjari lekti en moro betre libi omstandigheden kon, tog a de so, dati soema di e lési troe troe na bijbel en di e meki a de wan tjariman ini den libi, e njan moro foeroe boen foe hen. Na famiri-edeman Job e sori, dati moro de fanowdoe leki wan fra fra sabi foe Gado. Baka di a taki foe wan toe foe den wondroe sani foe den sani di Gado meki en di koniman kan verstan en tjari kon na krin nanga foeroe wetenschappelijk ondrosoekoe, a de taki: „Loekoe, disi de den lanki foe den pasi (foe Gado), en fa wan taki safri foe wan afersi foe hen ben de foe jere!” Bakaten Job e tjari kon na krin, dati foe troe troe koni moro de fanowdoe, dan soso foe leri sabi den „lanki foe hen pasi” — moro dan soso wetenschappelijke feiten. Wi moe leri sabi den toemsi moifasi foe Gado égifasi foe kan frede hen leki Na Soema di e hori joisti gronprakseri hé en foe waka baka den gronprakseri dati. Na koni disi joe kan kisi soso nanga wan studi foe hen Wortoe. Job e taki: „Loekoe! Na frede foe Jehovah — dati na koni, en tan farawe foe ogri, na verstan” (Job 26:14; 28:28). Na psalmsingiman ben skrifi foe na soema di e proberi foe bow wan krosibé matifasi nanga Gado nanga na loekoe ini na bijbel: „Kolokoe na soema de, di joe e teki en di joe e meki kon na joe, foe a mag tan ini den gadri foe joe. Troe troe, a sa abi nofo pasa marki foe na boen foe joe oso.” — Ps. 65:4.
SOEMA KAN PRISIRI HENSREFI INI WAN KROSIBÉ MATIFASI NANGA GADO?
11, 12. Sortoe soema Gado sa teki ini krosibé, switi matifasi nanga hen?
11 Wan matifasi, pe Gado e erken wan soema leki hen mati, soboen ben sa tjari toemsi bigi blesi di e tan. Na soema, di Gado e teki foe so wan krosibé matifasi, Psalm 15 e skrifi foe hen:
„O Jehovah, soema sa tan libi na ini joe santa tenti?
Soema sa libi na tapoe joe santa bergi?
Na soema, disi de waka opregti, en disi de wroko geregtigheid,
En disi e taki waarheid ini hen ati.
Disi no de gongosa tra soema, taki lé nanga hen tongo,
En disi no de doe trawan ogri,
En disi no de kosi trawan;
Na soema, disi veragti den ogri soema,
En disi respeki den, disi de frede Gado;
Na soema, disi e hori hen sweri, alwasi a de doe hen srefi ogri nanga dati;
Na soema, disi no de teki toemsi bigi intresi foe hen moni, bidrigi trawan,
En disi no de teki presenti, doe den onnowsel soema kroekoetoe.
Wan soema, disi doe ala dem sani disi dja, hen no sa seki noiti.” — Ps. 15:1-5.
12 Soso so wan soema sa frede Gado en leri sabi hen troe troe. So wan mati foe Gado, abi foe doe nanga den srefi algemeen problema, di ibri tra soema abi foe doe nanga hen. Ma a no de tan sondro jepi.
JEPI INI TEN FOE SIKI
13. Sa Gado e doe gi wan soema di e siki tranga, en fa wan kristen e si hori doro ini ten foe siki?
13 Wan kristen kan siki tranga. Foeroe tron a de so dati wan siki foe wan soema skin, abi wan krakti tapoe wan soema jeje gosontoe, di a no ben wani. A de wan moeiliki sani foe hori wan boen balans ini ten foe siki. Gado e firi tranga toe nanga na siki. Ma moro leki dati, a de gi jepi toe. Na psalmsingiman e taki: „Jehovah sa asisteri so wan soema na hen sikibedi; joe sa kenki na sikibedi foe hen na ini a ten foe hen siki” (Ps. 41:3). Gado no e pramisi, dati hen dienstknegti sa kon boen dorodoro ala tron. Ma a de gi kristen na djaranti dati a sa asisteri hen en meki dati a kan tjari na siki foe hen. Den wortoe foe na psalmsingiman, meki wi denki na wan verpleegster, di e sorgoe alaten gi wan sikiman, sodati ala pisi foe na skin sa didon boen, ofoe a de meki wi denki na papa ofoe mama, di nanga lobi e sorgoe gi wan siki pikin, e meki hen so switi gi den leki a kan, e wasi hen, krin hen bedi en e poti den laken boen, sodati a de firi hensrefi switi en boen. Efoe disi de na moro boen sani gi na soema, dan Gado kan opo hen poeroe foe hen sikibedi en kenki na sikibedi ini wan bedi foe gosontoe. Ma winsi a no kon boen, baka, dan Gado e meki ala sani waka foe na tanboen foe hen. (Rom. 8:28). A de kon moro tranga na jeje fasi, en a de verdrage na siki, aladi a de si disi leki wan fasi foe tranga leri ofoe opleiding, di e meki hen leki kristen kon moro tranga, moro nanga switifasi en moro attenter. A e memre dati Kristus ben pina. Na ondrofeni foe Jezus ben de foe na boen foe hensrefi nanga wi. Gado no ben libi Jezus en na paiman foe hen foe hori doro getrouw, ben de bigi. — Hebr. 4:15; 5:8, 9.
JEPI INI TEN FOE VERVOLGOE
14. Wi moe froewondroe efoe vervolgoe e kon en sortoe djaranti wi abi, dati wi sa kisi jepi?
14 Foedi kristen e teki na sé foe bijbel gronprakseri, dan stré en srefi vervolgoe kan kon. Disi ben pasa nanga David, di kownoe Saul ben vervolgoe leki wan meti en di wan krosibé mati ben tori hen, aladi hen égi manpikin ben meki mofo foe kiri hen, di a ben siki (1 Sam. 24:2; Ps. 41:9; 2 Sam. 15:31; 1 Kon. 1:1, 5). Tog a ben skrifi foe hen égi ondrofeni: „Hen (Jehovah) sa kibri mi ini hen kibripresi tapoe na dé foe ogri; a sa meki mi kibri ini hen tenti.” „Efoe mi égi papa nanga mi égi mama ben libi mi troe troe — ja, Jehovah srefi ben sa teki mi.” — Ps. 27:5, 10.
FRI FOE ECONOMIA FREDE
15. Foe sainde wan kristen no abi foe frede dati a sa mankeri den fanowdoe sani foe tan na libi?
15 Srefi foe na economia situatie wan kristen no abi foe broko hen ede. Na apostel Paulus ben skrifi: „Meki na fasi foe libi foe joe de fri foe na lobi foe moni, en de tevréde nanga den sani foe disi ten. Bikasi hen ben taki: ’Mi no so gwe libi joe noiti noso libi oiti!’ Sodati wi kan abi dekati en kan taki: ’Jehovah de mi jepiman; mi no sa frede. San wan soema ben sa kan doe mi?’” (Hebr. 13:5, 6). David ben taki ooktoe: „Na soema di e soekoe Jehovah, hen no sa mankeri wan boen sani.” Ooktoe a ben taki: „Mi ben de jongoe, en mi kon owroe, ma noiti mi no ben si, dati Gado libi wan regtvaardiki soema; mi no ben si den pikin foe hen waka begi brede.” — Ps. 34:10; 37:25.
VRÉDE NANGA NA PRISIRI FOE JEPI TRAWAN
16. San na wan toe foe den moro warti winimarki di wan kristen abi now leki wan bakapisi foe hen matifasi nanga Gado?
16 Wan foe den moro bigi winimarki foe wan krosibé matifasi nanga Gado ini disi ten de vréde foe ati en fri foe frede foe den sani di e kon tapoe a grontapoe nanga wisrefi. Wan kristen di ben ondrofeni na lobi sorgoe en kibri di Gado e gi na den soema di de diri gi hen, abi na seker howpoe, dati moro betre sani de ini na ten di e kon. Akroederi nanga na pramisi foe Gado a de loekoe na a kon foe njoen hemel nanga njoen grontapoe, pe retidoe sa libi (2 Petr. 3:13). A abi na howpoe dati aladi a sa moe dede, a sa kisi wan opobaka ini na regtvaardiki seti foe sani dati (Tori foe. 24:15). Aladé a abi na bewijsi foe san na apostel Paulus ben taki foe égi ondrofeni: „Na vréde foe Gado di bigi pasa ala prakseri (ala den fini sani san wan kristen ben sa kan prakseri), sa kibri oen ati nanga oen jeje memre nanga jepi foe Kristus Jezus.” — Fil. 4:7.
17. Sortoe tra prisiri wan kristen kan abi, foedi a de ini wan krosibé matifasi nanga Gado?
17 Foedi wan kristen e prisiri hensrefi ini so wan toemsi moi matifasi, dan a kan jepi trawan foe kon sabi moro foe disi. Wan moro bigi prisiri de leki na jepi foe trawan foe kisi wan sabi foe na waarheid foe Gado en foe kon ini wan boen matifasi nanga Jehovah en hen Manpikin. Nanga disi na prakseri, meki Jehovah kotoigi na heri grontapoe e go na den oso foe soema foe verteri den foe na „boen njoensoe”, aladi den e kon baka foe hori bijbelstudi. Te njoen soema e tjari kon ini kontakti nanga na kristen gemeente, dan den toe e ondrofeni na prisiri foe leri sabi boen na Tata en Na Soema di a ben seni kon Jezus Kristus. Gi ala den disi a wani taki „tégo libi”. — Joh. 17:3.