Préki ini wan grontapoe sondro wet en orde
„Foedi na libi sondro wet nanga orde sa kon moro foeroe, meki na lobi foe na moro bigi pisi foe soema sa kon kowroe. Ma soema hori doro te na a kaba, hen sa kisi libi. En na boen njoensoe disi foe na kownoekondre sa préki tapoe na heri grontapoe pe libisoema e libi leki wan kotoigi gi ala naatsi, en dan na kaba sa kon.” — Matt. 24:12-14.
1. O fara na libi sondro wet nanga orde e kon moro foeroe now ini na grontapoe? (2 Tim. 3:1-3)?
JOE e si dati na libi sondro wet nanga orde e kon moro foeroe now? Ini foeroe presi foe na grontapoe soema e tegoe gi wet nanga orde. Ini na moro bigi pisi foe den bigi foto, ogridoe de boen foeroe. Wan soema no kan waka veilig moro tapoe strati. Ini den laatste jari den ben poeroe foeroe tiri nanga jepi foe revolutie, aladi tra tiri e soekoe foeroe fetisani foe kaka foetoe gi oproeroe foe inisé nanga bedreiging foe dorosé. Srefi na communistisch grontapoe abi moeilijkheid, foedi den poti nationalisme tapoesé foe socialistisch „wanfasi”.
2. Fa na libi sondro wet ben soigi go ini foeroe foe den sekte foe na Kristenheid?
2 Fa a de nanga na kristenheid? Soleki Jezus ben taki na fesi foe na ten foe wi, dan na „kon moro foeroe foe na libi sondro wet nanga orde” abi wan pori krakti tapoe foeroe foe den sekte (kerki) foe hen. Na bijbel di abi wan joisti respeki gi wet nanga orde, foeroe soema e si hen now dati a no „boen foe na ten disi”. Foeroe foe den kerki go makandra nanga na maatschappij foe disiten di e gi pasi foe doe ala sani en den e si hoeroedoe, homoseksualiteit nanga bidrigifasi leki a no de ogri. Na so fasi den e kisi kristen ini nen, foe na sortoe di no „sa kisi Gado kownoekondre”. — Matt. 24:12; 1 Kor. 6:9, 10.
3. Fa soema di no e libi nanga wet ben proeberi foe kon inisé foe na kristen gemeente, en san Jezus e taki foe den sortoe soema disi?
3 Soema di no e libi nanga wet ben proeberi srefi foe kon inisé foe na troe kristen gemeente en den ben taki dati a no de now na ten foe „na pramisi de noja” foe wi Masra. Den e spotoe den owroeman en den taki dati a no de so, dati na Meester ben poti „wan getrouw nanga voorzigti foetoeboi” foe sorgoe gi hen kownoekondre-afersi tapoe grontapoe (2 Petr. 3:3, 4; Matt. 24:45-47). Na warskow foe Jezus ini Matteus 7:15-23 abi ooktoe foe doe nanga den sortoe soema disi. Wi e lési drape: „Loekoe boen nanga den falsi proféti, di ini skapoe-boeba e kon na oenoe, ma inisé den de krasi tigri . . . (tapoe na dé dati) mi sa verteri den na publiki: Mi no ben sabi oenoe noiti! Oen komoto na mi fesi, oen wrokoman foe na libi sondro wet nanga orde.”
4. Wi e kisi tranga foe kweki sortoe fasi, en fa wi kan sori dati wi abi na fasi disi?
4 Foe den soema di ben gersi troe troe leki skapoe, Jezus ben taki: „Soema hori doro to na a kaba, hen sa kisi libi.” Fa wi kan sori dati wi abi na fasi disi foe horidoro? We, te wi abi wan prati ini na kon troe foe den tra wortoe foe Jezus: „En na boen njoensoe disi foe na kownoekondre sa préki tapoe na heri grontapoe pe soema e libi leki wan kotoigi gi ala naatsi, en dan na kaba sa kon” (Matt. 24:13, 14). Te wi hori doro ini na meki bekenti foe na „boen njoensoe disi foe na kownoekondre” wi kan kisi libi.
5. (a) Foe sainde wi kan taki dati wi no e doe na wroko foe wi, wi-wawan? (b) Sortoe kroetoe-wroko e doe now en soema e doe hen?
5 Wi no e doe na wroko disi wi wawan, bikasi ini Jezus proféti-tori foe na „bosroiti foe na seti foe sani” den e verteri wi moro fara, dati „te Soemapikin sa kon ini hen glori, en ala engel nanga hen, dan a sa teki presi tapoe hen glori troon”. Komoto foe na hemel di wi no kan si a de doe wan kroetoe-wroko, pe a de prati den soema foe den naatsi „soleki wan herder e prati den skapoe foe den bokoboko”. Na pratiwroko disi e doro hen hémarki ini na „bigi benawtoe”, pe den „bokoboko” di no wani jere en go „ini na tégo koti-poeroe”, aladi den „skapoe” di e gi jesi e kisi na kari, foe kon teki na kownoekondre, di na Tata „ben sreka sensi na fundamenti foe na grontapoe”. — Matt. 24:3, 21; 25:31-46.
6. (a) San e meki soema kon sabi den „skapoe” nanga „bokoboko”? (b) Fa foeroe tron a kon na krin dati engel e tjari na oso-foe-oso wroko foe wi?
6 Fa den „skapoe” nanga „bokoboko” e meki soema kon sabi den leki so? Disi de wan bakapisi foe wan kotoigi-wroko, di den brada foe na kownoe di ben kisi salfoe nanga na geest en den kompe foe den e doe tapoe grontapoe, wan wroko di e doe „tapoe den moro farawe presi foe grontapoe” (Tori foe. 1:8) Moro foeroe we taki dja foe wan prékiwroko di e doe na heri grontapoe oso foe oso. Na activiteit disi e tjari leki bakapisi dati soema e teki jeje afersi tapoe wan boen fasi en disi wi kan si ini den wortoe di na kownoe e taki gi na klasse foe „skapoe”: „Mi ben de wan vreemde soema, en oenoe ben teki mi na oso” (Matt. 25:35). Na teki di den e teki hen „brada” a de si leki den doe dati na hen. Disi de tra fasi nanga na fasi fa tranga-ede soema e ontvange den en di no e poti prakseri tapoe jeje afersi. Na pratiwroko disi e pasa troe troe ondro na tiri foe engel (Matt. 25:31, 32). En akroederi nanga dati, a de so, dati engel e gi jepi ini na meki bekenti foe na „boen njoensoe”, bikasi fa a no pasa foeroe tron, dati wan opregti soema begi Gado foe jepi hen, en tapoe na momenti dati wan Kotoigi foe Jehovah ben kon na hen doro! En fa a no ben pasa foeroe tron dati wan ofoe tra ongewoon sani ben tjari wan kotoigi foe go na wan oso tapoe wan momenti dati tranga fanowdoe ben de foe jepi! Nanga na verstan, dati myriaden hemel engel e jepi wi, meki wi no tapoe noiti foe soekoe na soema di warti na „boen njoensoe” nanga jepi foe wan faja oso-foe-oso-préki.
WAKA BAKA NA MODEL FOE NA FOSI EEUW
7. (a) San e sori dati den fosi kristen ben teki fajafaja prati na a gi foe kotoigi „ini publiki en oso foe oso”? (b) Sortoe tra vergelijking wi kan meki mindri fosi-eeuw kristen nanga disiten kristen?
7 Na mindri den fosi kristen wan difrenti no ben de foe geestelijken nanga leken. Den soema di ben bribi ini Masra Jezus Kristus, no ben de soso „sidon-en arki-kristen”. Den ben de actief en man en so toe oema ben teki prati na a gi kotoigi „ini publiki en oso foe oso” (Tori foe den Apostel 20:20). Den „ben foeroe Jeruzalem letterlijk nanga na leri foe den” en den ben préki na boen njoensoe „ini na heri mekisani di de ondro hemel” (Tori foe. 5:28; Kol. 1:23). Soleki na historiaskrifiman E. Arnold e taki ini na boekoe foe hen „The Early Christians”, dan den ben de succesvol, bikasi „srefi den moro eenvoudig memre foe den groepoe foe den . . . ben de boskopoeman, di ben panja na waarheid di a ben kisi”. Disi moe de now ooktoe so, bikasi den wortoe foe Paulus di e kon now abi foe doe nanga kristen di e bribi: „Sori bribi ini ati e meki wan soema kon regtvaardiki, meki publiki bekenti nanga mofo e meki wan soema kisi libi”. En ete wantron na bakapisi de dati bigi groepoe soema e jere na „boen njoensoe”, bikasi na babari foe den waka go na heri grontapoe, en den wortoe foe den na den oekoe foe grontapoe. — Rom. 10:10, 18.
8. Sortoe bigi difrenti de foe si mindri den religie foe na kristenheid nanga na troe kristendom?
8 Fa na profétisch boskopoe foe troe kristen kenki bigi nanga den gwenti foe na kristenheid! Na historia-skrifiman H.G. Wells ben taki na sani disi ini hen boekoe Outline of history:
„A de fanowdoe foe wi poti na prakseri foe na lésiman tapoe den bigi difrenti mindri na volledig ontwikkeld kristendom foe Nicea (foe 325) nanga na leri foe Jezus foe Nazareth . . . San e kon na krin, de, dati na leri foe Jezus foe Nazareth ben de wan profetisch wan foe na njoen sortoe di ben bigin nanga den Hebrew proféti. . . . A ben sabi soso wan organisatie foe prékiman en na moro prenspari wroko ben de di foe na préki. Na volledig ontwikkelde kristendom foe na vierde eeuw na a tra sé ben de moro foeroe wan priester-religie foe wan sortoe di grontapoe ben sabi doesoen doesoen jari kaba . . . a ben abi wan organisatie di ben gro esi foe diaken, priester nanga bischop.”
Gi na profetisch leri foe den ini disi ten, troe kristen abi na diri boen njoensoe foe na kownoekondre di opo, en di moe „préki fosi ini ala naatsi”, bifo na kaba kon. — Mark. 13:10.
9. Sortoe oso-foe-oso-diniwroko, di wan bigin ben meki nanga hen ini 1919, e doe te leki na dé foe tide nanga winimarki?
9 A disiten préki foe na „boen njoensoe” ben kisi wan extra poesoe, baka di ben verteri tapoe 5 september 1919 ini na congres di ben hori ini Cedar Point (Ohio, Amerkankondre), dati wan njoen tijdschrift The Golden Age (Na Gowtoe Pisiten) ben sa kon leki tijdschrift. Na tijdschrift disi abi now na bijbel titel „ONTWAAKT!” (Rom. 13:11). A ben de na wrokosani foe wan spesroetoe wroko, di na Wachttoren genootschap ben verteri foe doe na a ten foe na congres:
„Na wroko nanga na Gowtoe Pisiten de wan oso-foe-oso-seri foe boekoe nanga na kownoekondre-boskopoe foe verteri na dé foe na atibron foe wi Gado en foe trowstoe den di e sari.”
Te leki na dé foe tide, na oso-foe-oso-wroko nanga na tijdschrift Ontwaakt! en ooktoe na tijdschrift De Wachttoren de ete wan foe den moro warti methode foe miti soema geregeld nanga „boen njoensoe”.
10. Sortoe kari foe doe wan sani ben de foe jere ini 1922 en fa disi ben tjari kon akroederi nanga na oso-foe-oso-activiteit?
10 Na oso-foe-oso-wroko foe Jehovah kotoigi ben kisi moro krakti sensi 1922, wan jari pe tapoe na tweede congres ini Cedar Point den wortoe di e kon now ben taki foe doe wan sani:
„Go na fesi ini na feti, te leki ibri pisi foe Babylon pori. Meki na boskopoe bekenti ala presi. Grontapoe moe sabi dati Jehovah na Godo en dati Jezus Kristus de Kownoe foe den kownoe en Masra foe den masra. Disi de den dé foe den dé. Loekoe, na Kownoe e tiri! Oen de den publiki prékiman. Foe datede: Préki, préki, préki, na Kownoe nanga hen kownoekondre.”
Wàn dé foe na congres ben poti na wan sé foe gi kotoigi oso foe oso ini groepoe en leki wi kisi foe jere dan den kownoekondre-prékiman ben prati 10.000 boekoe. Te leki na dé foe tide, spesroetoe programma foe na oso-foe-oso-préki tapoe congres e tjari prisiri gi den soema di e fisiti den congres.
WAN LEGRE FOE „SPRENKA” E HARI GO
11. (a) Nanga san na bijbel e agersi na legre foe kotoigi, di e doe den prékiwroko oso foe oso? (b) Sortoe krakti na „sprenka”-activiteit disi ben abi tapoe (1) den geestelijken (2) opregti soema?
11 Ini den jari ’20 nanga ’30 na faja kotoigi-wroko disi oso-foe-oso ben de leki wan sprenka-plaag di ben hari pasa na kristenheid. Ini Openbaring 9:7-10 wi e lési foe disi: „Den sprenka ben de leki asi, di de sreka sreka foe go na feti . . . En na babari foe den fré ben de leki na babari foe wagi nanga foeroe asi di e lon go na feti. Ooktoe den abi tere nanga maka leki kroektoetere.” Wan „makti” legre foe faja kotoigi ben panja go na den bigi nanga pikin foto foe na kristenheid en den ben tjari falsi leri nanga falsi kerki-doe kon na krin. Nanga disi foeroe tron den geestelijken ben kisi „soetoe” so, dati den ben bigin foe gensi. Na „sprenka”-groepoe ben bigin verteri dati na dé e kon krosibé, dati Jehovah sa sori hen atibron na ala soema di e gi hen nen sjen en ben gi trowstoe na opregti soema nanga na prisiri njoensoe, dati na paradijs sa kon baka tapoe grontapoe ondro Gado soevereiniteit. — Jes. 61:2.
12. (a) Foe sainde den „laatste dé” disi no de wan ten foe de te vréde? (b) Fa den wortoe foe Joël tapoe na tori foe na „sprenka”-legre kan tjari kon tapoe na activiteit foe Jehovah Kotoigi?
12 Den „laatste dé” disi no de na ten foe de tevréde (2 Tim. 3:1). A de soleki na proféti foe Gado Joël ben taki: „Na dé foe Jehovah e kon, bikasi a de krosibé!” (Joël 2:1) Aladi a de gi den aanbegiman foe falsi religie wan dé foe doengroe nanga broeja en skreki, den sma di lobi Gado kan prisiri now ini jeje leti di gersi na „leti foe na mamanten di panja tapoe den bergi” (Joël 2:2a). Leki wan „sprenka”-legre den ben tjari na kownoekondre-boskopoe oso foe oso. Na proféti foe Gado e skrifi foe na faja activiteit foe den nanga den wortoe disi:
„Wan makti en bigi volkoe de; na speri foe hen no ben kon foe de sensi na onbepaalde ten di pasa en baka hen no wan sa de moro te leki den jari foe pikin te pikin. Na fesi foe den wan faja e njan sani en baka den fajavlam e pori sani. Leki na djari foe Eden na kondre de na den fesi; ma baka den wan sabana di den libi de, en a sori toe dati foe hen e tan” (Joël 2:2b, 3).
Ja, troetroe, noiti ete wan jeje legre ben de leki den salfoe kotoigi disi foe Jehovah! Den waka pasa na grontapoe en den ben tjari na sondoe foe babylon religie kon na krin en pori krin krin ibri pisi foe na gebied foe den di ben gersi Eden. Ma den e tjari ooktoe trowstoe go na den oso di e teki na „boen njoensoe” nanga waarderi. Nanga mofo foe Joël Jehovah e taki foe den bigi ipi kotoigi disi:
„Leki tranga man den e lon. Leki sroedati den e kren skotoe . . . Tapoe den oso den e kren. Na den fensre den e pasa go inisé leki wan foefoeroeman . . . En Jehovah srefi sa meki soema jere hen sten na fesi foe hen sroedati-makti, bikasi hen kampoe de boen foeroe. Bikasi hen di e doe hen wortoe abi makti; bikasi na dé foe Jehovah de bigi en wan frede sani en soema kan pasa hen?” (Joël 2:7-11)
Ondro na kibri foe den myriade hemel engel den jeje „sprenka” disi ben doe den oso foe oso-wroko. Na gewoon pipel e arki nanga ala prisiri na den, foedi na „frede en skreki dé foe Jehovah e kon krosibé” — loekoe na boekoe Godsdienst, kapitel 6 nanga 7 (1940); ooktoe na Watchtower foe 15 juni nanga 15 juli 1939, ondro „Doom of Religion” (Na go na ondro foe religie).
13. Sortoe „asi” leki wrokosani ben jepi na „sprenka”-legre ini na ten disi, en sortoe bigi kotoigi oso foe oso disi ben tjari kon?
13 Na proféti Joël ben si ini wan visioen fa na legre disi foe „sprenka” ben opo waka leki „asi” di de sreka sreka foe feti en di e meki wan babari leki di foe foeroe wagi (Joël 2:4-6). Den prékiman disi foe na kownoekondre de troe troe wan bigi legre te den e feti wan jeje feti tapoe na heri grontapoe nanga na go foe den oso foe oso! En ini na visioen foe Johannes den e skrifi moro fara foe asi nanga asiman na den tapoe di de „wan legre foe asiman” en na nomroe foe den de so wan „toe myriade tron myriade” — 200.000.000 — ! (Openb. 9:16-19). Den „asi” disi de makti wrokosani di de wan jepi foe meki den kroetoe foe Jehovah bekenti! O boen wi kan agersi den nanga den miljoen en miljoen bijbel, boekoe nanga tijdschrift, di den „sprenka”-groepoe ben prati ini ala den jari ini na oso-foe-oso-activiteit foe den! (Loekoe „Dan is Gods mysterie voleindigd”, kapitel 17). Soso ini na jari 1978 den ben prati makandra nanga na „bigi ipi” di Openbaring 7:9-17 e kari, 216.709.937 tijdschrift foe na Wachttoren nanga Ontwaakt! ini den oso. Na oso-foe-oso-préki di na legre foe „sprenka” e doe, e meki troe troe dati wan bigi kotoigi ben gi.
VERVOLGOE DI E KON MORO FOEROE
14. Fa wi kan tjari Joël 2:7 kon akroederi nanga na activiteit di Jehovah Kotoigi e doe ondro den wet di e tapoe na wroko foe den?
14 Féjanti foe na waarheid ben proeberi foe tjari wan kaba kon na a préki-activiteit disi. Ini foeroe kondre den nationalistisch tiriman ben poti wan wet tegen na „sprenka”-wroko. Den ben proeberi foe poti wan skotoe gi na Kownoekondre-prékiwroko. Ma na „sprenka”-legre kren tapoe den sortoe skotoe disi leki „sroedati”. Ini son foto ini kondre pe den tapoe na wroko, den soema ini na foto di abi belangstelling ben moksi den srefi nanga den Kotoigi en den e tjari den go na den oso pe den sabi dati soema nanga switifasi e libi drape. Son tron den e fisiti soso wan ofoe toe oso ini wan blok en den e doe a srefi ini wan tra blok. Foeroe tron den e gi kotoigi soso nanga na bijbel. Ini tra kondre den kotoigi e doe wan moi wroko na den okasi di den e feni, aladi den e angri na a dé dati den boei di tapoe den sa broko komoto, sodati den kan go fri baka oso foe oso.
15. Sortoe wortoe na Hékroetoe foe Amerkankondre ben taki foe gi na oso-foe-oso-préki foe wi krakti?
15 Ini na ten foe na Tweede Grontapoe Feti den religieuze geestelijken ini Amerkankondre ben doe ala moeiti foe sorgoe dati na oso foe oso activiteit foe Jehovah Kotoigi tapoe. Na foeroe okasi na Hékroetoe foe Amerkankondre ben erken, dati na oso-foe-oso-préki abi hen gron ini na mama-wet, di e djaranti na fri foe dini fa wan soema wani, na fri foe taki nanga foe skrifi sani ini boekoe. Poti prakseri tapoe na bijbel gron foe na wroko foe Jehovah Kotoigi, na Hékroetoe ben taki ini mei 1943, baka di wan bosroiti ben teki nanga moro foeroe foe den sten ini na zaak foe Murdock kontra Commonwealth of Pennsylvania:
„Den e taki dati den e waka baka na eksempel foe Paulus ’foe préki publiki en oso foe oso’ (Tori foe. 20:20). Den e teki na komando foe na bijbel letterlijk, te tanapoe drape: ’Go na a heri grontapoe en préki na evangelium gi ibri mekisani’ (Mark. 16:15). . . . Na fasi disi foe evangelie-wroko difrenti kerki-sekte e gebroiki, te leki na dé foe tide boen foeroe, en di nanga jepi foe seriman e tjari na Evangelie go na doesoen doesoen oso en di nanga jepi foe fisiti e proeberi foe wini soema gi na bribi foe den. A de moro leki préki; A de moro leki na panja foe boekoe. Na wan combinatie foe ala toe.”
Na legre foe sprenka nanga den kompe foe den ben kren troe troe tapoe wan boen fasi pasa den skotoe foe lantiwet, di den féjanti ben opo poti tegen na oso-foe-oso-préki foe den.
OSO FOE OSO — TAPOE NA HERI GRONTAPOE
16. (a) Sortoe wroko engel e doe now ini na heri grontapoe? (b) Foe sainde meki den „préki”-methode foe den zendeling foe na kristenheid no ben abi winimarki?
16 Di Jezus ben tjari wan foe den gersitori foe hen kon na krin, a ben taki: „Na gron de na grontapoe . . . Na kotiwroko de wan bosroiti foe wan seti foe sani, en den kotiman de den engel” (Matt. 13:38, 39). Na apostel Johannes ben si ooktoe ini wan visoen fa engel ben sa doe wroko ini disi „ten foe na kaba” en a ben skrifi foe datede:
„Mi ben si wan tra engel fré ini na mindri foe na hemel, en a ben abi tégo boen njoensoe foe meki dati bekenti leki boen ten gi den soema di e libi tapoe grontapoe en na ibri naatsi en lo en tongo en ibri pipel en den taki nanga tranga sten: ’Frede Gado en gi hen glori, bikasi na joeroe foe na kroetoe foe hen ben kon, en aanbegi hen foe datede di ben meki na hemel nanga na grontapoe nanga na se nanga den watra-fonten!’ En wan tra engel, wan tweede wan, ben kon baka hen en a taki: ’A fadon! Na Bigi Babylon fadon, hen di ben meki ala den naatsi dringi na win foe hen hoeroedoe!’” (Openb. 14:6-8)
Fa ala den volkoe foe na libisoema famiri ben sa kisi foe jere foe na boen njoensoe foe Gado Kownoekondre-tirimakti en foe na fadon en pori di e kon foe na grontapoe kownoekondre foe falsi religie? Nanga den methode foe na kristenheid en foe go na den sokari „heiden” naatsi foe bow skoro, atoso en reliefcentra en préki wawan tron gi den „alési-kristen” di e kon na den? Nono, bikasi den sortoe methode disi no kan abi winimarki. En noiti den ben abi winimarki toe, en den religie foe na kristenheid abi ini foeroe foe den kondre di no de kristen kondre wan takroe nen, bikasi ini hondro hondro jari a ben abi frantwortoe ooktoe ini na smokkel foe fetisani en koloniale feti.
17. Sortoe methode den zendeling foe Jehovah Kotoigi ben gebroiki en nanga sortoe winimarki?
17 Ondro na tiri foe den hemel engel ini den laatste jari wan heri tra zendingwroko ben doe. Foe sensi na jari 1943 Jehovah Kotoigi e meki gebroiki foe na Wachttoren-Bijbelskoro Gilead (a ben abi hen bigin ini South Lansing, New York, Amerkankondre), di ben opo nanga na spesroetoe prakseri foe leri soema foe na prékiwroko tapoe na heri grontapoe. En den ben seni den zendelingen disi foe ben préki „na publiki en oso foe oso,” hori oso-bijbelstudi en tjari soema di abi belangstelling kon makandra ini njoen gemeente. Na publiki préki disi oso foe oso ben abi winimarki? Foe troe! Ini 1943 joe ben abi ini 54 kondre nanga gebied foe grontapoe 126.329 Kotoigi foe Jehovah, di ben de ini 6310 gemeente. Ini 1978, 35 jari na baka joe ben abi ini 205 kondre 2.182.341 faja kotoigi, di ben orga ini 42.255 gemeente.
18. (a) Na gi kotoigi oso-foe-oso de teleki na dé foe tide prenspari ete, en foe sainde meki joe e piki so? (b) Fa Jehovah dienstknegti moe si na rol foe den ini na kroetoe-wroko? (c) San wi moe doe foe kan de seker foe kolokoe te foe kaba?
18 Te na „joeroe foe na kroetoe” foe Gado e kon krosibé, dan na kaba foe na oso-foe-oso-wroko disi, di den soema ondro wi e doe ini den égi kondre ofoe den zendeling ini wan tra kondre, moe kon esesi toe (Openb. 14:7). Aladi foeroe sma kande e meki den sabi den now leki „bokoboko”, tog ini den difrenti gebied „skapoe” e wakti tapoe wi. Te wi e go doro foe doe nanga dekati wi oso-foe-oso-wroko, dan hemel engel sa sorgoe dati wi tjari go na den „skapoe” disi. Na Jezus di ben poti tapoe na troon de na Kroetoebakra. Wi de soso sakafasi dienstknegti, di abi na grani foe pré wan rol ini na kroetoewroko foe hen en wi kan doe disi te wi „gi kotoigi finifini” en leri ini publiki en oso foe oso (Tori foe. 20:20, 21). Heri esi den foto foe na kristenheid sondro wet nanga orde en di foe na heri grontapoe sa „fadon tron broko ston-ipi, foe kan de sondro soema foe libi na ini.” Kolokoe den soema sa de di ben gi jesi na a kari foe go ini Jehovah diniwroko en di ben taki: „Dja mi de! Seni mi” — Jes. 6:8-11.