„Den sroto foe na kownoekondre” en na „bigi ipi”

1. Sortoe aksi de kon na na sé foe Filippus foe na jari 36 G.T. efoe a ben go libi na Cesaréa ini na ten dati?

INI na jari 36 G.T. ini Cesaréa, na na westsékanti foe Palestina, wan prenspari sani feni presi ini na kristen historia. Wi no sabi seker efoe na prékiman Filippus ben go tan libi drape ini na jari dati. Efoe disi ben de so, foe sanede a no en ben gebroiki foe jepi wan seker srodati-edeman foe na Italian afdeling di ben abi kompi drape? Filippus ben waka na fesi foe na apostel Petrus foe meki na kristen activiteit bigin lolo ini Samaria, so foe sanede no now, ini 36 G.T., ini Cesaréa? Na geïnspireerde Skrift de gi wi na piki.

2. O’ten na Mozaïsche Wetsverbond no ben abi krakti moro, èn olanga na fosi-presi behandeling foe den besnij djoe ben tokoe go doro?

² Na Wetsverbond, foe san Moses ben de mindriman mindri Jehovah nanga Israël na na bergi Sinaï ini Arabië, ben komoto na pasi foe di Jesus Kristus, na bakapikin foe Abraham èn kownoe David, ben spikri na wan oedoe. Dati ben pasa dri nanga afoe jari na baka di ini 29 G.T. Jesus ben dopoe ini watra èn a ben salfoe nanga jeje. Tokoe Jehovah ben tan gi den gebore djoe nanga Samariasoema ete dri nanga afoe jari wini marki, foe kan meki na profétitaki foe Daniël 9:24-27a kon troe. Na „wiki” disi ofoe pisitem foe sébi jari ben kaba ini na di foe sébi moenkenkimoen (Tisjri) foe 36 G.T. Sinsi na ten dati den Israël bakapikin foe Abraham ben kon tanapoe tapoe na srefi jeje niveau leki den soema foe den no-djoe naatsi, den heiden di no ben besnij. Baka dati na fosi-presi behandeling di na Gado foe Abraham ben gi den djoe, ben kaba! Fa disi ben kon na krin ini 36 G.T.?

3. (a) Pe na apostel Petrus ben de na ten dati, èn foe sanede? (b) Foe sanede den besnij djoe kristen ini Jeruzalem ben kroetoe Petrus foe na frémde sani san a ben doe?

³ Ini na ten disi Petrus ben kon na na sipifoto Joppe na baka di na kristen gemeente ben seni wan tranga kari foe a kon èn a ben opo baka foe dede na djoe kristen oema Dorkas di ben lobi foe gi soema sani. A ben tan wan toe dé na na oso foe Simon na mekiman foe leer (Tori foe den Apostel 9:36-43). Wan heiden di no ben besnij ini na ten dati ben de net soleki fa a no switi foe de nanga wan soema ini na ten disi di sroto poti na dorosé foe na gemeente foe Gado pipel, na srefi fasi a ben de foe no makandra nanga en (Matth. 18:17). Te leki na ten dati na djoe kristen Petrus soboen noiti ensrefi nanga en fri wani ben go ete ini na oso foe wan heiden di no ben besnij. (Disi ben kan taki séker toe foe na prékiman Filippus) Di bakaten den besnij djoe kristen ini Jeruzalem ben kisi foe jere taki tokoe Petrus ben go na ini na oso foe wan heiden, den ben kroetoe en, taki „a ben go na ini oso foe soema di no besnij èn a ben njan nanga den”. — Tori foe den Apostel 11:3.

4. Fa na djoe-kristen apostel Petrus ben meki soema kon sabi en firi di a ben go na ini na oso foe wan heiden ini Cesaréa?

⁴ Srefi Petrus, di tokoe ben de wan toe jari kaba wan kristen apostel, ben taki gi na ososoema ini Cesaréa o’soema oso bigin bigin a no ben prefoeroe foe go na ini: „Joe sabi éri boen taki a no fiti gi wan djoesoema foe go makandra nanga wan soema foe wan tra ras” (Tori foe den Apostel 10:28). Heiden pipel den ben loekoe den leki no-krin ofoe doti.

5, 6. Sortoe troe tori Petrus ben tjari kon na fesi foe verdedig en fasi foe doe ini Cesaréa sortoe sani ben meki soema kroetoe en?

⁵ Foe ferdedig ensrefi Petrus ben moesoe ferteri den apostel nanga den tra besnij djoe kristen ini Jeruzalem foe den troe tori. San ben de den troe tori? Disi: dati Petrus no ben doe foe di ensrefi ben wani ma foe di a arki Jehovah Gado.

⁶ Di Petrus ben de na ini na oso foe Simon, na mékiman foe leer ini Joppe, Gado ben seni Petrus wan dren (visioen) foe meki a froestan taki san Gado ben meki kon krin, Petrus no ben moesoe tan kari no-krin. Baka dati dri man di na ltalian centurio (edeman abra ondro) Cornelius ini Cesaréa ben seni, ben doro na na oso èn den aksi efoe Petrus ben de drape. Gado ben komander na djoe-kristen apostel disi now foe go nanga den, „sondro foe tweifri . . . , bikasi na mi seni den”. Siksi foe den besnij djoe kristen foe na gemeente Joppe ben waka makandra nanga Petrus na na sekanti langa langa go na Cesaréa di ben didon moro na noordsé. Di na tra dé den ben go na ini na oso foe na heiden centurio Cornelius, a ben ferklare gi den taki Gado engel ben kon na en fesi èn ben gi en komander foe meki Petrus kon na en foe Joppe. Na engel ben taki: „A sa taki den sani gi joe nanga san joe nanga joe eri osofamiri sa kan kon verloesoe.” — Tori foe den apostel 10:1-33; 11:14.

7. O’fara Petrus kon na en taki ini na oso foe na Italian centurio Cornelius?

⁷ Sondro foe sabi san ben sa pasa wan ten wan ten baka disi, Petrus bigin taki foe na boskopoe foe na grontapoe prékiwroko foe Jesus Kristus, en dede nanga en opo baka foe dede nanga jepi foe Gado makti di no abi marki. Ini en taki Petrus ben doro na punt di a ben taki: „Disi de na Wan . . . di Gado ben poti leki kroetoebakra foe den libiwan èn den dedewan. Foe en ala profeet de gi kotoigi taki ibriwan di de poti bribi ini en, sa kisi pardon foe en sondoe nanga jepi foe en nen.” — Tori foe den apostel 10:34-43.

8. Sortoe beweisi Gado gi di Petrus ben taki ete dati now a ben meki heiden di e bribi èn di no besnij kon na ini na gemeente di kisi santa jeje?

⁸ Di Petrus ben taki disi, Jehovah Gado ben gi na beweisi dati now a ben meki heiden di e bribi, nanga aladi den no besnij, kon na ini na gemeente foe kristen di kisi santa jeje, bikasi wi e lési: „Na srefi ten di Petrus ben taki ete foe den tori disi, na santa jeje fadon tapoe ala den di ben jere na wortoe. En den getrowwan di ben kon nanga Petrus en di ben de besnij soema ben ferwondroe, bikasi na fri gi foe na santa jeje ben trowe tapoe soema foe den naatsi toe. Bikasi den ben jere den e taki ini tongo èn den ben grani Jehovah.” — Tori foe den apostel 10:44-46.

9. Fa Petrus baka ten ben taki foe na wroko foe santa jeje ini Cesaréa, èn nanga san a agérsi na wroko disi?

⁹ Di Petrus ben ferteri na tori disi ini Jeruzalem, a ben taki: „Di mi bigin foe taki, na santa jeje fadon na tapoe den, net soleki ini na bigin [nanga Pinksteren 33 G.T.] tapoe wi toe. Dan mi memre den wortoe foe Masra, fa a ben taki: ’Johannes ben dopoe troe nanga watra, ma oenoe sa dopoe ini santa jeje.’ Efoe Gado gi den na srefi fri gi leki san a gi wi, di kon tron soema di de bribi ini Masra Jesus Kristus, soema ben de mi dan, dati mi ben sa kan ori Gado tegen?” — Tori foe den apostel 11:15-17.

10. San Petrus taki now ben moesoe pasa nanga den heiden disi di no ben besnij, èn foe sanede?

¹⁰ San Petrus ben doe baka dati? „Dan Petrus piki: ’Wan soema [foe den siksi djoe kristen di ben go nanga Petrus] kan tapoe na watra, sodati den disi, di so leki wi [besnij djoe kristen] kisi na santa jeje, no ben sa kan dopoe?’ Baka dati a gi komander taki den ben moesoe dopoe ini na nen foe Jesus Kristus.” — Tori foe den apostel 10:46-48.

11. (a) Leki sortoe soema den heiden di ben kisi jeje èn di ben bribi sinsi na ten dati ben kan wroko sondro prakseri? Foe sanede? (b) Fa na wroko foe na santa jeje ben de na dri okasi èn na dri difrenti groepoe?

¹¹ Na sowan fasi „Foe na fosi tron Gado poti en prakseri na den naatsi di [no besnij] . . . foe teki na mindri foe den wan pipel foe en nen” (Tori foe den apostel 15:14). Na na okasi disi Petrus ben gebroiki ini na oso foe na centurio Cornelius di no ben besnij ete wan foe den „sroto foe na kownoekondre foe hemel”, na di foe dri wan. Sinsi na tem dati den discipel di ben salfoe nanga jeje ben kan de kotoigi foe Jesus „te na na moro fara pisi foe grontapoe” (Tori foe den apostel 1:8). San Gado ben opo nanga jepi foe na man di ben abi sroto Petrus, ben tan opo sodati wan grontapoe kotoigi ben kan gi. Foe kroedéri nanga disi na santa jeje ben „fadon” „tapoe” (Grieki tongo: epipiptoo) dri difrenti groepoe foe soema di e bribi, (1) tapoe den dopoe 120 discipel èn, baka ten, tapoe sowan 3000 djoe di ben bekeer, ala nanga Pinksteren ini 33 G.T. ini Jeruzalem, (2) tapoe den dopoe Samaritan, ma nomo baka na kon èn den wroko foe den apostel Petrus nanga Johannes èn (3) tapoe den heiden di ben bribi di ben de ini 36 G.T. ini na oso foe Cornelius ini Cesaréa. — Tori foe den apostel 1:15; 2:1-4, 38, 41; 8:15-17; 10:44, 45; 11:15, 16.

OPO WAN PASI GI NA „BIGI IPI”

12. Sortoe groepoe Jehovah ben meki sinsi na ten dati, èn foe soema a ben teki den?

¹² Ini den jari ondro di ben folgoe Jehovah ben teki foe den djoe di besnij, Samaritan di besnij nanga heiden di no besnij wan „pipel foe en nen” (Amos 9:12). Na pipel disi foe Gado nen ben sa de foe joisti 144.000 soema, di ben sa de makandra nanga Jesus ini en emel koninkondre. — Openb. 7:4-8; 14:1-3.

13. San Njanjan foe kristen di e prakseri nanga Het goddelijk plan der eeuwen ben sori foe natuur èn den verloesoe di abi foe doe nanga den?

¹³ Ini september 1881 na Wachttorenuitgave Njanjan foe kristen di e prakseri (Engels) ben druk. Bakaten, ini 1886, na boekoe Het goddelijke plan der eeuwen (Engels) ben gi uit. Den toe publikatie disi ben sori taki na jeje natuur nanga na libisoema natuur no de na srefi ma dati den de difrenti. Na so meki na ferloesoe foe na gemeente di opo nanga na jeje den 144.000, di abi na ópoe foe libi na ini hemel, de difrenti foe di foe den libisoema di abi na ópoe foe libi tapoe wan paradijsgrontapoe. Tokoe na wan so srefi na tra groepoe nomo nanga jepi foe na Ferloesoepaiman foe Jesus Kristus den kan feni ferloesoe.

14.San na publiki taki di ben ori na sonde 24 februari 1918 ini Los Angeles ben sori tranga tapoe?

¹⁴ Na 24 februari 1918, di na fosi Grontapoefeti ben feti, J.F. Rutherford leki president foe na Watch Tower Bible and Tract Society ben ori wan publiki taki ini Los Angeles, Californië (VS). Disi ben abi na titel: „Miljoen soema di e libi now noiti sa dede.” Baka na Fosi Grontapoefeti na inibere foe na taki disi di ben meki soema ferwondroe ben gi uit leki wan boekoe. Ini na taki makandra disi a ben tjari kon na krin taki soema nanga wan reti ati nanga prakseri ben sa de na grontapoe di te na dé foe Gado atibron di e kon krosibé sa doro ben sa feni kibripe. Libi libi den ben sa go na ini Gado njoen seti foe sani nanga na den fesi libi foe tégo tapoe wan grontapoe di sa kenki kon tron wan moi djari.

15. San ben ferklare ini na taki di ben ori ini 1923 na Los Angeles, foe na agérsi tori foe Jesus foe skapoe nanga bokoboko?

¹⁵ Ini 1923, di wan congres ben ori baka ini Los Angeles, na president foe na Genootschap ben taki foe na agérsi-tori foe Jesus foe den skapoe nanga den bokoboko. Nanga jepi foe na Skrift a ben kon si taki den „skapoe” na agérsi fasi de den soema di ini na „ten” disi „foe na kaba”, de doe boen na difrenti fasi na Jesus’ jeje brada ofoe brada di de „gebore baka”. Leki wan paiman foe disi den soema disi ben sa kisi kibripe ini na feti foe Armageddon di e kon èn na emel kownoe Jesus Kristus ben sa tjari den ini en grontapoe kondre foe en doesoen jari kownoekondre (Matth. 25:31-46). Disi ben tjari wan moro krin leti na san di ben seti na fesi gi den foeroe soema di gérsi skapoe di ben doe Kristus’ „brada” boen leki den ben doe dati gi en srefi.

16, 17. Foe sanede san pasa twarfoe jari baka dati leki wan émarki ini sabi foe bijbel, no ben de zomaar wan kewon sani?

¹⁶ Twarfoe jari na baka na sabi disi di ben gro safri safri ini na froestan foe na bijbel ben kon miti wan eri boen émarki. Disi ben sori taki a no ben de zomaar wan kewon sani di pasa na ini libisoema historia. Foe di ekonomia aférsi ben ondrofeni wan bigi kwinsi a ben go de na di foe siksi jari. Na lomsoe „Santa Jari” 1933 no ben tjari na „fréde nanga boen” di ben pramisi. Foe di Etiopiakondre nanga Italiankondre ben abi kesekese na fascistis Italiankondre ben sreka ensrefi foe feti èn na 3 oktober 1935 Italian fet’man ben kon foe feti na ini Ethiopia. Adolf Hitler ben bigin nanga na di foe dri jari foe en regeri ten èn a ben ferfolgoe Jehovah kotoigi nanga bita ati. Tapoe 4 oktober 1934 a ben kisi warskow nanga hondro hondro telegram komoto foe ala pisi foe grontapoe taki efoe a no ben kaba foe ferfolgoe Jehovah kotoigi, Jehovah ben sa pori en so srefi en nazipartij. Leki wan bokoboko a ben teki na besroiti foe kiri ala den „sneki pikin” foe den politiki neutraal kristen ini na Doisri kondre.

¹⁷ Ini 1935 na Amerikan president Franklin D. Roosevelt, ben kisi problema nanga na NRA (National Recovery Administration) di en srefi ben opo, wan wrokosani foe na regering di e kontroleer na wroko ini fabriek, èn na nationale regering no ben man ori doro ondro na druk foe na Katholieke Actie. Sovjet-Rusiakondre ben de ondro na regeri foe na „tranga man” Josef Stalin. Leki wan féjanti foe na communisme di ben klari foe feti na imperialistische Japan ben poti en fesi na sé foe na ellendige Driemogendhedenpact nanga na fascistische Italiankondre èn nazi-Doisrikondre, nanga san a ben go bondroe makandra nanga den As-mogendheden. Na di foe Toe grontapoefeti ben de na meki!

18. Pe Jehovah kotoigi ben ori na mofojari foe 1935 wan congres, èn foe san na publiki taki ben taki?

¹⁸ O span na politiki situwasi na eri grontapoe ben de ini 1935 tokoe disi ben de wan spesroetoe span ten gi Jehovah kotoigi. Foe 30 mei te leki 3 juni den ben ori wan congres ini Washington, D.C., pe na nationale regeringzetel foe America ben de. Na publiki taki di ben ori na sonde, 2 juni, ben abi na titel „Regering” èn nanga jepi foe radiostation a ben seni go na Groot-Brittannië, na Europa-kondre, Afrikankondre èn den tabitji ini den grontapoesé. — Loekoe na The Golden Age (Het gouden tijdperk) foe 29 augustus 1935.

19. Sortoe groepoe ben kon sori tapoe fredabakadina, 31 mei, èn san na groepoe disi ben sa ondrofeni nanga na „bigi pina”?

¹⁹ Moro froekoe, na fredabakadina 31 mei, den arkiman foe na congres ben kisi foe jere wan taki di ben go na ati. Foe di a ben de prenspari, na taki disi ben bari na na srefi ten na toe radio station. Soema di kan de agérsi nanga skapoe di abi belangstelling foe libi foe tégo na wan paradijsgrontapoe, ben kisi wan spesroetoe kari foe kon na na congres. Ala congresarkiman ben arki nanga den eri ati na na takimakandra foe na „bigi ipi” di soleki Openbaring 7:9-17 de taki na apostel Johannes ben si na ini wan dren. Disi ben de wan pisi tori di soema no ben ferstan boen te na ten dati. Leki wan bigi prisiri foe den arkiman di ben de foe si nanga den di no ben de foe si a ben tjari kon na krin soema ben de pisi foe na „bigi ipi”. Den soema disi no de soema di de foe go na hemel, wan groepoe kristen „di kebore baka”. Den de na grontapoe groepoe foe „skapoe” ini na agérsitori foe Jesus ini Mattheüs 25:31-46. Den e pasa na „bigi pina” libi libi èn e tan libi go doro na tapoe grontapoe, sodati soboen kan taki foe den taki den „e komopo foe na bigi pina”. — Openbaring 7:14.

20. San ben de winsi foe den soema di ben sa tron memre foe na „bigi ipi”, èn sortoe wroko foe na santa jeje den no ben moesoe ferwakti baka di den ben sori na publiki taki den ben gi densrefi abra?

²⁰ Den e ferplikti densrefi foe dini Jehovah Eri boen Herder, Jesus Kristus. Den e sori taki den tai densrefi foe doe disi foe di den „wij” oefoe gi den srefi abra na Jehovah ini na nen foe Kristus. Soleki na Skrift de sori dan so wan gi abra moesoe kisi tranga foe di na soema de dopoe ini watra ini na nen foe na Tata, na Manpikin nanga na santa jeje (Matth. 28:19, 20). Efoe soema ben wani tron ete memre foe na „bigi ipi”, so leki fa a de sori dan den moesoe gi densrefi abra na Gado en agérsi na gi abra nanga na watradopoe (The Watchtower, 15 augustus 1934, bls. 250, par. 34). Den no ben kan ferwakti taki na baka den dopoe Gado jeje ben sa „fadon” na den tapoe èn den ben sa kisi na opoe foe kisi emel libi san den no ben soekoe.

21. Foe doe san na kon krin disi ben troesoe hondro hondro soema na tra dé, èn sortoe „ipi” den ben lon kon na ini?

²¹ Na kon krin ben de toemsi faja gi den, fornamkoe gi den soema di ben kan agérsi nanga skapoe di ben abi bigi angri foe sabi ofoe kon ferstan san ben de den presi ini san Jehovah ben seti. Di na presi foe na „bigi ipi” ben kon foe si krin disi ben de wan eri bigi krakti di ben poti den foe wroko. Na tra dé, satra 1 juni, ten ben poti na sé foe watradopoe. Na prisiri foe den 840 soema di ben go dopoe ben bigi, foe soema na moro bigi groepoe ben abi na opoe taki Jehovah ben sa meki den de wan pisi foe na „bigi ipi” di ben moesoe foe kon. A ben kon tron wan fornamkoe dopoe. A ben de leki den sroisi foe emel ben kon opo. Bigi groepoe di ben sori na publiki taki den ben gi densrefi abra na Jehovah, ben lon kon na ini a wan ’enkri ipi’ foe na Eri boen Herder foe kon tron wan drape nanga den jeje „brada” foe en. — Joh. 10:16; Matth. 25:34.

22. (a) Sortoe „sroto” ben kebroiki, èn fa a ben wroko tapoe soema? (b) Na sortoe regering den prakseri ben poti na tra dé, èn leki san den ben moesoe loekoe na en na fesi?

²² A ben de leki na „getrow nanga forsigtigi srafoe”-groepoe ben kebroiki wan „sroto foe sabi” (Matth. 24:45-47; Luk. 11:52) èn ben opo na doro foe wondroefasi okasi gi den memre foe na „bigi ipi” di ben moesoe kon ete. Te den ben sa graboe den okasi disi disi ben sa méne gi den dati den ben sa komopo „ini na bigi pina” èn waka go na ini na krin grontapoe di e tiri nanga en njoen grontapoeregeri ondro Kristus. Na tra dé den prakseri ben poti na na regering dati ini wan publiki taki foe na tori „Regering”, wan tori di den fiti eri boen na na situwasi di ben de na na ten dati ini grontapoe. Na bigi groepoe arkiman di ben de foe si èn wan moro bigi groepoe arkiman di no ben de foe si di ben de ini den osokamra foe den soema ben kisi warskow ini na taki disi, langa bifo, foe na pori di ala libisoema regering na grontapoe sa kisi ini Gado feti na Armageddon. Moro fara na taki disi ben sori tapoe Jehovah theocratis regering ini anoe foe Kristus leki na wan enkri opoe foe ala libisoema. Disi ben de na Gado fasi regering di na „bigi ipi” ben moesoe loekoe na fesi leki en eri moi opoe!a

23. (a) Na doro foe go na na hemel kownoekondre ben sroto gi soema di e bribi, foe di na „sroto foe sabi” ben kebroiki? (b) San kan de leki wan bewési na na pisi tori disi?

²³ Na doro di e meki soema foe bribi pasa go na emel kownoekondre, ben sroto na na srefi ten dati di na „sroto foe sabi” ben kebroiki? Nono, bikasi na Jezus Kristus de na soema di abi „na sroto foe David”, èn en wawan kan sroto sowan doro. A ben de soleki fa Gado wani ben de taki a kan ete gi son soema foe pasa go na ini na doro dati. Leki wan bewèsi foe dati son memre foe na salfoe fika pisi foe Jehovah kotoigi ben dopoe ini den jari di ben folgoe na prenspari kon krin foe na „bigi ipi” ini na mofojari foe 1935 èn den skrifi foe na kon krin disi ini den Wachttoren foe november nanga december 1935. — Openb. 3:7; Luk. 11:52; Matth. 23:13.

24. (a) San sa tapoe soema foe ete moro soema kon tron pisi foe na „wan ipi” ondro na Eri boen Herder? (b) Ini sortoe egi-fasi na Herder de meki „skapoe” kon ete ini na „wan ipi”?

²⁴ Nomo na loesoe foe na „bigi pina” kan tapoe taki ete moro soema kan sroto densrefi na den soema di gérsi skapoe di de pisi foe na „bigi ipi”. Na okasi foe kisi ferloesoe foe di soema kebroiki na pasi foe no ondrofeni pori makandra nanga na seti foe sani disi di de klari foe lasi gowe sa pasa kaba. Na ini ala den jari disi sensi 1935 na doro di e gi pasi foe go na na „wan ipi” foe na Eri boen Herder tanapoe opo. Soleki fa den njoensoe e sori dan moro leki toe miljoen soema go na inisé. Na Eri boen Herder, Jesus Kristus, ben taki: „Mi de na doro foe den skapoe” (Joh. 10:7-9). Nanga na egi-fasi dati a de meki den mati foe en jeje „brada” kon na inisé ete èn a de prati den foe den „bokoboko”, di no sa pasa libi libi na na „bigi pina” èn na „feti” foe Har-mageddon kwet’kweti. Meki ala soema now di wani dati, arki na na „stèn” foe na Eri boen Herder, soleki fa dati e kon na krin nanga jepi foe en jeje „brada” di de ete na grontapoe (Joh. 10:16). O, fa na grani foe den bigi foe ondrofeni na kibripe di de wan pisi foe na „wan ipi” ondro na „wan herder”!

[Foetoewortoe]

Foe san waka na baka na aksi disi na Herald di e druk na ini Washington ben taki:

„Leki wan bare foe se na makti ipi soema di ben de na ini en lontoe na oso pe na taki ben ori. Nanga den anoe na ini loktoe Jehovah kotoigi ben bari so tranga leki den ben kan den ja-wortoe di ben seki gron. Na babari disi di ben seki gron ben meki den grasi foe den fensre naki, èn soleki fa den skowtoe ben kan marki dan na babari foe na ipi soema disi joe ben kan jere ete eri boen na wan nanga afoe kilometer moro fara.”

Situwasi di ben gérsi disiwan ben de foe si na na srefi ten ini Londen, Belfast, Glasgow, Kopenhagen nanga ondro ondro tra presi ini foeroe pisi foe grontapoe. — The Golden Age, na tijdskrift foe 19 juni 1935, bls. 598 (Het Gouden Tijdperk, tijdskrift foe 1 januari 1936, bls. 13); loekoe toe na Year Book of Jehovah’s Witnesses foe 1936, blz. 62, par. 3.