Tan tanapoe nanga jepi foe na millennium
„Leri foe na figabon na gersitori disi: te hen jongoe taki e kon safoe en e meki wiwiri, dan joe sabi dati dréten de krosibé kaba. Te joe e si den sani disi e pasa, so toe joe moe sabi dati a de krosibé, na mofodoro.” — Mark. 13:28, 29.
1, 2. (a) San wan grontapoe-tiriman ben taki foe oorlog nanga vréde? (b) Ma sortoe howpoe Jezus ben poti na wi fesi? (Loekoe Lukas 21:29-31)
„INI na eeuw foe na waterstofbom, dan wan boen difrenti no de moro mindri wan grontapoe oorlog nanga wan grontapoe zelfmoord.” Disi na presidenti foe Amerkankondre ben taki di a ben drai baka kon na oso, baka di a ben onderteken a SALT-akroederi nanga Sowjet Unie. A ben taki toe, dati foe taki foe vréde, na grontapoe e libi ini wan „doengroe toestand” en alaten moe loekoe na fesi foe na kon foe „wan kern-oorlog di sa de wan rampoe, wan oorlog di te joe loekoe na skrekifasi, na pori en na dede, sa meki ala oorlog foe na langa historia foe libisoema di de nanga broedoe, de noti”. Ma wan grontapoe zelfmoord de wan sani di moesoe kon? We, meki wi ondrosoekoe pikinso san „libisoema-pikin” Jezus Kristus, abi foe piki tapoe dati leki fa na boekoe Markus e taki.
2 Di Jezus Kristus ben taki na fesi den sani wi e „si pasa” ini na twintigste eeuw foe wi, dan a ben agersi den nanga wan figabon te „hen jongoe taki e kon safoe en e meki wiwiri” — wan bewijsi dati dréten de krosibé (Markus 13:28, 29). Disi e akroederi nanga na kon foe Jezus foe tjari strafoe kon. Baka dati den „doesoenjari sa kon”, di Didibri no sa kori den naatsi moro. — Openb. 20:2, 3.
3. (a) Sortoe bakapisi den „sani” abi di wi e „si pasa” en tapoe san Jezus ben sori tapoe na libisoemafamiri? (b) Fa den discipel foe Jezus moe si den sani disi?
3 Ma den „sani di wi e si”, no de so switi. Ini na proféti-tori di Jezus ben gi a de gi wi tranga nanga den wortoe disi: „Te joe e jere foe . . . feti nanga njoensoe foe feti, no skreki; den sani disi moesoe pasa, ma na kaba no de ete. Bikasi naatsi sa opo feti nanga naatsi en kownoekondre sa opo feti nanga kownoekondre, na a wan presi go miti a trawan aardbéfi sa de, en mankeri foe njanjan sa de. Nanga disi den pen foe benawtoe e bigin” (Mark. 13:4, 7, 8). Soboen, den discipel foe Jezus no ben lasi densrefi, di den ogri sani ben pasa na grontapoe sensi 1914, di „den ten foe den naatsi” ben kon na wan kaba (Luk. 21:24-28). Den alamala de wan bewijsi, dati Kristus Jezus, Libisoemapikin, „kon krosibé kaba, na mofodoro”, en dati den foetoeboi foe hen di opo foe dede en di ben waka ini hen foetoestapoe, heri esi sa tiri leki kownoe nanga hen „doesoen jari langa”. — Matt. 24:33; Openb. 20:4.
„LOEKOE BOEN NA JOESREFI”
4. Foe sainde Jehovah Kotoigi ben njan pina moro foeroe leki tra soema, en san Markus 13:9 e taki foe disi?
4 Makandra nanga foeroe trawan foe na libisoema-famiri Jehovah Kotoigi ben njan pina foe den „pen foe benawtoe” disi. Sontron den ben moe ondrofeni srefi moro leki tra soema, foedi disi de na pisiten di Didibri ati ben bron spesroetoe tapoe den soema „di e hori den komando foe Gado” (Openb. 12:12, 17). Jezus e taki foe disi nanga den wortoe: „Loekoe boen na joesrefi; den sa gi joe abra na kroetoe, en den sa fon joe ini synagoge, en joe sa tanapoe na fesi tiriman nanga kownoe foe mi ede, leki wan kotoigi gi den.” — Mark. 13:9
5. San Jehovah Kotoigi ben ondrofeni sensi 1914, aladi den e waka go foe doro na marki foe den na millennium?
5 Fa disi ben de troe ini na pisiten foe 1914! Na moro bigi pisi foe den naatsi di ben teki prati na a Fosi Grontapoefeti, ben vervolgoe den. Ini den jari dri-tenti en te ini den jari fo-tenti na wan skwala foe vervolgoe go miti na trawan ben kon tapoe den Doisri Kotoigi foe Jehovah, sondro dati den ben kan pori den. Na moro bigi pisi foe den naatsi foe grontapoe ini na Tweede Grontapoefeti ben moksi den srefi kon na wan foe feti tegen Jehovah Kotoigi. Ma winsi fa den ben pina, tog den kristen disi alaten ben hori na fesi na moi howpoe foe wan blesi doesoen jari rigeri, en den e feti foe miti na kolokoe foe na ten dati. — Openb. 20:6.
6. (a) Sortoe „kotoigi” na pipel foe Jehovah ben moe gi? (b) O fara Markus 13:10 ben kon troe ini na ten disi?
6 Te nanga na dé foe tide, den dienstknegti foe Jehovah ini foeroe kondre moe kon na fesi kroetoebakra nanga tiriman „leki wan kotoigi gi den”. Disi e doe kon foedi na pipel foe Gado na a fosi presi de getrouw na a Kownoekondre foe Kristus, di leki fa Jezus ben taki „no de wan pisi foe disi grontapoe” (Joh. 18:36). Disi doe kon ooktoe foedi den e teki prati faja faja na a kon troe foe den wortoe disi foe na profétitori foe Jezus: „Na boen njoensoe moe préki ooktoe fosi ini ala naatsi” (Mark. 13:10). Disi ben doe sensi 1914? Foe troe! No ini soso libisoema krakti, ma ini na krakti foe Gado jeje Kotoigi foe Jehovah ben waka go na a heri grontapoe, foedi den ben hari go foe préki en meki discipel. Now moro leki toe miljoen Kotoigi e meki na howpoe bekenti foe na millennium „te na den moro farawe oekoe foe grontapoe”. — Zach. 4:6; Rom. 10:8.
7. Tapoe sortoe fasi Jehovah Kotoigi e ondrofeni na jepi foe na dynamische krakti foe Gado? (Jes. 40:25-31).
7 Nanga jepi foe hen dynamische krakti Gado e hori hen pipel tanapoe tapoe wan wondroe fasi, aladi den e kaka foetoe gi den situatie di Jezus e taki moro fara foe den nanga den wortoe: „Ma te den e tjari joe gwe foe gi joe abra, no broko joe ede san joe sa taki, ma taki den sani di joe sa kisi foe taki ini na joeroe dati, bikasi a no joe de na soema di sa taki, ma na santa jeje. Moro fara na wan brada sa gi na tra brada abra foe dem kiri hen, en wan papa wan pikin en den pikin sa opo tanapoe tegen den papa nanga mama en kiri den; en foe mi nen ede oenoe sa de soema di ala soema no wani si na ai.” — Mark. 13:11-13.
8. Fa santa jeje ben jepi den dienstknegti foe Jehovah nofotron te den ben tanapoe ondro druk?
8 A pasa foeroe tron kaba ini disi dé foe na kon troe foe na marki foe Jezus dati Jehovah e gi „santa jeje” nanga tiri te disi de moro tranga fanowdoe (Mark. 13:4). A no langa pasa kaba, wan Kotoigi foe Jehovah, wan getrouw opziener di e visiti gemeente, skowtoe ben kisi, foedi a ben préki na boen njoensoe. Den soema di ben kisi hen ben sreka densrefi foe kiri hen. Ma a ben protesteer dati na afersi foe hen ben moe kon fosi na wan eerlijk kroetoe foe ondrosoekoe. Di den gi pasi foe wan kroetoe, a ben aksi efoe wan papira foe na kroetoe ben kan meki. Nanga jepi foe Jehovah jeje na opziener ben gi wan moi kotoigi foe na Kownoekondre, aladi a ben tjari foeroe tekst kon na fesi. Ala disi ben kon ini na officiële papira foe na kroetoe. Ma den ben kroetoe dati a ben moe dede. Ma now a verteri na kroetoe dati na wet e gi hen na reti foe go moro hé. Soboen, tapoe na gron foe den officieel papira foe hen pe na kotoigi foe hen ben tanapoe na ini, a ben kisi pasi foe go na wan moro hé kroetoe. Na moro hé kroetoe poeroe na strafoe en gi komando foe den loesoe na opziener, sodati a ben kan go doro nanga na préki foe hen foe na boen njoensoe foe Gado kownoekondre. Santa jeje ben jepi hen foe wini! — Loekoe Tori foe den Apostel 4:13, 31; 5:32.
9. Sortoe problema foe famiri foeroe kotoigi ben ondrofeni en wini?
9 Soleki Jezus ben taki na fesi, dan soema foe na famiri di no e bribi e opo kon leki vervolgoeman. Wawan tron den égi oproeroe pikin tori den mama nanga papa, soleki pasa ini wan loweman-kampoe ini Afrika. Ooktoe ini kondre di abi vréde son tron Jehovah Kotoigi ben moe kaka foetoe gi bita gensi foe na sé foe den trowpatna ofoe foe tra memre foe na osofamiri ofoe famiri. Aladi den sortoe Kotoigi dati e gi tactvol kotoigi en e proberi foe jepi den sortoe gensiman disi tapoe wan lobi fasi, den alamala tan tanapoe nanga na djaranti dati „soema horidoro te na a kaba, . . . sili sa feni boen.” — Mark. 13:13; loekoe Mark. 10:28-30; 1 Petr. 3:1-4.
LERI SI NA „TEGOE SANI”
10. Sortoe aksi e kon na fesi foe Markus 13:14?
10 Ala soema di e angri foe na kon foe na millennium, abi faja faja wan prati ini na kon troe foe den wortoe foe Jezus di e kon now: „Ma te oen si tanapoe na tegoe sani di e tjari pori kon tapoe wan presi pe a no mag tanapoe (na lesiman moe gebroiki hen verstan), dan meki den di de ini Judéa, lon go na den bergi” (Mark. 13:14). San de na „tegoe sani” disi?
11. (a) Fa na kownoekondre foe Gado nanga na tegoe sani tanapoe nanga makandra? (b) Foe sainde na VN de wan „tegoe sani” foe na sé foe Jehovah?
11 Na „tegoe sani” de tra fasi leki na „kownoekondre foe wi Masra (Jehovah Gado) en foe hen Kristus” en na kownoekondre disi ben gebore ini 1914 ini hemel (Openb. 11:15-12:12). Na bijbel e skrifi foe na kownoekondre dati leki „moi nanga héfasi” en „na volmaakti fasi foe moifasi” (Ps. 48:2; 50:2). Ma den naatsi ben bigin wantron wantron foe feti nanga na kownoekondre (Ps. 2:1-6). Heresi den ben meki na Volkoebontoe, di ben kon bakaten leki na Verenigde Naties. Ini na bijbelboekoe Openbaring na bijbel e skrifi foe na internationaal skin disi leki wan troe troe „tegoe sani” — „wan redi wilder meti . . . di ben foeroe nanga spotoe nen en di ben abi sébi ede nanga tin toetoe” (Openb. 17:3, 8). Ma o „tegoe” a de foe na sé foe Jehovah! Den gafa hen leki na na wrokosani, di sa tjari „vréde nanga veiligheid” — wan sani di soso na glori kownoekondre-rigeri foe Kristus kan tjari kon gi libisoema. — Jes. 9:6, 7; loekoe 1 Thess. 5:3.
12. Fa na Bigi Babylon tjari na atibron foe Gado kon tapoe hen, en san disi sa abi gi hen leki bakapisi?
12 Soema ben de den soema di ben gafa so gi na wrokosani disi foe libisoema? A ben de spesroetoe den kerki fesiman foe na kristenheid! Ini december 1918 na Federale Raad foe kerki foe Kristus ini Amerkankondre ben gi grani na a volkoe-bontoe di ben sa opo leki na „politiek nen foe na kownoekondre foe Gado na grontapoe”. Moro krosibé, ini 1965, paus Paulus VI ben kari na Verenigde Naties leki „na laatste howpoe tapoe wanfasi nanga vréde”. Te leki na jari disi 1980, den paus nanga hé soema foe kerki e aksi wan boen foe na VN. Ma foe san den kerki fesiman disi de wan pisi? Den tai den srefi nanga wan hoeroe-oema foe kerki, di Openbaring e skrifi foe hen leki „na Bigi Babylon, na mama foe den hoeroe-oema en foe den tegoe sani foe grontapoe” (Openb. 17:1, 3-6). Leki na grontapoe kondre foe falsi religie na hoeroe-oema disi e hori matifasi nanga den politiek-tiriman foe den naatsi, en a de meki hen bribi ini na VN-meti bekenti en srefi nanga bigifasi a de go sidon tapoe na „meti” dati leki „koningin” foe tiri hen (Openb. 18:7). Ma let bifo a gersi dati a „sidon moi” en de ini na boen-ati foe hen politiek „lobiman”, dan den radicaal „tin toe-toe” foe na VN dati „sa abi ogri-ati foe na hoeroe-oema” en den „sa meki a pori” en pori hen krin krin. — Openb. 17:16.
13, 14. (a) Foe sainde wi moe sabi now seker dati na „lon foe oenoe go na den bergi” boen dorodoro? (b) Sortoe bewijsi de dati foeroe soema de di e gi jesi na a komando foe Openbaring 18:4?
13 Kristen soema kan si nanga den ai foe bribi srefi now na „tegoe sani” — na VN — tanapoe „tapoe wan presi pe a no mag tanapoe”, aladi a de wan gevaar gi na „santa kondre” foe na kristenheid (Mark. 13:14; Matt. 24:15). Na pori foe na falsi religie e kon krosibé. A wan misberekening foe hen foe poti bribi ini na tegoe meti disi! San den lésiman di e si den sani disi moe doe? Jezus e piki: „Meki a lon go na den bergi”.
14 Kolokoe dati den soema „di de ini Judéa” no drai drai nanga na lon go na a „bergi” foe kibri dorosé foe na kondre dati. Foe datede meki Jehovah Kotoigi now ini 205 kondre nanga gebied tapoe na heri grontapoe e warskow foe na esesi kaba foe na seti foe sani disi. Den ben gi jesi na a sten foe hemel di e taki: „Komoto foe hen (na Bigi Babylon), mi pipel, efoe joe no wani kisi afoe foe hen sondoe en efoe joe no wani kisi afoe foe hen plaag. Bikasi hen sondoe ben hé go te na hemel en Gado ben memre hen onregtvaardiki fasi” (Openb. 18:4, 5). Jehovah pipel ben sorgoe dati den „no de wan pisi foe na grontapoe” (Joh. 15:19). Doesoen doesoen soema e tan lon, soleki e kon na krin dati ini dri jari ten di kon baka 1975, ala nanga ala 416.167 soema tapoe heri grontapoe ben dopoe.
WAN TRANGA FANOWDOE SITUATIE
15. Fa wi kan tjari na rai foe Markus 13:15, 16 kon ini wi égi libi?
15 Te Jezus e poti krakti tapoe na tranga fanowdoe situatie ini na „seti foe sani” a de go moro fara foe taki: „Meki na man di de tapoe na dak, no go na ondrosé, ooktoe no go na inisé foe teki wan sani poeroe foe hen oso; en meki na man di de tapoe na firi, no drai baka go na den sani di a ben libi, foe go teki hen tapoesé krosi” (Mark. 13:15, 16). Ini bijbel ten a ben sa de roekeloos te ogri e kon te wan man di ben de de ini hen dak-kamra, ben sa saka na dorosé trapoe foe hen oso en ben sa go ini hen oso foe poti hen goedoe dati noti pasa nanga hen. Nofotron a ben kan lon gwe moro esi te a ben lon gwe tapoe den dak na sé foe hen. Ooktoe wan gronman di ben poeroe hen boen krosi foe wroko tapoe na gron ben sa lasi den kans foe lon gwe efoe a ben drai go baka foe teki wan moi tapoesé krosi. Na so fasi redding wi kan kisi te wi e lon go na Gado kownoekondre en alaten poti den afersi foe kownoekondre tapoe na fosi presi — en no proberi foe redde goedoe komoto foe wan grontapoe di e go lasi. — Loekoe Lukas 9:62; 12:22-31; 17:31, 32.
16. (a) Sortoe soema sa abi hen troe troe moeiliki te na „benawtoe” kon? (b) Sortoe trowstoe papa nanga mama di e frede Gado kan verwakti na a tra sé?
16 Jezus e taki moro fara: „Heloe foe den oema nanga bere en den di abi jongoe pikin a bobi, ini den dé dati!” (Mark. 13:17). Den sortoe soema dati ben abi hen moeiliki — toemsi moeiliki — di na Romein sroedati-makti ben pori Jeruzalem ini na jari 70 G.T. En te na troe troe „benawtoe” kon tapoe grontapoe, dan a sa de ooktoe wan moeiliki ten gi oso-famiri di no ben poti prakseri tapoe Jehovah seti foe lon komoto. Kolokoe foe den papa nanga mama di e frede Gado en di doe moeiti foe „leri den pikin foe den ini na tranga leri nanga rai foe Jehovah”, kan verwakti dati pikin di e gi jesi sa kon ondro na boen foe na osofamiri en disi sa wani taki redding gi den (Ef. 6:4; loekoe 1 Kor. 7:14). Ma na pasi foe tan na libi no de makriki, soleki den wortoe foe Jezus e sori moro fara:
17. (a) San wi kan verwakti foe na winterten foe na benawtoe? (b) Fa wi kan handri koni now en nanga sortoe howpoe foe na ten di e kon? (Jes. 26:20, 21)
17 „Tan begi dati (na lon foe joe) no pasa ini na ten foe winter; bikasi den dé dati sa de dé foe wan benawtoe soleki sensi na bigin foe di sani ben meki no ben kon te leki na ten dati en no sa kon moro. Efoe Jehovah no ben koti den dé sjatoe, dan no wan soema no ben sa tan na libi. Ma foe den disi a ben verkisi ede, a ben koti den dé sjatoe” (Mark. 13:18-20). Leki wan aparti soema a ben sa kan de dati wi no „doro” efoe wi e wakti ini wan boen ten, leki ini dréten, foe lon, en drai drai te na winterten foe na „bigi benawtoe”. Ini na abnormaal ten disi, no wan soema no kan verwakti foe abi wan normaal libi. A de sori soso dati wi koni te wan soema lon go na a sé foe Gado kownoekondre en tan drape, aladi wan soema e gi hen srefi krin krin abra foe na boen foe den kownoekondre-afersi.
18. Fa wi kan ferwakti dati „na broeja skreki foe den naatsi” sa kon moro foeroe (Jes. 45:18)?
18 Baka di a warskow foe „falsi Kristus nanga falsi proféti”, en ini den laatste dé disi foeroe foe den ben kon, dan Jezus e sori na den skreki sani na hemel en na a „bigi krakti nanga glori” foe na kon foe hen leki Libisoemapikin, te a de kon nanga na strafoe en a de tjari den di de foe hen kon makandra foe redde den (Matt. 24:24; Mark. 13:26). A no de wan sani foe degedege, dati mankeri foe njanjan, oli nanga tra sani nanga na meki foe moro fetisani foe kiri foeroe ipi soema sa meki kon moro foeroe „broeja skreki foe den naatsi, di no sabi wan pasi foe lon komoto, aladi den soema e kon weri foe frede nanga verwakti foe den sani di sa kon tapoe na heri grontapoe” (Luk. 21:25, 26). Ofoe den naatsi sa go ini na pasi foe wan kern-oorlog, en disi ben sa wani taki zelfmoord, wi sa moe loekoe. Ma den no kan en no sa man foe kiri na libisoema famiri poeroe foe na heri grontapoe! Den wan di Gado verkisi nanga den mati foe den abi wan krakti pramisi foe verloesoe. — Luk. 21:28; Matt. 24:21, 22.
19. San wi kan ferwakti ini na ten di e kon?
19 Sensi „di naatsi ben opo feti nanga naatsi” foedi den feti wan grontapoefeti, dan troe troe den „pen foe benawtoe” ben tjari foeroe sari kon tapoe na libisoema famiri (Mark. 13:8). Tog Jezus e gi wi na djaranti, dati, soleki na kon krosibé foe dréten de foe si na den jongoetaki di na figabon e meki, dati „den sani disi di e pasa” djonsro sa doro na hé marki foe den te Kristus kon foe gi strafoe. A de taki: „Foe troe, mi taki, dati den disiten soema no sa dede alamala te leki ala den sani disi sa pasa. Hemel nanga grontapoe sa pasa, ma mi wortoe no sa pasa” (Mark. 13:21-27, 30, 31). Boiti dati, wi e kisi na sekerfasi ini na Openbaring di Jezus gi bakaten na a apostel Johannes, dati na komoto na pasi foe Didibri nanga ala hen wroko sa kon en baka dati doesoen jari jari foe tiri nanga jepi foe Gado kownoekondre ini anoe foe Kristus sa kon. — Openb. 20:2, 3; 1 Joh. 3:8.
„DE NANGA AI”
20. (a) Foe sainde a de wan gevaarliki sani foe sribi ini na ten disi? (b) Akroederi nanga Markus 13:34, 35 fa wi kan sori loyaliteit gi wi Masra?
20 Den wortoe foe Jezus di e tjari na bigi profétitori kon na wan kaba, abi gi wi alamala wan krakti warskow. Son soema kande e kisi sribi ofoe srefi fadon ini sribi, foedi Libisoemapikin no ben kon tapoe wan datum di den verwakti foe reken af nanga den naatsi. Fa dati de wan gevaarliki sani! Jezus e gi na rai: „Foe na dé nanga na joeroe no wan soema sabi wan sani, no den engel ini hemel, no na Pikin, soso na Tata. Tan loekoe boen, tan nanga ai, bikasi joe no sabi oten na fasti ten de.” Dati wi no sabi na ten de wan krakti reden foe de nanga ai. Boiti dati, te wi de loyaal na wi Masra, dan a de aksi foe wi foe de alaten nanga ai en disi wi e sori foedi wi e préki faja faja na boen njoensoe foe na kon foe hen. „A de leki wan soema, di, na a ten di a ben reis go na tra kondre, libi hen oso en gi na makti na den srafoe foe hen, ibriwan hen wroko, en a gi komando na a doro-waktiman foe de nanga ai. De nanga ai foe datede, bikasi joe no sabi oten na Masra foe na oso e kon.” — Mark. 13:32-35.
21. Te wi loekoe sortoe pramisi wi moe tan nanga ai?
21 Te „Libisoemapikin” kon foe datede „wantron wantron” foe gi strafoe, meki a no feni wi e sribi, ma meki a feni wi actief ini na doe foe na wani foe wi Tata. Wi sa kisi wan blesi efoe wi poti prakseri tapoe den wortoe foe Jezus: „San mi e taki gi joe, mi e taki gi alamala: De nanga ai” (Mark. 13:37) Meki wi tan tanapoe nanga den diri pramisi foe Jehovah, pasa na „benawtoe” te ini na moi ten foe vréde di sa tan doesoen jari ondro na kownoekondre foe Gado ini anoe foe Kristus! — Openbaring 21:1-5.