„Ini den laatste dé” — Sensi oten?
„Sabi disi, dati ini den laatste dé moeilek ten sa doro.” — 2 Tim. 3:1.
1, 2. Foe sanede disi de so wan bigi sani gi wi, dati wi de so fara ini „na ten foe na kaba”? (b) San na bijbel abi foe taki foe disi ini 2 Petrus 3:13, 14?
„DEN LAATSTE DÉ” foe san? Foedi a abi foe doe nanga den laatste dé foe wan owroe seti foe sani, di no e gi satisfaksi èn di fadon èn di de sondro howpoe, foe dat’ede meki a de wan verlekti foe sabi dati wi ben doro na „ten foe na kaba” foe en (Dan. 12:4). Kolokoe dati a no de so dati na heri kaba foe na owroe organisatie foe sani wani taki dati na grontapoe foe wi e tan na baka leki wan légi globe sondro libi èn di de wan skreki sani. Nanga dati na pasi e opo foe na bigin foe wan regtvaardiki, vrédefasi, njoen seti foe sani, di abi na ini en na pramisi dati ala sani sa waka boenboen. A de gi wi foe datede wan toemsi bigi sani dati wi de now so fara ini „a ten foe a kaba”. Nanga moi wortoe na bijbel, na boekoe di ben taki na fesi foe na disiten „ten foe na kaba”, abi disi foe taki:
2 „Ma njoen hemel nanga wan njoen grontapoe de, di wi e froewakti soleki en ben pramisi, èn ini dati regtvaardiki fasi sa libi. Foe datede, lobiwan, foe di joe e froewakti den sani disi, doe ala joe moeiti foe en kan feni joe te foe kaba sondro vlaka èn sondro doti èn ini vréde.” — 2 Petr. 3:13, 14.
3, 4. (a) Pe, oten nanga foe san-ede na apostel Petrus ben taki foe den „laatste dé” èn na soema? (b) Sortoe profétitaki Petrus ben teki foe gi verklari?
3 So wan dritenti jari bifo na kristen apostel Petrus ben skrifi den wortoe dati, a ben taki foe den „laatste dé”. Dati ben de tapoe a pinksterdé, 6 Sivan, foe na jari 33 G.T.. A ben taki ini na foto Jeruzalem, ma no ini a tempel foe Herodes ini a foto dati. A ben hori en lezing ini wan tanpresi, pe so wan 120 discipel foe Jezus Kristus di ben anga na wan postoe no langa pasa kaba ben konmakandra froekoe mamanten, bifo 9 joeroe ini wan sodro. Wantronwantron na froewakti foe den ben kon troe. Na santa jeje di Jezus ben sa kanti tapoe den, baka te a ben sa drai go baka na hemel soleki a ben pramisi, ben kon na tapoe den, aladi disi ben go de nanga wan sani di joe ben kan si. Den ben kisi santa jeje foe taki ini vreemde tongo foe „den bigi wroko foe Gado” (Tori foe den Apostel 2:1-11). Na a srefi ten doesoen doesoen djoe di ben de drape foe na fesa, ben konmakandra foe de kotoigi foe san ben psa èn foe ben kon sabi san a ben wani taki alamala. Na apostel Petrus ben kisi santa jeje foe ben taki gi den, aladi a ben tjari kon na krin:
4 „Disi de san ben taki nanga mofo foe na proféti Joël: ’„Èn ini den laatste dé”, Gado taki, „mi sa kanti afoe foe mi jeje tapoe ala sortoe foe skin, èn oen manpikin nanga oen oemapikin sa taki profétitori èn oen jongoeman sa si visioen, èn oen owroe man sa dren dren; èn srefi tapoe mi srafoe nanga tapoe mi oema-srafoe ini den dé dati, mi sa kanti afoe foe mi jeje tapoe den, èn den sa taki profétitori. Èn mi sa gi wondroe ini hemel na tapoesé èn marki na grontapoe na ondrosé, broedoe nanga faja nanga smoko; na son sa kenki tron doengroe èn na moenkenki ini broedoe bifo na bigi nanga frede dé foe Jehovah sa kon. Èn ala sma di kari na nen foe Jehovah sa kisi verloesoe.”’” — Tori foe den Apostel 2:16-21.
5. (a) Leki fa Petrus ben taki, dan oten den laatste dé dati ben bigin? (b) San kan taki foe na aksi ofoe na a ten dati, Petrus ben taki foe „den laatste dé” foe na seti foe na heri (. . .) grontapoe?
5 Oten Gado ben taki so wan sani? Hondro-hondro jari a fesi ini Joël 2:28-32. Ini Hebrew tongo na profétitaki e bigin nanga den wortoe: „Èn baka dati a moe pasa dati mi sa kanti mi jeje tapoe ala sortoe foe skin”, nanga so moro fara. Ondro na krakti foe Gado jeje na apostel Petrus ben sori tapoe sortoe presi ini a ten den wortoe „baka dati” ben sa de, di a ben taki dati disi ben sa pasa „ini den laatste dé”. Soboen, den „laatste dé” dati ben bigin so wan 850 jari baka di Joël profétitori ben skrifi, èn Petrus ben libi ini a pisi ten dati. Ma wi ben sa wani sabi: Petrus ben libi ini den laatste dé foe na seti foe sani foe na heri grontapoe? Disi wi no kan bribi dati a de so, bikasi now, moro leki 1900 jari baka di den ben kiri Petrus leki wan kristen, wi e libi ete ini na seti foe sani dati (Joh. 21:18, 19; 2 Petr. 1:14). Fa nanga na bijbel wi kan redeneer dati den „laatste dé” de na heri pisiten foe sensi Petrus dé te nanga na moeilek ten di wi e libi na ini èn di no kon na wan kaba ete? Disi no ben sa de so kweti-kweti, alwasi ini ala den ten foe den tina-négi hondro jari te nanga now a ben trowe en jeje tapoe ala sortoe foe bribiman èn meki den tron en jeje manpikin nanga oemapikin nanga jepi foe Jezus Kristus.
6. Oten den „laatste dé” ben bigin, di Petrus ben libi na ini?
6 Den santa boekoe e taki, dati Petrus ben libi ini den „laatste dé” foe wan pisiten di ben de ini na ten dati? Ja! Den spesroetoe „laatste dé” dati ben bigin nanga na dopoe foe Jezus di Johannes na Dopoeman ben doe èn nanga na salfoe foe Jezus nanga santa jeje, baka di a ben opo komoto foe na watra. Na so fasi a ben tron Kristus ofoe Salfoewan. — Tori foe den Apostel 10:37, 38.
7. Fa Paulus, ini Hebreeër 1:1, 2 ben sori dati den „laatste dé” dati ben bigin, di Jezus ben tron dritenti jari?
7 Den „laatste dé” foe na ten dati ben bigin soboen ini na herfst foe 29 G.T., di Jezus foe Nazareth ben tron wan bigi man foe 30 jari (Luk. 3:21-23). Na apostel Paulus ben sori tapoe a ten foe dati, di a ben skrifi disi gi den Hebrew kristensma (di kande ben libi ini Jeruzalem): „Gado, di langa ten pasa kaba ben taki nanga den fositentata a foeroe okasi nanga na foeroe fasi nanga mofo foe den proféti, ben taki (oten) na a kaba foe den dé disi nanga mofo foe wan Manpikin, di a ben poti leki erfgenaam foe ala sani èn di nanga jepi foe en a ben meki den seti foe sani.” — Hebr. 1:1, 2.
8. (a) San Johannes na Dopoeman ben taki foe sori dati den „laatste dé” ben kon krosibé? (b) Foe sanede meki na warskow di Petrus ben gi na Pinksteren ben de prenspari na a momenti dati gi den djoe?
8 Ja, a ten ben sori dati a ben de den „laatste dé” foe na djoe seti foe sani drape ini na Midden-Oosten. A no de wan wondroe dan, dati Johannes na Dopoeman ben kan taki gi den Sadducésma nanga Farizésma di ben kon na en foe ben dopoe, den wortoe disi: „Oen snekipikin, soema ben sori oenoe fa foe lon komoto foe na atibron di e kon? Meki dan froktoe di fiti berouw” (Matt. 3:7, 8). Soso tapoe na fasi dati den ben kan abi na howpoe foe lon komoto foe na faja foe den moeilekheid, di, na agersi fasi, ben sa bron den memre foe den naatsi foe den di ben gersi alési-boeba ini 70 G.T. Tapoe na Pinksterdé foe 33 G.T. na apostel Petrus ben taki foe dat’ede gi den djoe di ben abi berouw èn di ben pristeri densrefi foe na dopoe ini watra: „Kisi verloesoe foe na kron geslacht disi”. — Tori foe den Apostel 2:37-40.
„LAATSTE DÉ” FOE NA DJOE WETVERBONTOE ÈN SETI
9. Leki wan bakapisi foe Jezus dopoe nanga salfoe nanga santa jeje, dan den „laatste dé” foe sortoe verbontoe ben doro, èn foe sanede?
9 Jezus ben gebore ondro na djoe Wetverbontoe, di na proféti Mozes ben de na mindriman foe en. Di Jezus ben kisi dopoe èn ben kisi salfoe nanga santa jeje, a ben tron na Mindriman foe wan njoen verbontoe, di ben sa meki nanga jeje djoe Israëlsma. Disi ben wani taki dati na „laatste dé” ben doro gi na djoe Wetverbontoe nanga na djoe seti nanga na tempel foe Herodes drape ini Jeruzalem leki a presi pe ala sani e drai lontoe. Di Jezus ben opo go na hemel leki Mindriman mindri Gado nanga en discipel, dan na njoen verbontoe ben kisi krakti nanga na waarde foe na broedoe foe en volmaakti libisma ofrandi. Na bewijsi foe disi ben gi tapoe na wondroe pinksterdé dati, di santa jeje ben kanti trowe kon na grontapoe, sodati jeje Israëlsma ben kon gebore, di na njoen verbontoe ben meki nanga den. Na a srefi ten, nanga a sani disi, na owroe Wetverbontoe nanga na Israël na skinfasi ben figi poeroe ofoe ben kon na wan kaba (Ef. 2:15, 16; Kol. 2:13, 14). Ma Gado spesroetoe boen-ati nanga den djoe ben tan dri nanga afoe jari moro langa, te nanga na herfst foe 36 G.T. Foe sanede?
10. (a) Foe sanede meki na boen-ati foe Jehovah baka Pinksteren foe na jari 33 G.T. ben tan wan pisi ten tapoe den djoe? (b) Ma oten na djoe seti ben kon na wan kaba ini na Midden-Oosten?
10 Foedi na profétitaki ben taki nanga krakti dati Gado spesroetoe boen-ati ben sa tan „sébi tenti jariwiki” na en verbontoepipel, èn na pisiten dati foe 490 jari ben kon na wan kaba ini 36 G.T., aladi Jezus Kristus srefi ben dede ini na mindri foe na di foe sébitenti wiki wan pinadede (Dan. 9:24-27, Willibrordvertaling, voetnoot). Jeruzalem nanga a tempel foe en no ben pori ini na jari dati, èn sosrefi toe den djoe no ben tjari gwe ini na jari dati foe na distrikt Judéa. Di disi ben pasa ini 70 G.T., dan na djoe seti foe sani ini na Midden-Oosten ben kon na wan kaba. Dati ben de na „kaba” di Jezus ben abi ini prakseri, di a ben taki en profétitori foe den discipel foe en ben jere.
11. (a) San e sori dati Jezus ben abi ini prakseri na „kaba” foe na grontapoe Jeruzalem, di a ben taki en profétitori tapoe na Olijfbergi foe en discipel jere? (b) Jezus ben taki drape, dati de „fasti ten foe den naatsi” ben sa bigin pas, baka te Jeruzalem ben pori, wan sani di ben pasa 37 jari baka na lezing foe Petrus na Pinksteren?
11 Petrus nanga Andréas, Jakobus nanga Johannes ben aksi Jezus: „Oten den sani disi sa de?” Sortoe sani? Di Jezus ben waka na a prasi foe a tempel, a ben taki: „Oenoe no e si ala den sani disi? Foe troe, mi taki gi oen: Dja kwet-kweti no wan ston no sa tan tapoe wan trawan, di no sa broko komoto” (Matt. 24:1-3; Mark. 13:1, 2; Luk. 21:5, 6). Ini na profétitori di Jezus ben taki baka dati tapoe na Olijfbergi, a ben taki: „Bigi nowtoe sa de na a kondre èn atibron tapoe a pipel disi; èn den sa fadon nanga na srapoepisi foe na feti-owroe èn den sa tjari den gwe leki strafoeman na ala naatsi; èn den naatsi sa trapoe Jeruzalem te leki den fasti ten foe den naatsi sa doro den marki” (Luk. 21:23, 24). Jezus no ben taki drape dati den „fasti ten foe den naatsi” ben sa bigin pas ini 70 G.T. nanga na pori foe Jeruzalem èn na poeroe foe den pipel foe heri Judéa. Na takroe kaba foe na djoe seti foe sani ini èn lontoe Jeruzalem nanga en tempel ben kon 37 jari baka na lezing foe Petrus tapoe na Pinksterdé, sodati nanga reti a ben taki dati na kanti trowe foe Gado jeje ben pasa „ini den laatste dé” — foe na djoe seti foe sani.
12. Boiti den falsi Kristus nanga proféti, san ben moe de moro wan pisi foe na „marki”, dati en djoe discipel ben libi ini den „laatste dé”?
12 Ini en profétitori foe Matteus 24:4-22 Jezus ben sori dati soso na kon foe falsi Kristus nanga falsi proféti no ben sa de na wan enkri pisi foe na marki, dati en discipel ben e libi ini den „laatste dé” foe na djoe seti foe sani. Jezus ben taki disi moro fara: „Oen sa jere foe feti nanga njoensoe foe feti; loekoe boen foe oen no skreki. Bikasi den sani disi moesoe pasa, ma na kaba no de ete. Bikasi naatsi sa opo tanapoe tégen naatsi èn kownoekondre tégen kownoekondre, èn ini na wan presi go miti na tra presi mankeri foe njanjan nanga gronseki sa de. Ala den sani disi de wan bigin foe pen foe benawtoe.”
13. Fa sma ben sa handri, leki wan pisi foe na „marki”?
13 „Dan den sa gi oen abra na benawtoe èn kiri oenoe, èn foe mi nen ede ala naatsi no sa wani si oen na ai. Dan foeroe sa naki foetoe èn tori makandra èn no man si makandra na ai. Èn foeroe falsi proféti sa opo tanapoe èn kori foeroe; èn foe na kon moro foe kroektoedoe ede na lobi foe na moro bigi pisi sa kon kowroe. Ma na soema di sa horidoro te na a kaba, en sa kisi verloesoe. Èn na boen njoensoe disi foe na kownoekondre sa préki na a heri grontapoe pe libisma e libi leki wan kotoigi gi den naatsi èn dan na kaba (telos) sa kon. Te foe dat’ede oen si tanapoe ini wan santa presi na tegoe sani di e tjari pori èn di proféti Daniël ben taki foe en (na lésiman moe gebroiki en makti foe si sani), dan meki den di de ini Judéa lon go na den bergi.” — Matt. 24:3-16.
14. Leki fa Paulus ben taki, dan fa a ben sa de nanga den djoe mindri a ten dati?
14 San ben sa pasa ini a ten a mindri? Di na apostel Paulus ben skrifi ini na jari 50 G.T. a ben sori tapoe den djoe nanga den wortoe: „Alaten den e meki na marki foe na sondoe foe den kon foeroe. . . . Ma en (Gado) atibron ben kon te foe kaba tapoe den” (1 Thess. 2:16). So wan sani ben de foe froewakti ini den „laatste dé” foe na djoe seti foe sani ini na Midden-Oosten.
15. Den djoe ben man ofoe no ben man foe drai na „kaba” foe na „laatste dé” foe den?
15 Den djoe di no ben teki na kristendom ben proberi foe drai na kaba foe den „laatste dé” foe na seti foe sani foe den ini Palestina. Ini 65 G.T. den ben opo meki oproeroe nanga den Romein granmasra. Disi ben abi leki bakapisi dati wan srefidensi djoe staat ben kon, di ben tan so wan féfi jari. Srefi djoe moni ben meki foe marki den jari dati sondro howpoe. Ini 70 G.T. den Romeinsma di no ben wani kisi sjen, ben sorgoe dati na kaba (telos) kon sondro foe abi sari.
16. (a) Paulus ben sori ofoe no ben sori ini 2 Timoteus 3:1-5, 12 na den „laatste dé” foe na djoe seti, na pisi ten foe 29 te nanga 70 G.T.? Tjari disi kon na krin. (b) Tra „laatste dé” ben de, di Paulus profétitori ben kan kon troe na ini?
16 A ben de ini na jari 65 G.T., ini na ten foe en tweede nanga laatste strafoe-oso-ten bifo a ben dede wan pinadede, dati na apostel Paulus ben skrifi Timoteus, en getrouw kompe ini na zendingwroko. Ini 2 Timoteus 3:1-5, 12 Paulus ben skrifi en foe na moreel èn kerki toestand di ben sa de ini na ten di a ben kari den „laatste dé”, Timoteus ben de na libi ete kande di Jeruzalem ben pori ini 70 G.T. A de foe dat-ede krin, dati Paulus no ben skrifi Timoteus foe den „laatste dé” foe na djoe seti foe sani, na pisi ten foe 29 te nanga 70 G.T. Paulus ben skrifi en foe wan laatste dé, di, te joe teri foe sensi a ten foe na pori foe Jeruzalem, ben de ini na ten di e kon ete, èn di ben abi foe doe moro leki nanga na djoe pipel, namkoe ala pisi foe na grontapoe. San Paulus ben taki na fesi ini 2 Timoteus 3:1-5 no kon troe kwet-kweti nanga na oproeroe foe den djoe ini 65 te nanga 70 G.T. Di den kristensma ben si na „tegoe sani”, na Romein legre di e tjari pori kon, tanapoe „ini wan santa presi” ofoe ini na birti foe na tempel, den ben lon komoto foe Jeruzalem nanga heri Judéa go na Peréa.
NA LANGA FOE SORTOE „LAATSTE DÉ”
17. San a ben sa wani taki foe na ten, efoe den „laatste dé” soleki wi ben taki, ben akroederi nanga na heri „kristen pisi ten” te nanga now?
17 Ma son bijbelondrosoekoeman kande sa taki, dati den „laatste dé” abi foe doe nanga na heri „kristen pisiten”, foe sensi na pinksterdé, di Petrus ben gebroiki Joël 2:28-32, te nanga wi ten (1981) èn te na a ten di e kon di no abi marki. We, san dati ben sa wani taki? Disi: na sokari djoe pisiten ben tan foe 1513 bifo G.T., di na Wetverbontoe ben sroto na a bergi Sinaï, te nanga 70 G.T, Dati ben de wan ten foe 1582 jari. Te joe teki disi gersi, dan o langa na sokari kristen pisiten de, te disi ben sa marki foe sensi Pinksteren ini 33 G.T., di santa jeje ben kanti trowe èn na fosi kristen gemeente ini na Jeruzalem foe owroeten ben opo? A de kaba so wan 1948 jari kaba. Disi ben sa wani taki, dati den „laatste dé”, efoe den de a srefi ten leki na kristen pisiten, ben sa de hondro hondro jari moro langa leki na djoe pisiten a fesi. Na wan vreemde sani, a no so?
18. San e taki foe den wortoe „laatste dé”, foedi na santa jeje ben kanti trowe tapoe sma ini na heri „kristen pisi ten”, aladi na bigi fadon komoto na bribi ben de?
18 Ma na a tra sé na aksi ben kan aksi: Na santa jeje no ben sa kanti trowe tapoe sma ini na pisi ten foe „den laatste dé”, èn na geest disi, no ben kanti trowe tapoe sma sondro foe stop sensi Pinksteren ini na jari 33 G.T. te nanga now, aladi na bigi fadon komoto na bribi ben de? Ini den jari di ben pasa, sma no ben de di ben taki dati den ben kisi salfoe nanga santa jeje, sodati den ben firi densrefi verplekti foe gebroiki na brede nanga win foe na Avondmaal foe Masra? Disi no wani taki, dati den „laatste dé” foe Tori foe den Apostel 2:16-21 e fadon makandra nanga na heri kristen pisiten, nanga na langa pisi ten disi di no ben stop, pe na santa jeje ben kanti trowe foe salfoe sma?
19. Gi soema Joël 2:28-32 ben skrifi fosi, èn na profétitori ben kon troe bifo den „laatste dé” foe na seti foe sani foe den ben bigin ini Palestina, ofoe ini den dé dati?
19 Tog wi moe teki na prakseri dati na pisi ten foe Gado jejefasi boen-ati gi den djoe, di ben besnij, ben kon na wan kaba ini 36 G.T., di sma di no de djoe èn no besnij, heidensma, ben kisi pasi foe na fosi tron foe kon ini na gemeente foe Kristus discipel di kisi salfoe nanga jeje. Boiti dati, den dé foe na djoe seti foe sani nanga na tempel foe den na Jeruzalem ben tan moro langa, te 70 G.T. Na profétitori foe Joel 2:28-32, di na apostel Petrus ben gebroiki, ben skrifi ini na fosi presi gi den djoe di ben besnij, èn den bijbel historia e sori dati na jeje foe salfoe sma na a ten foe na „laatste dé” foe na djoe seti foe sani ben kanti trowe tapoe sma ini na pramisi Kondre foe den, èn no bifo den dé dati. Den sortoe dé dati no ben de kwet-kweti den laatste dé foe na Romein Kownoekondre, na di foe siksi grontapoe-makti foe na bijbel historia. Na di foe siksi grontapoe-makti disi pas ini 1763 G.T., na di foe sébi grontapoe makti (Na Ingrisi Kownoekondre nanga en Amerkan kolonie) ben teki en presi leki wan kon troe foe na di foe sébi ede foe na agersi wilde meti foe Openbaring 13:1-3, di abi 7 ede èn 10 toetoe.
20. Sortoe internationale politiek makti de nownow ini den „laatste dé” foe den?
20 A de wan sani di de so, dati na Ingrisikondre (nanga na Ingrisi Gemenebest) nanga en staman, den Verenigde Staten foe Amerkankondre, de ini den „laatste dé” foe den. Na internationale seti, di den politiek makti dati de den krakti fetiman foe en, namkoe na organisatie foe den Verenigde Naties nanga 152 kondre di de memre foe en, de sosrefi toe ini en „laatste dé”. Fa a de foe datede wan onredelek sani foe taki, dati den „laatste dé” di e taki foe den ini Joël profétitori, abi foe doe nanga a langa kristen pisiten!
21. (. . . ?)
21 Tapoe na gron leki fa sani ben pasa, dan na apostel Petrus ben tjari Joël profétitori kon tapoe na laatste pisi foe na djoe seti foe sani ini na Midden-Oosten. Ma Petrus no ben taki, èn disi no e taki toe ini Joël 2:28, 29, dati no wan srefi pisiten foe den „laatste dé” ben sa de, èn dati ini na pisiten dati tapoe wan spesroetoe fasi na kanti trowe foe santa jeje tapoe sma ben sa feni presi.
22. (. . . ?)
22 San Joël ben taki na fesi foe na kanti foe santa jeje tapoe sma, namkoe wondroe ini hemel, marki na grontapoe, broedoe, faja, smoko, na kon doengroe foe na son, èn moenkenki di tron broedoe, no ben pasa alamala ini den „laatste dé” pe Petrus ben libi na ini. Efoe Jehovah, leki na Sma di gi na profétitori, foe datede wani de troe ini ala sani di a ben taki na fesi, foedi ala pisi foe en profétitori e kon troe, dan ete wan pisiten moe de di moe kari den „laatste dé”. Sani di pasa ini historia moe tjari kon na fesi foe gi piki tapoe na aksi di den fo apostel ben aksi Jezus Kristus: „San sa de na marki foe joe de-noja (parousia) èn foe na bosroiti foe na seti foe sani?” (Matt. 24:3). Na bewijsi di de now, e sori dati wi e libi ini na disiten kon troe foe den „laatste dé”. Ma oten, èn foe sanede? Wi o poti wi prakseri tapoe den aksi disi ini na tra artikel.