Baka den „laatste dé disi” Gado Messias Kownoekondre!
1. (a) San den wortoe „laatste dé” wani taki tapoe na tori foe den dé dati? (b) Den „laatste dé” foe na djoe seti foe sani ben kon na wan kaba?
DÉ di e kari den „laatste dé”, moesoe kon wan dé na wan kaba. Ini na tori foe den djoe nanga na njoen tempel foe den ini Jeruzalem, den dé dati ben kon na wan kaba ini na jari 70 G.T. Noso foe sanede den ben kisi na nen foe „laatste dé”? Te joe loekoe en na historia sé, dan troetroe wan kaba (telos) ben kon na den. Jezus ben taki foe den „laatste dé” foe na djoe seti foe sani: „Dan so wan bigi benawtoe sa de, soleki sensi na bigin foe grontapoe te now no ben kon ete, èn no sa kon moro toe. Efoe foe dat’ede den dé no ben koti kon sjatoe, dan no wan skin no ben sa kisi verloesoe; ma foe den sma di Gado ben verkisi ede, meki den dé dati moe koti kon sjatoe.” — Matt. 24:21, 22; Mark. 13:19, 20.
2. (a) Soema ben de den „sma di Gado ben verkisi” èn di foe den ede na „bigi benawtoe” tapoe Jeruzalem ben koti sjatoe? (b) Te wi loekoe na kon troe foe Jezus profétitori na sortoe fasi, meki den ben sa de wortoe di de pasa marki?
2 Leki fa tori e sori dan 97.000 djoe ini Jeruzalem ben pasa libi-libi na lontoe nanga na pori foe na santa foto foe den nanga na tempel di kownoe Herodes ben bow. Ma den no ben de den sma „di Gado ben verkisi” èn di foe den ede meki na „bigi benawtoe” ben koti sjatoe. Den sma „di ben verkisi” ben de den kristensma, di, baka den (Romein sroedati) ben gwe libi na lontoe die den lontoe na (foto Jeruzalem) ini 66 G.T., ben gi jesi wantronwantron na Jezus rai di ben gi ini Matteus 24:16-20 èn den ben lon komoto foe na foto di ben o pori, go na wan presi dorosé foe na distrikt Judéa. Ala sani di ben pasa na a ten dati, ben ogri nofo. Ma efoe na sani di Jezus ben taki foe en ini Matteus 24:21, 22 nanga Markus 13:19, 20, ben abi foe doe soso nanga na kaba (telos) foe Jeruzalem ini 70 G.T. dan den wortoe foe en ben pasa marki. A no ben de na moro bigi benawtoe di ben de oiti ini na heri historia foe na libisma-famiri.
3. Ma foe sortoe oekoe wi moe loekoe na pori foe na owroe Jeruzalem, te den wortoe foe Jezus wani kon troetroe reti?
3 Jezus wortoe foe gersi nanga makandra e kon na en reti te wi e si na pori foe Jeruzalem leki wan eksempre ofoe wan tesi-afersi foe wan „bigi benawtoe” di didon ini na ten di e kon èn di no abi en speri, na pori foe na kristenheid, di e taki dati a doro so wan wán miljard (wan doesoen miljoen) memre. Na pori foe en de na bigin foe na pori foe na heri grontapoekondre foe falsi religie. Sjatoe baka dati sa kon na pori foe ala grontapoe elementi di ben poti densrefi aparti foe na Babylon grontapoekondre foe falsi religie, ma di no ben doe disi foe na boen foe Gado Messias kownoekondre. Na nomroe foe libisma libi di sa pori ini na „bigi benawtoe” dati, sa pasa krinkrin na bigi nomroe di ben dede ini na froedoe foe Noach dé - dati wani taki, ini den jari 2370-2369 bifo G.T.
4. (a) Ini sortoe ten den „feti nanga njoensoe foe feti”, di Jezus ben taki foe den na fesi, ben sa pasa? (b) Dati den de kari „wan bigin foe pen foe benawtoe” e sori tapoe san?
4 „Den feti nanga njoensoe foe feti” di Jezus ben taki foe den ini en profétitori foe Matteus 24:4-22 de foe wan spesroetoe ten. Ini na tori foe na djoe seti foe sani, di en discipel ben aksi sani foe en, na pisi ten disi ben abi foe doe nanga den „laatste dé” foe 29 te nanga 70 G.T. Na pisi ten disi, troetroe ben abi leki marki „feti nanga njoensoe foe feti”, makandra nanga angriten, pestsiki, nanga gronseki. Sondro degedege, den djoe ben ondrofeni wan toe bakapisi foe den ongolokoe sani dati. Ma Jezus ben taki dati den sortoe sani disi ben sa de soso „wan bigin foe pen foe benawtoe” (Matt. 24:8). Den no ben sa de den laatste dede-pen.
5. (a) Den benawtoe sani ini na ten dati ben tjari go na a „denoja” foe Kristus nanga na „bosroiti foe na seti foe sani”? (b) Boiti dati, na Kownoekondre-préki ben doe ofoe no ben doe ini a fasi fa a ben taki na fesi? Verklari disi.
5 Den ongolokoe sani dati ben tjari na kaba (telos) foe na djoe seti foe sani kon. Ma soleki wi kan si now, dan den no ben de na „marki foe (Kristus) de-noja nanga na bosroiti foe na seti foe sani”, sani di ben de ini den aksi foe den discipel (Matt. 24:3; Mark. 13:4). Sosrefi toe na préki foe „na boen njoensoe disi foe na kownoekondre na a heri grontapoe leki wan kotoigi gi ala naatsi” ben doe tapoe wan pikin fasi ini „den laatste dé” foe na djoe seti, foedi pikinso kownoekondre-prékiman ben de nomo, èn na préki disi ben doe ondro vervolgoe (Matt. 24:9-14). A no de foe taki, dati na heri grontapoe ben de wan opo kontren gi den, foedi na Kownoekondre-préki no ben sa go wawan na den djoe di ben besnij. Baka na opobaka foe Jezus na dede, en discipel ben kisi na komando foe „meki discipel foe sma foe ala naatsi” (Matt. 28:19, 20). Na Kownoekondre-préki na a heri grontapoe ben moe doe ete soboen ini na ten di ben kon, baka 70 G.T.
6. (a) Sortoe sani ben sa feni presi, leki fa ben taki na fesi, baka na benawtoe di ben kon tapoe den djoe ini na ten dati? (b) Foe sanede den „sma di ben verkisi” no ben teki na sé foe ala „lo foe grontapoe” ini na bari kré?
6 Baka di Jezus ben ferteri foe na „bigi benawtoe” di ini 70 G.T. ben kon tapoe Jeruzalem, a ben taki moro fara foe sani di „ben sa kon wantronwantron baka na benawtoe foe den dé dati” (Matt. 24:29). „Na marki foe na Manpikin foe libisma” ben sa kon; Sosrefi toe, no wawan den 12 lo foe den djoe na skinfasi, di ben panja, ma ala „lo foe grontapoe” ben sa bari kré. Sosrefi toe, ala en „sma di ben verkisi” ben sa tjari konmakandra te leki den doro na marki. „Den sma di ben verkisi” no ben sa teki na sé foe ala „lo foe grontapoe” ini na bari-kré foe den foe na grontapoerampoe di e kon. Den ben sa prisiri, na presi dati den ben sa bari kré foe na „marki foe a Manpikin foe libisma”, di ben sa kon ini hemel (Matt. 24:30, 31). Den ben sa prisiri foe na bewijsi dati den ben de ini den „laatste dé” foe na owroe grontapoe seti. Sensi na sari jari dati 1914 G.T., na jari pe na libisma-famiri ben si na fosi grontapoe-feti, dan wi ben si na bewijsi dati moro bigi.
7. Leki fa na Wi Tata begi sori, dan san moe psa na a kaba foe den „laatste dé” foe na grontapoe seti foe sani?
7 Den „laatste dé” foe wan pisiten moe abi wan sani di e waka na den baka. San sa waka baka den „laatste dé” foe na grontapoe seti foe sani disi? Wansi san grontapoe loekoeman e taki na fesi san de na toestand foe grontapoe baka wan derde grontapoe-feti di den e froewakti, Jehovah Kotoigi e si na fesi Gado Messias Kownoekondre, na kownoekondre di Jezus ben leri en discipel foe begi foe en ini na Wi Tata begi. — Matt. 6:9, 10.
8. Foe sanede kristensma e begi te now ete na Wi Tata begi, wansi san Paulus ben skrifi ini 60-61 G.T. ini Kolossenzen 1:13?
8 Wi e begi na begi te now ete, wansi san na apostel Paulus ben skrifi so wan 60-61 G.T. ini Kolossenzen 1:13. A ben skrifi na a ten dati: „En (na hemel Tata) ben fri wi foe na makti foe doengroe èn ben poti oen go abra ini na kownoekondre foe na Manpikin foe en lobi.” Disi e sori tapoe wan jeje kownoekondre, pe den kristensma ini Kolosse ben poti go na ini, aladi den ben de dja ete na grontapoe ini skinfasi, ini wan foto foe Pikin-Azië di ini religieus fasi ben de ini doengroe. Na jeje toestand di den ben de na grontapoe ondro na tirimakti foe Satan Didibri, no ben de na kon troe foe na Wi Tata begi: „Tata, joe nen moe de santa. Joe kownoekondre moe kon” (Luk. 11:2; Matt. 6:9, 10). Te na begi dati ben wani kon troe krinkrin, dan na Manpikin foe Gado lobi ben moe poti tapoe na troon èn ben moe moro leki wan jeje kownoekondre di ben sa wroko foe na boen foe en discipel.
NA MESSIAS-KOWNOE NANGA EN BORGROE, DI GERSI SKAPOE
9, 10. (a) Leki fa na agersitori foe Jezus foe den skapoe nanga bokoboko sori, dan o fara a ben sori tapoe en kownoekondre? (b) San Jezus ben sa doe fosi, bifo na pratiwroko ben sa feni presi, èn san na actief doe dati ben sa wani taki?
9 Ini en profétitori foe „na bosroiti foe na seti foe sani” Jezus ben sori fifini na en kownoekondre. Leki fa na tori foe na apostel Mattéus e taki, dan Jezus ben bosroiti en profétitori nanga na agersitori foe den agersi skapoe nanga bokoboko. Ini Matteus 25:31, 32 a ben bigin na agersitori nanga den wortoe: „Te soemapikin sa ben kon ini en glori, èn ala engel nanga en, dan a sa teki presi tapoe en glori troon tapoe. Èn ala naatsi sa tjari konmakandra na en fesi, èn a sa prati den libisma (no den naatsi) foe makandra, soleki wan herder e prati den skapoe foe den bokoboko.” Disi ben sa pasa baka te Jezus di ben poti tapoe na troon ben sa tjari wan kaba kon na a ten di Satan Didibri nanga en ogri jeje ben kisi foe tan ini hemel, èn den ben sa iti trowe komoto foe den hemel tanpresi go na a birti foe wi grontapoe. Ala disi e akroederi nanga na proféti prenki ini Openbaring 12:5-9. Foe na actief doe disi wi e lési:
10 „Èn mi (Johannes) ben jere wan tranga sten ini hemel taki: ’Now ben kon na verloesoe nanga na krakti nanga na kownoekondre foe wi Gado èn na makti foe en Kristus, bikasi na kragiman foe wi brada, di e kragi den dé nanga neti na fesi foe wi Gado, trowe go na gron! Èn den ben wini en nanga na broedoe foe na Lam èn nanga na wortoe foe na kotoigi, di den ben gi, èn den no ben lobi den sili, srefi te den ben tanapoe na fesi dede. De nanga prisiri foe datede, oen hemel èn oenoe di de drape na ini! Heloe foe grontapoe nanga na se, bikasi Didibri saka go na oenoe, èn a abi bigi atibron, foedi a sabi dati a abi wan sjatoe pisiten nomo.’” — Openb. 12:10-12.
11. (a) Oten den fo „asiman foe Apocalypse ben bigin rij, te joe loekoe den sani di ben pasa? (b) Nanga sortoe sjatoe pisiten di ben taki na fesi ini Jezus profétitori foe den laatste dé”, na pisiten foe wi foe feti sensi 1914 e akroederi nanga en?
11 Sortoe sma di sabi sani boen kan taki dati a no de so dati so wan bigi „heloe (gi) grontapoe nanga na se” ben marki na twintigste eeuw sensi 1914, na jari, di den fo „asiman foe na Apocalypse” ben bigin foe rij, te joe sa loekoe ala bewijsi? (Loekoe Openbaring 6:1-8) Dati moe de wan „marki” sondro foe meki wan misték dati ini 1914 den „laatste dé” foe na seti foe sani foe disi grontapoe ben bigin èn dati wi de ini na „bosroiti foe na seti foe sani”. Èn sensi Satan Didibri nanga en demon ben iti komoto foe hemel, dan sosrefi toe foe den „laatste dé” foe den ben doro bifo den iti go ini na peti sondro gron, bifo na doesoen jari tiri foe na Messias Jezus (Openb. 20:1-3, 7). A de krin dati na Fosi Grontapoefeti foe 1914 èn na Tweede Grontapoefeti foe 1939 èn den tintron feti di ben feti na grontapoe sensi 1945, de wan disiten parallel foe den „feti nanga njoensoe foe feti” (makandra nanga den angriten, pestsiki nanga gronseki) di, soleki Jezus ben taki, ben sa meki den jari 29 te nanga 70 G.T. de den „laatste dé” foe na djoe seti foe sani, di ben drai lontoe Jeruzalem nanga na tempel di ben bow njoen baka.
12. Efoe Jeruzalem ini 70 G.T. no ben ondrofeni krinkrin san Jezus ben taki na fesi ini Matteus 24:21, 22, san de foe taki dan foe na sani pe na grontapoe seti foe sani now e lon go?
12 O takroe na benawtoe ben de di ben kon tapoe Jeruzalem, ete a no ben de so takroe leki san Jezus ben taki ini en profétitori foe Matteus 24:21, 22. Ma now na agersi Jeruzalem (na kristenheid), ja, na heri grontapoekondre foe falsi religie, ja na heri grontapoe seti foe sani e lon go na a „bigi benawtoe soleki sensi na bigin foe grontapoe te leki now no ben kon ete, èn no sa kon moro toe”. Foe datede meki a no de wan vreemde sani dati wi e si na kon troe foe na profétitori di na apostel Paulus ben taki ini 65 G.T. èn di wi e feni ini 2 Timoteus 3:1: „Sabi disi dati ini den laatste dé moeiliki ten sa kon.”
NA LAATSTE MEKI BEKENTI NA HERI GRONTAPOE
13. Sortoe tra marki foe Jezus profétitori, akroederi nanga Openbaring 12:11, ben sa meki na „bosroiti foe na seti foe sani” so spesroetoe?
13 Soleki tanapoe ini Openbaring 12:11, dan kristen di Satan Didibri ben kragi, „ben wini (en baka en fadon foe hemel) nanga na wortoe foe na kotoigi di den ben gi”. Na kon troe foe disi de ete wan marki fa na „bosroiti foe na seti foe sani” ben sa kan si. Sortoe marki? „Na boen njoensoe disi foe na kownoekondre sa préki tapoe na heri grontapoe leki wan kotoigi gi ala naatsi, èn dan na kaba (telos) sa kon” (Matt. 24:14). Disi e psa na a kaba foe den „laatste dé”.
14. Fa na Kownoekondre-kotoigiwroko disi ben pasa krinkrin na préki ini den „laatste dé” foe na djoe seti foe sani?
14 So wan kotoigiwroko, di Jehovah Kotoigi ben gi sensi na kaba foe na Fosi Grontapoe tapoe 11 november 1918, ben pasa krinkrin na internationaal kotoigi di ben gi ini den „laatste dé” foe na djoe seti foe sani foe 29 te nanga 70 G.T. Na a ten dati na kotoigi ben gi ini Azia, Europa nanga Afrika. Now a no e gi wawan ini den pisi dati foe grontapoe, ma sosrefi toe ini Amerika, ini Australia nanga tapoe den eilanti foe na Bigi Se, ja, tapoe na heri grontapoe.
15. San spotoeman, foe soso a doe disi, kande ben sa taki foe den zendelingen, di na kristenheid ben seni go ini den hondrohondro jari di pasa?
15 Joe abi kande sma di nanga spotoe sa soso a doe disi èn sa poti krakti na tapoe dati den zendeling foe na kristenheid ben doro na ala den presi disi ini den hondro-hondro jari di pasa, bifo den kristen kotoigi ben dren foe kon srefi. Foe troe! Ma na kownoekondre-kotoigi di Jehovah Kotoigi ben gi sensi 1914, kenki krinkrin foe san den zendelingen foe na kristenheid ben meki bekenti a fesi soleki sensi 1914.
16, 17. (a) Na sortoe fasi na Kownoekondre-kotoigiwroko di ben gi sensi na kaba foe na Fosi Grontapoe-feti ini 1918, ben kenki foe san den zendeling foe na kristenheid ben préki? (b) Leki wan bewijsi foe disi, san ben taki ini na uitgave foe 1 juli 1920 foe na tijdschrift na Watch Tower?
16 Na sortoe fasi a „kenki”? Bikasi a no ben de wan kotoigi foe na kownoekondre di ben kari ini Kolossenzen 1:13, „na kownoekondre foe na Manpikin foe Gado lobi”, pe den 144.000 jeje Israëlsma di ben kisi wan ségelmarki ben poti go na ini (Openb. 7:1-8). San Jehovah Kotoigi ben préki sensi 1918 na heri grontapoe, ben de wan aparti sani, wan sani di e marki na ten disi leki den „Laatste dé” foe na politiek, maatschappelijk, rechterlijk nanga sroedati seti foe sani. A de wan kotoigiwroko na heri grontapoe foe wan kownoekondre tiri di opo now ini hemel, èn di kisi na makti foe trowe Didibri nanga en demon komoto foe na presi pe a troon foe en de (Openb. 12:5-9). Moro pikinso leki toe jari baka na kaba foe na Fosi Grontapoefeti na tijdschrift The Watch Tower and Herald of Christ’s Presence (Na Wachttoren èn Prekiman foe Kristus denoja) ben tjari kon na doro ini en uitgave foe 1 juli 1920 na ede-artikel, di ben nen „Evangelie foe na Kownoekondre”. Baka di den ben teki skrifi Matteus 24:14, den ben taki disi na a ondro-ede „Wroko gi ala sma”:
17 „Na evangelie wani taki boen njoensoe. Na boen njoensoe abi foe doe dja nanga na kaba foe na owroe ordening foe sani èn na opo foe na kownoekondre foe na Messias. A wani taki dati na doengroe neti foe sondoe nanga sari e pasa. A wani taki dati na kondre foe Satan e fadon èn noiti sa opo moro.” — Bladzijde 199, 200.
18. (a) Leki fa Jezus profétitori taki, dan baka san na kaba sa kon? (b) Nanga sortoe fositen dé wi „laatste dé” e waka paralel leki wan kon troe foe Joël 2:28, 29?
18 Te na préki foe na boen njoensoe disi foe na Messias kownoekondre, di ben opo ini 1914 ini hemel, ben doe ini na fasi dati Gado wani disi, dan „na kaba (telos) sa kon” (Matt. 24:14). Na laatste Kownoekondre-préki disi tapoe na heri grontapoe, soboen e doe ini na ten foe den „laatste dé”. Disi de foe datede den joisti dé, di na troetroe kaba foe na profétitori foe Joël 2:28, 29 moe feni presi, soleki ini den dé foe na apostel Petrus nanga en kompe-apostel wan fosi kon troe foe na profétitori ben de, soleki ensrefi ben tjari kon na krin na Pinksteren ini na jari 33 G.T. Den „laatste dé” foe wi de foe dat-ede wan disiten paralel foe den „laatste dé” foe den.
19. Sortoe sani di ben psa ini den „laatste dé” pe den apostel ben libi na ini, moe abi sosrefi toe wan disiten paralel, efoe na teki gersi foe den pisiten foe „laatste dé” wani kon troe krinkrin ini ala fasi?
19 Foe meki na parallel kon boen dorodoro ini ala fasi, dan wan kanti foe santa jeje foe salfoe „ala sortoe foe skin” ben de toe? (Tori foe den apostel 2:16-19) Wi no e degedege foe taki dati Joël 2:28, 29 ben kisi wan aparti kon troe sensi na jari 1914 di ben seki grontapoe. Ini na ten foe na Fosi Grontapoe-feti, dan feanti foe na Messias-Kownoekondre, spesroetoe den kerki-fesiman foe na kristenheid ben man foe meki den tapoe ofoe skotoe na kownoekondre-préki di Jehovah salfoe dienstknegti ben doe. Disi e akroederi nanga na 51 dé foe sensi na dede foe Jezus tapoe 14 Nisan te nanga na mamanten foe Pinksteren tapoe 6 Sivan 33 G.T. Tapoe na di foe 50 dé foe sensi Jezus opobaka, dan den pikinso discipel di a ben abi èn di ben konmakandra ini Jeruzalem, ben kisi krakti foe tapoesé di na jeje foe salfoe sma ben saka kon tapoe den èn den ben tron Jezus publiki kotoigi.
20. San ben pasa baka di tiriman foe na Wachttorengenootschap ben kon fri ini 1919 foe strafoe-oso èn di e kon akroederi nanga san ben tjari kon na krin ini Openbaring 11:7-13?
20 Baka di tiriman foe na Wachttorengenootschap nanga den kompe-strafoeman foe den ben kon fri ini maart foe na baka-oorlog jari 1919 foe na federale strafoe-oso ini Atlanta, Georgia (Amerkankondre) dan santa jeje tapoe wan makti fasi ben wroko tapoe na fikapisi foe Jehovah dienstknegti na grontapoe di ben gi den srefi abra èn dopoe. Ondro na poesoe-krakti foe na jeje disi, den ben poti densrefi tapoe na wroko, di ben tjari kon na krin gi den ini Matteus 24:14, namkoe dati te na a kaba den sa tan gi na laatste kotoigi foe Gado Kownoekondre di ben opo. Disi e akroederi na agersi fasi nanga san tanapoe ini Openbaring 11:7-13.
21. (a) San ben pasa tapoe Pinksteren foe na jari 33 G.T. nanga doesoen doesoen djoe di ben kon makandra foe na fesa ini Jeruzalem? (b) Sortoe spesroetoe sani ben marki den algemeen congres akroederi nanga disi ini 1919?
21 Ini na ten dati ini 33 G.T. so wan dri doesoen djoe di ben konmakandra foe na Pinksterfesa, ini Jeruzalem ben dopoe „ini na nen foe na Tata èn foe na Manpikin èn foe na santa jeje”, nanga na djaranti dati den ben sa kisi na presenti foe na santa jeje. Baka ten na nomroe foe den sma di ben kisi na santa jeje foe salfoe sma, ben kon de so wan féfi doesoen (Tori foe Apostel 2:37-41; 4:4; Matt. 28:19, 20). Ini wi disiten „laatste dé”, èn a no ben de ete wan afoe jari baka di memre foe na ede-kantoro foe na Wachttoren-genootschap ben kon fri foe na strafoe-oso foe Atlanta ini Georgia (VS) dan foe 1-8 september 1919 wan algemeen congres ben hori ini Ohio (VS). Tapoe na congres disi moro leki 200 sma ben kisi dopoe ini na Eriemeer nanga na howpoe foe dopoe ini na jeje skin foe Kristus. Tapoe na di foe toe congres ini Cedar Point, di ben hori dri jari na baka, dan 361 sma ben dopoe leki toekomstige memre foe na jeje skin foe Kristus, di abi na howpoe foe hemel. Tapoe na congres di ben hori ini Columbus, Ohio (VS), dan 485 sma ben dopoe.
22. Fa Joël 2:28, 29 ben gebroiki ini 1925 ini Indianapolis èn san e sori dati Gado e hori ensrefi soifri na a ten tapoe a tori foe na profétitori dati èn dati a de wan Proféti di no e meki fowtoe?
22 Ini na jari 1925, dan no wawan foeroe sma ben dopoe tapoe na congres ini Indianapolis, Indiana (VS), ma sosrefi toe wan prenspari lezing ben hori. Disi ben abi leki nen „Na santa jeje kanti” èn a ben behandel wan disiten kon troe foe Joël 2:28, 29. Doesoen doesoen moro leki oiti na fesi ben teki prati na a brede nanga win foe na Avondmaal foe Masra na a hori foe en ibri jari (den bladzijde 339-344 foe na Watch Tower, 15 november 1925). Ini na ten foe den „laatste dé” sensi na jari 1914 di na oorlog ben priti, dan santa jeje tapoe wan spesroetoe fasi ben kanti leki wan bewijsi dati Jehovah e doe ala sani tapoe na fasti ten di a ben poti èn dati a de wan Proféti di no e meki fowtoe. Den „laatste dé disi” djonsro sa feni den kaba (telos) ini na moro „bigi benawtoe” di na grontapoe ben ondrofeni oiti.
23. Sortoe rigeri sa kon baka den sani di pasa na fesi, nanga sortoe winimarki gi den sma di ben pasa libilibi foe na „benawtoe” èn foe ala dedesma di ben bai fri?
23 Te foe kaba, dan san sa kon baka ala disi? Openbaring 19:11 te nanga 20:6 e piki: Jehovah Gado doesoen jari Messias kownoekondre sa kon èn nanga disi „vréde tapoe grontapoe ondro sma foe boen wani” sa kon. Den fosiwan sa prisiri ini disi vréde, de den sma di pasa libilibi na „bigi benawtoe”, namkoe wan fikapisi foe den sma di santa jeje ben kanti tapoe den ini na pisiten foe den „laatste dé”, nanga na „bigi ipi” foe kompe di gersi skapoe, èn di te nanga na kaba ben tan na den sé (Luk. 2:14; Matt. 24:21; Openb. 7:9, 14, 15). Na en fasti ten, te den doesoen jari dati tapoe wan bigi fasi lon go na wan boen kaba, dan na opobaka foe ala dedesma sa kon, di sa jere na sten foe na Lam foe Gado, na Messias Kownoe Jezus, di ben gi en volmaakti libisma libi, leki wan verloesoeprijs gi den alamala. — Openb. 20:11; 21:4; Joh. 5:28, 29.
[Faki na tapoe bladzijde 10]
Na Kownoekondre-préki foe Jehovah Kotoigi sensi 1914 e kenki bigi nanga di foe den zendeling foe na kristenheid, bikasi:
A de pasa ini na ten foe den „laatste dé” foe na pori seti foe sani
A de sori dati Gado Kownoekondre ini 1914 de wan troetroe sani
Sensi 1919 a abi na marki foe wan bigi kanti trowe foe Gado jeje, di meki Joël 2:28, 29 ben kon troe dorodoro
A de doro en hémarki ini na „kaba” (telos), foe den „laatste dé”, ini na moro bigi benawtoe di grontapoe ben ondrofeni oiti
A de gi na moro bigi howpoe dati na salfoe fikapisi nanga na „bigi ipi” sa pasa libilibi na „benawtoe” èn sa go ini na kontren foe na doesoen-jari kownoekondre foe na Messias
A de sori tapoe na kon troe foe Gado pramisi, dati den dede libisma sa opobaka tapoe wan paradijsgrontapoe