Dini Jehovah „skowroe na skowroe”
„Dan mi sa meki volkoe go abra foe taki wan njoen tongo, sodati den sodati den alamala sa kari na nen foe Jehovah, foe dini en skowroe na skowroe.” — Zef. 3:9.
1. Sortoe djaranti wi abi foe na profétis wortoe foe Jehovah?
JEHOVAH profétis wortoe sondro misi alaten e kon troe. A de taki ensrefi foe disi: „A so mi wortoe di komoto foe mi mofo, sa de. A no sa drai kon na mi baka sondro winimarki, ma a sa doe séker den sani di mi abi prisiri na ini èn a sa abi séker boen bakapisi ini san mi ben seni en go doe” (Jes. 55:11). Disi séker wi kan taki foe boen foeroe pikin sani foe na prenspari profétitori foe Zefanja.
2. (a) Zefanja e sori tapoe sortoe nationaal groepoe ini Zefanja 2:4-8? (b) Fa wan sma di ben sa tjari wan fisiti go na den fositen tanpresi ben kan si o soifri na profétitori ben kon troe?
2 Foe eksempre, Zefanja ben skrifi den wortoe foe kroetoe di ben taki gi den foto foe Filistéa, na naatsi foe den Kerethietsma, na kondre foe den Filistijnsma èn Moab èn Ammon (Zef. 2:4-8). Ala den profétitori dati ben kon troe ini ala den jari nanga eeuw di ben kon na baka tapoe wan spesroetoe fasi. Pe wi abi now na naatsi foe den Filistijnsma, nanga en foto, èn pe den Kerethietsma di ben de na den ondro de? Den no de moro. Fa a de nanga Moab èn Ammon? Na profétitori e taki:
„’So troe leki mi e libi’, a so den wortoe foe Jehovah foe den legre de, na Gado foe Israël, ’Moab sa tron leki Sodom, èn den manpikin foe Ammon nanga Gomorra, wan kontren foe maka, èn wan sowtoepeti, èn wan broko presi di sma libi gwe, ja, foe ten di no abi marki’” (Zef. 2:9).
San joe e si te joe e waka psa den kontren foe trans-jordanië now pe wan dé den hémemre naatsi foe Moab nanga Ammon ben go na fesi? Pori — soleki Jehovah ben taki na fesi! Na historia e sori dati Ethiopia, makandra nanga Egypte, ben njan pina foe den Babylonsma di ben kon feti. — Zef. 2:12.
„WAN SANI FOE FROEWONDROE”
3, 4. (a) Fa den wortoe foe Jehovah ben de gi Assyria nanga Ninivé? (b) Foe san-ede disi ben sa gersi wan dangra sani? (c) San de wan bewijsi foe na toemsi moi kontroe foe a profétitori?
3 Na kontroe foe den wortoe foe Jehovah di ben abi foe doe nanga Assyria nanga Ninivé de wan troetroe froewondroe sani. Zefanja ben taki profétitori na a ten di Assyria hémemre mamafoto Ninivé ben de ini na glori ten foe en, a moro pikinso 15 jari bifo na naatsi dati ben troesoe komoto foe en positie leki di foe toe grontapoe-makti foe na bijbel historia. Soema bén kan prakseri so wan sani? Ma Jehovah ben de kontra na nationalistis „foto dati foe trowe sma broedoe” (Nah. 3:1, 5). Na a mofo foe Zefanja a ben taki dati a ben sa pai en nanga den wortoe:
„A sa langa en anoe go na noordsé, èn a sa pori Assyria. Èn a sa meki Ninivé de wan broko presi di sma libi gwe, wan kontren sondro watra leki a gran sabana. . . . disi a prisiri foto di ben sidon ini sékerfasi, di ben taki ini en ati: ’Na mi na a man, èn nowan trawan de.’ O fa a tron wan sani foe froewondroe, wan presi pe den boesmeti didon langalanga! Ibriwan sma di e waka psa, sa froiti; a sa seki nanga en anoe.” — Zef. 2:13-15.
4 ’Dati na wan sani di no kan!’ Sma ini na ten dati ben sa taki. Ma tokoe densrefi sma dati ben si en! Ini 633 bifo G.T. Nabopolassar foe Babylon nanga na Mediasma Cyaxares ben lontoe Ninivé èn wini en. Ini den boekoe foe Babylon wi e lési foe disi: „Na bigi goedoe di ben tjari gwe èn (den ben kenki) na foto ini wan pikin bergi foe brokobroko sani”. Na pori foe Ninivé ben de so dorodoro dati srefi na presi foe en no ben de bekenti hondro hondro jari. Ini den jari 1800 den ben kon feni na foto njoen baka èn na barinen bibliotheek foe Assurbarnipal 2 ben tjari kon na krin. Ma te nanga na dé foe tide na kontren de wan broko presi pe sani no e gro èn pe wanwan tron ipi meti e rostoe. O soifri Jehovah profétis wortoe ben kon troe.
5. Sortoe krakti boskopoe na profétitori disi abi gi na ten foe wi?
5 Ma a moro prenspari sani de, dati na profétitori disi abi wan boskopoe gi wi ten. A de dini leki „wan warskow gi wi, di den kaba foe den seti foe sani ben kon na wi” (1 Kor. 10:11, 12; Rom. 15:4; 2 Tim. 3:16, 17). A de gi wi tranga foe hori wisrefi farawe foe hémemre, na gi wisrefi abra na a soekoe foe prisiri, na denki foe sani di abi foe doe nanga goedoe èn na fasi foe doe ogri, di ben meki na kroetoe foe Jehovah ben kon tapoe den naatsi dati. Wi moe hori na prakseri sosrefi toe dati den profétitori dati de nownow na libi èn dati ibri momenti den kan abi na hé marki foe na kontroe foe den. Jehovah, na libi Gado, no wawan ben kibri den te na a ten disi foe na historis waarde foe den. Den owroe naatsi disi abi na disiten model foe den, spesroetoe ini den politiek-sroedati makti di gersi Assyria èn di e meki bigi tapoe na sroedati makti foe den. Séker Jehovah sa teki refrensi tapoe ala den sroedati feanti disi foe en kownoekondre. — Nah. 1:2; Zef. 1:2, 9.
„HELOE . . . GI NA FOTO DI E KWINSI SMA”
6. Sortoe aksi wi e aksi now èn foe sainde a de fiti?
6 Den disiten totalitair, autoritair tiri e akroederi soifri nanga na ogri-ati Ninivé foe na makti kownoekondre foe Assyria. Ma ete Jehovah e sori krin dati wan bepaalde pisi foe na disiten grontapoe seti foe sani abi moro fowtoe ini en ai. Sortoe pisi na dati?
7. (a) Sortoe „foto di ben kwinsi sma” e akroederi nanga na owroe Jeruzalem èn na sortoe fasi? (b) Fa a ben wégri tranga leri?
7 A de a pisi foe na grontapoe di e taki dati den de Gado egi pipel, soleki Juda nanga Jeruzalem ben e taki dati ini den dé foe Zefanja. A de taki dati a de „kristelek” èn sma sabi en ini algemeen leki „na kristenheid”. Ma den kerki fesiman foe en fadon komoto foe na soifri leri foe na Wortoe foe Gado na bijbel èn den naatsi èn volkoe foe no e broko den ede kwetkweti foe den toemoesi moi moreel markitiki di tjari kon na krin ini na Wortoe dati. Foe datede meki Zefanja e taki now kontra na „foto” dati di e afrontoe Gado nanga den wortoe:
„Heloe foe en di e meki oproeroe èn di e doti ensrefi, na foto di e kwinsi sma! A no ben arki na wan sten; a no ben teki tranga leri. A no ben poti foetrow na Jehovah. Na a Gado foe en a no ben go krosbé.”
Ala pe ini na krestenheid Jehovah ben seni en kotoigi go na den foto nanga dorpoe foe fisiti den sma oso foe oso. „Mamanten baka mamanten” den ben meki en kroetoe bekenti. „Na déten” den regtvaardiki wèt foe en ben tjari kon na krin. Ma den tiriman nanga fesiman foe na kristenheid ben de „sondro sjen” èn no ben „abi sjen” ini na gens di den e gens den boskopoeman foe na regtvaardiki Jehovah èn en kownoekondre. — Zef. 3:1-5.
8, 9. (a) San Jehovah srefi e meki bekenti now? (b) O fara wi kan gebroiki na sani disi? (c) Foe sainde wi moe de grantangi gi disi?
8 Foe hori baka gi en getrow proféti, meki na Soeverein Masra Jehovah e go doro now nanga na kroetoe-boskopoe, ai meki a kon moro bigi foedi a de tjari ala naatsi kon na ini èn a de tjari en kon na wan hé marki nanga den wortoe:
„’Foe datede, tan froewakti mi’, a so den wortoe foe Jehovah de, ’te leki na dé di mi e opo tanapoe foe wini sani, bikasi mi kroetoe bosroiti de foe tjari naatsi kon makandra, foe mi tjari kownoekondre kon makandra, sodati mi kan kanti tapoe den, den sani di mi no e feni boen, heri mi faja atibron; bikasi nanga na faja foe a lobi di mi lobi foe doe sani na heri grontapoe sa njan gwe.’” — Zef. 3:6-8.
9 Na tjari kon soboen foe na kroetoe foe Jehovah no e kaba te na kristenheid nanga en bribi e kisi pori — makandra nanga na heri grontapoe makti foe falsi bribi, di na bijbel e skrifi foe en leki „Babylon na Bigiwan” (Openb. 18:2-4). Na dé foe en „faja atibron” èn foe „na faja foe a lobi di a lobi foe doe sani” sa poeroe ala takroedoe foe na grontapoe (Loekoe toe Jesaja 34:2-8; Jeremia 25:32, 33). Fa wi kan de nanga tangi dati na moro bigi benawtoe foe ala ten leki fa Jezus srefi taki ini Mattéus 24:21 sa de na kriboi benawtoe! Na prakseri foe Jehovah „foe meki wan troetroe pori kon”, neleki na Ninivé foe owroeten, sa kisi grani. „Na benawtoe no sa kon a di foe toe tron baka” — Nah. 1:9; Dan. 12:1; Openb. 19:11-21.
NA PASI FOE LON KOMOTO
10. Sortoe tongo di no de krin e taki now ini na grontapoe?
10 Na wan sani di kan, foe pasa libilibi na grontapoe rampoe disi? Séker! Ini den wortoe foe na profétitori Jehovah srefi e sori fa disi kan. A de taki:
„Dan mi sa meki volkoe go abra foe taki wan soifri tongo, sodati den alamala kan kari na nen foe Jehovah, foe dini en skowroe na skowroe” (Zef. 3:9).
Den naatsi e meki propaganda ini wan „tongo” di de tegoe ini Jehovah ai, wansi sortoe wan foe den hondro hondro nationaal tongo den e taki. Na presi dati den e gi grani na Gado kownoekondre, den e hé den égi nationalistis programma, aladi den e proberi foe gebroiki na prati VN gi gridifasi politiek marki. Den e trowe Jehovah kownoekondre ini anoe foe Kristus Jesus.
11. (a) Sortoe „soifri tongo” wi e jere now? (b) O fara na tongo disi e taki? (c) Fa wi kan taki dati den sma di e taki na tongo disi „e kari na nen foe Jehovah”, èn nanga sortoe bakapisi?
11 San dan de na kenki disi go na wan „soifri tongo”? Disi wani taki dati wan sma e drai go na a boskopoe foe waarheid, na a „boen njoensoe” di e kowroe ati, na „patron foe gosontoe wortoe”, di e gi grani na Jehovah nanga en regtvaardiki prakseri di nanga jepi foe Kristus Jezus sa kon troe (2 Tim. 1:13). Na „soifri tongo” disi e tjari troe kristen kon wán. Èn a de sori dati „na kownoekondre foe na grontapoe” ini na toemoesi prenspari jari 1914, ben tron „na kownoekondre foe wi Masra èn foe en Kristus, èn dati a sa tiri leki kownoe tego alaten” (Openb. 11:15). Leki wan marki dati den gi densrefi abra na Gado, meki troe kristen na a heri grontapoe e teki na boskopoe disi tapoe den mofoboeba èn den e kari na so fasi „na nen foe Jehovah” èn den e doe „santa dienst” ini wanfasi nanga en. Leki na wán enkri pipel nanga wanfasi na a grontapoe, den e go na den oso foe den sma foe meki na „boen njoensoe” foe Jehovah kownoekondre di opo bekenti. Na so fasi den e dini Jehovah „skowroe na skowroe” (Matt. 24:14; Rom. 12:1). Joe de wan pisi foe den sma di poti densrefi aparti foe na grontapoe foe dini Gado fajafaja leki sma di ben gi densrefi abra? Te joe wroko na so fasi makandra nanga a georganiseerde pipel foe Jehovah, dan joe sa „kan lon komoto tapoe wan boen fasi” — Joël 2:32; Loekoe ooktoe Hoséa 14:1, 2; Hebreër 13:15.
12, 13. (a) Sortoe problema kan de ini a leri foe na „tongo” disi? (b) Foe sainde safri fasi de fanowdoe foe doe dienst „skowroe na skowroe”? (c) Fa wi kan kweki na égifasi foe safri fasi?
12 A ben de wan moeilek sani gi sonwan foe go abra foe taki wan soifri tongo. A no wan makriki sani foe komoto foe na grontapoe, nanga en makriki gwenti di e gi pasi foe doe ala sani èn foe tjari den ofrandi di de fanowdoe foe „kari na nen foe Jehovah”. Wi ben moe poeroe fowtoe prakseri èn foe wan gridi loesoe fasi foe libi foe kan skeki wi na den krin èn boen markitiki foe na pipel foe Gado (Ef. 4:17, 18, 19; 1 Petr. 4:3). Wi ben moe èrkèn a wan enkri organisaatsi di Jehovah e gebroiki now na grontapoe wan fasi di fiti, foedi wi ben moksi wisrefi na a „getrow èn koni srafoe”. Wi ben moe sori safri fasi, foedi wi ondrosoekoe na Wortoe foe Gado nanga jepi foe den boekoe foe na srafoe dati, foe tranga na bribi foe wi. — Matt. 24:45; Tori foe den Apostel 17:11.
13 Foe kan dini Jehovah „skowroe na skowroe”, wi moe kweki na égifasi safri fasi, soleki Zefanja e poti krakti nofotron a tapoe. Te wi e meki fowtoe, soleki ala onvolmaakti sma e doe disi, meki wi dan de klari foe piki dati a de so, neleki na „getrow èn koni srafoe”, di de onvolmaakti sma foe skin nanga broedoe, ben moe tjari kenki kon. Ma meki wi no soekoe fowtoe noiti na a heri boen bigi waarheid — patron di Jehovah ben meki gro kon ini den hondro jari di psa na mindri en wanfasi pipel èn di, nanga kenki èn skeki foe sani, ben skijn moro krin tapoe na „pasi foe den regtvaardiki wan”. — Odo 4:8.
14. (a) Sortoe fasi de abra sé foe safri fasi èn fa na fasi disi e sori? (b) Fa den sortoe hémemrewan disi e wroko èn sortoe warskow wi moe teki na ati? (c) Pe wi no sa mankeri noti?
14 Ten na ten joe ben abi na mindri na pipel foe Jehovah sma, di neleki na fosi Satan, ben teki wan fasi foe feni fowtoe èn foe de onafhankelek. Den no wani doe dienst „skowroe na skowroe” nanga a bradafasi na a heri grontapoe (Teki gersi Efese 2:19-22). Na presi foe dati den e pristeri wan „oproeroe skowroe” na den wortoe foe Jehovah (Zach. 7:11, 12). Aladi den hémemre wan disi e skempi na patron foe na „soifri tongo” di Jehovah ben leri en pipel foe boen ati ede a den hondro jari di psa, den e proberi foe hari den „skapoe gwe” foe na internationaal „ipi” di Jesus ben tjari kon makandra dja na grontapoe (Joh. 10:7-10, 16). Den e proberi foe sai twijfel èn foe prati sma di no e denki no wan ogri komoto foe na fatoe „tafra” foe jeje njanjan ini den kownoekondre-konmakandra-presi foe Jehovah Kotoigi, pe troetroe „noti e mankeri” (Ps. 23:1-6). Den e taki dati a nofo foe lési soso na bijbel, kande joe wawan ofoe pikin groepoe na oso. Ma, a wan vreemde sani, dati nanga na sortoe „bijbellési” disi den drai go krinkrin baka na den falsi leri di hondro jari pasa kaba den kerki fesiman foe na kristenheid ben tjari kon na krin ini den bijbelverklari foe den, aladi sonwan ben go hori baka den fesa foe na kristenheid, soleki den Romein Saturnalia foe 25 december! Jezus nanga den apostel ben gi warskow foe den sortoe kroektoedoe sma disi — Matt. 24:11-13; Tori foe den apostel 20:28-30; 2 Petr. 2:1, 21.
15. (a) Fa Jehovah e handri nanga hémemre sma? (b) Fa wi e kon sabi na sakafasi èn mofina pipel? (c) Sortoe djaranti Jehovah e gi na den?
15 Nanga mofo foe en proféti Zefanja, Jehovah e ferteri en pipel, dati a sa fri ensrefi foe den sma di sondro sjen e proberi foe sai pratifasi na mindri en grontapoe organisaatsi. Ai taki:
„Mi sa poeroe na oen mindri den hémemrewan foe oenoe di e prisiri toemoesi; èn noiti moro oen sa abi hémemre baka tapoe mi santa bergi”.
Leki a tra sé foe a tori di e gi kowroe ati, Jehovah e taki:
„Séker mi sa meki tan abra na oen mindri wan sakafasi èn mofina pipel, èn foe troe den sa soekoe den kibripe na a nen foe Jehovah” (Zef. 3:11, 12).
Ja disi de den safri-ati-sma di „skowroe na skowroe” e wroko makandra na a doe foe na „santa wroko foe na boen njoensoe” (Rom. 15:15, 16). Den no abi hémemre toemoesi foe doe na sakafasi wroko di de akroederi na patron di Jesus discipel ben leri foe na Méstri, foe go oso foe oso (Matt. 10:5-13; Luk. 9:2-6; Tori foe den apostel 5:42). Ala di den e soekoe den kibripe na Jehovah, den e préki na glori nen dati nanga prakseri foe Gado foe meki na nen disi kon na en reti nanga jepi foe na victori kownoekondre foe en Kristus (Ezech. 38:23; Dan. 2:44). Foedi Jehovah dienstknekti e doe dienst èn e libi akroederi en regtvaardiki fasi, meki den abi na froetrow dati „nowan sma sa de di o meki den béfi” (Zef. 3:13). Den abi troetroe vréde foe den froestan!
WAN TEN FOE PRISIRI WROKO
16. (a) Fa Zefanja e sori en égi prisiri? (b) Jesi ben gi na sortoe kari na proféti fasi èn nanga soema?
16 Zefanja srefi bréti leki wan bakapisi foe na djaranti disi foe na sé foe Jehovah, sodati a de kari a pipel foe Gado now foe prisiri:
„Bari wan prisiri-babari, o oemapikin foe Sion! Njanpré, . . . o Israël! Oen prisiri, èn oen abi nanga oen heri ati prisiri, o oemapikin foe Jeruzalem! Jehovah ben poeroe den kroetoe di ben de na oen tapoe. A ben poeroe oen feanti. Na Kownoe foe Israël, Jehovah, de na oen mindri. Oen no sa frede no wan rampoe moro” (Zef. 3:14, 15).
Sensi 1919, di den salfoe kotoigi foe Jehovah ben fri komoto foe jeje katibo na Babylon na Bigiwan, den ben dini en „skowroe na skowroe”, foedi den e kotoigi nanga prisiri ini publiki. Jehovah ben kroetoe èn feni boen den pikin disi foe na hemel Jeruzalem (Gal. 4:26; 1 Petr. 4:17). Strafoe-oso nanga wrokokampoe no ben abi makti leki wrokosani foe tjari den go baka ini katibo. Wan „bigi epi” kompe-kotoigi e prisiri makandra nanga den èn di sensi 1935 sma ben kon sabi den leki sma di de wan pisi foe den „tra skapoe” foe Masra. — Joh. 10:16; Openb. 7:9, 10.
17. (a) Sortoe djaranti e jepi Jehovah pipel ini a „santa dienst” foe den? (b) Fa Jehovah e „tan pi”, aladi „a de prisiri tog nanga babari foe kolokoe”, èn fa wi moe doe?
17 Aladi Jehovah e taki nanga en salfoewan, di e teki presi foe na hemel Sion, èn e taki nanga jepi foe den nanga den kompewrokoman, di de wan pisi foe na „bigi ipi”, a de taki ensrefi nanga tranga:
„No frede, o Sion. No meki oen anoe kon slap” (Zef. 3:16).
Alwasi kiri nanga tranga de now so ogri, alwasi den tjalansi foe na atoom-ten de so wan frede sani, alwasi ferfolgoe di sa kon ete tapoe Jehovah kotoigi de so takroe, den sa kan pasa ala den sani disi nanga jepi foe a krosbé matifasi foe den nanga Jehovah èn a froetrow foe den ini a Gado foe den. Now di wi poti wi anoe na a ploegoe foe „santa dienst”, meki wi noiti drai loekoe na baka èn stop foe ploegoe go doro „skowroe na skowroe”! (Luk. 9:26; Openb. 7:15). Réde no de foe dati, bikasi na profétitori e gi now na djaranti foe Gado di e kon now:
„Jehovah, oen Gado, de na oen mindri. Leki wan Maktiwan a sa ferloesoe. Nanga bréti fasi a sa prisiri pasa marki foe oenoe. A sa prisiri foe oen nanga na bari foe kolokoe” (Zef. 3:17).
Jehovah „e tan pi”, foedi a de gi en rostoe nanga kowroe-ati foe sori lobi gi en pipel di kisi fri èn di kon boen baka, èn a de bréti toemsi foe na getrow fasi nanga faja foe den ini en dienst. Ini den „laatste dé” disi, wi moe firi wisrefi boen krosbé na wi libi Gado, Jehovah, èn dini en nanga wanfasi skowroe. — 2 Tim. 3:1.
18. (a) Fa den dienstknekti foe Jehovah sensi 1919 ben tron „wan nen èn prijse”? (b) Fa foe na boen foe doesoendoesoen moro sma wi kan doe dienst „skowroe na skowroe”?
18 Na pisi ten 1919 de gi ala den dienstknekti foe Gado wan toemsi bigi dé kon boen baka. Leki getrow kotoigi den go doro foe préki nanga faja, sodati Jehovah organisaatsi panja go te na den kaba foe na grontapoe (Rom. 10:10, 18). A de troetroe wan ten pe Gado pipel ben tjari konmakandra. Èn nanga sortoe prakseri? Jehovah srefi e piki:
„Mi sa meki oenoe tron wan nen èn wan prijse na mindri ala volkoe foe grontapoe” (Zef. 3:20).
A ben meki na salfoe fikapisi foe a pipel foe Gado kolokoe toemsi, dati den tron „wan nen èn prijse” foedi den hori na diri nen foe na Soeverein Masra Jehovah hé, èn foeroe foe den „volkoe dati foe na grontapoe” e wroko now „skowroe na skowroe” nanga den makandra foe meki en prakseri foe na kownoekondre bekenti. Foedi wi go abra foe taki foe na „soifri tongo” èn dati bari wroko foe na „boen njoensoe foe na kownoekondre”, sa meki doesoendoesoen moro sma kisi jepi foe „kari na nen foe Jehovah”, sodati den toe sa kisi kibri ini na dé foe Jehovah atibron, èn den kan kon nanga dekati na fesi foe prijse en tego alaten.