Prisiri Jehovah leki osofamiri
„Oen oema, oen saka oensrefi na oen man ondro . . . Oen man, oen tan lobi oen oema . . . Oen pikin, oen gi jesi na oen papa nanga mama ini ala sani, bikasi disi de switi na Masra.” — Kol. 3:18-20.
1. Sortoe fundament marki wan osofamiri moe doro foe kan prisiri Gado, ma san e tapoe wan joisti loekoe?
WAN kristen osofamiri di wani prisiri na Mekiman, moe doro wan fundament marki: A moe gi jesi na makti di poti na wan joisti fasi. Fa joe e si makti? Te wan sma lési koranti nanga tijdschrift, te a loekoe na a njoensoe tapoe televisie ofoe te a arki na den njoensoe foe radio, dan a de kisi boen foeroe bewijsi di e sori dati na a heri grontapoe wan oproeroe fasi de gi makti. Na fasi disi kan abi makriki krakti tapoe na denki foe wan sma. Efoe wan sma ini na fasi fa a de loekoe na gi jesi na makti, meki den sani di e pasa ibri dé baka lontoe en kenki en, dan na fasi disi kan meki bigi sekseki kon tapoe na osofamiri-nivo.
2-4. Osofamiri e si densrefi tanapoe na fesi sortoe aksi te a de go foe na èrkèn foe makti?
2 Efoe joe de wan masra èn papa, fa joe e si na gebroiki foe joe makti ini na osofamiri? Joe e denki dati na ede foe na osofamiri, na masra, wawan abi a reti foe taki foe sani di abi foe doe nanga na osofamiri èn dati joe abi na reti foe tiri na osofamiri foe joe? Ofoe joe e meki foe vréde ede joe oema teki fesi ini a osofamiri moro foeroe?
3 Efoe joe de wan oema èn mama, joe e njan joe niri dan na a makti di joe masra e gebroiki? Joe e feni en wan moeilek sani foe teki na fasi di joe man e gebroiki makti ini na osofamiri? Joe e si dati joe e meki oproeroe èn dati joe e winsi foe kon fri foe na makti disi?
4 Efoe joe de wan boi ofoe wan meisje, fa joe e si dan na makti foe joe papa nanga mama, kande foe joe papa ofoe mama ofoe foe wan sma di e sorgoe foe joe? Joe e si dati joe de klari foe saka joesrefi na ondro na tiri foe den? Ofoe, joe e kaka foetoe gi na makti foe den? Joe wani de tapoe joesrefi èn joe e winsi foe kon fri foe na makti foe den?
5. Sortoe matifasi e ondrofeni krakti foe na fasi fa wan sma e loekoe makti?
5 Na fasi fa wan sma e loekoe makti èn a saka di a de saka ensrefi na ondro dati, abi wan dipi krakti di e tan tapoe en matifasi foe en nanga na Mekiman, Jehovah, èn tapoe na matifasi foe en nanga trawan, di de ini na grontapoe pe wi e libi dé foe dé èn di de ini na osofamiri. A de foe datede boen foe sabi fa den sma di e taki dati den de kristen ini disi ten, moe de precies nanga makti, spesroetoe ini na seti foe na osofamiri. Wi moe abi na lostoe foe prisiri na Mekiman leki osofamiri.
NA SETI FOE NA OSOFAMIRI
6, 7. Sortoe komando Jehovah ben gi na a fosi man nanga oema, èn sortoe rol a ben wani meki na oema pré?
6 Foe bigin, Jehovah Gado, wi Mekiman, de na Sma di meki na osofamiri-groepoe doe kon. A ben bigin ini Eden, di Gado ben gi na fosi man nanga oema na komando: „Oen meki pikin, èn kon foeroe èn foeroe na grontapoe èn poti en na oen ondro” (Gen. 1:28). Te nanga na dé foe tide na osofamiri-groepoe e tan pré wan toemsi prenspari rol ini na fasi fa a prakseri foe Jehovah e doe tapoe na tori foe na grontapoe. — Ef. 3:14, 15.
7 Wi e kisi foe jere, dati ini na fosi osofamiri-seti, di Gado ben poti, na oema ben meki foe foeroe na man, soboen na no wan fasi a ben de wan mekisani di ben lagi. Na oema ben meki moro foeroe leki wan jepi gi na man foe pré wan rol foe hori baka gi en (Gen. 2:18). Makandra den ben sa kisi pikin èn meki na osofamiri-groepoe.
NA ROL FOE MAN NANGA OEMA
8. (a) Fa makti ben moe gebroiki? (b) Fa wan man ben moe si en oema?
8 Efoe wan osofamiri wani prisiri na Mekiman, dan orde moe de, èn boen tiri moe gi. Den ben taki gi na fosi man nanga oema dati den „moe hori na den ondro den fisi foe se nanga den mekisani foe hemel di e fré nanga ibri libi mekisani di e kroipi na grontapoe” (Gen. 1:28). Na man, Adam, ben de na fosi libisma di Gado ben meki. Foedi Jehovah de na Mekiman, nanga na Almakti Gado, dan a abi na reti foe bepaal fa makti moe gebroiki na grontapoe. Gado ben bepaal dati na gebroiki foe makti ini na osofamiri ben moe waka foe na man go na a oema èn moro fara go na den bakapikin foe den (1 Kor. 11:3). Na tori foe bijbel e sori krin dati na makti disi no moe gebroiki leki koemanderiman ofoe nanga ègi makti. Loekoe san Adam ben taki di a ben si foe a fosi tron na jepi di Gado ben meki gi en: „Disi de now bonjo foe mi bonjo èn meti foe mi meti” (Gen. 2:23). San Adam ben taki dja so moi, no ben sori na no wan fasi dati a ben moe de wan koemanderiman na fesi foe wan lagi sma. A ben taki dati na oema di ben tjari kon na en, ben de „bonjo foe en bonjo èn meti foe en meti”, wan sani di ben moe boboi èn di ben moe sorgoe leki en égi skin. Foeroe eeuw na baka, na apostel Paulus ben sori ini wan brifi gi kristen foe na fasi fa wan man moe lobi en oema èn moe sorgoe gi en. A ben taki: „Den man (moe) lobi den oema foe den leki den égi skin. Na sma di lobi en oema, lobi ensrefi, bikasi nowan sma ben abi ogri-ati foe en égi skin ma a de gi en njanjan èn a de boboi en.” — Ef. 5:28, 29.
9. (a) Sortoe fasi wan oema moe abi gi en man? (b) Fa ala toe, papa nanga mama, moe doe ini na kweki foe pikin ini na osofamiri?
9 A ben de ini na prakseri foe Jehovah, dati na man ben sa de na ede foe en oema (Ef 5:23, 24). Na oema leki jepi foe a man ben moe behandel nanga wartifasi èn lobi, sodati en foe en sé ben kan abi „dipi respeki” gi en man èn ben kan de klari foe „saka na ondro” en (Ef. 5:33; 1 Petr. 3:1). Den toe ben sa wroko nanga makandra èn ben sa meki pikin, aladi den ben sa gi abra na den pikin foe den nanga den wortoe èn nanga den doe foe den san de switi ini Jehovah ai, sodati na osofamiri-seti ben sa abi en blesi. Soleki Gado ben ferteri bakaten, dan na papa nanga na mama ini na gebroiki foe makti tapoe den pikin foe den ben moe loekoe boen dati den no tergi den pikin foe den. Den pikin moro foeroe ben moe kweki ini a tranga leri nanga rai foe Jehovah. Den moe kisi kristelek tranga leri nanga leri (Ef. 6:4; teki gersi Odo 1:8, 9). Den e aksi foe papa nanga mama toe dati den gebroiki na tiki foe piri-ai te disi de fanowdoe (Odo 13:24; 29:15). Aladi wi loekoe sjatoe den frantwortoe foe man nanga oema, tog a de krin dati na seti foe Jehovah wani taki dati makti ini na osofamiri-groepoe moe gebroiki nanga lobi èn nanga leti.
(. . .)
10. Fa foeroe jongoe sma e doe, leki wan bakapisi foe wan lostoe foe srefidensi (onafhankelijkheid), èn san de na marki foe den bodoi di sa gi now?
10 Den sani di e gi njoensoe (leki koranti, radio, tv) nanga tra sani ini wi ten ben foeroe na froestan foe libisma nanga na lostoe foe srefidensi (onafhankelijkheid). Foeroe jongoe sma e meki oproeroe nanga ibri fasi foe den papa nanga mama ofoe sortoe tra makti toe foe loekoe na libi foe den. Aladi a de troe dati na papa nanga mama e tjari foeroe frantiwortoe foe na gebroiki foe makti ini na oso tapoe joisti fasi, den pikin e tjari frantwortoe ooktoe. Foedi na fanowdoe de foe krakti, jeje gosontoe osofamiri-groepoe, di e prisiri Jehovah, meki wi sa loekoe wantoe problena tapoe na tori foe pikin, ma ooktoe tapoe na tori foe na fanowdoe, dati den abi waarderi gi makti èn dati den saka densrefi na ondro tapoe wan joisti fasi.
11. (a) San a wani taki foe „respeki joe papa nanga joe mama”? (Odo 1:8, 9; 4:1-3). (b) Fa wan pikin moe doe, wansi a de denki dati den reti foe en e poti na wan sé? (Odo 3:11, 12).
11 „Respeki joe papa nanga mama”: Di na apostel ben taki foe na komando disi, a ben kari disi „na fosi komando. . .. nanga wan pramisi”, namkoe, „sodati a kan go joe boen èn joe kan tan libi langa ten na grontapoe” (Ex. 20:12; Ef. 6:2, 3). Wan pikin di taki dati a de wan kristen, abi na prekti foe gi jesi na a komando foe respeki en papa nanga mama. Fa wan pikin e gi grani ofoe respeki na en papa nanga mama? A pikin moe sori séker waarderi gi en papa nanga mama èn sori waarderi gi na moeiti foe den foe sorgoe gi en èn foe kweki en. Pikin moe leri foe respeki na kroetoe nanga den bosroiti foe den papa nanga mama foe den (Odo 22:15). Wansi den pikin e denki dati den reti di den abi e poti na wan sé, tokoe den de verprekti foe gi jesi na „den papa nanga mama foe den ini wanfasi nanga Masra” (Ef. 6:1). Efoe pikin wani „tan libi wan langa ten na grontapoe” èn dati den de séker dati Jehovah sa feni den warti foe na libi di e kon, dan den moe respeki den papa nanga mama.
12. (a) Sortoe makti foe den papa nanga mama ofoe foe na sma di abi na sorgoe foe wan pikin moe èrkèn foe kan prisiri Jehovah? (b) Fa sma di e libi wan boen libi, sma foe en ten e loekoe? (Odo 1:10-16).
12 Na èrkèn foe makti: krosbé nanga na respeki foe papa nanga mama de na èrkèn foe makti, na reti foe den papa nanga mama foe poti bepaalde skotoe èn foe bepaal san den pikin foe den mag èn no mag foe doe. Saka joesrefi na ondro makti de foeroe tron toemsi moeilek gi pikin èn disi kan meki foeroe taktaki kon ini na osofamiri. Ma soleki taki kaba, dan den sani di e gi njoensoe (leki koranti, radio èn tv) nanga tra sani e gi nofotron bodoi, di e brokosaka na makti foe papa nanga mama èn di e gi jongoe sma na tranga foe aksi foe kon de fri foe gi jesi na a makti foe papa nanga mama. Wan punt di e fiti ini a tori disi de na fasi di den e teki now ini a tori foe fri seks libi. Na situwasi disi doro na punt, dati jongoe man ofoe oema di e kibri den mansma ofoe njoenwenke fasi, no e teri ini na ai foe jongoewan foe den ten. Den laatste wan di oen kari dja e si den sma di e hori na den hé moreel markitiki foe na bijbel, leki sma di mankeri wan sani, leki wan sani di no e hari joe èn leki sma di, foe na sé foe den sokari mati foe den, „no de na teri moro”. — Loekoe 1 Petrus 4:4.
13. Fa bepaalde libisma wèt de sontron wan dekati foe doe ogri?
13 Son wèt di lanti meki, e gi tranga na jongoe oema te joe loekoe en boen foe gi densrefi abra na wan loesoe fasi foe libi, foedi den meki a kan gi oemapikin foe poeroe wan bere sondro na primisi foe papa nanga mama. Wan oemapikin foe 15 jari ben sori a tapoe dati wan datra ben wégri foe boro wan olo ini en jesi sondro na primisi foe en papa nanga mama, ma dati na Moro Hé Kroetoe foe Amerkankondre ben teki na bosroiti dati wan oemapikin di no doro na jari foe bigisma (minderjarig) mag meki den poeroe wan bere gi en sondro na primisi foe en papa nanga mama. Wan datra di ben skrifi ini na Journal of the American Medical Association foe den moeiti foe meki propaganda moro bigi foe jepisani foe no kisi bere, ben ferklari no langa pasa kaba: „Mi e skreki foe a wani di sma ini datrawroko wani foe teki fri seks libi èn srefi foe meki a go na fesi . . . Mi e bribi dati wi moe gebroiki wan sani foe den mogelijkheid foe wi foe leri fa wi kan meki frantwortoe èn gosontoe seks doe kan go na fesi, makandra nanga na hori joesrefi farawe foe seks èn getrowfasi.”
14. Fa boi nanga oemapikin di wani prisiri Jehovah moe si papa nanga mama, di wani kibri den foe hoeroedoe?
14 Na krakti rai foe Gado Wortoe ini Efese 6:1 de so: „Oen pikin, oen gi jesi na oen papa nanga mama ini wanfasi nanga Masra, bikasi disi de regtvaardiki.” Gi jesi e aksi na èrkèn foe makti. Papa nanga mama abi na frantwortoe foe kweki den pikin foe den ini den pasi di e tjari kon na krin ini Gado Wortoe èn di den moe waka foe prisiri en, èn na Wortoe dati e tapoe fri seks libi, loesoe seks libi (Ex. 20:14; 1 Kor. 6:9, 10). Efoe pikin abi papa èn mama di abi belangstelling foe kibri den gi na hoeroedoe grontapoe, dan den papa nanga mama dati e verdini na loyaal jepi foe den pikin foe den. Na presi dati wan koni pikin di e frede Gado kaka foetoe gi na makti foe den sortoe papa nanga mama disi, a sa waka baka na bijbel rai foe gi jesi na den, nanga na froestan dati disi de wan sani di Gado e feni boen, èn dati a de foe en égi boen èn a abi na ini en wan séker pramisi foe na ten di e kon. — Odo 3:1, 2.
15. San e meki na wégri di wan pikin e wégri foe saka densrefi na a makti foe papa nanga mama, de so wan serjoesoe sani?
15 Efoe wan pikin e wégri foe saka ensrefi na en papa nanga mama ondro, dan a de tranga jesi Jehovah Gado. Neleki fa Jehovah ben gi en regel nanga wèt foe a tiri foe na libisma-famiri, na so a gi den papa nanga mama na reti foe gi joisti wèt di e fiti — oso-regel wan sma ben sa kan taki — foe na fasi fa na osofamiri-groepoe, pe den pikin de wan pisi foe en, e tjari ensrefi. Efoe den regel nanga wèt dati no de kontrari na Wortoe foe Gado, dan den pikin de verprekti foe gi jesi na a makti foe den papa nanga mama.
LOBI INI A OSOFAMIRI
16, 17. (a) O prenspari lobi de gi wan osofamiri di wani prisiri Jehovah? (b) Sortoe krakti rai Kolosse 3:12-14 abi? (c) Sortoe boen rai e gi te na rai foe Paulus gi den sma foe Kolosse wani abi boen bakapisi?
16 Lobi gi den sma foe na osofamiri: Efoe Jehovah wani abi prisiri nanga na osofamiri-groepoe, dan den pikin moe sori lobi gi den papa nanga mama. Den e taki gi den masra foe lobi den wefi leki densrefi, èn den wefi moe abi dipi respeki gi den masra. Den alamala, den papa nanga mama leki den pikin moe handri nanga makandra akroederi na kownoe wèt foe lobi (Jak. 2:8). Na apostel Paulus ben gi krakti rai di a ben skrifi foe na afersi disi: „Weri dan gi joesrefi den safoe lobifasi foe sari-ati, boenfasi, sakafasi foe froestan, safri-ati-fasi nanga langa pasensi. Tan verdrage makandra èn gi makandra pardon nanga wan krin ati efoe na wan abi wan réde foe kragi na a trawan. Soleki Jehovah ben gi oen pardon nanga wan krin ati, so srefi oenoe moe doe toe. Ma teki weri fosi na lobi, bikasi dati de wan volmaakti banti foe wanfasi”. — Kol. 3:12-14.
17 Disi no de soso wortoe di moe lési ofoe di wan sma moe taki baka. Den de wortoe foe santa jeje, di wi moe go prakseri tranga. A ben sa boen te ala sma di e lési na materiaal disi e loekoe baka njoen ibriwan foe den kristen marki disi. Go prakseri dipi foe den. Loekoe den nanga ini prakseri na osofamiri di joe de wan pisi foe en. Fa den wortoe foe Paulus abi krakti tapoe joe matifasi nanga joe man, joe oema, joe papa, joe mama ofoe trawan ini na krosbé osofamiri-groepoe? Joe e prisiri Jehovah nanga ibriwan foe den punt disi, di na apostel Paulus e kari? Wan sma no kan tjari en libi kon akroederi nanga den wortoe dati foe rai èn na a srefi ten e bari tranga foe srefidensi (onafhankelijkheid) foe na makti foe papa nanga mama ofoe a de gi ensrefi abra na bigi kroetoe ofoe taktaki nanga en papa nanga mama. Èn so srefi toe papa nanga mama no kan handri nanga den pikin foe den na so wan fasi. Wan kolokoe osofamiri di abi na blesi fee Jehovah, moe loekoe na vermane, di joe e feni ini a Wortoe foe Gado, dipi, serjoesoe èn alaten, foe kan waka baka na „Sma di e jere begi”, di meki den sortoe wortoe disi skrifi ondro na krakti foe santa jeje. — Ps. 65:2; Ef. 4:31, 32; Kol. 3:15-17.
18. Sortoe serjoesoe tori wi moe loekoe now, èn disi e meki wi aksi sortoe aksi?
18 Ofoe ala toe papa nanga mama de ini na osofamiri, ofoe joe abi soso wan nomo foe den, na vermane nanga na frantwortoe e tan a srefi. Ma a de wan sari sani foe taki, dati Satan e doe tranga moeiti, di sontron e luk, foe broko na osofamiri èn foe pori en nanga „prati èn wini”-tactiek. Ala sma di e lési na artikel disi moe hori ini prakseri dati Didibri e go lontoe leki „wan krasi tigri, foe soekoe foe swari wan sma” (1 Petr. 5:8). Wi sa gi pasi dati a broko na wanfasi ini wi osofamiri, di de so switi ini Jehovah ai? Wi sa fadon gi wan geest foe srefidensi (onafhankelijkheid), wan geest di e taki, te joe loekoe en boen: „Mi no abi foe arki na mi papa nanga mama; mi e doe gewoon ini san mi srefi abi prisiri na ini”? Na waka baka so wan fasi foe libi kan pori wi kolokoe, sodati wi kan tjari na atibron foe Gado kon na wi tapoe.
19. Fa kristen osofamiri sa njan boen foe na blesi foe Jehovah?
19 Efoe wi wani abi na boenati foe Jehovah — èn kaba foe kaba na en abi na makti tapoe libi nanga dede — dan wi moe èrkèn na makti di a ben poti na ini na osofamiri. A de foe na boen foe wi te wi saka wisrefi na ondro. Soso dan wi sa de troetroe kolokoe nanga tevréde. Foedi wi e meki na harmoni nanga wanfasi ini na osofamiri go na fesi, meki wi kan aksi Jehovah efoe wi kan kisi na blesi di kownoe David foe owroeten ben taki foe en di a ben taki: „Soema mag kren na bergi foe Jehovah, èn soema mag opo tanapoe ini en santa presi? Ala sma di anoe no abi fowtoe èn di de krin na ati, di mi ati no ben tjari go na soso sani di no abi warti, èn di no ben sweri na wan bidrigi fasi. A sa tjari blesi gwe foe Jehovah èn regtvaardiki fasi foe en Gado foe ferloesoe.” — Ps. 24:3-5.
SAN JOE E MEMRE ETE FOE NA TAKIMAKANDRA DISI?
• Foe sanede na loekoe foe joe tapoe makti de prenspari foe a kisi foe osofamiri-kolokoe?
• Sortoe bijbeltekst e ferteri foe na rol foe na man èn na oema ini wan kristen oso-famiri?
• Sortoe boen krakti a abi te pikin e respeki èn èrkèn na makti foe papa nanga mama?
• Fa moeiti di e doe foe meki na lobi ini na osofamiri kon moro foeroe, kan go kontra krakti di e proberi foe prati osofamiri?
• Foe den sani di wi ben taki, dan tapoe sortoe kontren joe sa wroko sodati na osofamiri sa kan prisiri Jehovah moro?
[Prenki na tapoe bladzijde 16]
Jehovah ben abi na ini prakseri dati man nanga wefi ben moe foeroe makandra èn dati den ben moe de ini wanfasi ini a dini foe en
[Prenki na tapoe bladzijde 18]
Oen jongoewan, oen abi troetroe belangstelling foe oen rol ini a osofamiri? Oen papa nanga mama, oen e handel nanga oen pikin akroederi nanga den sani di Gado wani?