Fu San Ede A De Prenspari fu Lespeki Sma Di Abi Frantwortu Posisi?

SUMA no breiti taki skowtu abi a makti fu sroto ogriman di e fufuru wi sani èn di de wan kefar gi wi osofamiri? Èn wi no e warderi en taki den krutubangi abi a makti fu strafu ogriman so taki ogri no pasa na ini a libimakandra?

Wi kan denki tu fu tra sani di lanti seti fu yepi wi, soleki a seti fu ondrow den strati, a seti fu hori sani krin èn a seti fu skoroleri — sani di du moro furu nanga a moni di lanti tiriman e aksi leki belasting. Tru Kresten na den fosiwan di e erken taki a de prenspari fu lespeki sma di kisi makti. Ma omeni lespeki den musu kisi dan? Èn na tapu sortu kontren fu na aladei libi wi musu lespeki sma di abi makti?

Tirimakti ini a Libimakandra

Bijbel e fruteri ala sma — efu den na bribiman noso sma di no e bribi — taki den musu lespeki lanti tiriman, di e du sani gi a bun fu a libimakandra. A Kresten apostel Paulus ben skrifi den kompe-bribiman fu en di ben libi na ini Rome, fu a sani dati. Èn a de wan yepi gi sma, fu luku san a ben skrifi na Romesma 13:1-7.

Paulus ben de wan borgu fu Rome èn a kondre dati ben de a grontapumakti na a ten dati. A brifi fu Paulus, di skrifi na a pisi ten fu a yari 56 G.T., e gi Kresten a rai fu de borgu di de wan bun eksempre. A ben skrifi: „Meki ibri sili saka ensrefi na ondro den hei tirimakti, bika efu Gado no gi pasi, dan no wan tirimakti no de; den tirimakti di de, na Gado poti den na ini den posisi fu den di skotu.”

Paulus e fruklari dyaso taki, efu Gado no ben gi pasi gi dati, dan no wan enkri libisma tirimakti ben o de. Na so wan fasi, den hei tirimakti abi wan posisi di skotu na ini a prakseri fu Gado. Dati meki „a sma di e gens a makti, opo ensrefi teige a seti fu Gado”.

Ala di hei tirimakti kan prèise borgu di e du bun sani, toku den tirimakti disi, abi a makti fu strafu ogri sma. Den wan di e du ogri sani abi furu reide fu frede den tirimakti di de srekasreka fu „teki refensi” bika den lanti tiriman e du dati leki „dinari fu Gado”.

Paulus e tapu nanga a tori disi, fu di a e taki: „Dati meki wan tranga reide de gi unu fu saka unsrefi na ondro makti, no soso fu na atibron dati ede, ma so srefi fu un konsensi ede. Bika na fu dati ede unu e pai lantimoni tu; bika den na Gado publiki futuboi di e dini en doronomo, yoisti fu a reide disi ede.”

Na den hei tirimakti de frantwortu fu a fasi fa den e gebroiki a belastingmoni, no a sma di pai dati. Leki wan borgu di de eerlijk, wan Kresten e tan abi wan krin konsensi. A sabi taki, te a e saka ensrefi na ondro den hei tirimakti èn te a e pai belastingmoni, dan a no e hori ensrefi nomo na den markitiki fu a libimakandra pe a e libi na ini, ma a e libi tu akruderi den markitiki fu Gado.

Na Osofamiri èn den Sma Di Abi a Frantwortu na ini

Ma san wi kan taki fu a sma di abi a frantwortu na ini na osofamiri libi? Na ini den fosi dei fu a libi fu wan nyunyun pikin, dan a beibi sa dwengi sma taki den poti prakseri na en, fu di a e krei noso e bari srefi. Ma wan koni papa noso mama sa si san wan beibi abi trutru fanowdu èn a no sa meki atibron fu a beibi e bepaal san a musu du. Son pikin e kisi pasi fu du san den wani èn den e kisi pasi tu fu poti den eigi markitiki te den gro kon moro bigi. Fu di den no abi nofo ondrofeni, meki taki den kan fadon na ini ogridu noso tra ogri sani, ala di den e pori na osofamiri èn so srefi a heri libimakandra. Disi na wan sani di furu sma di abi frantwortu posisi na ini den libimakandra dati, sabi heri bun.

„Papa nanga mama e gi den pikin trangaleri tumusi lati”, na so Rosalind Miles, skrifiman fu a buku Children We Deserve (Pikin Di Wi Frudini) e taki. „A ten te den musu bigin fu du dati, na a momenti di a pikin gebore.” Efu sensi a bigin, papa nanga mama e taki na wan switi ma seryusu fasi nanga a pikin èn den e hori densrefi na wan markitiki ala ten baka te den e du sani, dan den pikin fu den sa leri heri esi fu erken a frantwortu posisi dati nanga a lobi-ati trangaleri di de na ini dati.

Bijbel abi furu bodoi fu a frantwortu na ini na osofamiri. Na ini a buku Odo, a koniman Salomo e meki papa nanga mama di e lespeki Gado, kon frustan taki den pikin musu si taki den e wroko makandra na ini wánfasi, fu di a e taki: „Arki, mi manpikin, a trangaleri fu yu papa, èn no gowe libi a wet fu yu mama” (Odo 1:8). Te papa nanga mama e tan abi a sortu bun wánfasi disi na fesi den pikin fu den, dan den pikin sabi fa den e denki èn san den papa nanga mama e fruwakti fu den. Pikin kan pruberi fu gebroiki den so taki den kan du san densrefi wani, ma efu papa nanga mama e wroko makandra na ini wánfasi, dan dati na wan kibri gi den yonguwan.

Bijbel e fruklari taki a masra abi a prenspari frantwortu taki sani e go bun na yeye fasi no wawan nanga en pikin ma so srefi nanga en wefi. Bijbel e kari dati na edeman wroko. Fa edeman na ini na osofamiri musu du na edeman wroko disi? Paulus e fruteri taki, neleki fa Krestes de na Edeman fu a gemeente, na so a man na a edeman fu en wefi. Dan Paulus e taki moro fara: „Masra, tan lobi a wefi fu unu, neleki fa Krestes ben lobi a gemeente [en trowmisi na yeye fasi] tu èn ben gi ensrefi abra gi en” (Efeisesma 5:25). Te wan man e waka baka na eksempre fu Yesus èn e du na edeman wroko na wan lobi fasi, dan en wefi sa kisi „dipi lespeki” gi en (Efeisesma 5:33). Pikin di de na ini so wan osofamiri sa si so srefi omeni waarde a frantwortu di Gado gi den mama nanga papa abi, èn den sa kisi deki-ati fu hori baka gi dati.—Efeisesma 6:1-3.

Fa papa noso mama di no abi wan patna, so srefi den wan di lasi a patna fu den na ini dede, kan du dati? Efu a de wan papa noso wan mama, dan toku den kan aksi Yehovah Gado nanga Yesus Krestes sondro draidrai fu gebroiki a makti di den abi fu yepi den. Ala ten Yesus ben taki leki wan sma di abi makti — a makti di a ben kisi fu en Papa èn a makti di a ben abi fu di a ben e gebroiki den Buku fu Bijbel di sma skrifi nanga yepi fu santa yeye.—Mateus 4:1-10; 7:29; Yohanes 5:19, 30; 8:28.

Bijbel e gi furu warti gronprakseri di abi fu du nanga problema di pikin e miti. Wan papa noso mama sa man gi den pikin bun rai na wan lobi fasi, te den e feni den gronprakseri disi èn e hori den (Genesis 6:22; Odo 13:20; Mateus 6:33; 1 Korentesma 15:33; Filipisma 4:8, 9). Papa nanga mama kan gebroiki publikâsi fu Bijbel tu di skrifi spesrutu nanga a marki fu yepi den fu kweki den pikin fu den, so taki den pikin kan frustan sortu bun wan sma e kisi te a e lespeki a tiri fu Bijbel.a

Tiri na ini a Kresten Gemeente

„Disi na mi Manpikin, a lobiwan, di mi feni bun; arki en” (Mateus 17:5). Den wortu disi di Yehovah Gado ensrefi ben taki, e sori krinkrin taki Yesus na wan sma di e taki fu di Gado ben gi en makti. Den sani di a ben taki, skrifi na ini den fo evangelie san wi kan gebroiki ala ten.

Leti bifo Yesus ben go na hemel, dan a ben taigi den disipel fu en: „Mi kisi ala makti na ini hemel èn na grontapu” (Mateus 28:18). Leki Edeman fu a gemeente fu en, a no ben luku wawan taki sani e waka bun nanga den salfuwan bakaman fu en na grontapu di ben e waka na ini en futustap. Ma sensi a ben kanti santa yeye tapu den na a Pinksterfesa 33 G.T., a e gebroiki den tu leki wan grupu di e prati waarheid, leki wan „getrow èn koni srafu” (Mateus 24:45-47; Tori fu den Apostel 2:1-36). San a du fu kan doro ala den marki dati, so taki a ben kan meki a Kresten gemeente kon moro tranga? „Di a ben opo go na hemel . . . , dan a ben gi presenti ini libisma” (Efeisesma 4:8). Den „presenti disi ini libisma” na kresten owruman, di salfu nanga a santa yeye èn den kisi a frantwortu fu sorgu gi den yeye afersi fu den kompe-bribiman.—Tori fu den Apostel 20:28.

Fu dati ede meki Paulus ben gi leki rai: „Memre den wan di e teki fesi na un mindri, di taki a wortu fu Gado gi unu, èn waka baka a bribi fu den, ala di unu e luku fa a waka nanga libi fu den e go.” Fu di den getrow man disi e waka soifri na ini den futustap fu Yesus, meki a de fu tru a moro koni sani fu du, fu waka baka a bribi fu den. Dan Paulus e taki moro fara: „Gi yesi na den wan di e teki fesi na un mindri èn saka unsrefi na den ondro [„erken doronomo taki den e tiri yu”, The Amplified Bible], fu di den e luku den sili fu unu leki sma di sa gi frantwortu, so taki den kan du disi nanga prisiri èn no nanga soktu, bika disi ben sa du unu ogri.”—Hebrewsma 13:7, 17.

San e pasa te sma no e erken a sortu tiri disi? Son memre fu a fosi Kresten gemeente ben du dati, ma dan den ben fadon komoto na bribi. Den e kari Himenei-us nanga Fileitus leki man di ben pori a bribi fu son wan èn di ’pori santa sani’ nanga soso takitaki. Wán fu den sani di den ben taki, na taki na opobaka ben teki presi kaba, kande wan opobaka na yeye fasi noso wan agersi wan. Èn fu dati ede, den no ben abi fu fruwakti no wan enkri tra opobaka na ini a ten di e kon na ondro Gado Kownukondre.—2 Timoteus 2:16-18.

Den sma di poti na ini frantwortu posisi ben opo du wan sani fu yepi a gemeente. Kresten owruman ben man fu sori taki den sortu sani disi no tru, bika leki sma di e teki presi gi Krestes, den ben gebroiki a tiri di den Buku fu Bijbel e gi (2 Timoteus 3:16, 17). A srefi sani e pasa now na ini a Kresten gemeente, di de neleki „wan pilari nanga wan fondamenti fu a waarheid” (1 Timoteus 3:15). Noiti falsi leri sa kisi pasi fu pori „a model fu gosontu wortu”, di kibri gi wi na ini Bijbel neleki wan gudu.—2 Timoteus 1:13, 14.

Ala di a abi di sma abi lespeki gi sma di abi frantwortu posisi e go na baka srefisrefi na ini grontapu, toku Kresten e erken taki makti di gebroiki na wan yoisti fasi na ini a libimakandra, na ini na osofamiri èn so srefi na ini a Kresten gemeente, poti gi wi eigi bun. Lespeki gi sma di abi frantwortu posisi de prenspari gi wisrefi so taki sani kan waka bun nanga wi na skin fasi, na yeye fasi èn so srefi na ini a fasi fa wi e firi. Te wi e teki èn e lespeki den sortu tiri disi di Gado poti, dan den moro bigi tiriman — Yehovah Gado nanga Yesus Krestes — sa kibri wi, gi wi eigi bun fu têgo.—Psalm 119:165; Hebrewsma 12:9.

[Futuwortu]

[Prenspari pisi na tapu bladzijde 5]

Bijbel abi furu bodoi fu a frantwortu posisi na ini na osofamiri

[Prenki na tapu bladzijde 6]

Papa noso wan mama di no abi patna kan aksi Yehovah Gado nanga Yesus Krestes sondro draidrai fu gebroiki a makti di den abi fu yepi den

[Prenki na tapu bladzijde 7]

Kresten e erken taki bun tiriman na ini na osofamiri, na ini a Kresten gemeente èn so srefi na ini a libimakandra poti gi a bun fu den

[Sma di abi a reti fu a prenki na tapu bladzijde 4]

Fowtow di Josh Mathes meki, Collection of the Supreme Court of the United States