„Na knekti” ini na ten let bifo Har-Mageddon
1. San sa psa ini Har-mágeddon, pe na „knekti”-klasse tanapoe now let na fesi, èn soema ini den dé foe kownoe Hizkia foe Jeruzalem de wan agersi fasi foe na „knekti” disi?
HAR-MÁGEDDON de na Hebrew nen foe na presi pe na „feti foe na bigi dé foe Gado Almakti” sa stré heri esi. Na fika-pisi foe na „knekti”-klasse tanapoe now let bifo na „feti” dati, di sa tjari wan kaba kon foe tego na a grontapoe seti foe sani disi. Foe datede meki na „knekti”-klasse e tan nanga ai foe si fa na masra di drai kon baka, na glori Jezus Kristus, sa tjari pori kon tapoe den féanti foe na kownoekondre di joe kan si nanga ai. Nanga na kownoekondre dati na ini prakseri, den e begi na Jehovah Gado: „Joe kownoekondre moe kon. Joe wani moe go doro, soleki ini hemel, so toe na grontapoe” (Matt. 6:9, 10; Openb. 16:14-16). Na grontapoe situwasi disi ben agersi ofoe ben taki na fesi nanga san ben psa ini na ten foe na knektiwroko foe na Israëlsma di ini wan toemsi moeiliki ten, kownoe Hizkia foe Jeruzalem ben poti en leki wan kownoe knekti.
2. Soema ben de na djoe dati, èn soema presi a ben teki abra ini na kownoewroko foe wan knekti akroederi Jesaja 22:15-25?
2 Na „knekti” ben de na djoe Éljakim, na manpikin foe Hilkia. Dri tron den e kari en leki na man di „ben loekoe na oso” foe kownoe Hizkía (Jes. 36:3, 22; 37:2). A ben teki na presi foe na man Sebna ini na kownoe wroko disi. Na bosroiti foe Gado tapoe na tori foe Éljakim nanga Sebna skrifi ini Jesaja 22:15-25. Wi e lési drape:
„Disi na Soeverein Masra, Jehovah foe den legre, ben taki: ’Go, èn go na inisé na oso na a knekti disi, na Sebna, di e loekoe na oso: „San de dja foe boen gi joe, èn soema de dja foe boen gi joe, dati joe meki den diki dja . . . wan grebi gi joe?” Tapoe wan hé presi a de diki en grebi; ini wan letopo stonbergi a de kapoe wan oso gi ensrefi. „Loekoe! Jehovah e fringi joe gwe nanga wan krakti fringi, o tranga man na skin fasi, èn e graboe joe nanga tranga. Sondro mankeri a sa domroe joe stéfi, leki wan bal gi wan bradi kondre. Drape joe sa dede, èn drape den wagi foe joe gori sa de den sjenvlaka foe na oso foe joe masra. Mi wani troesoe joe poeroe foe joe presi; èn foe joe officiëel post den sa hari joe poeroe.
Èn a moe psa tapoe na dé dati, dati mi sa kari mi knekti séker, namkoe Éljakim, na manpikin foe Hilkía. Èn mi wani weri joe langa krosi gi en, èn joe berebanti mi sa tai gi en stéfi, èn na makti foe joe mi sa gi ini en anoe; èn a moe tron wan tata gi na sma foe Jeruzalem èn foe na oso foe Juda. Èn mi wani poti na sroto foe na oso foe David tapoe en skowroe, èn a moe opo sondro dati wan sma e sroto, èn a moe sroto sondro dati wan sma e opo . Èn mi wani naki en go leki wan spikri ini wan faste presi, èn a moe tron leki wan troon foe glori gi na oso foe en tata. Èn den moe anga na en a heri glori foe na oso foe en tata, den bakapikin, nanga den sé-taki, ala patoe foe na pikin sortoe, patoe foe na komtjisortoe, soleki ala patoe foe na sortoe foe bigi watrakan.
Tapoe na dé dati”, so Jehovah foe den fetiman taki, „na spikri di ben naki go ini wan faste presi, sa hari poeroe, èn a moe koti poeroe èn fadon, èn na lai di de na en tapoe, moe koti poeroe, bikasi Jehovah srefi ben taki dati.”’”
3. (a) San na nen Éljakim wani taki, èn fa san na nen wani taki ben kan sori ensrefi tapoe na sma di e tjari na nen? (b) Soema ben seni go foe arki den laster wortoe na fesi den skotoe foe Jeruzalem, èn te foe kaba na soema wan tranga begi foe jepi ben seni go?
3 Akroederi nanga san Éljakim nen wani taki, „Gado e opo”, meki dati Jehovah ben opo en poti na a presi foe knekti foe na palési foe kownoe Hizkía. Disi ben psa bifo na tiriman foe Assyria Sanherib ben fadon go ini na kondre Juda ini 732 bifo G.T. Sanherib, meki en sroedatimakti poti kampoe wan pisi foe Jeruzalem, èn seni dan en takiman, Rabsake, makandra nanga en bodyguard, foe tanapoe na fesi den skotoe foe Jeruzalem èn den ben aksi nanga tranga foe na foto gi en srefi abra. Rabsake ben soso ini disi Jehovah leki Gado èn a ben gi grani na Assyria nanga en tiriman. Na kownoe foe Jeruzalem Hizkía ben seni den sma di e teki presi gi en foe arki na den wortoe disi di e afrontoe Gado, èn dati ben de Éljakim, di ben de now knekti, èn Sebna, di ben poti kon . . . lagi leki sekretarsi, èn Joah, na historia-skrifiman. Nanga sari foe san a ben jere, a ben tjari boskopoe go gi kownoe Hizkía. Foedi na kownoe ben firi ensrefi krinkrin sondro jepi, a ben seni wan tranga begi go na a proféti Jesaja, na soema di ben teki presi gi Jehovah. — Jes. 36:1-37:7.
4. Soema e agersi ini na disiten kontroe foe na owroe drama, Sanherib, Hizkía, nanga Éljakim?
4 Djaso wi e si densrefi agersi marki di e pré wan rol ini na moeiliki situwasi foe now. Sanherib, na kownoe foe Assyria e agersi dan ooktoe na feanti foe Gado kownoekondre, namkoe Satan na Didibri, di e aksi foe Jehovah orga pipel gi densrefi abra noso den e kisi na strafoe foe katibo ofoe pori. Na salfoe kownoe Hizkía, di en nen wani taki, „Jehovah ben gi tranga”, de wan agersifasi foe na kownoe di e tiri now, Jezus Kristus, di sabi boen na moeiliki toestand foe en loyaal discipel na grontapoe, di e ondrofeni sjen èn di na organisaatsi foe Didibri e frede den foe pori den. Éljakim di ben poti leki knekti foe na oso foe kownoe Hizkía, de wan agersi fasi foe na fikapisi foe na „knekti”-klasse, na groepoe salfoewan di de ete na grontapoe ini na „bosroiti disi foe na seti foe sani” sensi 1914. Soleki na agersi knekti Éljakim ben de wan djoe ofoe Israëlsma, na so na fika-pisi ini disi ten de foe jeje Israëlsma na ondro na kownoe di e tiri, Jezus Kristus.
5. Nanga soema den sma di de wan pisi foe na salfoe fikapisi ben tai densrefi, soleki e kon na krin foedi den e panja te now ete na a heri grontapoe na tijdschrift NA WACHTTOREN, èn oten den ben poti ala sjen nen di sma ben kari den na wan sé?
5 Te nanga na lati pisi ten disi, na salfoe fikapisi di e kon moro pikinso, e tjari te now ete na a heri grontapoe èn ini foeroe tongo na tijdschrift Na Wachttoren — A de gi njoensoe foe Jehovah Kownoekondre. Dati tapoe na spesroetoe fasi disi den e meki den sabi den leki sma di tai na Jehovah Gado de wan logis bakapisi foe na di foe 20 eeuw waka foe den theokratis sani di e psa. Ja, bikasi ini na jari foe memre 1931 foeroe doesoen sma foe na salfoe fikapisi ben konmakandra ini algemene konmakandra, èn na tapoe 26 juli leki wán man den ben teki . . . wan bosroiti, pe tapoe na gron foe dati, den ben teki na bijbel nen „Kotoigi foe Jehovah”. Dati ben de na Columbus (Ohio, Amerkankondre). Na so fasi den ben poti ala sjen nen na wan sé, di den kerki sistema foe na kristenheid ben kari den bijbelondrosoekoeman disi di tai nanga makandra tapoe na heri grontapoe. Wantronwantron baka dati ala gemeente foe jeje Israëlsma na a heri grontapoe ben teki leki wán man na nen disi.
6. San den ben teki tapoe den nanga den heri ati, foedi den kari densrefi na so fasi nanga na nen foe Gado?
6 Na so fasi den ben teki na frantwortoe a den tapoe di didon ini na sani di ben taki gi den Israëlsma ini den dé foe Jesaja:
„’Oenoe de mi kotoigi’, so Jehovah taki, ’ja, mi knekti di mi ben teki, sodati oen sabi en èn abi bribi ini mi, èn sodati oenoe froestan dati mi de na Srefiwan . . . Foe datede meki oenoe de mi kotoigi’, so Jehovah taki, ’èn mi na Gado.’” — Jes. 43:10-12.
DEN FRANTWORTOE DI ABI FOE DOE NANGA NA KNEKTIWROKO
7. (a) Fa kerki fesiman di ben taki dati den ben kisi wan knekti-wroko, bifosi na kaba foe na Fosi Gontapoefeti ini 1918, ben lé gi san den ben taki? (b) Fa den kerki fesiman foe na kristenheid ben sori dati den de leki Sebna?
7 Neleki Sebna ini na tiri foe kownoe Hizkía ini na ten foe Jesaja, na so kerki fesiman foe na kristenheid e taki dati den wawan abi na reti foe a grontapoe knektiwroko ondro na Moro Bigi Hizkía, Jesus Kristus. Na tra fasi leki den kerki fesiman, den getrow sma di de wan pisi foe na salfoe fika-pisi ben doe moeiti tranga foe doe na frantwortoe foe den, di abi foe doe nanga a knektiwroko foe na kownoekondre. Sensi na kaba foe na Fosi Grontapoefeti, di ben bigin ini na kristenheid , dan disi ben de so tapoe wan spesroetoe fasi. Te nanga na ten dati, den kerki fesiman foe na kristenheid di ben soetoe faja foe feti kon ben sori krin sondro foe joe kan figi en poeroe fa a fasi foe den de tapoe a tori foe na knektiwroko, di den ben taki, dati den ben kisi foe na Kownoe, Jesus Kristus. Srefi dan kaba, foeroe bewijsi ben de pasa marki, dati den „ten foe den heiden” ofoe den „faste ten foe den naatsi” ben kon na wan kaba ini na herfst foe 1914. Ja, èn dati ooktoe na glori Jesus Kristus ben bigin foe tiri ini hemel leki na Moro Bigi Hizkía (Ezech. 21:25-27; Luk. 21:24, Statenvertaling; Nieuwe Wereldvertaling). Ma den kerki fesiman foe na kristenheid ben taki dati den ben de foe hori baka gi na kownoekondre foe Jehovah ondro Kristus di ben opo? Nono!
8. San den kerki fesiman foe na kristenheid ben doe baka na fadon foe na Volkoebontoe, kontrari nanga san na fikapisi foe jeje Israëlsma ben doe?
8 Ini 1919 den kerki fesiman foe na kristenheid ben pristeri densrefi leki „knekti” foe doe dienst gi na Volkoebontoe di den taki foe opo. Ma ini 1939 na Bontoe dati ben fadon krinkrin. Na njoen vréde-organisaatsi, na Verenigde Naatsi, ben teki en presi now. Krinkrin tra fasi leki den kerki fesiman, na fika-pisi foe den jeje Israëlsma e tan gi jepi na a kownoekondre foe Gado ondro Kristus.
9. Akroederi den troe tori foe na historia, dan san de na disiten piki tapoe na aksi foe Jezus ini Lukas 12:42?
9 Soema foe datede sensi na bigin foe na kroetoe foe Gado ini 1918 ben kisi na grani foe na knektiwroko ofoe di ben poti stéfi ini na wroko foe knekti? Den historia troe tori sensi 1918, di e taki foe densrefi, e piki: Na salfoe fikapisi foe den jeje Israëlsma. Den leki klasse de na piki tapoe na aksi foe Jesus: „Soema de troetroe na getrow, na koni knekti di en masra ben poti tapoe en skin foe foetoeboi foe tan gi den na a reti ten na marki foe njanjan foe den?” (Luk. 12:42). Den de now na Moro Bigi Éljakim. Nanga tra wortoe, den de na „knekti”-klasse di na getrow èn koni Éljakim e agersi ini na ten foe na tiri foe kownoe Hizkía (745-716 bifo G.T.), na a ten di den Asyriasma ben fadon kon ini na kondre Juda.
10. Fa na srafoe-„knekti”, na fikapisi foe den jeje Israëlsma ben sa kon de „kolokoe” akroederi na profétitori foe Lukas 12:43, 44?
10 Aladi benawtoe e kon tapoe na kristenheid nanga na tra pisi foe na grontapoe foe libisma, tokoe na fikapisi foe na getrow „knekti”-klasse de troetroe kolokoe, soleki Jesus srefi ben taki a fesi nanga den wortoe: „Kolokoe na srafoe dati de te en masra te a kon feni en e doe so!” San e meki den de kolokoe? We, na sani di Jesus ben taki moro fara: „Mi e taki ini waarheid: A sa poti en tapoe ala en goedoe.” — Luk. 12:43, 44.
11. Akroederi Jesaja 22:20, 21, fa Jehovah ben sa poti wan tra sma ini na presi foe Sebna?
11 Ini jeje fasi a ben go a srefi nanga na getrow fikapisi leki nanga Éljakim, na manpikin foe Hilkía, di ben teki na presi foe na Sebna di ben gi ensrefi grani leki „knekti” foe na oso foe kownoe Hizkía. Jehovah ben taki gi en proféti Jesaja: „Èn a moe pasa tapoe na dé dati (te Sebna ben sa poeroe foe na positie foe en), dati mi sa kari séker mi knekti, namkoe Éljakim, na manpikin foe Hilkía. Èn mi wani weri joe (foe Sebna) langa krosi gi en, èn joe berebanti mi sa tai gi en stéfi, èn na makti foe joe mi sa gi ini en anoe; èn a moe tron wan tata gi den sma foe Jeruzalem èn foe na oso foe Juda.” — Jes. 22:20, 21.
12. Nanga sortoe doe foe Jezus Kristus sensi na bakajari foe 1919 dati e kon akroederi?
12 Disi e akroederi nanga na poti di Jezsu poti na getrow, koni „knekti”-klasse tapoe ala en Kownoekondre goedoe. Spesroetoe sensi na bakajari foe na jari baka na feti 1919 wan njoen kapitel ben bigin ini na historia foe bribi. Neleki Éljakim, na so den ben weri gi a fikapisi foe a getrow, koni „knekti”-klasse wartifasi foe tron boskopoeman foe na kownoekondre foe Jehovah Gado di ben opo ondro Kristus (2 Kor. 5:20). Ini na fasi disi den ben meki na kownoekondre di ben opo bekenti, „tapoe na heri gronatpoe pe sma e libi . . . leki wan kotoigi gi ala naatsi” (Matt. 24:14; Mark. 13:10). Foe taki en na agersi fasi, dan na Almakti Gado ben tai den mindri sodati den ben sa doe na prenspari diniwroko disi foedi den tai den mindri nanga na „berebanti” foe wan knekti ofoe basja (sochen, Hebrew; oikonomos, Griki Septuaginta). — Teki gersi Zacharia 3:1-7.
13. Oten den sma di de wan pisi foe na „knekti”-klasse, ben gwe libi Babylon na Bigiwan èn tapoe soema na „makti” disi foe na „knekti” disi ben go?
13 Spesroetoe sensi na bakajari foe 1919, Jehovah Gado ben seni na kari gi en heri pipel di gi densrefi abra foe gwe libi „Babylon na Bigiwan”, na grontapoemakti foe falsi bribi (Openb. 18:2, 4). Den sma di de wan pisi foe na „knekti”-klasse, ben gi jesi èn hari gwe troetroe, èn a hemel masra foe den, na masra Jezus Kristus di de noja èn di no de foe si nanga ai, Jezus Kristus, ben gebroiki den leki klasse foe gi ala den sma di den ben feni boen „na a reti ten na marki foe njanjan foe den”. Na Éljakim-klasse ben de ini disi leki wwan „tata” di e sorgoe gi ala sma di „na sma foe Jeruzalem èn na oso foe Juda” e agersi. Nanga jepi foe Kristus Jehovah ben poti na „makti” disi ini anoe foe na „knekti”-klasse, èn na „knekti” disi di de foe difrenti sma ben gebroiki na „makti” disi te nanga na dé foe tide tapoe wan getrow èn koni fasi. Spesroetoe sensi 1935, na „bigi ipi” foe Kristus „tra skapoe” ben njan boen foe na sorgoe disi foe wan tata, soleki disi ben de nanga „den freemde sma di ben libi na inisé” foe den doro foe Jeruzalem foe owroeten. — Ex. 20:10; Joh. 10:16; Openb. 7:9-17.
14. Fa na „knekti” ben doe en frantwortoe soleki ben agersi foedi Éljakim ben tjari na „sroto foe na oso foe David” tapoe en skowroe?
14 Wan hebi franitwortoe ben poti na a skowroe foe na disiten Éljakim-klasse, di de a srefi leki di skrifi ini den wortoe foe Jehovah gi na Éljakim ini na ten foe kownoe Hizkía: „Èn mi wani poti na sroto foe na oso foe David tapoe en skowroe, èn a moe opo sondro dati wan sma e sroto, èn a moe sroto sondro dati wan sma opo” (Jes. 22:22). Na „knekti”-klasse di de foe difrenti sma sori dati den warti foe tjari na kownoe „sroto foe na oso foe David” tapoe den skowroe. Den ben kibri den grontapoe afersi foe Gado Messias kownoekondre — di na oso foe David e agersi — nanga a tan na ai. Den ben bari wan switikon gi den sma di na Masra ben teki foe de den kriboi sma foe na fikapisi foe kownoekondre-erfgenaam. Ini 1935 den ben bigin foe bar odi gi den „tra skapoe” di na Toemsi Boen Herder ben wani tjari so te kon makandra, sodati den ben sa de „wán ipi” nanga na salfoe fikapisi. A ben sroto na doro gi ala sma di ben fadon komoto foe na gemeente èn gi den sma di ben proberi foe kon na inisé tapoe wan kibri fasi foe pori na organisaatsi foe Jehovah Kotoigi. — Teki gersi Openbaring 3:7.
15. Leki san Jehovah ben wani naki Éljakim go ini wan faste presi èn san ben moe anga alamala na en?
15 Jehovah ben taki profétitori moro fara ete foe na disiten Éljakim-klasse nanga den wortoe: „Èn mi wani naki en go leki wan spikri ini wan faste presi, èn a moe tron leki wan troon foe glori gi na oso foe en tata. Èn den moe anga na en (leki na wan spikri) heri na glori foe na oso foe en tata, den bakapikin, nanga den sétaki, ala patoe foe na pikin sortoe, patoe foe na komtji sortoe, soleki ala patoe foe na sortoe foe bigi watrakan.” — Jes. 22:23, 24.
16. Ini soema presi Éljakim ben kon, èn foe sortoe dienst foe na boen foe na „skin foe foetoeboi” na agersi Éljakim ben poti?
16 Na „spikri” di ben naki go foe alaten, pe den oso-sani dati ben moe anga na en, ben agersi Éljakim, na njoen knekti di ben teki na presi foe Sebna. Foe datede meki a ben kisi na wroko foe sorgoe dati den sma foe na oso foe na kownoe ben kisi njanjan nanga dringi. Dati Éljakim ben poti ini na wroko disi, e agersi dati na Moro Bigi Hizkía, Jezus Kristus, te a ben kon ini en glori ben sa feni en boen dati na „getrow knekti”-klasse ben sa poti tapoe na fikapisi foe mede-erfgenaam di ben de ete na grontapoe foe gi na „skin disi foe foetoeboi na a reti ten na (fanowdoe) marki foe njanjan”, efoe a ben de wan bigi ofoe wan pikin porsi. Disi ben anga foe na sortoe faste njanjan ofoe dranki. Den sortoe „fanowdoe njanjan” disi, a no de foe taki, ben sa komoto foe a Wortoe foe Gado. Te wi loekoe en foe wan tra sé foe na bijbel, dan den „patoe” dati e agersi den dienstknekti foe Gado srefi, nanga difrenti koni foe doe dienst. — 2 Tim. 2:20-22.
17. Na sortoe fasi Éljakim ben sa de „wan troon foe glori” gi na oso foe en tata, èn fa den „bakapikin nanga sé-taki” foe en tata ben sa njan boen foe dati?
17 Éljakim ben sa tron wan „troon foe glori” gi na oso foe en tata Hilkía. Disi ben wani taki, tra fasi leki na fosten knekti Sebna, dati a no ben sa tjari sjen kon tapoe na oso foe en tata ofoe ben sa langi na boen nen foe en. A ben sa poti moro hé ete ini na kownoe dienst foe kownoe Hizkía. Ala den sani disi ben agersi nanga a sani, dati a ben sa tron wan „troon foe glori”. A no ben sa poti ensrefi leki wan kownoe foe sma dini en, ma leki na dienstknekti foe na kownoe a ben sa abi ini en njoen wroko makti nanga „glori”. Te nanga wan bepaalde marki a ben sa teki presi gi na kownoe foe Jeruzalem èn taki ini na nen foe en. Sjen no ben sa fadon tapoe na „oso foe en tata”, ma moro foeroe „glori” èn boiti dati a ben sa poti stéfi leki a ben anga na wan spikri di no kan hari poeroe. A no ben sa de leki wan sjen gi den „bakapikin èn sé-taki” foe na oso foe en tata, foedi den ben anga foe Éljakim foe wan boen wortoe. Ala den sortoe famirman disi foe Éljakim ben kan bow a tapoe, dati a ben sa teki presi gi den tapoe wan grani fasi ini en héwroko. Foedi den sortoe famirman disi ben sa kisi krakti stanbai, dan den ben sa kisi dekati foe pristeri densrefi leki „patoe” ini na dienst foe na kownoe.
18. (a) Na sortoe klasse ini disi ten spesroetoe frantwortoe ben anga neleki na wan spikri, èn na sortoe fasi a de wan kownoe frantwortoe? (b) Soema ini disi ten de „den bakapikin nanga sé-taki”, èn nanga sortoe sani foe gebroiki den e agersi?
18 Na a srefi fasi na „getrow knekti”-klasse ini disi ten e tjari wan hebi frantwortoe. A de wan kownoe frantwortoe, di foeroe glori tai na en, foedi a de tjari now ini na dienst foe Jehovah kownoe, di poti now foe wroko, Jesus Kristus. A de wan jeje frantwortoe gi ala den sma di de famiri na a Éljakim-klasse ini na kownoekondre howpoe, leki „den bakapikin nanga sè-taki” foe na jeje Tata foe den. Den e anga foe ofoe ’e anga’ na a „knekti”-klasse di gersi wan spikri, ala di densrefi nanga froestan de libi „patoe”, di e tjari difrenti marki foe fanowdoe njanjan gi trawan di e prisiri densrefi nanga den ini na srefi jeje famirman fasi. — 2 Tim. 2:20, 21; 2 Kor. 4:7.
19. (a) Ini sortoe moeiliki ten Éljakim ben poti leki kownoe knekti? (b) Na sortoe sé na kownoe foe Juda ben drai soekoe jepi ondro skreki omstandigheden?
19 Ini owroeten, ini na di foe aiti eeuw bifo wi gewoon teri, Éljakim ben poti ini na kownoe wroko foe knekti ini wan moeiliki pisi ten foe Jehovah model kownoekondre ini Jeruzalem. Ensrefi ben jere den wortoe di e tapoe skreki gi joe di na boskopoeman foe na Assyria kownoe di ben fadon kon na ini ben bari. Éljakim ben taki den ete wan tron gi en masra, kownoe Hizkía. Kownoe Hizkía foe en sé no ben go soekoe sroedati jepi foe Egypte, ma a ben go na en Gado Jehovah. Leki piki, nanga mofo foe en proféti Jesaja, Jehovah ben gi wan piki di ben gi tranga. San ben psa na a ten dati leki wan kontroe foe na tjalansi boskopoe foe Jehovah? Wi e lési:
20. San Jehovah ben doe dan leki wan kontroe foe en tjalansi boskopoe nanga mofo foe en proféti Jesaja?
20 „Dan na èngel foe Jehovah ben go èn a ben naki ini a sroedati kampoe foe den Assyriasma wan hondro-nanga-aiti-tenti-na-féfi doesoen man. Di den opo mamanten froekoe, we, loekoe, den alamala ben de dede sma. Foe datede meki Sanherib ben hari gwe, na kownoe foe Assyria, èn a ben drai gwe baka èn a ben go libi ini Ninevé. Now a psa dati di a ben boigi ensrefi ini na oso foe Nisroch, en gado, Adrammelech nanga Sarezer, en égi manpikin, ben naki en kiri nanga a fet-owroe.” — Jes. 37:36-38; 2 Kon. 19:35-37.
21. (a) San a de agersi foedi Jehovah ini na ten dati ben bigin nanga na stré? (b) Fesi san na disiten „knekti”-klasse tanapoe èn sensi oten èn na soema na klasse disi ben meki den jere na warskow?
21 Dati Jehovah ini a ten dati ben bigin feti foe a boen foe en kownoekondre ini Jeruzlaem e agersi na moro bigi fasi fa a sa opo doe sani ini „na feti foe na bigi dé foe Gado na Almaktiwan” na Har-mágeddon. Drape a èngel foe en foe pori sani sa de wan gran-èngel, na Kownoe, Jezus Kristus, di e tjari ala hemel èngel go na feti (Openb. 16:14-16; 19:11-21). Na fikapisi foe na „knekti”-klasse tanapoe let a fesi na feti disi foe ala feti, di noiti sa kon baka ete wan tron. Na „knekti”-klasse, di abi na frantwortoe foe na sorgoe foe na fanowdoe njanjan foe na Wortoe foe Gado, den ben gebroiki den speciaal sensi 1919 foe meki na warskow foe na „feti” disi di e kon tapoe na presi di nen Harmágeddon, bari lontoe. Neleki ini a tori foe Éljakim ini den dé foe kownoe Hizkía a so den tanapoe let a fesi na fadon kon di de so krosbé foe na Moro Bigi „Assyriasma”, Satan na Didibri, nanga en ipi (Micha 5:5, 6). Den e tan go doro foe warskow ala sma foe na osofamiri foe a hemel Masra foe den nanga na heri libisma famiri.
22. Soema ben teki na warskow dati boen, èn foe sanede den e kisi dekati nanga san ben psa nanga Éljakim nanga den tra sma di ben libi ini Jeruzalem èn ooktoe nanga san ala den sani disi wani taki?
22 Wan internationaal „bigi ipi” ben teki na warskow boen èn ben meki disi bekenti na trawan baka (Openb. 7:9-17). Den e kisi dekati nanga san ben psa nanga Éljakim, na knekti foe na kownoe Hizkía nanga den tra sma di e libi ini Jeruzalem, bikasi den disi ben komoto foe na bigi pori foe den Assyriasma di ben fadon kon feti èn den no ben tron sma di a feti ben gi mankeri. Na a srefi fasi na „knekti”-klasse ini „disi ten foe na kaba” makandra nanga na „bigi ipi” foe Kristus „tra skapoe” sa kisi kibri foe no go ini pori makandra nanga na grontapoe seti foe sani ini „na feti foe na bigi dé foe Gado na Almaktiwan” na Harmageddon (Dan. 12:4). Baka na wini foe Jehovah drape, dan na Moro Bigi Sanherib, Satan Didibri nanga ala en ogri-jeje èngel sa fringi go ini na pisi ten foe na doesoen jari tiri foe na Moro Bigi Hizkía, Jesus Kristus.
23. Oten no wan degedege no sa de foe na joisti piki tapoe na aksi di Jesus ben aksi ini Lukas 12:42?
23 Solanga a de prisiri a Masra foe den di e tiri now, Jesus Kristus foe gebroiki den moro fara na grontapoe, na fikapisi foe na „getrow knekti”-klasse sa prati na joisti „marki foe fanowdoe njanjan” gi den kompe di sa tan na libi, na „bigi ipi” foe den „tra skapoe” foe a Masra foe den. Meki ala sma di gersi skapoe loekoe boen te den abi a froewakti foe na kontroe foe den sani disi dati den no koti poeroe ini Harmageddon, soleki den sma di nanga foeroe froetrow e anga na a spikri di no boen, na Sebna-klasse ini na kristenheid (Jes. 22:17-19, 25). Kolokoe troetroe ala sma di ben ondrosoekoe èn hori faste na a joisti piki tapoe na aksi: „Soema de troetroe na getrow èn koni knekti?” Foedi den de getrow na en knektiwroko, meki den tan teki ini a joisti ten disi na fanowdoe njanjan foe na anoe foe na getrow knekti, na Moro Bigi Éljakim. Na agersi „spikri” dati akroederi na sabi foe Gado na fesi ben naki go ini wan faste presi foe tan drape nanga na jepi foe Gado. Anga foe datede nanga foeroe froetrow èn ini ala loyaliteit na en.
Leki wan loekoe baka san joe ben leri, joe kan piki den aksi di e kon now?
◼ Soema ben de Éljakim nanga Sebna?
◼ Soema Éljakim nanga Sebna e agersi ini wi ten?
◼ Soema kownoe Sanherib èn kownoe Hizkía e agersi ini disi ten?
◼ Na soema na Éljakim-klasse e gi jepi, tra fasi leki san na Sebna-klasse ben gi jepi?
◼ Soema „na sma foe Jeruzalem èn na oso foe Juda” e agersi?
◼ Soema, boiti na disiten „sma di e libi ini Jeruzalem èn Juda” e kisi moro tata sorgoe foe na Éljakim-klasse?
◼ San na „oso foe David” e agersi?
◼ Soema na a „spikri” ini na profétitori foe Jesaja, èn soema a de agersi?
◼ San a de agersi dati na „spikri” disi e tron wan „troon foe glori”?
[Prenki na tapoe bladzijde 11]
A salfoe fikapisi nanga den kompe-wrokoman foe den e panja NA WACHTTOREN na a heri grontapoe ini foeroe tongo