A pasi foe den regtvaardikiwan e tan kon moro krin
„Te na sma di e tiri tapoe a libismafamiri de regtvaardiki, . . . san a de leki na mamanten leti, te a son e go skijn.” — 2 Sam. 23:3, 4.
1. San wi ben kan froewakti tapoe a gron foe 2 Samuël 23:3, 4, èn disi ben psa ooktoe?
NA LETI tapoe a pasi foe Jehovah dienstknekti tan kon moro foeroe foe sensi owroeten te na a ten foe tide. Disi srefi ben de moro so ete sensi na spesroetoe jari 1914 dati, di, soleki den sani di ben psa dja na grontapoe e sori, „na kovrnoekondre foe na grontapoe ben tron na kownoekondre foe wi Masra (Jehovah) èn foe en Kristus” (Openb. 11:15). Na leti foe na Wortoe foe Gado wantronso ben go skijn moro krin, soleki na son tapoe „wan mamanten sondro wolkoe”, foe meki na pasi di Jehovah dienstknekti moe go waka, kon moro krin . — 2 Sam. 23:3, 4.
2. Fa wi kan si aanpassingen ini a froestan foe sani?
2 Ma a kan dati a ben gersi gi son sma leki na pasi dati no ben de alaten letopoe. Wawan tron na bodoi di Jehovah organisatie di wi e si nanga ai ben gi, ben tjari aanpassingen kon di ben gersi leki den drifi komoto foe san den ben si a fesi. Wi ben kan agersi disi nanga san de bekenti ini a tjari foe boto leki „séri skoinsi go èn skoinsi kon”. Nanga a seti foe den séri den sériman kan meki a sipi go foe reti-anoe-sé go na kroektoe-anoe-sé èn foe baka go na fesi, ma ini ala a ten disi e tan go na fesi pe den moe doro, aladi den moe go kontrari a winti. Èn a presi pe Jehovah dienstknekti moe go, de den „njoen hemel nanga wan njoen grontapoe” di Gado pramisi. — 2 Petr. 3:13.
3. Sortoe bewijsi de dati Jehovah e tan blesi en kotoigi?
3 Degedege no de foe disi dati Jehovah Gado e tan gi en blesi na a wroko foe en kotoigi na a heri grontapoe, soleki na „getrow èn koni srafoe” e tiri en. Disi e kon na krin foe den froktoe. Hori ini prakseri dati Jezus ben taki: „Ibri boen bon e tjari toemsi boen froktoe kon.” Èn den froktoe disi joe kan si internationaal na soso wán pipel — na wanfasi maatschappij foe Jehovah Kotoigi na heri grontapoe. — Matt. 7:17.
4, 5. Sortoe tra wrokosani Jehovah Gado ben gebroiki foe tjari en pipel boiti en geïnspireerde Wortoe?
4 Wansi pe wi e libi na grontapoe, a Wortoe foe Gado e tan leki wan leti tapoe wi pasi èn wan lampoe gi wi foetoe tapoe a tori foe wi libi èn waka èn wi bribi èn overtoigi (Ps. 119:105). Ma foe jepi kristen ini ala naatsi foe froestan na bijbel èn foe gebroiki disi tapoe joisti fasi ini den libi, meki Jehovah Gado ben gi ooktoe en organisatie di wi kan si nanga ai, na „getrow nanga koni srafoe”, di de foe sma di kisi salfoe foe santa jeje. Efoe wi no tanapoe ini contacti nanga na communicatie-kanari disi di Gado e gebroiki, dan wi no sa go a fesi tapoe a pasi foe libi, wansi omeni wi e lési ini a bijbel. — Teki gersi Tori foe den Apostel 8:30-40.
5 Jezus ben taki foe Gado communicatie-kanari, dati na „getrow èn koni srafoe” ben sa gi jeje njanjan na a reti ten na ala bakaman foe Jezus èn dati na „srafoe” disi ben sa poti tapoe ala en goedoe (Matt. 24:45-47). A de ooktoe wan aparti sani dati na apostel Paulus ben sori ini Efese 4:11-16, dati na kristen gemeente no ben abi wawan fanowdoe foe geïnspireerde wrokosani leki apostel èn proféti, ma ooktoe foe evangeliumprékiman, herder nanga leriman, di ben moe jepi kristen foe kon ini na wanfasi ini na bribi èn na soifri sabi foe na Manpikin foe Gado èn foe kisi jeje lepi-fasi dorodoro. — Loekoe ooktoe 1 Korinte 1:10; Filipi 1:9-11.
6. Leki wan bakapisi foe sortoe sani meki a ben de fanowdoe foe den loekoe njoen agen den sani di den ben bribi?
6 Na „getrow èn koni srafoe” disi, di e wroko krosbé nanga Jehovah Kotoigi, Jehovah gebroiki troetroe foe tjari en pipel èn foe tranga èn tiri den. Foe di na leti e skijn moro nanga moro, èn foe di fowtoe e meki leki wan bakapisi foe libisma onvolmaaktifasi, meki dati den kristen foe troe wawan tron ben moe loekoe agen den leri èn fasi fa den ben si sani. Ma disi no ben tjari wan moro krin froestan foe sani kon èn a no ben tjari boen gi den? Meki wi loekoe pikinso wantoe eksempre.
NA FERLOESOE PAIMAN ÈN JEHOVAH NEN
7. Foe san-ede èn tapoe a gron foe san meki den bijbelondrosoekoeman ben poti na leri foe na ferloesoeprijs so na fesi?
7 Ini 1878 Charles T. Russell, di ben tron bakaten na fosi presidenti foe na Wachttorengenootschap, ben broko a wrokomakandra nanga a mederedacteur foe The Herald of the Morning, N.H. Barbour, tapoe a tori foe na ferloesoeprijs. Na masra Barbour ben trowe na bribi ini na krakti foe Jezus srakti-ofrandi foe poeroe sondoe. Bakaten den bijbelondrosoekoeman, soleki den kotoigi foe Jehovah disi ben kari densrefi, ben si jari langa na ferloesoeprijs leki na moro prenspari leri foe na bijbel. Èn degedege no de dati ini Gado Wortoe krakti e poti tapoe ferloesoe nanga jepi foe a bribi ini a ferloesoe prijs foe Kristus (Joh. 3:16; Tori foe den Apostel 4:12; Hebr. 5:9; Openb. 7:10). Na moeiti foe Abraham foe offer Isaäk èn den srakti-ofrandi di ben tjari ondro na wèt foe Mozes e agersi Jezus ferloesoe-ofrandi na profétifasi. Den proféti ben taki disi na fesi. Den bijbelondrosoekoeman foe datede ben poti bigi krakti tapoe san Jezus ben doe gi na libisma famiri. — Luk. 24:25-27, 44.
8. (a) Ne san den ben go si leki wan sani foe moro bigi belang? (b) Disi ben tjari den kon tapoe san, ma sortoe kenki ben tjari kon ini den bakaten tintron jari?
8 Ma a bijbel e sori dati wan moro prenspari sani de leki na persoonlek ferloesoe foe wi. A de na bigi stré-aksi tapoe a tori foe Jehovah universele soevereiniteit, di Satan ben tjari kon ini degedege na a ten foe na oproeroe ini Eden (Gen. 3:15; 1 Kor. 15:24, 25; Openb. 11:15; 12:10). Nanga disi ini prakseri meki a de fanowdoe foe Jehovah nen kon poti reti. Ja, na heri thema foe na bijbel, foe Genesis te nanga Openbaring de na Messias Kownoekondre, na wrokosani di Gado e gebroiki foe poti en glori nen kon reti foe alaten, ja foe hé en foe tego! So wan 75 tron wi e lési Gado égi ferklari: ’Den sa moe sabi dati mi na Jehovah.’ Baka wan pisi ten en kotoigi ben go froestan dati libisma ben kan go taki foe den afersi foe den na Gado tapoe a gron foe a sani dati en nen de ini na tori. èn dati „ibriwan sma di e kari a nen foe Jehovah, sa kisi ferloesoe” (Rom. 10:13; Joël 2:32; Zef. 3:9). Wantoe jari baka makandra foe datede a ben de so dati Jehovah en nen nanga a poti reti foe en ben poti so na fesi dati sma di e feni fowtoe na Jehovah Kotoigi ben taki dati den no e bribi ini Jezus Kristus. Ma tapoe a punt disi wi kan taki dati toemsi krakti ben poti tapoe wan bepaalde punt. Soleki den geregelde lésiman foe Na Wachttoren sabi heri boen, dan den kristen kotoigi foe Jehovah ben poti troetroe prakseri na a prati foe Jezus ini a kon troe foe Gado prakseri ini den tintron jari di no psa langa kaba. A proféti Wortoe foe Jehovah foe troe e poti ala prakseri tapoe Jezus leki Gado „Prenspari Wrokoman foe ferloesoe”. — Hebr. 2:10; 12:2; Openb. 19:10.
9. Sortoe gronprakseri di e tjari a go na fesi foe wetenschap gersi foe kan gebroiki dja?
9 Foe den sortoe kenki ofoe aanpassing disi wi ben sa kan taki dati den e waka baka wan gronprakseri di, leki fa den taki, e meki wan go na fesi kon foe wetenschappelek waarheid. Foe taki en sjatoe, disi e go so: Fosi den e poti wan stelling, di alaten joe kan taki moro fara foe en. A de gi bigi mogelijkheid foe froestan sani moro krin ofoe gobroiki en ini praktijk. Ma baka wan pisi ten a de kon na krin dati wan toe fowtoe ofoe swaki sé fasi na en. Na firi e de foe poti wan stelling di e go te na a tra sé. Bakaten den e kon si dati a positie dati ooktoe no de na heri waarheid, èn foe datede den e tjari ala den boen punt ini den toe stelling kon makandra. Na gronprakseri disi foeroe tron ben gobroiki ini a fasi fa Odo 4:18 ben kon troe.
FASI FOE LIBI ÈN WAKA ÈN PRÉKIWROKO
10, 11. Sortoe toe sani ben kisi krakti baka makandra, nanga sortoe bakapisi te foe kaba?
10 Loekoe ete wan eksempre foe na go na fesi foe froestan sani: So wan 40 jari langa den bijbelondrosoekoeman ben poti krakti tapoe a prensparifasi foe a kweki foe toemsi boen kristen égifasi, wan sani di den ben kari na „gro foe joe karakter”. Boen foeroe krakti ben poti tapoe disi, foe di disi no ben loekoe na wan ai ini a kristenheid. A de ooktoe troe dati kristen ben moe gi kotoigi, foe di den ben moe taki nanga tra sma, ma disi ben go pikinso tapoe a di foe toe presi. Ma di Jehovah pipel ben go si na prensparifasi foe a nen foe Jehovah èn den ben froestan dati den ben moe gi kotoigi foe en nen èn kownoekondre, dan krakti ben poti tapoe dati, nanga na bakapisi dati pikinso prakseri ben poti tapoe a kweki foe wan kristen égifasi. Den ben taki dati Jezus ini na fosi presi ben kon foe gi kotoigi èn dati na préki ben de troetroe na sani di e teri. Na fanowdoe ben kon now foe feni na balans na mindri den 2 positsi disi. — Rom. 10:10; Gal. 5:22, 23.
11 Baka wan pisi ten na joisti balans ben feni. Kristensma no moe kweki wawan na froktoe foe na jeje foe Gado, ma den moe gi kotoigi ooktoe foe Jehovah sondro frede èn getrow. Ala toe marki de prenspari. Wi no kan poti a wan na wan sé foe di wi e doe a trawan. Na apostel Paulus ben taki: „Heloe foe mi, efoe mi no meki na boen njoensoe bekenti!” Ma a ben taki ooktoe: „Mi de tranga gi mi skin èn mi e tjari en leki wan srafoe, foe misrefi no keur af tapoe wan ofoe tra fasi, baka te mi ben préki gi trawan.” — 1 Kor. 9:16, 27.
SAKA JOESREFI NA ONDRO DEN „HÉ MAKTI”
12, 13. (a) Fa den ben si fosi den „makti” ini Romeini 13:1? (b) Disi ben tjari den go na sortoe tra sé, ma nanga sortoe troetroe boen?
12 Na kisi foe wan joisti froestan foe Romeini 13:1-7 de ete wan eksempre foe na „tiri foe wan boto” go na a joisti sé. Den fositen bijbelondrosoekoeman ben froestan nanga reti dati den „makti” ofoe „hé makti” ben de den tiriman foe disi grontapoe. (Teki gersi Statenvertaling nanga na Nieuwe-Wereldvertaling.) Tapoe a gron foe a froestan foe a sani disi, meki den ben teki a bosroiti, dati efoe wan kristen ini ten foe feti ben kisi kari foe weri fetisani, a ben moe doe dienst ini a legre, ben moe weri sroedati krosi èn ben moe go feti. Ma te a ben kon so fara dati a ben moe kiri wan tra sma, dan a ben kisi pasi dati na presi foe dati a ben soetoe go na loktoe.
13 Ma a ben de toemsi krin dati na apostel Paulus noiti ben sa agri nanga so wan fasi. Na aksi ben kon na fesi: Den „makti” ben sa kan abi foe doe nanga Jehovah Gado èn Jezus Kristus? Boen langa a pipel foe Gado ben hori na a sani disi. Èn ini den djoegoedjoegoe jari foe na di foe Toe Grontapoefeti disi ben tranga den a wansi fa a no fa „foe gi jesi na Gado leki tiriman moro leki libisma” èn foe bow na a heri grontapoe wan wondroe bericht foe sondro-frede kristen neutraliteit (Tori foe den Apostel 5:28, 29). Noiti degedege ben de dati kristensma ini na fosi presi ben moe de getrow na a Soeverein Masra Jehovah èn en Messias kownoe, Jezus Kristus. Ma den disi de ooktoe „den hé makti” di wi moe gi „belasting nanga schatting” èn di wi moe meki den kisi „grani”? — Rom. 13:7.
14. Fa na afersi foe saka joesrefi na ondro grontapoe tiri-makti te foe kaba ben si ini na joisti leti?
14 Kolokoe dati Jehovah ben tjari en pipel ini na jari 1962 foe froestan na gronprakseri relatieve onderworpenheid (a saka joesrefi na ondro makti ma joe moe hori san Gado wani a prakseri). A ben de krin dati kristen di ben gi densrefi abra ben moe gi jesi na grontapoe tiriman leki den „hé makti” èn ben moe wani nanga ala prisiri foe èrkèn den leki „Gado dinari” foe a boen foe den (Rom. 13:4). Ma san den moe doe efoe den „makti” disi e aksi foe den foe pasa den wèt foe Gado? Te na a punt dati kristen e gi jesi na a komando ini Romeini 15:1: „Ibri sili moe saka ensrefi na ondro den hé makti.” Ma disi e ferklari moro fara ini Jezus wortoe ini Mattéus 22:21: „Pai caesar foe datede san na foe caesar, ma Gado san na foe Gado.” Disi de kontrari foe san sma e doe ini na kristenheid ini algemeen. Foeroe sokari kristen sa abi . . . pikinso konsensi-fonfon foe pasa den wèt foe Gado te „caesar” komanderi den foe doe disi. Wán patriot ben taki foe disi na a fasi disi: „Wi kondre! . . . Dati a kan de alaten ini en reti; ma a de wi kondre, joisti ofoe fowtoe.” Gi den kristen kotoigi foe Jehovah disi no de so! Te den e komanderi den foe handri kontrari a wani foe Gado, dan den e taki ete wan tron den wortoe foe Jezus apostel, di ben taki: „Wi moe gi jesi na Gado leki tiriman moro leki na libisma.” — Tori foe den Apostel 5:29.
SOEMA DE BEDINARI?
15, 16. (a) San ben de langa ten na froestan foe soema ben de Gado bedinari? (b) Sortoe kenki ben tjari kon èn foe san-ede? (c) Ma sortoe fowtoe ben de ete na a kenki disi?
15 Meki wi kari ete wan eksempre foe leti di e go na fesi. A de go foe na afersi ofoe ala kristen di ben gi densrefi troetroe abra na Gado de bedinari, wansi o owroe èn sortoe sekse den de. Foeroe jari langa Johovah Kotoigi ben hori dati ala sma di ben abi beraw, di ben drai densrefi, di ben sori bribi ini Gado nanga Kristus, di ben gi densrefi abra na Jehovah foe doe en wani, soleki Kristus ben tjari disi kon na krin èn di ben dopoe, ben de troetroe bedinari. Ma dan son sma ben go tjari bezwaar kon na fesi. Tirimakti foeroe tron no ben waarderi na standpunt disi. Sma ben taki toe dati foeroe tongo no abi wan equivalent foe na Latijn pe na wortoe bedinari komoto foe en (minister), sodati den sma di abi wel so wan vorm ini a tongo foe den, no moe gebroiki a wortoe disi na a sé foe bribi. Moro fara den ben taki dati na dopoe no gersi dati a de wan ordinatie-ceremonie di fiti. Ma disi ben de boen réde foe gebroiki a wortoe „bedinari” (minister, Latijn) soso gi den sma di poti ini wan wroko ini na gemeente, soboen gi den owroeman èn „diaken” ofoe „bedinari ini na diniwroko”?
16 A de wan troe tori dati na wèt foe na kondre gwenti foe gi ibri bribi na reti foe taki san e meki wan sma tron wan bedinari foe en. A no trobi efoe tra sma no e froestan ofoe èrkèn na positie foe den. A no abi trobi ooktoe dati foeroe tongo no abi wan equivalent foe na Latijn wortoe minister. Dati no moe tapoe den sma di te ini den tongo so wan wortoe de — Ingrisi, Italiaan, Spanjoro nanga tra tongo — foe no gebroiki en te a de dini wan boen sani
17, 18. Soema kan tron troetroe „bedinari” èn fa den moe si na diniwroko foe den?
17 Na wortoe „bedinari” boen, bikasi a de sori na wan spesroetoe sortoe foe „dinari”, wan dinari nanga wan hé, spesroetoe dienst èn wroko. Ibriwan sma, wansi o owroe ofoe sortoe sekse a de, di kan bewijsi dati a abi wan boen froestan foe a wani foe Gado èn en prakseri gi libisma èn di tjari en libi kon akroederi bijbel gronprakseri, èn di ben gi ensrefi abra èn di ben teki dopoe akroederi a komando foe Jezus ini Mattéus 28:19, 20, de troetroe wan bedinari foe Gado. Wi kan taki srefi dati so wan sma de moro bekwaam èn abi moro bevoegtoe foe taki foe Gado leki soema toe di ben go na wan theologisch skoro ofoe seminarie, ma di no e froestan a prakseri foe Gado èn di kande no ben tjari den libi foe den kon akroederi den regtvaardiki wèt foe Gado. Den sma di e dini Gado troetroe, kan taki nanga na apostel Paulus: „Mi e gi (grani) na mi diniwroko.” — Rom. 11:13.
18 Wi moe poti krakti a tapoe dati a wortoe „bedinari” no de wan titel ma ai ferteri foe wan sani. (Teki gersi Mattéus 20:28). A no de nofo gi wan sma foe doe den stap di e meki dati a kan kon de Gado dienstknekti di kan kisi dopoe. Na sma moe meki en diniwroko, en „santa dienst” gi Jehovah Gado, de na moro prenspari marki ini en libi. Noso, wansi omeni ten di foe omstandigheden ede di a no abi ini en makti, a ben kan gi na en diniwroko, dan no nanga reti a ben sa kari ensrefi wan bedinari èn trawan no kan si en ooktoe leki wan bedinari foe Gado. — Rom. 12:1; 2 Tim. 4:5.
19. (a) San na kisi foe moro froestan ben abi leki bakapisi, ma fa loyaal wan ben kisi blesi? (b) San na Jehovah seti tapoe a tori foe a prati foe jeje njanjan, èn foe san-ede na organisaatsi disi wi sa teki alaten?
19 So wan kon moro foeroe foe froestan foe sani, di, a no de foe taki dati wi ben moe „séri skoinsi go èn skoinsi kon”, ben dini foeroe tron leki wan tesi tapoe a loyaliteit foe den sma di moksi densrefi nanga na „getrow èn koni srafoe”. Ma alaten wi e go na fesi na a sé foe kisi wan moro betre froestan foe na „boen njoensoe” èn ala sani di abi foe doe nanga en. Den sma di e tan krosbé foe Gado organisaatsi, abi na ondrofeni dati aksi nanga sani di de moeilek foe froestan, te ten e psa alaten e kon na krin. Èn fa a pasi e meki wi ati waran èn e gi wi satisfaksi o moro na leti e skijn moro krin! A de soleki Petrus ben tjari en kon ondro wortoe di son wan foe den discipel foe Jezus ben naki foetoe na a leri foe Jezus: „Masra, na soema wi sa go? Joe abi wortoe foe tego libi” (Joh. 6:68). Na masra Jezus Kristus abi den „wortoe” dati te now ete, èn a de meki a kon na den sma nanga jepi foe na wán „getrow èn koni srafoe”-organisatie, di a de gebroiki now na gronatpoe. A de leki na „boen bon” di, fa Jezus ben taki, e meki „toemsi boen froktoe” (Matt. 7:17). Na wán enkri tra sé di de opo gi sma, de foe moksi densrefi nanga a politiek „wilde meti” foe Satan èn „Babylon na Bigiwan”, na grontapoe-makti foe falsi bribi (Openb. 13:1; 17:5). Nowan enkri kristen di ben gi ensrefi abra ben sa wani drai go baka na dati! — 2 Petr. 2:22; Joh. 14:6.
20. (a) Foe san-ede wi kan abi moro froetrow leki oiti wanten ini „na leti di ben opo kon”? (b) Sortoe kolokoe froewakti ini a ten di e kon de na a fesi foe ala sma di ben teki a pasi foe a leti di e kon moro krin?
20 Ja, „leti ben opo kon gi na regtvaardikiwan” (Ps. 97:11). Odo 4:18 e kon troe foe di na pasi „foe den regtvaardikiwan” de leki wan leti di e skijn moro krin. Efoe son tron wantoe kenki moe tjari kon, dan disi e tjari wan moro betre positie kon. A kisi foe wan moro soifri froestan no de foe soso. Now di Jezus e tiri, dan na leti di Jehovah pipel e prisiri na ini, de leki „na mamanten leti, te a son e go skijn” (2 Sam. 23:3, 4; Matt. 25:31). Fa a de wan grani gi ala den sma di e doe dienst loyaal nanga na „getrow èn koni srafoe”-organisatie, na communicatie-kanari foe Jehovah di wi si nanga ai! Den ben teki wan boen sé, bikasi na pasi foe den tjari den go na a diri marki foe tego libi ini na njoen ordening di Jehovah e meki. — Jes. 65:17, 18; 66:22.
[Faki na tapoe bladzijde 108]
Nanga jepi foe stoeka èn ondrofeni, meki dati Jehovah dienstknekti abi now a joisti balans loekoe tapoe den punt disi:
Dati a poti reti foe Jehovah nen de moro prenspari leki a ferloesoe foe libisma.
Dati a sori foe faja ini a gi foe kotoigi èn a kweki foe den froktoe foe na jeje de prenspari a srefi.
Dati na saka foe wan kristen na den grontapoe makti ondro de wan relatieve onderworpenheid
[Prenki na tapoe bladzijde 104 di e tjari sani kon na krin]
(Loekoe a tijdschrift)
Séri skoinsi tegen a winti