„San e tapoe mi foe teki dopoe?”
1. Den ben seni Filippus go na sortoe sma?
NA AKSI di de dja na tapoesé wan man ben aksi en, di ben abi frede nanga lobi gi Gado kaba, ma di ben kisi djonsro wan moro krin froestan foe na „boen njoensoe foe Kristus”. Na man di wi e taki foe en, ben de a Ethiopia eunuch di ben go na „Jeruzalem leki wan djoe proseliet, foe anbegi”. Di a ben de a pasi baka e go na Ethiopia foe go doe baka en wroko ini na hé positsi di a ben abi na a oso foe na koningin foe Ethiopia, na evangelie-prékimen Filippus ondro na tiri foe a jeje foe Gado ben go na en.
2. Fa Filippus ben jepi na eunuch foe froestan na profétitori?
2 Aladi Filippus ben e waka esi na sé na wagi, a ben jere na man e lési tranga foe na boekoe foe Jesaja. Di a ben aksi na Ethiopia eunuch ofoe a ben froestan san a pisi foe a tekst di a ben lési wani taki foe wan lam di no ben feti aladi a ben tjari go srakti, na eunuch ben moe piki, dati a no ben froestan ofoe na proféti ben e taki foe ensrefi ofoe foe wan tra sma. Ma disi ben de wan moi okasi gi Filippus! „Foe bigin na a tekst disi a ben meki na boen njoensoe foe Jezus bekenti na en.” Ja, na proféti-tori foe Jesaja ben e go foe a „Lam foe Gado, di e tjari a sondoe foe na grontapoe gwe”! — Tori foe den Apostel 8:26-35; Jesaja 53:7, 8; Johannes 1:29.
3. Sortoe krakti na njoen froestan foe sani ben abi tapoe en?
3 Sortoe krakti na onfroewakti sani disi ben abi ini na libi foe na eunuch? „Aladi den ben e go moro fara tapoe a pasi, den ben kon a wan séker watra, èn na eunuch ben taki: ’Loekoe! Dja watra de san e tapoe mi foe teki dopoe?’” Filippus ben si ini a fasi foe libi foe a man disi èn ini a froestan di a ben abi foe den prakseri foe Gado — spesroetoe soleki disi ben abi now foe doe nanga Jezus leki na Messias èn Ferloesoeman — nowan sani di ben sa moe poti en dopoe tapoe wan tra ten. Den ben stop a wagi; makandra den go ini na watra èn Filippus ben dopoe en tapoe a gron foe na teki di a ben teki Jezus srakti ofrandi foe kisi pardon foe sondoe. — Tori toe den Apostel 8:36-39.
Fa a de nanga joe?
4. Omeni sma di de nanga Jehovah Kotoigi, ben doe na stap foe na dopoe?
4 Now joe abi na a heri grontapoe sma di de nanga Jehovah Kotoigi, ma di no dopoe ete leki wan agersi fasi foe a gi di den gi densrefi abra na Jehovah Gado. Na hé marki na a heri grontapoe ini na nomroe foe den sma di ini 1981 ben abi wan prati na a préki foe na „boen njoensoe”, ben de 2.361.896 (di 25 procent no dopoe ete). Ma ini na srefi jari dati na a heri grontapoe 5.987.893 sma ben konmakandra foe de na a Avondmaal foe Masra. Disi wani taki dati moro leki afoe foe den sma di wawan tron e go na wan konmakandra foe Jehovah Kotoigi, no dopoe ete. Disi de wan réde foe ongorostoe? Nono, ma a de wel wan réde foe a sori foe lobi sorgoe. Sonwan foe den no de moro leki wantoe moen nanga Jehovah Kotoigi.
5. Fa na Ethiopia eunuch de wan boen eksempre gi den sma di no teki dopoe ete?
5 Respeki lésiman, kande joe de wan foe den sma di no teki dopoe ete. Kande joe abi wan boen réde foe san-ede meki joe no teki dopoe ete, ma efoe a no de so, dan wi e kari joe foe loekoe soifri èn ondro begi na eksempre foe na Ethiopia eunuch, di sondro drai-drai ben wani teki dopoe. Baka di na man disi ben ondrosoekoe en égi froestan nanga ati, a ben aksi Filippus ofoe sani ben de di ben e tapoe en foe kisi dopoe. Foedi réde no ben de foe poti wan tra ten, a ben kisi dopoe wantron-wantron.
6. Sortoe stap den sma moe teki di e prakseri dati den abi moro ten fanowdoe ete?
6 Kande joe no teki dopoe ete, foedi, baka wan opregti ondrosoekoe, joe ben kon na a bosroiti, dati joe no abi gewoon nofo froestan foe a Wortoe foe Gado foe kan gi joesrefi nanga joe heri ati abra na Jehovah. Foe kan doe disi sondro wan kondisi, joe sa wani foe leri sabi Jehovah nanga en prakseri. Dati na wan sani foe prijse, èn wi e gi joe tranga foe tan go boen na fesi ini joe studi, aladi joe e hori na prakseri dati ibri dé sondro foe joe si a ten e lon gwe. Gebroiki so boen leki joe kan den okasi foe joe foe stoeka na bijbel joesrefi èn nanga Jehovah Kotoigi (2 Timotéus 3:16, 17). Meki a de wan gwenti foe de alaten na den kristen konmakandra, pe joe sa kisi toemsi prenspari leri èn pe joe sa abi na fanowdoe demakandra nanga kompe-kristen èn kisi dekati foe den (Hebreër 10:24, 25). Te joe e go nanga faja na fesi ini na toemi moi gwenti disi, dan a sa de séker wan afersi foe soso wantoe moen, bifo joe de klari foe agersi na gi di joe gi joesrefi abra nanga jepi foe a dopoe ini watra. Wi hemel Tata e kari wi foe kon ini na spesroetoe matifasi disi nanga en.
7. (a) Fa son sma di e poti a dopoe go na wan tra ten ben kan prakseri? (b) Fa Jezus ben sori dati disi de kefarlek?
7 Kande joe de wan sma di difrenti jari baka makandra kaba joe e go na den konmakandra foe Jehovah Kotoigi, ma joe no ben teki a bosroiti ete foe doe den stap foe gi joesrefi abra èn teki dopoe. Ma te joe e ondrosoekoe den kibri prakseri foe joe ati, dan ben sa kan kon na krin, dati joe e draidrai, foedi joe e froestan dati a libi foe wan kristelek libifasi ben sa skotoe joe? Prakseri go èn prakseri kon na joesrefi, dati solanga joe no teki dopoe ete, den skotoe disi no tai joe èn joe abi wan séker „fri”, solanga na owroe seti de ete foe doe degedege sani ini na howpoe, dati joe sa kan wakti te na a laatsti minuut foe teki na sé foe na troe anbegi? So wan prakseri kan de kefarlek, ja, troetroe wan rampoe! Jezus ben taki: „Poti prakseri na joesrefi, dati joe ati noiti kon hebi nanga njan toemsi pasa marki èn dringi toemsi pasa marki èn sorgoe foe a libi, èn a dé dati kon wantronwantron leki wan trapoe, ini wan momenti tapoe joe.” — Lukas 21:34, 35; 1 Korinte 15:33, 34; Romeini 13:11-14.
8. Fa wi moe si na lobi kari foe Jehovah foe gi wisrefi abra na en?
8 Efoe joe ben sa wakti toemsi langa nanga na teki foe na lobi kari foe Jehovah foe kon ini na boen-ati foe en, foedi joe moe gi joe libi na en abra, dan na boen ten di Gado e kari sma ete foe doe a stap disi, ben sa kon na wan kaba (2 Korinte 6:1, 2; Hebreër 12:25). No drai-drai soboen foe doe moeiti foe kisi na presenti foe a libi èn gebroiki disi nanga tangi. No drai loekoe na baka nanga lostoe na den moi sani foe na seti disi, di sa go na ondro djonsro. Teki na lobi foe Gado tapoe wan boen fasi, aladi joe de ete ini na okasi. Aladi a de loekoe boen, soema a de teki ini a krosbé matifasi nanga en èn a de poti skotoe foe san kan doe èn no kan doe, tog, o moro joe e leri sabi Jehovah moro boen, joe o go froestan moro boen dati san a de doe èn e aksi, de alaten a moro boen sani gi joe. A no wani foefoeroe joe foe wan sani di de troetroe boen ofoe san sa gi joe kolokoe foe alaten (Psalm 145:16, 19). Wan respeki manpikin di e gi jesi e feni dati a de wan sani foe ensrefi foe de pe en grontapoe tata de èn kisi leri foe en. O moro foeroe joe moe abi a fasi disi gi joe lobi hemel Tata! — Johannes 14:23.
9. Fa wi moe kakafoetoe gi persoonlek problema?
9 Efoe joe e stré wan troetroe stré foe dwengi wan ofoe tra skin lostoe èn joe e doe moeiti troetroe nanga joe heri ati èn ala joe krakti foe wini na lostoe disi, dan a no de foe taki dati joe kan de séker dati Gado sa jepi joe foe wini — no nanga jepi foe wan wondroe, sodati a problema e teki poeroe a pasi, ma a sa meki joe man foe tjari den fanowdoe froktoe foe na jeje kon ini joe libi. Ooktoe joe sa feni ini a gemeente froestan di den sa froestan joe èn joe sa kisi jepi te joe go soekoe rai na den owroeman. Den de drape leki a sani di Gado seti foe jepi joe. — Galacia 5:22-24; Efese 4:11-15.
10, 11. (a) Sortoe toemsi moi eksempre na waktiman foe strafoeman na Filippi nanga en oso-famiri ben gi? (b) Foe „kon kisi ferloesoe”, moro ben de fanowdoe dan soso poti bribi ini Jezus?
10 Foe datede no poti wan tra ten foe doe na sani di joe sabi dati a moe doe foe prisiri Gado. Waka baka na toemsi moi eksempre foe na waktiman foe strafoeman na Filippi, di ben aksi Paulus nanga Silas: „Oen man, san mi moe doe foe kisi ferloesoe?” Di a ben kisi foe jere: „Bribi ini Masra Jezus èn joe sa kisi ferloesoe”, a tori e ferteri wi dati „en nanga ala den sma foe en, nowan sma ben poeroe na ini, ben dopoe sondro drai-drai”.
11 Aladi wan gronseki di Gado ben seki kon ben meki na a bigin dati na waktiman disi foe strafoeman ben kisi frede foe Gado, wi no moe froewakti ini disi ten dati Gado o seki oenoe kon wiki tapoe so wan aparti fasi foe meki wi kon na wi froestan èn meki wi libi na drai-drai disi foe wi. Ini a tori foe a man disi nanga en osofamiri, den no ben kon ini wan toestand foe ferloesoe nanga soso wan algemeen poti foe bribi ini Jezus. Ooktoe den no ben meki wan aladé kroederi foe libi wan kristelek libi. Nono, bikasi a tori e taki, dati Paulus èn Silas „ben taki a wortoe foe Jehovah gi en èn gi ala sma di ben de ini en oso”. Disi ben wani taki, dati den ben moe leri sabi Jehovah nofo, foe kisi pardon foe den sondoe di den ben doe ini a ten di psa. A de troe dati ini a tori foe den, disi ben psa ini wan boen sjatoe ten, ini soso wán dé. Dan den ben gi densrefi abra na a Soeverein Masra foe na universum, Jehovah Gado èn den ben dopoe leki wan agersi fasi foe disi. Ja, na waktiman foe strafoeman „ben prisiri toemsi nanga en heri osofamiri, now di a ben tron wan bribiman ini Gado”. — Tori foe den Apostel 16:25-34.
12. Wan sma moe drai nanga en dopoe foedi a no froestan son punt ete?
12 Kande joe e draidrai, foedi alaten wan séker degedege de ete ofoe bepaalde aksi di joe no ben kisi wan piki na tapoe. Ma efoe wan ofoe tra technisch punt foe wan leri no loesoe, dan moro foeroe réde de foe soekoe na piki ini a Wortoe foe Gado, aladi joe e tan begi sondro foe weri na Gado ofoe a kan gi joe a krakti foe si sani krin. A sa doe disi, te joe poti froetrow krinkrin tapoe en. A no sa poti nowan „ston” ofoe „sneki” ini joe anoe di joe langa (Mattéus 7:7-11). Dati joe no e froestan son sani krinkrin, no ben sa de wan pardon, dati joe no ben gi joe libi na en abra. Wan kristen e tan kisi moro sabi foe Gado nanga en prakseri. — Filippi 1:9-11; Hebreër 6:1-3.
13. (a) San wi e èrkèn foe jongoe pikin di de na wi mindri? (b) Oten wan sma di de jongoe ini jari moe dopoe?
13 Èn te foe kaba joe abi den sma di e denki kande dati den jongoe toemsi foe kan gi densrefi abra nanga froestan. Gi foeroe sma disi kande de so ooktoe, foedi doesoen-doesoen jongoe pikin de nanga Jehovah Kotoigi — èn disi de wan sani foe prisiri gi wi (Mattéus 19:13-15). Aladi den e gro kon bigi teleki den tron lepi nofo na a sé foe skin nanga froestan foe den teki krinkrin na frantwortoe foe gi densrefi abra nanga dopoe a den tapoe, wi kan abi na froetrow dati Gado e si den sortoe pikin disi leki „santa” solanga den e teki na tiri boen èn e gi jesi na papa nanga mama di de ini bribi (1 Korinte 7:14). Ma a ten no e tan tiri. Efoe joe ben teki boen na fasi di joe papa nanga mama ben kweki joe ini „a tranga leri èn rai foe Jehovah” èn joe ben poti joesrefi tapoe na kisi foe sabi, na oso èn ini na gemeente, na ten kon now dan foe gi joesrefi abra na Jehovah? Efoe dati de so, dan wi e gi joe na tranga, baka te joe taki disi nanga joe papa nanga mama èn den owroeman ini na gemeente, foe doe akroederi joe bosroiti foe gi joe libi abra na Jehovah èn meki den dopoe joe. — Efese 6:1-4; 2 Timotéus 1:5-7.
Dini pe Jehovah e poti joe
14. Sortoe sani tapoe a tori foe a „koti” foe salfoewan wi moe loekoe now?
14 Howpoe de, now di den e dopoe joe, dati Gado sa kari joe foe de wan pisi foe na bruid foe Kristus? A no de foe taki, na Gado de a kroetoeman, no libisma. Wan sma firi nanga lostoe, soleki den ben poti disi kande go ini en di a ben de ini wan ofoe tra sekte foe na Kristenheid, no moe abi krakti tapoe en (Romeini 8:23-30; 9:16). A de prenspari foe hori ini prakseri dati na „koti” foe den salfoewan e doro esesi en kaba. (Teki gersi Mattéus 13:36-43). Tina-négi-hondro jari langa soso wán kari ben de, na di foe hemel, aladi Jehovah ben wroko fini foe piki den sma di ben sa wroko nanga en Manpikin foe de na Kownoekondre-tiri. Foeroe sma ben sa kisi kari, ma soso wan diri pikin groepoe ben sa teki poeroe (Mattéus 22:2, 14). Baka wan pisi ten na beperkte nomroe foe 144.000 ben sa doro en marki. Baka dati, dan sma no ben sa kisi salfoe moro foe santa jeje leki wan kotoigi dati den abi na hemel howpoe, efoe, èn disi no ben sa psa foeroe tron, na ontrow foe wan foe den „sma di ben ferkisi” èn di fika no e meki a de fanowdoe foe poti wan tra sma ini en presi. — Romeini 8:16; 11:19; Openbaring 7:1-8; 14:1-5.
15, 16. (a) San gersi dati a de krin tapoe a tori foe na kaba foe na hemel howpoe èn a tjari konmakandra foe na „bigi ipi”? (b) San gersi de logisch ini na lati joeroe disi, foe go ini na presi foe wán foe den? (c) Fa wi moe si ibri persoonlek reti di wan sma taki dati a abi tapoe na hemel kari?
15 Efoe wi e loekoe fa Jehovah ben handri nanga en pipel ini na ten foe „koti”, dan a gersi dati a de krin dati na algemene kari ben kon na wan kaba na wan pisi ten foe 1935, di na pipel foe Gado ben kisi na joisti froestan, dati a „bigi ipi” foe Openbaring 7:9-17 abi wan grontapoe howpoe. Soleki Openbaring 7:3, 4 e sori, dan wan kriboi „poti foe wan ségelmarki” ben sa feni presi foe den wan foe na jeje Israël di ben tan abra. Ma ini na pisi ten disi, leti bifo na „bigi benawtoe”, dan wan „bigi ipi” di nomroe no ben skotoe ben sa kon sori ensrefi. Den ben sa tan hori den natuurlek howpoe tapoe grontapoe libi, foedi den no e kon „njoen gebore baka” nanga hemel libi a den fesi. — Psalm 115:16; Johannes 3:1-8.
16 Dati na kans de ini a lati joeroe disi foe de wan sma di „kon njoen gebore” foe teki na presi foe wan salfoewan di fadon komoto a bribi, a foe froestan, dati boen pikinso foe den salfoewan disi sa libi na hemel kari foe den foedi den no de getrow. Na nomroe foe den ini disi ten kon pikin èn kon tron wantoe doesoen foedi den dede. Efoe a de fanowdoe foe poti wan sma ini a presi foe wan foe den, dan soema Jehovah sa kari dan? Jezus ben taki foe den sma di ben kisi na kari foe tron en apostel: „Oenoe ben de den sma di ben tan na mi alaten ini mi tesi” (Lukas 22:28). A de foe datede soso wan logisch sani dati Jehovah ben sa teki wan sma di de kaba foeroe jari nanga a pipel foe Gado, èn di ben sori horidoro nanga loyaliteit, na presi foe a teki wan sma di no langa psa kaba ben tron wan discipel foe Kristus di dopoe èn di kande no ben kisi tesi na foeroe fasi. Disi wi no e taki dogmatisch ofoe foe gi wan gron foe kan kroetoe na reti di wan sma taki a abi tapoe na hemel kari, ma foe jepi sma di de njoen nanga wi foe komoto na a pasi foe tjari densrerfi asranti èn foe de séker foe na fasi fa Jehovah e handri nanga den.
17. Sortoe matitasi e bigin nanga a gi di wan sma e gi ensrefi abra èn dopoe, èn disi e tjari sortoe paiman kon?
17 Na matifasi foe wi gi Gado, wansi wi de foe na „pikin ipi” foe kownoekondre-erfgenaan ofoe wi abi na toemsi bigi howpoe foe libi foe tego ini volmaakti fasi èn kolokoe na grontapoe, e bigin foedi wi e kon ini a boen-ati foe wi Tata, Jehovah (Lukas 12:32). Èn fa wi e kisi wan boen positsi na fesi foe Gado? Te wi teki sabi ini wi, poti bribi ini Kristus srakti-ofrandi, abi beraw foe wi fosten libifasi ini na grontapoe, drai wisrefi positief foe doe a wani foe Gado, gi wi libi abra na Jehovah èn foe agersi na gi di wi gi wisrefi abra nanga na teki foe dopoe. Te wi e hori tranga na a diri matifasi, di wi ben kon tanapoe nanga Gado, dan a de getrow foedi a sa pai wi nanga tego libi, wan toemsi diri goedoe, ofoe wi sa kisi now libi ini hemel ofoe ini a kontren foe na Kownoekondre dja na grontapoe. — Hebreër 11:6; Romeini 6:23.
18. Na sortoe fasi wan „marki”-wroko e go doro now, èn fa aparti sma e sori dati den ben kisi wan „marki” foe kisi ferloesoe?
18 Ini a ten di de krosbé na wi fesi wan kaba sa kon na a prati foe den „skapoe” èn den „bokoboko”. Te Gado e tjari na „bigi benawtoe”, foe figi den poeroe „di no sabi Gado èn . . . den di no e gi jesi na a boen njoensoe foe wi Masra Jezus”, dan nowan sma sa tan a baka tapoe neutraal gron (Mattéus 25:31-46; 2 Thessalonika 1:6-9). Soso den sma di kisi na „marki” foe ferloesoe sa tan na libi èn go ini Gado njoen seti foe sani (Openbaring 7:3, 4, 9, 14; Ezechiël 9:2-6). O kolokoe den sma sa de di ben meki den „marki” den na so fasi foe tan na libi, foedi den, leki sma di ben gi densrefi abra èn ben agersi disi nanga a dopoe ini watra, ben kon ini wan boen matifasi nanga Jehovah Gado, èn e tan waka ini getrow fasi tapoe a smara pasi di e tjari joe go na libi! — Mattéus; 7:13, 14.
JOE KAN PIKI DEN AKSI DI E KON NOW LEKI WAN LOEKOE BAKA FOE SAN WI BEN LERI?
□ Fa na Ethiopia eunuch ben gi wan eksempre foedi a meki den dopoe en?
□ Foe san-ede wan sma sondro foe drai moe poti den moi sani foe a seti disi a wan sé foe teki na lobi kari foe Jehovah?
□ Fa froetrow ini Jehovah sa jepi wan sma te alaten ete wan séker degedege ofoe te séker aksi di a no kisi piki a tapoe de?
□ Fa jongoe sma moe si a gi di wan sma e gi ensrefi abra èn dopoe?
□ Soema, te joe loekoe en logisch, Jehovah ben sa teki te wan tra sma ben moe kon ini a presi foe wan jeje Israëlsma?