Jehovah dekati legre foe foeroe-ten-fetiman
„(De) wan boen wan sroedati foe Kristus Jezus. Ini na legre no wan sroedati e go moksi ensrefi nanga a libi foe wan borgroe, foe di a moe de klari gi na sma di ben teki en a wroko.” — 2 Timoteus 2:3, 4, Na Jeruzalem bijbel.
1, 2. Sortoe kari foe prékiman ben kon hondro jari pasa kaba èn nanga sortoe bakapisi?
„WI WANI DOESOEN PRÉKIMAN”. Na edeprakseri disi ben kon so wan hondro jari pasa kaba ini wan boekoe, ma na ongewoon aksi disi no ben de wan pisi foe wan advertentie ini wan koranti ini na rubriek „Wi wani”. Boiti dati, den sma di ben teki na kari disi ben pasa na froewakti foe den uitgevers. Soema ben gi na kari disi, èn soema ben teki en? Èn fa ini disi ten joe de ini na tori disi toe?
2 A ben de ini a di foe toe jari foe na tijdschrift di soema sabi now na a heri grontapoe leki Na Wachttoren ini wan foe den nomroe foe en dati na faja kari foe prékiman ben kon. Ma nanga jepi foe na kari disi, den no ben soekoe kerki fesiman di ben sa préki foe den kerki-kansel. Na bijbel e gi wan tra loekoe foe den sma di ben sa doe dienst leki prékiman foe Gado boskopoe. Nono, den uitgevers foe Na Wachttoren ben e soekoe ini 1881 na sma di ben de klari foe „go na bigi èn pikin foto leki colporteur ofoe evangelium-prékiman”. Na kari ben de gi den sma di ben man foe gi ala den ten na a préki foe na waarheid foe na bijbel. Den sma di ben gi jesi na a kari disi, ben bigin foe wroko leki wan pikin groepoe, wantoe dja èn wantoe drape, te leki ini 1885 den ben doro na nomroe foe 300. Ma a nomroe foe den now kon tron doesoen-doesoen, ja tin-doesoen-doesoen, srefi te doro na gemiddelde foe 151.180 ini na jari 1981.
3. Sortoe tra nen e gebroiki now gi den sortoe prékiman disi?
3 Jehovah Kotoigi no e kari den foeroe-ten-prékiman disi moro langa „colporteur”, wan Fransi wortoe pe krakti e poti tapoe soso wán pisi foe a wroko foe den, na panja foe bijbel èn tra boekoe foe bijbeltori. Na wroko disi de soso wan pisi foe na moro prenspari wroko foe den. Wan tra wortoe de, di e tjari moro boen kon na fesi na wroko foe na jeje legre disi foe evangelium-prékiman, di e tjari na „boen njoensoe” (2 Tim. 2:3, 4; Luk. 8:1; 10:1). Na wortoe disi na „pionier”.
Pionier-fetiman ini wan jeje legre
4. San na a background èn san a wortoe „pionier” wani taki?
4 Foe san ede „pionier” de wan wortoe di fiti gi Jehovah Kotoigi di kan de foeroe-ten-prékiman? A wroko na a bigin ben abi foe doe nanga sroedati-wroko èn wan sroedati, aladi a no ben de wan gewoon sroedati di e waka nanga foetoe, ofoe fa den e kari en wan infanterist. A ben abi foe doe nanga wan koni sroedati, wan sma di ben go a fesi a troetroe legre èn di ben bow broiki, pasi nanga ondrogron olo foe waka. „Pionier” ben wani taki foe datede foe sreka ofoe opo na pasi, èn wan „pionier” ben de wan sma di ben e teki fesi, di wansi wan bigi makti of gens de o opo wan wroko, soleki den fosten kolonist na Westsé Amerkankondre. A wortoe e meki wi prakseri na wan sma di no e frede, wan sma di e hari go na fesi te leki a doro en marki. Fa disi de wan fasi di e taki moi foe den sma di e gi ala den ten foe doe dienst leki „sroedati” foe Kristus di e offer ala den ten foe den!
5. Foe san ede wi kan kari kristensma „sroedati” (Fil. 2:25).
5 Ala troe kristen wi kan teki gersi nanga sroedati di de ini wan jeje feti (1 Tim. 6:12; 2 Tim. 4:7; Jud. 3). Wi abi wan gemeenschappelijk feanti di abi na pori foe wi na prakseri — Satan. A tjari ala en ogri-jejekrakti di wi no kan si kon makandra, nanga en ogri seti foe sani di wi kan si, ini wan boen bigi legre foe gens den troe discipel foe Kristus. Tokoe so wan 2 miljoen 300 doesoen kristen ini na heri grontapoe e gi jesi na komando di komoto foe santa jeje: „Kakafoetoe gi (na Didibri), faste ini bribi” (1 Petr. 5:9). Disi de Jehovah Kotoigi, di, aladi den de swaki èn no de noti, abi . . . winimarki ini na jeje feti nanga na bigi feanti foe den. — Jak. 4:7, 8, 10.
6. Fa na wortoe „sroedati” de moro fara ete wan boen nen foe kari wan kristen?
6 Wan sroedati di feti e denki soso na a stré di a moe stré. A no kan gi pasa dati sani di no de prenspari kori en. Na apostel Paulus ben taki gi wan moro jongoe kristen kompe, Timotéus: „Teki tjari joe pisi foe den lai, leki wan boen sroedati foe Kristus Jezus. Wan sroedati ini actieve dienst no e bemoei nanga afersi foe na libi foe wan borgroe, efoe pikinso a wani plisi den sma di de na en tapoe” (2 Tim. 2:3, 4, Willibrordvertaling). Paulus nanga Timotéus, a no foe taki, no ben de sroedati, di ben e feti gi wan ofoe tra naatsi ofoe wan grontapoe kondre. Ini W.E. Vine’s An Expository Dictionary of the New Testament (wan verklarend wortoeboekoe foe a njoen Testament) e taki dati „sroedati” dja tapoe wan overdrachtelijk fasi abi foe doe nanga „wan sma di e psa moelijkheid gi na afersi foe Kristus”.
7. Sortoe wroko pionier ini na kristen legre foe jeje fetiman ben doe?
7 Na mindri den miljoen-miljoen boenede kristen fetiman disi, joe abi wan groepoe di de na fesi, den foeroe-ten-bedinari. Foeroe foe den ben pionier troetroe ini na fasi disi, dati den ben go na fesi foe na bigi groepoe èn ben opo na pasi. Foeroetron pionier ben go na kontren pe noiti ete na boen njoensoe foe na Kownoekondre di ben opo ben préki. Son pionierzendeling ben go na vreemde kondre, pe den ben moe leri eigenaardig gwenti nanga moeiliki tongo èn pe den ben moe kakafoetoe gi ongemak, siki èn ogrijeje bribi. Den ben wini ala den moeilijkheid disi, aladi nanga jeje fetisani den meki ros èn ben meki „briki-ede” di ben gro kon tron krakti gemeente. Den ben opo na pasi go na kontren, pe now wantoe jari na baka, wan heri legre foe kristen fetiman e préki Kristus boskopoe foe jeje ferloesoe. — Jes. 60:22.
8. Sortoe winimarki a abi dati a jeje legre disi abi friwanisma? (Recht. 7:3).
8 A jari di pasa ibri moen gemiddeld joe ben abi 151.180 foe den foeroeten-fetiman disi ini na gron na a heri grontapoe. Alamala de friwanisma èn joeroesma no de a den mindri (Ps. 110:3). Dati fiti, bikasi sroedati di den poti ini wan legre sondro den wani ofoe di e doe dienst foe wini ede, e sori dati ini a moro faja pisi foe a feti foeroetron no man teki besroiti. Den e lasi ati ofoe libi na feti ofoe go abra na a feanti. Ma foe san ede den pionier, leki friwani-sma, sondro paiman di joe kan hori nanga joe anoe, ben sa gi ala den ten na a dienst foe Gado, ala di miljoen-miljoen kristen di frede Gado no e doe disi? Disi wani taki dati den e pionier, foe di den e froewakti ini na ten di e kon wan moro bigi paiman leki den sma di tapoe na gron foe den omstandigheden kan gi soso so wan 10, 20, ofoe 30 joeroe ini wan moen ini na diniwroko? Nono, opregti pionier e span densrefi na so wan fasi leki wan sori foe na dini foe Jehovah Gado nanga den heri ati. Neleki fa a de nanga na geval foe ibri troetroe kristen di gi densrefi abra, na so den wani doe ala sani san de ini den makti foe dini wi Gado di foeroe nanga lobi. Soema kan èn moesoe foe pionier foe datede? A ben sa boen te joe loekoe joe égi situwasi nanga fasi fa joe e si sani.
Teri den kostoe
9. Foe san ede meki dati son kristen no sa kan pionier?
9 Te wan sma e loekoe ofoe a ben sa kan ofoe moe de wan pionier-bedinari, dan a moe loekoe wantoe sani. En persoonlijk omstandigheden ini na libi sa abi krakti tapoe en. Joe abi verprekti di e kon na fesi na foeroe-ten-préki (Deut. 24:5). Na apostel Paulus ben skrifi dati wan kristen di no e sorgoe foe den fanowdoe sani gi en osofamiri, „ben drai baka gi na bribi èn de moro ogri leki wan soema di no de ini bribi” (1 Tim. 5:8). Verprekti foe na osofamiri kan meki dati son sma na a momenti no man foe pionier foe datede. Moro fara, omstandigheden de toe, di abi foe doe nanga wi gosontoe nanga jari. Den disi wi moe teki ini prakseri, ala di foeroe sma de nanga wan takroe gosontoe, sosrefi toe owroesma, e doe wroko leki pionier.
10. Fa pionierwroko e aksi bribi?
10 Sosrefi toe na pionier-sroedati moe abi wan krakti bribi, bikasi a no wan makriki sani foe doe dienst ini na fasi dati. Paulus e tjari so wan bribi nanga a na publiki meki bekenti foe na waarheid foe wan kristen kon makandra te a de skrifi: „Stré na toemsi boen stré foe na bribi, graboe na tego libi stéfi, di den ben kari joe foe en èn na fesi foe foeroe kotoigi ben gi wan toemsi boen publiki bekenti” (1 Tim. 6:12). Ala di ala sma ini Gado legre moe abi bribi, tog wan difrenti de mindri sori foe bribi ini na prékiwroko wawan tron ofoe e doe disi foeroe joeroe ini wan dé. Ma wi kan taki wel, dati te wan sma nofotron de bezig foe taki na waarheid nanga tra sma, disi kan meki en bribi kon moro bigi. — 2 Thess. 1:3.
11. (a) Sortoe ofrandi ala kristen e tjari? (b) Sortoe ekstra ofrandi ben kan aksi foe den sma di e doe pionierwroko?
11 Sosrefi toe na afersi foe a tjari foe ofrandi de. Ini wan seker fasi wi kan si ala dienst di e doe ini soifrifasi èn ini opregti fasi gi Gado, leki na tjari foe wan srakti-ofrandi gi en (Hebr. 13:15). Pionierwroko nanga na joisti bewégi foe ati foe prijse Gado èn foe jepi trawan eskép na katibo foe Satan seti foe sani, de foe datede seker wan toemsi boen ofrandi. Tokoe ini na pionierwroko te wi loekoe en foe wan tra sé, wi kan taki foe a tjari foe wan ofrandi. Ten di wan kristen ben gebroiki wan dé gi moro persoonlek afersi, moe gebroiki gi na prékiwroko nanga na gi foe leri, te a tron pionier. Ten di ben gebroiki fosi foe kisi èn pai sani na skin fasi, kande sa moe skotoe now. Ja, pionierwroko e go makandra nanga na offer foe joesrefi. Doesoen-doesoen pionier de tevrede foe skotoe den okasi foe den na economia èn goedoe sé, sodati den e doe grontapoe wroko wán, toe ofoe kande dri dé ini wan wiki foe abi den fanowdoe sani foe tan na libi, ala di den e abi nofo ten ete foe a diniwroko foe den. — 2 Tim. 2:4.
Doe moro — neleki den nazirésma
12. Foe san ede son sma e pionier, èn fa bepaalde Israëlsma foe owroeten ben man foe doe moro ini na anbegi foe den?
12 Foeroe sma di ben teki na pionierwroko na den tapoe, ben kisi dekati foe na lostoe foe doe moro. Den no wani doe moro leki den kristen brada nanga sisa foe den nanga wan fasi foe stré ofoe hémemre, ma na wan moro bradi fasi den wani sori lobi gi Jehovah nanga den sma di de na den sé (Matt. 22:37-39). Wi abi wan moi bijbel eksempre ini den nazirésma. Israël man nanga oema foe owroeten nanga den friwani ben kan tron nazirésma, wan nen di komoto foe a Hebrew wortoe nazir, di wani taki gi ensrefi abra, de en wawan, poti aparti. Foe tron wan nazirésma, joe ben moe meki wan pramisi, ma wi no moe proberi foe teki disi gersi nanga na besroiti foe wan kristen foe go pionier, bikasi ini disi wan pramisi no de nanga ernstig verprekti di e komoto foe dati. Tokoe ete wi kan leri bepaalde akroederi na mindri den nazirésma èn den pionier.
13, 14. (a) Tjari kon na krin san de wan foe den bepaling di de wan skotoe gi nazirésma? (b) Sortoe akroederi de nanga pioniersma?
13 Wan Israëlsma di ben pristeri ensrefi nanga en fri wani foe doe dienst leki nazirésma, ben teki bepaalde bepaling di ben skotoe en èn di ben tjari kon boen na fesi dati a ben „de en wawan” ofoe „poti aparti” gi na anbegi foe Jehovah. Wán skotoe ben de ini na tori foe njan èn dringi, soleki e kon na krin ini Numeri 6:3, 4. Wan nazirésma no ben abi pasi foe dringi sopi ofoe den dringi foe na droifibon (Ps. 104:15). Aladi wan seker fasi foe no ke foe joesrefi ben de ini na tori, tog a ben de so dati fanowdoe njanjan no ben tapoe. Den bepaling disi di ben skotoe na sma, soboen no ben wani taki dati a sma ben moe njan pina foe na besroiti di a ben teki.
14 Boenede pionier no e bow a libi foe den lontoe goedoe, soleki njanjan ofoe moi goedoe, ma lontoe a dienst foe den leki wan grani gi Gado. Disi de wan prenspari marki foe wan dipi firi foe prisiri di e tan èn di foeroe sma, di te joe loekoe en so na skin fasi abi wan moro betre libi, e djaroesoe foe en (Teki gersi Lukas 12:16-21). Libi wan eenvoudig libi ofoe foe a sé foe goedoe de tevréde nanga moro pikinso, kan tjari winimarki kon toe di makriki wi kan loekoe pasa den. Sabiman foe na gosontoe foe libisma e ferteri foe den foeroe gevaar foe njanjan nanga foeroe fatoe èn dringi. Ma wan pionier di normaal, e gebroiki eenvoudig boen njanjan di de ini balans èn boiti dati e waka foeroe ete ini en oso-a-oso-préki, kande seker sa abi wan moro boen gosontoe. Sma di abi wan bigi oso, den laatste njoen sani di den feni foe masjin nanga elektrik sani, èn foeroe tra goedoe, sabi dati den sani disi e tjari alaten baka moeilijkheid nanga problema. Den akroederi na mindri Numeri 6:3, 4 nanga pionierwroko de seker warti foe wi loekoe den.
15. Sortoe model de ini na skotoe tapoe na tori foe na wiwiri foe wan nazirésma?
15 Na wet di foe toe di ben de leki wan skotoe gi nazirésma ben de dati den no ben mag koti den wiwiri (Num. 6:5). Na langa wiwiri foe den ben de wan marki leki wan kroon pe trawan ben kan herken den. Paulus ben bedoi bakaten dati na langa wiwiri foe wan kristen oema ben de memre en na en situwasi foe saka ensrefi (1 Kor. 11:3-15). Te wi abi na langa wiwiri foe na nazirésma na prakseri, dan wi no kan agri dan dati wan kristen brada nanga sisa di e pristeri ensrefi nanga en fri wani foe doe pionierwroko, na wan bigi fasi moe sori na saka di a saka ensrefi na ondro Jehovah? Foeroe persoonlijk afersi e poti na wan sé ofoe e poti tapoe a presi di foe toe, sodati na diniwroko kan kisi ala en prakseri. Na pionier e leri foe froetrow tapoe Jehovah èn foe saka ensrefi na ondro Gado.
16. San wi kan warderi foe na situwasi foe wan nazirésma tapoe a tori foe wan dede skin?
16 Wan laatste wet gi nazirésma ben de dati den no ben mag fasi wan dede skin, srefi efoe wan krosbé famirman, soleki wan papa ofoe mama mama, ben dede (Num. 6:6, 7). Soboen, wan nazirésma ben moe tan santa èn krin, sondro flaka (Teki gersi Leviticus 21:10, 11). Ini na ten disi den no e tapoe no wan enkri kristen, èn sosrefi toe no wan enkri pionier, foe seti sani foe na beri foe wan krosbé famirman ofoe go na a beri disi. Ma soleki ini na geval foe den nazirésma, pionier moe komoto na a pasi foe ibri doe ofoe fasi foe libi di ben sa tjari aksi kon ini wan sma prakseri èn di ben kan keur den af. Den moe tjari densrefi leki boen eksempre. Èn efoe wan pionier di lobi en famiri de e wroko farawe èn foe dat-ede no man foe fisiti den someni tron leki en ben sa wani, dan a abi na satisfaksi foe sabi dati Jehovah e warderi en offer.
17. Foe san ede na de foe wan nazirésma no ben de soso na hori foe wan kerki gwenti? Fa a de nanga na pionierwroko?
17 Na bijbel e sori dati wan Israëlsma di ben tron wan nazirésma no ben hori na wan ofoe tra kerki gwenti. A ben waka moro foeroe baka wan prenspari fasi foe libi di e gi tevréde fasi, bikasi Gado ben taki foe so wan man leki wan sma di „leki nazirésma ben libi foe Jehovah ede” (Num. 6:2). Na sosrefi toe na pionierwroko de ini disi ten wan fasi foe libi, ja, wan toemsi switi fasi foe libi!
’Mi kan doe pionierwroko?’
18. Sortoe aksi wi moe aksi wi srefi wi alamala? Foe san ede?
18 Ala kristen de ini wan-fasi ini na anbegi foe Gado. Wi de wan spesroetoe legre foe fetiman gi na waarheid. Wi moe abi na lostoe foe doe ala san wi kan doe ini na feti dati. A de troetroe na lostoe foe wi foe doe ala san de ini wi makti. Foe datede meki ibriwan foe wi nanga reti kan aksi na aksi: ’Mi kan doe dienst leki pionier?’ Na tra artikel sa jepi joe te joe o wegi go wegi kon foe si fa Jehovah kan skraki joe te joe man foe teki na pionierdiniwroko na joe tapoe.
JOE BEN KRABOE EN POTI BOEN INI JOE FROESTAN . . .
□ Foe sanede den e kari foeroe-ten-bedinari nanga reti pionier?
□ Foe san ede na bijbel e teki kristen gersi nanga sroedati?
□ Sortoe sani joe moe hori ini prakseri te joe wani tron pionier?
□ Fa nazirésma e gi wan eksempre tapoe na tori foe pionierwroko?
[Prenki na tapoe bladzijde 196]
Foe san-ede na wan fasi di fiti den e teki kristen gersi nanga dekati sroedati?
[Prenki na tapoe bladzijde 198]
Fa na pioniersdienst kan tjari kolokoe nanga wan boen gosontoe kon?