Fa na kownoekondre ’e kon’
1. Foe san ede a no de wan froewondroe sani dati den „laatste dé” foe na heri grontapoe seti foe sani e go doro ini 1982 ete?
OMENI ten de ete bifo na „bigi benawtoe” loesoe kon, wi no sabi. Den „laatste dé” foe na djoe seti foe sani ben abi na ini den den jari 29 te 70 G.T., ala nanga ala 41 jari. Ma now wan moro bigi seti tanapoe a fesi foe a kon foe a kroetoe foe Gado, namkoe na heri grontapoe seti foe na Didibri, di na grontapoe-makti foe falsi bribi, èn spesroetoe na namaak-bribi foe na kristenheid, de na moro fowtoe pisi. Foe dati meki a no de wan froewondroe sani dati den „laatste dé” foe na grontapoe seti foe sani disi de now pikinmoro 68 jari, foe 1914 te 1982. Ala disi ben abi wan sani foe taki. San a wani foe taki?
2. Fa den fosi eeuw kristen ben de wan eksempre gi wi ini disi ten?
2 We now, san den fosi eeuw kristen ben doe ini den „laatste dé” foe na djoe seti foe sani? Den ben préki! Den ben meki sma jere na warskow! Foe datede meki na apostel Paulus ben kan skrifi wantoe tintron jari na baka: „Na howpoe foe na boen njoensoe dati, di oen ben jere . . . ben préki ini na heri mekisani di de ondro hemel.” — Kol. 1:23.
3, 4. Na soema Jehovah jeje ben gi krakti foe gi na disiten kotoigi, èn nanga sortoe bakapisi?
3 Ini na ten disi na gron kon moro bigi èn bradi. A de na grontapoe, na heri grontapoe! Ma agen, ondro na tranga krakti foe Gado jeje, den kristen Kotoigi foe Jehovah ben hari go te na den oekoe foe na grontapoe. Den ben préki na waarheid ini moro leki 160 difrenti tongo. Den ben tjari den sma di gersi skapoe kon makandra foe ala naatsi. We 5.980.000 sma (pikinmoro 6 miljoen) ben de tapoe a Memrefesa foe 1981 foe memre a dede foe Jezus. Leki wan waktiman-klasse na „getrow èn koni srafoe” ben teki fesi ini a meki bekenti foe Jehovah dé foe refrensi èn na a srefi ten foe trowstoe ala sma di e sari (Jes. 21:11, 12; 61:1, 2). Foe taki foe na prékiwroko ini den hondro jari di pasa, dan Jehovah Kotoigi ben panja 460.000.000 (460 miljoen) bijbel nanga boekoe èn 4.767.000.000 (4 miljard 767 miljoen) foe den tijdschrift Na Wachttoren nanga Ontwaakt! Disi no ben de wan toemsi bigi kotoigi gi na nen foe Jehovah èn na kownoekondre?
4 Na préki disi foe na boen njoensoe disi foe na Kownoekondre e doro en hémarki! Ini na heri grontapoe ini wanfasi getrow zendeling, pionier nanga gemeente-prékiman ben doe wan toemsi moi wroko — „no nanga krakti, no nanga tranga, ma nanga mi Jeje” Jehovah foe den legre e taki (Zach. 4:6, NBG). Leki wan bakapisi foe dati, miljoen-miljoen sma ben kon na fesi foe moksi densrefi na a „getrow srafoe” èn den e taki: „Wi wani go nanga oenoe, bikasi wi ben jere dati Gado de nanga oenoe.” — Zach. 8:23.
5. Fa Daniël 2 e agersi na „kon” foe na Kownoekondre?
5 Na soso Gado kownoekondre moe „kon” now ete! Na sortoe fasi a sa kon? We, na a fasi di na proféti Daniël e skrifi ini en profétitori! Dja na Messias kownoekondre e agersi nanga wan „ston” di ben koti poeroe foe wan agersi „bergi” foe Jehovah soevereiniteit foe omeni eeuw. Leki wan projectiel na ston disi e fré, ja, „e kon” foe naki na seti foe regeri di libisma meki trowe na gron èn masi en tron poeiri. Dan na kownoekondre-„ston” srefi e tron wan „bergi” di e foeroe na grontapoe, ala sani foe gi Jehovah grani èn glori. — Dan. 2:34, 35, 44, 45.
Pori na „hoeroe”
6. (a) Foe sainde a no moe froewondroe wi dati Jehovah sa gebroiki radicale libisma wrokosani foe tjari na kroetoe? (b) Sortoe disi ten model Jeruzalem abi, èn foe sortoe marki a de ook toe wan pisi?
6 Ma wantoe sani e waka a fesi foe na uiteindelijke masi foe libisma tirimakti na grontapoe. Na proféti boekoe Openbaring e meki wi si dati Jehovah sa gebroiki radicale makti ini den Verenigde Naatsi leki wan smeti-ambra di e pori sani. Disi no moe froewondroe wi, bikasi ini owroeten Jehovah ben gebroiki na grontapoemakti Babylon leki „na smeti-ambra foe na heri grontapoe” di a ben tjari en kroetoe kon tapoe den naatsi, spesroetoe tapoe na Jeruzalem di ben fadon komoto foe bribi (Jer. 50:23). Na Jeruzalem foe owroeten abi ini disi ten wan model ini na georganiseerde religie foe na kristenheid. Den disi e tan dati den e anbegi na Gado foe na bijbel, ma na presi foe dati a ben meki ensrefi tron wan pisi foe na grontapoe makti foe falsi bribi. Na profétitori e meki wi sabi na makti dati leki „Babylon na Bigiwan, na mama foe den hoeroe èn foe „den tegoe sani foe grontapoe”. — Openb. 17:5.
7. (a) Sortoe besroiti na falsi bribi ben teki? (b) Fa den takiman foe den e sori ini san den howpoe de? (c) Akroederi na Bijbel, san de na howpoe gi libisma?
7 Na grontapoe-makti dati foe falsi bribi ben teki en besroiti. A ben trowe Gado kownoekondre ini anoe foe na Messias foe na boen foe kownoekondre di libisma ben meki. Ini na ten disi den kerki fesiman foe den bribi foe na kristenheid e gi nanga den heri ati jepi na den Verenigde Naatsi. Akroederi den wortoe foe wan djoe rabbijn dan den Verenigde Naatsi „de na wan enkri howpoe foe vréde di e tan ini wan grontapoe di e anga foe dati foe tan na libi.” Èn paus Johannes Paulus II e skrifi foe na organisaatsi dati leki „na moro hé forum foe vréde èn geregtigheid”. Ma den Verenigde Naatsi ben tjari vréde nanga geregtigheid kon na wi grontapoe? Den Verenigde Naatsi de troetroe na „wan enkri howpoe” gi na libisma famiri? Ofoe a de Gado kownoekondre di de na howpoe dati? Ja, na howpoe dati de krinkrin tapoe na „kon” foe Gado kownoekondre ini anoe foe na Messias! — Matt. 12:18, 21.
8. Sortoe verklari ini na Handvest foe den VN e memre wi na 1 Thessalonika 5:3 èn foe san-ede wi moe abi belangstelling foe disi?
8 Den Verenigde Naatsi e taki ini na handvest foe den dati na prakseri foe den de ini a fosi presi, „foe kibri internationale vréde nanga sekerfasi”. Wi e jere leki Jehovah Kotoigi wan bekenti klank ini den wortoe dati? Ja! Bikasi na apostel Paulus ben taki: „Te den e taki: ’Vréde nanga sekerfasi!’ dan wan wantronwantron pori ini wan momenti sa kon na den tapoe soleki den pen foe wan bere-oema, èn den no sa eskép kwetkweti” (1 Thess. 5:3). Soboen, now di wi e doro na laatste pisi foe den „laatste dé” disi, wi kan froewakti foe jere wan ofoe tra sresroetoe wortoe foe „Vréde nanga sekerfasi!”. Na profétitori e piki wi san sa waka na en baka te na a sé foe den naatsi disi sa de foe jere: ’Ini wan momenti, wantronwantron pori di den no sa eskép!’
9. (a) Sortoe ongolokoe kaba e wakti na falsi bribi? (b) Fa den politiekman èn den bigi handelman si disi, èn foe san ede?
9 Na „lobi-afersi” di no mag, foe den bribi foe na grontapoe nanga den Verenigde Naatsi sa kon ini wan ongolokoe kaba! Ini „wan joeroe” ala sani sa psa gwe! Den 10 toetoe foe na Verenigde-Naatsi-„meti” sa drai go feti nanga Babylon na Bigiwan. Den sroedati, radicale elementi ini na grontapoe organisaatsi dati sa priti en èn pori en, sa poeroe en toemsi moi krosi na en skin èn bron en. Bidrigi politiek man di ben gebroiki na falsi bribi foe tranga na positsi foe den, èn bigi makti handelman di ben gebroiki en leki wan djakti foe smokkel-handel èn tra zaak di e tjari wini kon, sa tanapoe farawe foe kré foe en ede. Den sa kragi: „A wan sari sani, a wan sari sani, joe bigi foto, Babylon, joe tranga foto, bikasi ini wán joeroe so wan bigi goedoe ben pori!” — Openb. 18:10, 17.
Armageddon — èn san e kon baka dati
10. Foe san ede Armageddon sa kon esesi baka dati èn nanga sortoe bakapisi?
10 Den sani di moe pasa sa waka esesi baka makandra te leki na kaba doro. Den srefi politiek toetoe dati di e pori na bigi „hoeroe”, sa drai densrefi go na den Kotoigi foe Jehovah di gersi leki den no kan feti gi densrefi. Ma now a sa kon na krin dati den e fet tegen no wan sma moro leki Jehovah „Kownoe foe den kownoe èn masra foe den masra”. Den sa doro ini Armageddon. Drape Jehovah kownoekondre ini anoe foe na Messias „e kon” foe doe na moro bigi sani foe poti Jehovah soevereiniteit reti èn foe en getrow dienstknekti. Na feti sa de hebi èn wan besroiti sa teki. Wan kaba sa kon na Satan sroedati èn politiek tirimakti na grontapoe èn Satan srefi sa tai èn smési go ini na peti di no abi gron foe doesoen jari „sodati a no kan kori den naatsi moro”. — Openb. 16:14; 17:14; 19:11-21; 20:2, 3.
11. (a) Fa na „kon” foe na kownoekondre sa de leki wan blesi gi na libisma-famiri? (b) Den sma e tjari go na sortoe kondre na a kaba foe den 1000 jari, èn nanga sortoe kolokoe froewakti?
11 Èn san e kon dan? We, dan na doesoen jari kownoekondre sa de! Fa prisiri sa de na mindri den sma di e psa libilibi Armageddon! Fa bigi lobi, prisiri nanga vréde sa panja ensrefi dan tapoe na heri grontapoe! O toemsi bigi na opobaka sa de di sa tjari lobiwan kon makandra foe alape foe grontapoe! Fa na programma foe dresi sma sa gi tranga te Jezus nanga en kompekownoe nanga -priester e gebroiki den safoe winimarki foe en ferloesoe-ofrandi èn sa opo den miljard-miljard sma kon de volmaakti! Èn ala sma di e tjari go abra foe na kondre foe Kristus doesoen jari kownoekondre go na a kondre Jehovah tego soevereiniteit èn den sma di kakafoetoe gi na laatste tesi foe Satan, e wakti na prisiri foe wan prati na den wondroe foe tego libi di sa tjari kon na krin! — Openb. 20:7-9; 21:3, 4.
12. San e meki den wondroe sani disi kan, èn san disi moe bewégi wi foe datede foe doe?
12 Nanga na „kon foe na Kownoekondre ini anoe foe na Messias ala den wondroe sani disi kan. Disi no e bewégi wi ini den laatste dé foe Satan seti foe taki nanga tra sma foe den „bigi wroko foe Gado”, na glori foe en kownoewroko èn na kownoekondre foe na Messias di no e seki? (Ps. 145:11; Tori foe den Apostel 2:11; Hebr. 12:28). A no e bewégi wi foe begi fajafaja na wi hemel Tata: „Joe kownoekondre moe kon”? — Matt. 6:9, 10.
13. Foe sanede wi moe begi nanga wi heri ati foe na kon foe na kownoekondre?
13 Ja, „Kon”, Gado kownoekondre, foe figi poeroe Satan wroko èn organisaatsi foe na grontapoe! Ja, „KON” foe tjari Kristus glori doesoen jari tiri kon, na paradijs foe kon baka, foe opo den dedewan èn opo den miljardmiljard libisma kon de volmaakti! Ja, „KON”, o kownoekondre foe na Messias, foe santa tego alaten na nen foe na Soeverein Masra Jehovah di no abi en speri!
NA KOWNUKONDRE INI GADO PRAKSERI
□ Jehovah proféti ben taki foe en a fesi
□ Na kownoekondre foe David ben de wan agersi fasi foe en
□ Den discipel foe Jezus ben préki en
□ A ben opo ini 1914 ini hemel
□ Sensi 1919 a de préki leki wan kotoigi gi ala naatsi
□ „Na bigi ipi” e tjari now kon makandra foe kisi ferloesoe
□ Na kaba e kon nanga — na bari foe „Vréde nanga seker fasi!” Na pori foe na „Bigi Babylon” Na pori foe den politiek tirimin, legre nanga bakaman di na kownoekondre e meki kon.
□ A kownoekondre e foeroe na grontapoe nanga prisiri, vréde èn prijse gi Jehovah
[Prenki na tapoe bladzijde 179]
Na kownoekondre-”ston” srefi e tron van „bergi” di e foeroe na grontapoe