„Tan wroko na joe égi ferloesoe”
„Tan wroko na joe égi ferloesoe nanga frede èn béfi.” — Fil. 2:12.
1. (a) Soema ofoe san e prijse Jehovah sondro wortoe, èn fa disi kan? (b) Soema moro e kisi na kari foe doe disi?
DEN wroko foe Jehovah e prijse en. „Prijse en, son nanga moenkenki. Prijse en, ala oen stari foe na leti.” Sondro foe abi na powa foe taki, den e taki foe en glori. Den bergi nanga den pikin bergi, den bon nanga den fofoetoe meti, den fowroe nanga den meti di e kroipi e doe disi toe (Ps. 148:3, 9, 10; 19:1-4). Fa na prijse disi kan gi efoe wortoe no e gebroiki? Disi kan, foe di wroko de wan spikri foe na wrokoman. Disi e taki spesroetoe foe den wroko foe Jehovah: „Den égifasi foe en di no kan si nanga ai, de krin foe si foe sensi grontapoe ben meki, foe di den de foe si nanga jepi foe den sani di ben meki, ia, en tégo krakti èn Gadofasi” (Rom. 1:20). Efoe sani di ben meki èn di no abi na powa foe taki moe prijse en, omeni moro den sma di abi na powa foe taki moe doe disi dan! A de foe datede wan sani di fiti toe dati den Psalm 146 te nanga 150 e bigin èn e kon na wan kaba nanga na kari foe sroiti kon na wan ini wan bigi ipi singiman di e bari taki: „Prijse Jah!”
2. Sortoe wroko moe de wan spikri foe wi kristendom?
2 Neleki den wroko foe Jehovah de wan spikri foe en, na so den wroko foe wi de wan spikri foe wi. Den e sori dati wi de sma di e soekoe goedoe ofoe di e prijse Jehovah? Na moro prenspari wroko di kristen moe doe now, de foe libi leki fa Jezus wortoe ben taki: „Na boen njoensoe disi foe na kownoekondre sa préki tapoe na heri grontapoe pe libisma e libi leki wan kotoigi gi ala naatsi, èn dan na kaba sa kon.” En adjosi-wortoe gi en bakaman ben de: „Go foe datede èn meki discipel foe sma foe ala naatsi, èn dopoe den ini na nen foe na Tata èn foe na Manpikin èn foe na santa jeje, èn leri den foe hori ala san mi ben komanderi oenoe” (Matt. 24:14; 28:19, 20). Te wi e ’gi kotoigi finifini foe oso na oso’, dan wi prékiwroko moe de foe wan hé kwaliteit. Na so fasi wi kan teki wan boen positsi na fesi foe den kownoe Jehovah nanga Jezus Kristus. „Joe ben si wan man, koni ini en wroko? Na fesi foe kownoe a sa poti ensrefi.” — Tori foe den Apostel 20:20, 21; Odo 22:29.
3. Fa wi e kisi leri foe a wroko disi èn foe san-ede wi moe kisi koni na ini?
3 Na bijbel ben gi foe na fanowdoe leri èn foe na fanowdoe kweki, „sodati na sma foe Gado sa koni dorodoro, de sreka-sreka dorodoro foe doe ibri boen wroko”. Doe foe datede, nanga jepi foe persoonlek studi nanga groepoestudi, nanga na go alaten na gemeente-konmakandra èn nanga a teki prati na den opleidingsprogramma, „ala moeiti foe presteri joesrefi na Gado foe a feni joe boen, leki wan wrokoman di no abi foe sjen foe noti, di e handri na wortoe foe na waarheid na a joisti fasi” (2 Tim. 3:17; 2:15). Satan, na gado foe na disi ten ogri grontapoe, ben bré wan boen bigi sluier foe kerki-lé èn a bradi en tapoe den naatsi, sodati sma di no e bribi kon breni gi a brenki leti foe na boen njoensoe foe Kristus kownoekondre. Ma Jehovah Wortoe de leki wan fet’owroe di e koti na ala toe sé èn Jehovah Kotoigi e gebroiki en na wan koni fasi foe koti na pispisi na sluier di e breni sma èn meki na leti skijn ini den opregti froestan èn ini a opregti ati foe man, oema nanga pikin di gersi skapoe. — 2 Kor. 4:4.
Ofrandi foe prijse di Gado teki
4. Nanga san wi prijse e teki gersi, èn sortoe fowtoe fasi Maleachi 1:6-8 e tjari kon na krin?
4 Den wortoe foe wi foe prijse Jehovah e teki gersi nanga den srakti-ofrandi di na wet foe Mozes ben aksi: „Nanga jepi foe en, meki wi tjari gi Gado alaten wan srakti-ofrandi foe prijse, namkoe na froktoe foe den mofoboeba, di e barwroko na publiki gi en nen.” Wortoe e teki toe gersi nanga „den jongoe kaw foe wi mofoboeba” (Hebreer 13:15; Hos. 14:2). Den srakti-ofrandi di ben tjari ondro na Wet, ben moe de sondro flaka, èn priester di ben poti na marki disi na wan sé, Jehovah ben strafoe den, soleki ini Maleachi 1:6-8 ben skrifi:
„’Wan manpikin foe en sé, e gi grani na wan papa, èn wan knekti en toemsi boen masra. Efoe mi de dan wan papa, pe na grani gi mi de dan? Èn efoe mi de wan toemsi boen masra, pe na frede gi mi de?’ Jehovah foe den legre ben taki gi oenoe, o priester di e wiswasi mi nen. ’Èn oenoe ben taki: „Na sortoe fasi wi ben wiswasi joe nen,?”’ ’Foe di oenoe ben presteri tapoe mi altari brede di no ben krin.’ ’Èn oenoe ben taki: „Na sortoe fasi wi ben doti joe?”’ ’Foedi oenoe e taki: „Na tafra foe Jehovah de wan wiswasi sani.” Èn te oenoe e presteri wan breni meti leki srakti-ofrandi: „A no de wan ogri sani.” Èn te oenoe e presteri wan malengri èn siki meti: „A no de wan ogri sani”’ ’Grantangi, tjari en go gi oen granman. A sa prisiri nanga oenoe ofoe a sa teki oenoe tapoe wan switi fasi?’”
5. Fa wi kan sorgoe dati wi no tjari ofrandi foe prijse di flaka?
5 Den srakti-ofrandi di wi e tjari ini disi ten, „den jongoe kaw foe wi mofoboeba” èn na ’froktoe foe wi mofoboeba’, de so, sondro flaka leki wi kan meki den kan de? Wi ben meki den ofrandi foe prijse foe wi de so boen leki a kan, leki wan bakapisi foe studi èn na opleiding èn oefening foe den sani di wi abi ini wi makti? Wi e soekoe waarheidwortoe èn wi e denki dipi foe den, sodati wi kan presteri tapoe wan switi fasi wi boskopoe na den oso foe den sma? „Boiti dati na tjari-konmakandraman ben kon koni, sosrefi toe a ben leri a pipel alaten ini sabi, èn a ben go denki dipi èn a ben go ondrosoekoe sani finifini, sodati a ben kan tjari foeroe odo kon makandra. Na tjari-konmakandraman ben soekoe den toemsi moi wortoe èn na skrifi foe joisti wortoe foe waarheid.” — Prek. 12:9, 10.
6. Fa wi kan meki en moro makriki gi den sma foe teki na kownoekondreboskopoe?
6 A de wan moeiliki sani gi libisma foe erken dati den ben de fowtoe èn dati den moe kenki den denki, spesroetoe tapoe a tori foe wan sani di abi foeroe foe doe nanga den firi leki den kerki denki foe den. Wi e proeberi foe meki en moro makriki gi den? Wi e poti wisrefi ini a presi foe den, soleki na apostel Paulus ben doe disi? A ben taki: „A so mi ben tron gi den djoe leki wan djoe, foe wini djoe; gi den di de ondro na wet, ala di misrefi no de ondro na wet, foe wini den di de ondro na wet. Gi den di de sondro wet, mi ben tron leki sondro wet, ala di mi no de sondro wet na fesi Gado, ma ondro na wet foe Kristus, foe wini den di de sondro wet. Gi den di de swaki, mi ben de swaki. . . . Mi ben tron ala sani gi ala sortoe foe sma foe ferloesoe tokoe wantoe foe den! Ma ala sani mi e doe foe na boen foe na boen njoensoe, foe mi kan teki prati na en nanga tra sma” — 1 Kor. 9:20-23.
7. Fa wi kan gi wi prékiwroko moro overtoigi-krakti?
7 Wi e sori dati wi e froestan tra sma èn wi e sori switi fasi, èn wi wortoe de leki wan dresi? „Soema de koni foe ati, den sa taki a de nanga froestan, en na sma di en mofoboeba de switi, e meki overtoigi-krakti kon moro foeroe. Switi wortoe de wan pisi foe wan onigodo, switi gi a sili èn dresi gi den bonjo.” Wi e studeri foe sori inzicht te wi e kotoigi gi tra sma foe Gado kownoekondre, sodati wi e poti overtoigi-krakti na a taki foe wi? „Na ati foe na koniwan e meki dati en mofo sori inzicht, èn na en mofoboeba a de poti overtoigi-krakti” (Odo 16:21, 24, 23). Sowtoe e gi njan tesi di flaw ofoe no abi tesi èn Paulus e gebroiki a sani disi foe sori, dati na jeje njanjan di wi e presteri na tra sma, moe de boen foe njan: „Na taki foe oenoe moe de alaten switi, a moe abi sowtoe, sodati joe sabi fa joe moe gi ibriwan sma wan piki.” — Kol. 4:6.
Moi na leri foe oenoe nanga toemsi moi wroko
8. San de toemsi prenspari efoe wi no wani den kroetoe wi leki falsi soema?
8 Boiti den wroko foe préki na boen njoensoe, wroko foe doe san wi e préki de prenspari efoe wi no wani den kroetoe wi leki falsi soema. Na apostel Paulus ben froestan disi heri boen. Na publiki a ben sori tapoe bepaalde djoe leriman di ben sondoe densrefi na disi: „Ma oenoe di e leri wan tra wan, oenoe no e leri oensrefi toe? Oenoe di e préki: ’No foefoeroe’, oenoe e foefoeroe? Oenoe di e taki: ’No doe soetadoe’, oenoe e doe soetadoe? Oenoe di e sori wan tegoe gi kroektoe gado, oenoe e broko tempel foefoeroe? Oenoe di e meki bigi foe na wet, oenoe e afrontoe Gado foe di oenoe e pasa na wet?” (Rom. 2:21-23). Paulus ben froestan ini en geval na gevaar disi boen, bikasi a ben taki: „Mi de tranga gi mi skin èn mi e tjari en leki wan srafoe, foe misrefi no poti na wan sé na wan ofoe tra fasi, baka te mi ben préki gi trawan.” — 1 Kor. 9:27.
9. Sortoe bewijsi e sori na fowtoe fasi foe na kerki denki „ferloesoe wan dé, wani taki ferloesoe alaten”?
9 Disi e sori dati Paulus no e agri nanga na loekoe foe foeroe kerkisma ini disi ten, namkoe: ’Kisi ferloesoe wan dé, wani taki ferloesoe foe alaten.’ So esi leki wi ben teki Jezus leki wi ferloesoeman èn jepiman èn wi ben gi wi libi abra na Jehovah Gado, dan wi poti soso den fosi stap tapoe na pasi foe ferloesoe; wi no doro na kaba foe en ete. Foe datede meki Paulus e gi wi na rai „foe wi tan wroko na wi égi ferloesoe nanga frede èn béfi” (Fil. 2:12). Foe san-ede wi ben sa moe „tan wroko”, èn foe san-ede nanga „frede èn béfi”, efoe ’kisi ferloesoe wan dé’ wani taki ’ferloesoe foe alaten’? Sma kan fadon komoto foe na troe anbegi, ala di a de wan sani di no kan moro dati son wan kon kisi beraw baka „foe di gi densrefi den e anga na Manpikin foe Gado baka na wan postoe”. Jezus srefi ben taki, dati a kan dati wan sma „teki joe kroon”. A ben taki sosrefi toe ini en wortoe foe na „besroiti foe na seti foe sani”: „Soema horidoro te na a kaba, en dati sa kisi ferloesoe” (Hebr. 6:4-6; Openb. 3:11; Matt. 24:3, 13). Na disi ten positsi na Gado e teri, no san wi ben de wan dé, efoe a ben de boen ofoe takroe (Ezech. 33:12-16). Foe datede wi moe tan wroko na a Kownoekondrepréki èn tan sori wan joisti fasi foe libi nanga waka, ala di wi e doe den toe sani disi nanga na gesontoe frede dati wi kan misi ini disi.
10. San moe moi a leri foe wi, èn nanga sortoe bakapisi?
10 Kristen e kisi na tranga ’foe de bedari ini gwenti, gesontoe foe froestan èn nanga respeki ini den libifasi, foe no gongosa ofoe foe dringi hebi, foe de nanga lobi ini a fasi fa den de nanga den osofamirman èn famirman, krin ini libi èn krin ini taki èn sori dati den de boen wrokoman’. Èn foe san-ede ala den sani disi? Sodati „Sma no sa skempi na wortoe foe Gado”. Sosrefi toe, sodati nanga so wan libifasi den „kan moi na leri foe wi Ferloesoeman, Gado, ini ala sani”. Na moi foe na prèki foe den nanga so wan toemsi moi libifasi, e meki den Kotoigi e tron „wan eksempre foe toemsi boen wroko” (Tit. 2:1-10). „Gi komando na den di goedoe ini na disi ten seti foe sani”, na apostel Paulus ben taki, „foe no poti den howpoe tapoe goedoe di no de séker, ma tapoe Gado, di e gi wi ala sani pasa marki foe njan boen foe den; foe doe boen, foe de goedoe ini toemsi boen wroko, foe lobi foe gi sani, de klari foe prati sani, e poti gi densrefi wan toemsi boen fundamenti ini a ten di e kon leki wan goedoe, sodati den kan graboe stéfi na troetroe libi.” — 1 Tim. 6:17-19.
11. Sortoe toemsi prenspari fanowdoe na libi disi e dini, ala di a abi wantoe dé di foeroe nanga moeilijkheid?
11 Na libi di den sma e libi ini na grontapoe now, no de wan troetroe libi. „Na sma di e firi prisiri ini na satisfaksi foe den lostoe, dede ala di a de a libi” (1 Tim. 5:6). Ma a libi disi, e dini na wán toemsi prenspari fanowdoe disi, namkoe: „foe de goedoe ini toemsi boen wroko”, „foe poti wan reti fundamenti ini a ten di e kon”, foe „graboe stéfi na troetroe libi” ini na kontren foe Jehovah Kownoekondre ondro Kristus. Wi ben sa kan abi ala sani di na libi disi ben kan gi, ma efoe wi libi de légi tapoe na tori foe toemsi boen wroko, dan a ben sa de wan sani di wi teki trowe èn di no warti. A libi disi e teri soso pikinso dé, di foeroe nanga moeilijkheid nanga pen, sari èn pina, sari nanga mandi, sondoefasi nanga dede. Den dé de wantoe nomo, ma efoe wi no e draidrai, dan nofo foe den dé disi de foe gi wi na okasi foe kon goedoe ini den toemsi boen wroko. A doe foe den sortoe wroko disi e gi wi prisiri èn satisfaksi, vréde nanga tevrédefasi, na firi foe libi wan libi di wani taki wan sani, jeje gesontoe èn tégo libi.
Wroko di e gi joe kowroe-ati foe kisi ferloesoe
12. San de wan sani di e weri getrow Kotoigi foe Jehovah, ma san e gi den kowroe-ati?
12 O fa a de wan vreemde sani ini disi ten foe foeroe mi-no-ke fasi nanga gens, tokoe a de wan sani di e weri Jehovah Kotoigi toemsi di e dini nanga den heri konsensi, te den e hori densrefi na baka foe meki Jehovah kownoekondre bekenti. Taki e gi den verlekti èn kowroe-ati. Di Jeremia ben teki na besroiti foe no préki, dan na boskopoe ben de leki faja ini en bonjo, sodati te foe kaba a ben bari taki: „Mi kon weri te foe dede foe hori en na inisé — mi no kan verdrage en” (Jer 20:9, An American Translation). Elihu ben soekoe verlekti di a ben taki den waarheid di a ben hori langa ten ini ensrefi: „Mi foeroe pasa marki nanga argument, mi foeroe te foe baster nanga argument; mi inisé e kokoe leki win, di no kan gwe èn di wa ni priti srefi njoen saka. Mi e taki; dati sa gi mi verlekti” (Job. 32:18-20, Willibrordvertaling). Baka di Elihu ben doe a wroko disi, a ben firi kowroe-ati. Gado ben firi kowroe-ati di a ben doe en mekiwroko. Na doe foe Jehovah wroko ben de gi Jezus leki njanjan di ben gi kowroe-ati. Èn a doe foe na prékiwroko e gi now kowroe-ati na Jehovah Kotoigi. Den „e fré go na tapoe leki aka”. — Jes. 40:31.
13. Sortoe wroko wi moe doe now nanga reti, èn gi soema èn fa a de wan sani di boen?
13 Now a de na ten foe studeri Gado Wortoe na bijbel, foe no go gersi moro langa na owroe, ogri seti foe sani disi, ma foe kon kenki foe di wi e kenki wi froestan. „No lobi na grontapoe èn den sani di de ini na grontapoe.” „Na grontapoe e pasa gowe èn sosrefi toe en lostoe, ma na soema di e doe Gado wani, e tan foe tégo” (1 Joh. 2:15, 17; Rom. 12:2). Sreka joesrefi foe trowstoe den sma di e sari nanga na boen njoensoe foe na kownoekondre foe Gado. Moi na leri foe joe foe di joe e meki jeje froktoe kon ini joe égi libi — „lobi, prisiri, vréde, langa pasensi, switifasi, boen-ati-fasi, bribi, safrifasi, dwengi joesrefi” (Gal. 5:22, 23). Jepi safri-ati-soema foe kenki den froestan èn foe den kon goedoe ini toemsi boen wroko èn jepi den sosrefi toe ini na moeiti foe den foe libi now so, dati djonsro den kan tan libi foe tégo tapoe wan paradijs-grontapoe (Ps. 37:11, 29). Jepi den foe den égi boen foe wroko na den égi ferloesoe, soleki joe e tan wroko na joe égi ferloesoe.
14. (a) Sortoe fermane foe kisi ferloesoe e gi, èn foe san-ede disi de now na a reti ten? (b) San wi kan de èn doe te wi teki a fermane disi?
14 Den dé disi de moeiliki èn a ten kon sjatoe, sodati na fermane foe Gado de: „Préki na wortoe, wroko nanga en leki wan tranga fanowdoe sani, ini boen ten, ini moeiliki ten.” „Tanapoe faste, no seki, abi alaten foeroe foe doe ini na wroko foe Masra, sabi dati joe wroko no de foe soso ini Masra.” „No doe joe wroko safri-safri. De nanga faja ini na jeje. Dini Jehovah leki srafoe” (2 Tim. 4:2; 1 Kor. 15:58; Rom. 12:11). „Tan wroko (tapoe ala den fasi disi) na joe égi ferloesoe nanga frede èn béfi . . . sodati joe kan de sondro fowtoe èn onnowsel, pikin foe Gado, sondro flaka na mindri foe wan kron èn kroekit libisma-lo, di na mindri foe den joe e skijn leki lampoe di e gi leti ini na grontapoe, hori na wortoe foe libi stéfi.” — Fil. 2:12, 15, 16.
□ Fa den wroko foe Jehovah e prijse en?
□ Sortoe ofrandi Jehovah e feni boen ini disi ten?
□ Fa wi kan meki en moro makriki gi trawan foe teki na kownoekondre-boskopoe?
□ Nanga sortoe toemsi boen wroko wi moe moi wi leri?
□ Sortoe wroko e gi Gado dienstknekti kowroe-ati?
□ Gi sortoe wroko a de now na ten?
[Prenki na tapoe bladzijde 260]
Jehovah glori wroko e sori a sortoe Gado di a de. Wi wroko e sori sortoe soema wi de
[Prenki na tapoe bladzijde 262]
Taki bijbel waarheid nanga trawan de wan wroko di e gi kowroe ati