„Na Gado foe ala trowstoe” de nanga wi
„Blesi moe de . . . gi na Gado foe ala trowstoe, di e trowstoe wi ini ala wi benawtoe.” — 2 KOR. 1:3, 4.
1, 2. San na apostel Paulus e taki ini 2 Korinte 1:3-7 foe trowstoe ini ten foe benawtoe?
JEHOVAH de „na Gado foe ala trowstoe”. Na apostel Paulus ben sabi disi foe égi ondrofeni. Foe dat’ede meki a ben skrifi leki wan dek’ati gi mede-kristen den wortoe di e kon now di e gi tranga:
2 „Blesi moe de . . . gi na Tata foe den safoe sar’atifasi èn gi na Gado foe ala trowstoe, di e trowstoe wi ini ala wi benawtoe. . . . Efoe wi de now ini benawtoe, a de gi na trowstoe èn ferloesoe foe oenoe; noso efoe wi e kisi trowstoe, a de gi na trowstoe foe oenoe, di e wroko foe meki oenoe ondrofeni na srefi pina di wi toe e ondrofeni. Wi howpoe gi oenoe de foe dat’ede toe sondro foe seki, foe di wi sabi dati oenoe, neleki fa oenoe e teki prati ini a pina, na a srefi fasi oenoe sa teki prati toe ini na trowstoe.” — 2 Kor. 1:3-7.
3. (a) Foe san-ede Paulus ben sabi Jehovah leki „na Gado foe ala trowstoe”? (b) Tapoe na gron foe san meki mede-kotoigi kan kisi trowstoe èn dek’ati foe hori-doro ondro benawtoe?
3 Ia, Paulus ben leri sabi Jehovah leki „na Gado foe ala trowstoe”. A ben ondrofeni fa en hemel Tata ben trowstoe en èn ben sori en safoe sari-ati, spesroetoe te a ben ondrofeni pina „foe na regtvaardikifasi ede”. (Teki gersi Matt. 5:10.) Na apostel foe dat’ede ben kan trowstoe trawan èn gi den dek’ati foe hori doro ondro benawtoe. Kristen kotoigi foe Jehovah di ben hori doro ondro benawtoe, e gi nanga a eksempre foe den foe getrowfasi èn a sori foe fertrow ini Jehovah, séker foeroe dek’ati, sodati mede-bribiman e kisi tranga foe tan getrow na Gado. Èn Paulus ben gi wan toemsi moi eksempre ini na hori-doro di a ben hori-doro ini pina.
Wan bericht foe getrow horidoro
4, 5. (a) Oten Paulus ben skrifi Toe Korinte? (b) Fa Paulus ben de speri foe den „superfini apostel”, ma fa a ben de moro bigi leki den?
4 Na a pisi ten foe 55 G.T. Paulus ben skrifi en di foe toe brifi nanga jepi foe santa jeje gi kristen ini na foto foe Korinte. Drape a ben ondrofeni gens foe na sé foe den sma di na wan spotoe fasi a e kari „superfini apostel”. Nanga dek’ati a ben opo feti gi en positie, no foe en égi wini ede, ma foe Gado ede, dati wani taki foe ferloesoe na gemeente di ben de foe Gado (2 Kor. 11:5, 12-14; 12:11; 5:12, 13). Na apostel ben sori dati a ben de speri foe en gensman te joe sa loekoe na famiriman-lo èn moro fara ben tjari kon na krin fa tapoe na kontren foe tranga wroko, pina, reis, gefaar nanga pina a ben de moro hé leki den leki wan ’dinari foe Kristus’. A ben skrifi:
5 „Den de [den gensman] dinari foe Kristus? Mi e piki leki wan lawman, mi de dati na wan moro bigi fasi: ini weriskin wroko moro foeroe, ini strafoe-oso moro foeroe, ini naki toemsi, nofotron krosbé foe dede. Foe den djoe mi ben kisi féfi tron fotenti tiki dan joe poeroe wan, dri tron den fon mi nanga tiki, wan tron den ben ston mi, dri tron boto ben soengoe, wan neti nanga wan dé mi ben psa tapoe na dipi foe na se; nofotron mi ben de na reis, ini gefaar foe liba, ini gefaar foe foefoeroeman, ini gefaar foe mi égi ras, ini gefaar foe den naatsi, ini gefaar ini na foto, ini gefaar ini na sabana, ini gefaar tapoe se, ini gefaar na mindri falsi brada, ini wroko nanga tranga wroko, nofotron ini neti sondro sribi, ini angri nanga dréwatra, foeroe tron ini a no teki foe njanjan, ini kowroe nanga sososkin.” — 2 Kor. 11:21-27.
6. (a) Pe wi e feni wan verslag foe son pisi foe a krakti bribi foe Paulus bifo a ben skrifi Toe Korinte? (b) Fa wi kan njan boen foe Paulus libi foe getrow horidoro?
6 Ini na bijbelboekoe Tori foe den Apostel (9:3 te nanga sowan 20:4) wan toe foe den sani di kari dja na tapoesé foe na libi foe Paulus e kari foe sensi na ten di a ben tron wan kristen te leki na ten di a ben skrifi Toe Korinte. Meki wi go loekoe now na bericht foe en pikinso foe getrow horidoro. Disi sa gi wi sondro degedege dek’ati foe hori doro ondro benawtoe ini na fertrow dati „na Gado foe ala trowstoe” de nanga wi.
Moro foeroe ini weriskin wroko èn strafoe-oso
7. (a) Sortoe wroko ben bedoel nanga den „moro foeroe wroko” foe Paulus? (b) Akroederi den wortoe foe na apostel Paulus gi den owroeman foe na gemeente foe Efese, dan fa a ben doe en diniwroko? (c) San ben gi Paulus tranga foe doe wroko fajafaja gi na boen njoensoe èn gi den kownoekondre afersi?
7 Moro foeroe ini weriskin wroko: Leki barwrokoman foe na „boen njoensoe” Paulus ben „wroko moro tranga” leki en gensman (2 Kor. 11:23, Willibrordvertaling). A no de foe taki dati a ben teki prati foe wan moro langa pisi ten na a prékiwroko èn nofotron ini spesroetoe moeilek gebied. Ini Efese, pe sma ben e anbegi na heiden oemagado Artemis èn pe Paulus ben fadon ini a anoe foe wan oproeroe foe gewoon sma, dan en moeiti ini na diniwroko èn foe na boen foe mede-bribiman spesroetoe ben de wan sani pe a ben moe span ensrefi, sontron srefi leki ati ben sa priti. Ma toemsi moi jeje froktoe ben kon na doro. Bakaten nanga reti a ben kan taigi den „owroeman” foe na gemeente na Efese: „Mi no ben hori misrefi na baka foe ferteri oenoe ala sani san boen èn foe leri oenoe na publiki èn foe oso na oso. Ma mi ben gi kotoigi na djoe èn na Griki finfini foe beraw na Gado èn bribi ini wi Masra Jezus” (Tori. 20:17, 20, 21, 31; 19:1-41). Bifo den man disi, di den de now owroeman, ben tron kristen, na apostel Paulus so boen ben leri den nanga jepi foe na „oso na oso”-prékiwroko ini den fundament waarheid foe na kristendom. Foe di na wortoe foe Jehovah èn santa jeje ben wroko tapoe na ati foe Paulus, meki dati a ben kisi tranga foe panja nanga faja na boen njoensoe èn foe meki den kownoekondre afersi go na fesi (Jes. 61:1, 2; Rom. 10:8-10). Nanga na faja wroko disi na apostel ben gi wan toemsi moi eksempre na den kristen foe na di foe twenti-jarhondro.
8. (a) Foe san-ede Paulus ben kan taki dati a ben de „ini strafoe-oso moro foeroe” leki den „superfini apostel”? (b) Ini san Paulus nanga Silas ben feni trowstoe di den ben de ini strafoe-oso na Filipi, èn san den ben doe di wan gronseki ben fri den? (c) Sortoe dek’ati wi kan feni foe den ondrofeni foe Paulus na Filipi?
8 Moro foeroe ini straf’oso: Clemens foe Rome, di ben skrifi na a kaba foe na fosi jarhondro G.T. ben taki dati Paulus ben poti ini straf’oso na sébi okasi. Bifo a ben skrifi Toe Korinte, a ben de moro foeroetron ini strafoe-oso leki den „superfini apostel”. Ini Tori foe den Apostel wi e feni wan verslag foe wan foe den sortoe poti ini strafoe-oso — ini na foto Filipi ini Macedonia. Paulus nanga Silas, a de krin, ben bréti dati „den ben ondrofeni pina foe regtvaardikifasi ede”, bika di den ben de ini na strafoe-oso, den ben begi na Gado èn ben prijse en nanga wan singi. Na a go prakseri foe den Boekoe nanga na froestan dati Gado ben jere den begi èn teki den begi, ben gi den trowstoe (Ps. 65:2; 119:52). Di nanga jepi foe wan gronseki den ben kon fri, den no ben opo lon gwe es’esi, ma den ben taki „na Wortoe foe Jehovah nanga na [waktiman foe den strafoeman] nanga ala den di ben de ini en oso”. Na bakapisi, na waktiman foe strafoeman nanga en osofamiri ben tron kristen! (Tori. 16:16-40) Na verslag disi e gi kotoigi foe Jehovah di de ini strafoe-oso èn di e libi ini disi ten, tranga foe teki ferfolgoe nanga prisiri foe Gado, foe de ini begi, foe go prakseri dipi foe na Wortoe foe Gado èn foe taki nanga dek’ati. — Tori. 4:29-31.
„Ini naki toemsi” èn „foeroetron krosbé foe dede” ma tokoe no nanga skreki
9. San den wortoe „ini fonfon toemsi” e sori?
9 Ini naki toemsi: Paulus nofotron ben ondrofeni dati den ben naki en boenboen. Sosrefi toe wi e kisi foe jere dati nofotron „a ben tanapoe ai ini ai nanga na dede” (vers 23, Na Njoen Testament ini na aladé tongo). Disi ben kan sori na tapoe dati den naki di a ben kisi na son okasi, ben de so hebi dati pikinmoro den ben naki en kiri.
10. (a) Fa Paulus ben de „nofotron krosbé foe na dede”? (b) San séker kande ben gi na apostel krakti di ’a ben tanapoe ai ini ai nanga na dede’?
10 Foeroetron krosbé foe dede: Disi a no de fanowdoe dati a abi foe doe nanga den naki di a ben kisi na bepaalde okasi. A fesi, ini na srefi brifi, Paulus ben taki: „Alaten wi e horidoro alape ini wi skin na dede behandeling di den ben gi Jezus” (2 Kor. 4:10, 11). Na apostel ben kon ini gefaarlek situwasi pe a ben kan lasi en libi ini Damaskus, Antiochië, ini Pisidië, Ikónium, Lystra Thessalonika nanga Beréa ofoe a ben njan srefi hebi pen di ben kan tjari dede kon (Tori. 9:23-25; 13:49-51; 14:1-6, 19, 20; 17:1, 5-9, 13, 14). Ija, kande a ben kon srefi na fesi na dede gefaar foe den Romeinpré, foe di a ben taki dati „Na Efese a ben feti nanga wilder meti” (1 Kor. 15:32; teki gersi Tori. 19:23-41; 2 Kor. 1:8-11). Foe di na apostel ben de so foeroetron ini gefaar foe en libi, meki a ben kan taki foe troe: „Ala dé mi e si na dede ondro mi ai” (1 Kor. 15:31). Den foeroe-tron di na apostel „ben tanapoe ai ini ai nanga na dede”, dan, sondro degedege, a jeje foe Jehovah nanga en bribi ini Gado diri pramisi ben gi en krakti. — 2 Kor. 1:20-22.
11. Sortoe naki Paulus ben kisi foe den djoe?
11 Foe den djoe mi ben kisi féfi tron fotenti naki dan joe poeroe wan: Paulus ben sori dati den naki di a ben kisi na féfi okasi „foe regtvaardikifasi ede”, ben komoto foe den djoe, kande ini den djoe kerki foe den (vers 24; Matt. 10:17). Na wet foe Mozes ben abi wan seti foe a gi fonfon nanga tiki ofoe naki nanga wan tiki, pe den kroetoeman ben poti a nomroe foe den naki tapoe na gron foe na ogri di wan sma ben doe. Ma na strafoe ben go te nanga fotenti naki foe libisma firi ede, èn den djoe ben tjari na nomroe disi kon tapoe dritenti na négi foe sorgoe dati den no ben psa na marki foe na wet per ongeluk (Deut. 25:1-3). Den naki disi ben gi toemsi skinati, ma „na Gado foe ala trowstoe” ben gi Paulus tranga sodati a ben kan hori-doro getrow na ondro na behandeling disi.
12. (a) Na sortoe behandeling na apostel e sori di a ben taki dati „dri tron a ben kisi fonfon nanga tiki”? (b) Nanga sortoe jepi naki kan ferdrage „foe na boen foe regtvaardikifasi ede”?
12 Dritron mi ben kisi fonfon nanga tiki: A de krin taki Paulus na dri okasi ben kisi fonfon foe Romein lantiman di ben tjari wan tiki (vers 25). Den naki disi nanga wan tiki ben e gi, baka te a sma ben poeroe en tapoesé krosi. Leki wan Romein kondreborgroe, Paulus abi a fri foe na wet foe no kisi den sortoe fonfon disi. Ma disi no ben kibri en nanga Silas foe kisi „foeroe naki” bifo den ben poti ini doengroe-oso leki barwrokoman foe na boen njoensoe na Filipi (Tori. 16:19-24, 33, 35-40). Den sortoe fonfon disi ben kan de nanga troetroe ogri-ati srefi, ma nanga na jepi foe Gado jeje Paulus ben verdrage den takroe ati behandeling disi „foe regtvaardikifasi ede”. Èn nanga wan srefi jepi foe Gado, foeroe disi-ten kristen ben kibri den getrowfasi na Gado fesi awinsi net so wan mishandeling na skinfasi ben miti den.
13. Pe den ben ston Paulus, ma disi ben tjari wan kaba kon na en diniwroko?
13 Wantron den ben ston mi: Ini Lystra [fanatiek djoe] ben „ston Paulus èn srepi en go na dorosé na foto nanga na prakseri dati a ben dede”. A no de foe taki dati na ston disi ben abi dede leki marki. (Teki gersi Lev. 20:2; Tori. 7:58 te nanga 60.) Ma „di den discipel ben lontoe en, a ben opo tanapoe èn ben go na ini a foto”, aladi a tamara foe en kaba a ben go moro fara nanga en zendingsreis. — Tori. 14:19-22.
Boto ben soengoe èn gefaar tapoe se
14. Foe sortoe soengoe foe sipi Paulus e ferteri èn sortoe krakti den ben abi tapoe en reis foe na boen foe a boen njoensoe?
14 Dritron boto ben soengoe: Ini a boekoe Tori foe den Apostel e ferteri dati soso wan tron boto ben soengoe èn disi ben psa baka di Paulus ben skrifi gi den Korintesma. Paulus ben de na a ten dati na pasi e go na Rome (Tori. kap. 27). Bifo disi ben psa, na apostel ben reis nofotron ini sesipi, èn a no ben de wan ongewoon sani dati sipi te den ben waka psa den sjoro ben soengoe. Soboen awinsi den boekoe no e ferteri finfini foe den dri soengoe foe boto di kari dja, tokoe e kon na krin dati den gefaar foe waka na se tapoe na Middellandse Se no ben tjari Paulus so fara foe waka foe reis moro pikinso foe na boen foe na boen noensoe.
15. (a) San Paulus ben bedoel di a ben taki ’dati a ben psa wan neti nanga wan dé tapoe na dipi foe na se’? (b) Fa na Gado foe „ala trowstoe” ben jepi Paulus ini den sani di kari dja na tapoesé èn sortoe fertrow disi moe gi wi?
15 Wan neti nanga wan dé mi ben psa tapoe na dipi foe na se: A no de foe taki dati na apostel no ben bedoel dati na wan wondroefasi a ben psa libilibi wan pisiten foe twenti-nafo joeroe ondro watra. Leki wan sma di ben soengoe a ben kan psa den ogri joeroe dati foe di a ben proeberi kande foe swen ini seksek watra ofoe foe hori ensrefi na planga ofoe pisi di ben tan abra foe na sipi di ben broko. Srefi efoe a ben de na tapoe wan vlot, dan na apostel ben psa na tergi ondrofeni disi (di no skrifi nowan pe ini den boekoe) foe di tapoe wan dek’ati fasi a ben horidoro net so langa te leki a ben kisi jepi ofoe ben doro sjoro na wan boen fasi. Paulus séker ben ’bari ini en nowtoe na Jehovah, èn Gado ben poeroe en ini ala en benawtoe’. (Teki gersi Ps. 107:23-31.) Nasrefi „Gado foe ala trowstoe” kan jere wi begi sosrefi toe. — Teki gersi 1 Joh. 5:13-15.
Wi Gado de wan fonten foe trowstoe di no e dré
16, 17. Foe san-ede wi kan taki dati na jepi foe Jehovah santa jeje de toemsi prenspari te wi e njan skin-ati „foe na boen foe regtvaardikifasi ede”?
16 Wi ben si wantoe fonten foe trowstoe di ben jepi Paulus foe tan getrow na Jehovah awinsi benawtoe ben de. Disiten kotoigi foe Jehovah moe go denki dipi foe disi nofotron, bika disi sa jepi den foe verdrage pina „foe na regtvaardikifasi”.
17 Na jepi foe Jehovah santa jeje de wan warti sani psa marki. Spesroetoe ini ten foe benawtoe wi moe begi foe na jeje, saka wisrefi na ondro na tiri foe en èn sori den froktoe foe en (Luk. 11:13; Ps. 143:10; Gal. 5:22, 23). Te Jehovah jeje wroko tapoe wi ati, dan disi e meki wi froestan en lobi, èn na trowstoe djaranti disi sa jepi wi foe hori-doro ondro benawtoe. — Rom. 5:3-5; 8:35-39; 2 Thess. 3:5.
18. Fa bribi ini Gado diri pramisi kan gi wi trowstoe ini benawtoe di wi e ondrofeni leki kristen?
18 Bribi ini Gado diri pramisi, soleki disi skrifi ini den boekoe, sa gi wi trowstoe toe (Rom. 15:4). Hori ini prakseri dati Jezus Kristus „foe na prisiri di ben poti na en fesi ben verdrage wan pina-oedoe” (Hebr. 12:1, 2). Awinsi wi ben sa dede foe hebi pina ede di wi ben ondrofeni, tokoe na wondroe froewakti foe wan opobaka èn foe wan libi sondro kaba ini Gado njoen seti, ofoe wi abi now wan hemel ofoe grontapoe howpoe (Matt. 10:28; Luk. 23:43; Joh. 5:28, 29; 17:3; 1 Kor. 15:53; 2 Petr. 3:13). Fa benawtoe de tokoe wan sjatoe „sani èn lekti” te wi abi tégo libi na wi fesi! — 2 Kor. 4:16-18.
19. Fa begi e gi wi trowstoe na mindri foe benawtoe?
19 Dati Gado e gi wi leki piki tapoe wi begi vréde foe froestan, de sosrefi toe wan bigi fonten foe trowstoe ini ten foe benawtoe. (Loekoe Luk. 22:32; Tori. 4:23-31; Jak. 5:16-18). Jezus ben seni faja begi nanga tranga begi go na Jehovah „di ben kan ferloesoe en foe na dede, èn Gado ben jere en na wan boen fasi, foe en frede di a ben abi foe Gado”. Ija, Jehovah ben seni wan engel foe tranga Jezus ini wan ten foe tesi (Hebr. 5:7; Luk. 22:43). Te wi e si dati Jehovah e jere wi begi te wi de ini benawtoe, dan séker wi e kisi trowstoe foe dati.
20. Sortoe tra fasi foe Paulus ben psa den „superfini apostel” foe Korinte, wi sa loekoe moro fara?
20 Te wi e doe moeiti opregti foe hori-doro getrow leki kristen kotoigi foe Jehovah, dan „na Gado foe ala trowstoe” sa de nanga wi, neleki a ben de nanga na apostel Paulus. Te so fara wi ben si na tranga wroko nanga pina foe Paulus. Ma ini en verdedeging leki wan „dinari foe Kristus” ben kon na krin dati a ben psa den „superfini apostel” foe Korinte ini reis, gefaar nanga moeilekheid. San wi kan leri foe den ondrofeni disi?
Joe e memre den punt di e kon now?
□ Fa a ben doe kon taki, na apostel Paulus ben leri sabi Jehovah leki „na Gado foe ala trowstoe”?
□ Fa kristen di ben horidoro ondro benawtoe kan gi medebribiman tranga foe tan getrow na Jehovah?
□ Sortoe wroko ben de ini na „weri-skin wroko” di na apostel ben doe moro foeroe?
□ Fa wi kan njan boen foe den ondrofeni foe Paulus ini strafoe-oso?
□ San na wan toe foe den fasi di e sori taki Jehovah Gado de wan fonten foe trowstoe di no e kon na wan kaba?
[Prenki na tapoe bladzijde 2]
Paulus ben kon foeroetron ini strafoe-oso soleki ben miti en nanga Silas ini Filipi
[Prenki na tapoe bladzijde 4]
Fo tron ini a ten foe en diniwroko Paulus ben miti taki boto ben soengoe