Gado Wortoe abi libi

Na grontapoe di Jezus no ben o begi gi

A neti bifo en dede, Jezus ben begi: „Mi e begi gi den [en discipel]; mi no e begi gi na grontapoe” (Johannes 17:9). Moro froekoe na a neti dati Jezus ben taki foe „na tiriman foe na grontapoe disi”. A bijbel e meki wi kon sabi na tiriman disi leki Satan Didibri, „a gado foe na seti foe sani disi [di] ben breni a ferstan foe den sma di no e bribi.” — Johannes 16:11; 2 Korintesma 4:4.

Ma san na a grontapoe disi di Satan e tiri èn di Jezus no ben sa wani begi gi en? A de na orga libisma maatschappij di de aparti noso di de a dorosé foe Gado organisaatsi di ai kan si. Satan grontapoe organisaatsi de moro spesroetoe ini dri pisi di tai krosbé na makandra.

A fosi wan de falsi fasi foe anbegi di ini a bijbel de leki wan hoeroe-oema di anoe lai nanga broedoe èn di nen „Babylon a Bigiwan”. Dati na hoeroe-oema disi de wan prenki foe wan kerki sistema e kon krin ini san a bijbel e taki foe en, taki nanga jepi foe en „afkodréwroko a ben kori ala naatsi” (Openbaring 18:23). Na takroe oema disi den e taki foe en leki „a sidon tapoe wan redi kloroe wilder meti . . . di ben abi sébi ede nanga tin toetoe”. — Openbaring 17:3.

Wan di foe toe prenspari pisi foe Satan grontapoe organisaatsi de den politiek tiri foe kondre, di na bijbel e taki foe den leki meti (Daniël 8:20, 21). Dati den tiri foe kondre foe na grontapoe disi e kisi den tranga foe Satan e kon na fesi ini wan visioen di na apostel Johannes ben skrifi: „Mi ben si wan wilder meti e opo komoto foe na se, nanga tin toetoe èn sébi ede . . . èn na kaiman [Satan na Didibri] ben gi na meti en tranga”. — Openbaring 13:1, 2; 12:9.

Wan di foe dri prenspari pisi foe Satan grontapoe organisaatsi de na gridi bisnis sistema di e kwinsi sma. A bijbel e taki foe en, leki „bisnis man di e reis lontoe”. Den „bisnis man” di e reis lontoe e tanapoe na wan sé èn den e kré te Babylon a Bigiwan e kisi pori. — Openbaring 18:11-15.

San moro fara e meki wi kon sabi Satan grontapoe na a loesoe libifasi èn hoeroe libi di de foe feni drape. Foe na sani disi meki ala toe den apostel Paulus nanga Petrus ben warskow kristensma foe wai komoto a pasi gi den doe foe den sma foe den naatsi (Efesesma 4:17-19; 1 Petrus 4:3, 4). Den sani di den sma foe na orga libisma maatschappij disi e bow den libi lontoe den de „na lostoe foe na skin èn na lostoe foe den ai èn a meki bigi nanga den sani foe libi di wan sma abi”.

Efoe kristensma e hori densrefi na Jezus wortoe gi en bakaman, „den no de wan pisi foe na grontapoe, neleki mi no de wan pisi foe na grontapoe” dan ini a ten disi den sa loekoe boen foe kan wai komoto a pasi foe de wan pisi foe Satan grontapoe (Johannes 17:16). Den no sa teki no wan prati ini en bidrigi fasi foe anbegi nanga politiek, ofoe ini en oneerlijk bisnis afersi. Den sa wai komoto gi en hoeroe fasi foe libi.

[Prenki na tapoe bladzijde 12]

Bidrigi politik

Falsi kerki

Gridi bisnis

Hoeroe libi