Ferteri boen njoensoe foe wan moro betre sani
„Wiki, wiki, weri joe tranga, o Sion!” — JESAJA 52:1.
1. (a) Na sortoe fasi den koranti, radio nanga so moro fara ben misi? (b) San na moro koni Presi foe Njoensoe e meki bekenti?
NA TRANGA kari disi ben de foe jere troetroe kaba na ini na di foe twenti jalrhondro foe wi. Èn foe san-ede? Foe di a ten ben doro foe meki boen njoensoe bekenti foe wan moro betre sani gi libisma. Wi ben lési na boen njoensoe disi na ini den koranti foe na grontapoe? Nono, bika den sani leki koranti, radio nanga TV nanga so moro fara ben wani foe ferteri moro foeroe foe sensaatsi na ini na grontapoe ofoe foe na kon moro foeroe foe porifasi nanga hoeroedoe na ini na njoensoe. Ma den no kan sori tapoe wan loesoe. Foeroe sma e frede now gi wan pori na ini wan nucleaire grontapoe feti, di ben sa kan bigin nanga a baster foe kernfetisani na ini na kroetoedémaksin di libisma meki densrefi. Ma wan sma di koni moro leki libisma di e dede e ferteri wi taki na kaba foe na grontapoe sa kon foe wan heri tra presi. A sa kon foe di Gado srefi sa tjari na kroetoe kon tapoe ogri sma nanga naatsi (Psalm 110:5, 6). A presi disi foe njoensoe e ferteri wi ooktoe foe wan toemsi moi millennium di e kon baka dati foe bow sani kon boen baka, wan pisten pe na grontapoe foe wi nanga den libisma di e libi na tapoe, sa tjari go na ini wan toestand foe moi volmaaktfasi. Dati detroetroe boen njoensoe! — Openbaring 20:6; Psalm 72:16, 18; Romeini 8:21.
2. Sortoe tranga fanowdoe kari de now foe jere, èn fa sma ben moe doe?
2 ’Wiki, wiki!’ Jesaja e kari. Foe san-ede na toemsi fanowdoe kari disi? Na aparti fasi fa bijbel profétitori e kon troe sensi na jari 1914 e sori taki Gado Kownoekondre na ini anoe foe Kristus Jezus, „wan foto foe na libi Gado, na hemel Jeruzalem,” e tiri now na ini hemel. Den sma na grontapoe di e teki presi foe Sion, a hemel organisaatsi foe Gado, ben moe wiki kon doe wroko fajafaja. Den ben moe meki na boen njoensoe disi bekenti na ini na krakti di Gado e gi na den sma di e gi jesi na en leki Tiriman. — Hebrewsma 12:22; Tori foe den Apostel 5:32.
3. Nanga soema Jesaja e taki, èn nanga sortoe kari?
3 Jesaja e go moro fara: „Weri joe moi krosi, o Jeruzalem, na santa foto! Bika na ini a ten di e kon no wan sma di no besnij nanga sma di no krin sa kon moro na ini joe. Naki na doti poeroe na joe skin, opo tanapoe, go sidon, o Jeruzalem. Loesoe gi joesrefi den banti di lontoe joe neki, o oemapikin foe Sion di de na strafoe”. — Jesaja 52:1, 2.
4. Fa na profeititori disi ben kon troe na ini na di foe twenti jarhondro disi?
4 A profétitori disi e kon troe na ini na di foe 20 jarhondro na ini wan span fasi! Na ini na ten foe na Bigi Feti foe 1914-18, den salfoe kristen na ini jejefasi ben kon na ini doengroe-oso, ala di sonwan, pe joe ben abi na ini den fesiman foe na Wachttoren Genootskap ben de na ini troetroe doengroe-oso. Ma na ini 1919 wan fri ben kon. Den kristen, di ben teki presi foe na hemel Sion, ben go weri dan „krosi” di foe na sé foe Gado ben de moi. Den ben weri namkoe krosi di e meki sma kon sabi den leki dienstknegti foe na Soeverein Masra foe na universum. Den ’e poti densrefi’ aparti foe moreel nanga jeje doti libi. — Teki gersi 2 Korintesma 6:17, pe na apostel Paulus e teki wan pisi komoto foe Jesaja 52:11.
5. Fa a pipel foe Gado ben poti prakseri na tapoe na kari foe Jesaja nanga na eksempre foe Jezus?
5 Na a fasi disi na pipel foe Gado ben meki ensrefi kon fri dorodoro foe falsi kerkileri nanga doe. Foe di den waka na baka na eksempre di Jezus ben gi na grontapoe meki den ben kan taki ooktoe taki den „no de wan pisi foe na grontapoe disi” èn ooktoe foe den bidrigi politiek nanga tranga ogri-doe di e kon moro foeroe (Johannes 18:36; Openbaring 18:2, 4). Ma soleki wi sa si now dan den ben moesoe go waka na ini den foetoemarki foe a meester foe den na wan moro positief fasi ete, di den ben opo tanapoe foe na toestand foe den pe den ben de leki den ben trapoe den èn den ben go teki wan presi na fesi foe Gado di a ben feni boen. — 1 Petrus 2:21.
„Joe Gado tron Kownoe!”
6. A „foetoe” foe soema e tjari now boen njoensoe go, èn nanga sortoe prakseri a ben kon now?
6 Arki boen na den tra wortoe foe na proféti: „O switi den foetoe de na tapoe den bergi di e tjari boen njoensoe, di e ferteri foe vréde, di e tjari boen njoensoe foe wan moro betre sani, di e ferteri foe ferloesoe, di e taigi Sion: ’Joe Gado tron kownoe!’” (Jesaja 52:7) A boskopoeman disi foe vréde de no wan tra sma moro leki na kownoe Jezus Kristus. Di a ben de na grontapoe a ben kisi salfoe nanga na jeje foe Gado foe meki boen njoensoe bekenti gi póti sma di den ben masi. Ma now di „den faste ten foe den naatsi” ben kon troe na ini 1914, a ben kon „na ini en glori, nanga ala en engel nanga en”, foe teki en kownoewroko èn foe kroetoe den naatsi nanga pipel foe grontapoe. — Lukas 4:18; 21:24; Mattéus 25:31, 32.
7. Sortoe njoensoe na boskopoeman e tjari?
7 Tjari na boskopoeman disi kon na ini prakseri pikinso soleki en, te joe taki en na agersifasi, e lon nanga bigi stap foe na wan bergi go na a trawan na ini en lostoe foe ferteri boen nioensoe foe moro betre sani gi den sma di e soekoe Gado. O switi den „foetoe” de! di e tjari en go es’esi te a e meki en vréde boskopoe bekenti. Nanga faja a e meki ferloesoe bekenti na a „oemapikin foe Sion” di ben de wan dé na ini doengroe-oso, na fika pisi foe den 144.000 sma di ben kon fri èn di ben de na jeje Israël èn baka dati gi wan ’bigi ipi foe ala naatsi’ di joe no kan teri. — Openbaring 7:4, 9, 10.
8. Sortoe sani di e gi faja e meki bekenti now èn foe san-ede?
8 Na meki bekenti foe vréde nanga boen njoensoe de moro foeroe na tapoe na faja kari: „Joe Gado tron kownoe!” Soema na a Gado disi èn fa a e tron kownoe? En na a Gado di a nen foe en ben e wiswasi na ini den kerki foe na kristenheid èn di den e kari wan toe tron nanga, na Soeverein Masra JEHOVAH. En na a sma di ini den vers na fesi foe Jesaja 52 e taki: „Alaten, na heri dé, den ben e wiswasi mi nen, na foe a réde dati mi pipel sa leri sabi mi nen.” A nen foe en di no abi speri moe kon na fesi now foe di a joeroe doro pe a sa kroetoe den naatsi. Den toe moe go frede en leki „kownoe foe den naatsi”. — Jeremia 10:7; Openbaring 14:7.
9. (a) San de den positsi baka makandra foe „Wi Masra” nanga „en Kristus”?
9 A bigi kownoe disi na a Masra foe soema den e taki nanga tranga sten na ini hemel a sani di e kon now di abi foe doe nanga den sani disi sensi 1914: „Na kownoekondre foe na grontapoe kon tron na kownoekondre foe wi Masra èn foe en Kristus èn a sa tiri leki kownoe te foe tégo.” Tra anbegiman foe Gado e poti wortoe foe opregti prijse moro na tapoe: „Wi e taki joe tangi, Jehovah Gado, na Almaktiwan, di ben de dati joe ben teki joe bigi krakti èn ben go tiri leki kownoe. Ma den naatsl ati kon bron, èn joe atibron ben kon”. Na ini a dé disi foe a kownoekondre Kristus Jezus e tiri leki kompe kownoe nanga en Tata na Masra Jehovah, di a regtvaardiki kroetoe foe en a e tjari kontapoe sma. — Openbaring 11:15, 12:10; Johannes 5:30.
10. San Paulus ben sori di a ben teki Joël 2:32 nanga Jesaja 52:7 taki foe den?
10 Na boskopoeman-Kownoe disi no tanapoe en wawan na ini na meki bekenti foe vréde. Na apostel Paulus ben tjari kon na krin foe san-ede disi de so foe di a e teki Joël 2:32 taki: „Ibriwan sma di e kari na nen foe Jehovah, sa kisi ferloesoe.” Baka dati Paulus e aksi wantoe aksi èn a e tjari disi kon na wan hémarki nanga na sori di a e sori na tapoe Jesaja 52:7: „Ma fa den sa kari en ini soema den no ben poti bribi? Fa den sa poti bribi ini soema den no ben jere foe en? Fa moro fara den sa jere sondro dati wan sma préki? Fa moro fara den sa préki efoe den no seni den go? Soleki ben skrifi: ’O switi den foetoe foe den sma de di e meki boen njoensoe bekenti!’” — Romeini 10:13-15.
11. Fa foeroe sma na ini a ten disi ben sori taki den abi „switi foetoe”?
11 Trawan toe abi soboen ’switi foetoe’. Den sma disi ben poti prakseri na tapoe na boen njoensoe di a Boskopoeman foe Gado ben meki bekenti. Foe den sé baka den tron prékiman foe boen njoensoe — wan legre foe kownoekondre prékiman. Now den prékiman disi de sowan toe nanga afoe miljoen — wan bigi ipi di joe abi na ini mannengre, oemasma nanga pikin foe ala naatsi foe a libismafamiri! Fa joe abi wan bigi grani te joe de wan foe den èn „e tjari boen njoensoe foe wan moro betre sani”! Èn fa joe letterlek foetoe de wan diri sani te alaten den e tjari joe go oso na oso foe ferteri foe ferloesoe bika nanga dati joe ben abi wan prati na a kontroe foe Psalm 19:4! Na ini Romeini 10:18 Paulus e teki na tekst disi taki so: „Den go abra na heri grontapoe, èn na wortoe foe den te na a kabapisi foe na grontapoe pe libisma e libi.” — Loekoe toe Psalm 99:1-3; 148:12, 13.
Organsaatsi foe Gado de na wroko
12. (a) Foe san na ten disi de na moro prenspari ten? (b) Sortoe aparti waarheid ben meki bekenti na ini 1925?
12 Ija, „joe Gado tron Kownoe!” Now a de foe dat’ede na ten foe alaten foé hé na nen foe na libi Gado, Jehovah, èn foe gi en grani leki Soeverein Masra. Na ini den jari 20 na fikapisi foe Gado salfoe dienstknegti ben de toemsi grantangi taki ’leti’ foe na kownoekondre foe Gado ben opo kon ala ten ala ten gi „na regtvaardikiwan”. Wan hémarki ben doro nanga na The Watchtower (Na Wachttoren) foe 1 Maart 1925. Na ini na ede-artikel foe na tijdschrift disi, di ben nen „Na gebortoe foe na naatsi”, den profétitori ben tjari kon na krin pe ben sori taki a kownoekondre foe Gado di ben pramisi ben gebore na ini 1914 na ini hemel, di na Messiaans kownoe ben iti trowe Dididbri nanga en engel go na grontapoe èn taki te na a kaba feti moe de a mindri na organisaatsi foe Gado nanga di foe Satan. — Psalm 97:11; Openbaring 12:1-12.
13. (a) Sortoe go na fesi a pipel foe Gado ben abi te nanga 1938? (b) Sortoe sani ben feni presi na ini 1938 na a joisti ten?
13 O moro na jeje feti disi ben e go doro, o moro den sma di e wroko makandra nanga Jehovah organisaatsi e kisi kowroe ati nanga na alaten leti di ben kon foe bijbel inzicht, èn a nomroe foe den ben gro te leki na ini 1935 sowan 50.769 sma ini wan internationaal kotoigiwroko ben ferteri taki den ben teki prati nanga na kownoekondre dienst. Na es’esi gro ben aksi wan moro betre-organisaatsi èn Jehovah ben si na fesi precies na a joisti ten a tori disi! Na studie-thema foe Na The Watchtower foe 1 juni nanga 15 juni (na ini Bakrakondre a ben kon na ini augustus nanga september) 1938 bentaki so: „Organisaatsi”. Na baka den nomroe foe na tijdschrift na ini juni nanga augustus (na ini Bakrakondre na ini september nanga oktober), fo tijdschrift ben kon di ben go foe „En feti”. Wan troetroe theocratis tiri ben tjari kon na mindri Jehovah Kotoigi èn disi ben tranga den gi wan tranga jeje-feti moro fajafaja. Soleki na ini kapitel 60 den vers 17 nanga 22 foe Jesaja profétitori ben sori, dan na moro betre toestand na mindri a pipel foe Gado ben sa meki na kownoekondrewroko foe Jehovah kon moro esi na fesi.
14. (a) Sortoe wroko na ini disiten e kroederi nanga a bowprogramma foe Salomo? (b) Sortoe aksi wi e aksi nanga disi na ini prakseri?
14 Na ini den Wachttoren-artikel disi di ben go foena tori „Organisaatsi” den ben teki na tiri foe Salomo ini na di foe erfoe jarhondro bifo wi G.T. gersi nanga na tiri foe Jezus Kristus di ben poti na tapoe na troon èn di ben bigin tiri na ini 1914 G.T. Salomo ben bigin en bowprogramma na ini na di foe fo jari foe en tiri. Sébi jari ben de fanowdoe foe bow na tempel èn ete 13 jari foe klari na oso foe a kownoe. Na so a gersi taki Masra Jezus Kristus ben abi foeroe foe doe nanga bowwroko di ben abi foe doe nanga na meki kon boen baka foe na troe anbegi èn nanga na bow foe na jeje „oso foe Gado” na in a pisiten foe 1918-1938 (1 Petrus 4:17). Na laatste Wachttoren di ben go foe „Organisaatsi” ben tapoe nanga den letterlek wortoe disi:
„Na bijbel e sori, taki Salomo baka twenti jari foe en bowprogramma, di wi taki foe en dja a tapsé ben bigin nanga wan tra bowprogramma, di ben abi foe doe nanga na heri naatsi (1 Kownoe 9:10, 17-23; 2 Kronieken 8:1-10). Ne a koningin foe Skéba ’ben kon foe den kabapisi foe na grontapoe foe jere na koni foe Salomo’ (Mattéus 12:42; 1 Kownoe 10:1-10; 2 Kronieken 9:1-9, 12). Disi e meki a aksi kon na fesi: San de gi na pipel foe Jehovah na grontapoe a den fesi na ini na krosbé ten di e kon? Nanga foeroe fertrow wi sa wakti, èn wi sa si.”
We, san wi e si now so wan 46 jari a baka?
Wan toemsi moi gro!
15. (a) Sortoe disiten „koningin foe Skéba” ben kon na fesi? (b) Sortoe sani di ben orga ben tjari winimarki gi na groepoe disi, èn na sortoe fasi?
15 Na disiten „koningin foe Skéba”-klasse, den „tra skapoe” foe na Masra, nanga bigi nomroe ben kon „foe na kabapisi foe na grontapoe” foe jere na koni foe na kownoe Jezus Kristus di poti na tapoe na troon. En de troetroe „moro leki Salomo”. Nanga jepi foe na „getrow nanga koni srafoe” — na groepoe foe salfoe kristen di na Meester ben orga èn ben poti dja na grontapoe — a prati gi sma wan fesa njanjan di de foeroe nanga jeje njanjan (Mattéus 12:42; Mattéus 24:45-47). Èn srefi di na di foe toe Grontapoefeti ben e feti hebihebi na „srafoe” disi ben doe sani foe meki na boen njoensoe moro bigi bekenti. Na ini 1943 na Wachttoren Bijbel Skoro Gilead na ini South Lansing, New York ben opo en doro (New York, Amerkankondre). Bekwaam bedinari foe na evangelium ben kisi leri leki Zendeling èn ibri afoe jari sowan 100 studenti ben seni go na a kaba foe grontapoe.
16. (a) San na grafiek di de dja foe si e sori foe na gro sensi 1943? (b) Sortoe sani ben psa na ini den 10 jari di psa?
16 Jehovah ben blesi na wroko foe en kotoigi di ben orga? Na grafiek djaso na tapoesé pe a mindri pisiten foe tin jari joe kan si na nomroe foe kownoekondre prékiman di sensi 1943 nen skrifi taki den e doe dienst gi Jehovah e gi joe na piki. Na gro na ini den tin jari no so langa psa kaba ben de spesroetoe prenspari gi wi na ini disi ten. Disi ben de wan jari di a pipel foe Gado ben kisi tesi èn ben manari, ala di wantoe di no ben de tevréde ben fadon komoto a bribi èn gwe libi na organisaatsi. Ma a ben de ooktoe toemsi moi jari foe bow sani èn orga sani njoen baka na a heri grontapoe, jari pe den brada nanga sisa ben kisi tranga foe doe na wroko di ben de na den fesi. Degedege no de foe na tori taki „bifo den foto kon tron troe troe brokobroko ston-ipi”, dan wan tjari kon makandra foe den „skapoe” moe kon. — Jesaja 6:11; Teki gersi Lukas 22:31, 32; Mattéus 25:31-33.
17. Foe san-ede Jehovah Kotoigi na a heri grontapoe abi now réde foe prisiri?
17 Na ini 1983 na kownoekondrewroko ben go k’falek na fesi. Ma abra na heri grontapoe na wan kondre baka na tra kondre ben bigin abi njoen hémarki na ini na nomroe foe prékiman. Na ini na fo kanti di de dja, wi sa tesi pikinso foe na prisiri di den brada nanga sisa ben abi te Jehovah ben meki sani gro. Na ini den moen foe na mofojari foe na bigin foe a dréten wan toemsi bigi gro ben kon sodati na a heri grontapoe now wan span hémarki di noiti ete wi ben si foe 2.652.323 prékiman ben doro — 174.715 prékiman moro leki na hémarki foe 1982 — na ini 205 difrenti kondre. Wi e prijse Jah foe na blesi disi! — Maleachi 3:10; Deuteronomium 28:12, 13
18. Na bericht foe omeni dopoesma di ben de moe gi wi tranga foe doe san?
18 Fa a de meki wi ati prisiri toe foe si dati moro nanga moro sma ben gi densrefi abra na Jehovah èn ben sori dati nanga na teki dopoe na ini watra! Na a ten foe den „Kownoekondrewánfasi” districtcongres foe 1983 dan na sofasi foeroe njoen sma ben tjari kon na ini wánfasi nanga na organisaatsi foe Jehovah. Ini 1983 dan ala na ala 161.896 sma ben dopoe, 17 procent moro leki a jari na fesi. Wi e begi taki Jehovah mag gi oenoe pasi ini 1983 foe abi wan moro boen „kisi foe fisi” èn foe de boen „ontiman” (Jeremia 16:16). Èn efoe wi feni sma di den en warti, meki wi gi den njanjan dan, foe di wi e gebroiki a wan koni fasi na Wortoe foe Gado foe di wi studeri nanga den ini den toe moi boekoe Joe kan libi foe tégo na ini wan paradijs na grontapoe nanga Bondroe kon na wan na ini na anbegi foe na wan-enkri troe Gado. — Mattéus 10:7, 11.
19. San na bericht foe na Memrefesa foe 1983 e sori?
19 Na moro span tori e kon foe na Memrefesa di ben hori na a neti foe 29 maart 1983 na ini so wan 46.235 gemeente na a heri grontapoe. Soso 9.292 sma ben sori a hemel howpoe foe den foe di den ben meki gebroiki foe den symbool. Nanga disi e kon na fesi taki den „skapoe” ben de a moro bigi pisi foe den 6.767.707 sma di ben de drape — wan gro foe 514.920 te joe teki en gersi nanga na nomroe foe 1982. Fa a ben de wan bigi groepoe safri-ati sma di e sori belangstelling gi Jehovah kownoekondre prakseri!
20. Sortoe prakseri wi moe sori now na njoen sma, èn ooktoe na inactiefwan èn foe san-ede?
20 Na ondro na krakti foe Gado santa jeje kownoe David ben taki: „Den safri-ati sma na a tra sé sa kisi grontapoe, èn foe troe den sa abi den switi prisiri na ini vréde pasa marki” (Psalm 37:11; loekoe Mattéus 5:5). Meki Jehovah Kotoigi na ala presi na grontapoe doe boen foeroe moeiti fajafaja foe kon ini kontakti nanga safri-ati sma soleki foe bow den fisitiman foe na Memrefesa, èn meki den gi lobi jeje jepi na fosten kompe di kande kon de inactief. A libi foe den ben moro diri na ini na ai foe Jehovah (Mattéus 18:14). Foe kan tan libi psa na bigi benawtoe èn kisi jepi, dan den disi moe ’wasi den krosi èn meki a kon weti na ini a broedoe foe a Lam’ èn hori en weti. Wi e begi taki na „bigi ipi” tan gro na ini nomroe te moro safri-ati sma e kon ferstan taki den moe meki sma kon sabi den leki dienstknegti foe Jehovah di gi densrefi abra èn di makandra nanga en pipel abi wan diri prati na ini na ’préki foe na boen njoensoe foe wan moro betre sabi’. — Openbaring 7:9, 14.
San joe ben sa piki?
◻ Na tapoe sortoe toemsi moi fasi Jesaja 52:1, 2 ben kon troe na ini disi ten?
◻ Fa Jesaja 52:5-7 ben tjari kon na tapoe den kownoekondre prékiman?
◻ Fa Jehovah ben sreka en pipel na fesi tapoe na gro di ben de a den fesi?
◻ Sortoe bewijsi de taki jehovah ben blesi na wroko someni tintin jari langa, èn spesroetoe na ini 1983?
[Faki na tapoe bladzijde 5]
Djaso wantoe aparti bericht de di den wachttorenbijkantoro ben seni kon:
▪ Canada: A jari e gi foeroe hémarki foe si, makandra nanga 77.003 prékiman, wan gro foe 13 procent te joe teki en gersi nanga a gemiddelde foe a jari a fesi.
▪ Chili: Ini augustus wi ben abi wan njoen hémarki foe 21.344 prékiman, wan gro foe 25 procent; 70.522 sma ben fisiti na Memrefesa.
▪ El Salvador: Foe januari te augustus wan toe njoen hémarki ini prékiman ben de, te doro 12.008, wan gro foe 25 procent; 44.967 sma ben de na a Memrefesa.
▪ Ierland: Wi kren go miti wan njoen hémarki foe 2215 prékiman na ini augustus, den 127 sma di ben teki dopoe de wan gro foe 17 procent.
▪ Israël: Wan hémarki di wi no ben doro ete foe 297 prékiman ini april ben de wan gro foe 14 procent.
▪ Filippijnen: Baka den distriktcongres foe 1982 na nomroe foe prékiman fré go na tapoe foe 60.000 te 70.000.
▪ Sri Lanka: Wi abi féfi hémarki baka makandra ini prékiman, nanga wan hémarki di wi no ben doro ete toe 764 ini mei — wan gro foe 14 procent.
▪ Wan Afrikankondre pe a wroko tapoe: Na moi nomroe foe 25.430 sma di ben de tapoe na Memrefesa, de sowan toe nanga afoe tron na gemiddelde nomroe prékiman.
[Schema na tapoe bladzijde 4 di e tjari sani kon na krin]
(Efoe joe wani si pe den sani disi skrifi, loekoe a tijdschrift)
Kownoekondre gro na mindri pisiten foe 10 jari
Gemiddelde nomroe foe prékiman di ben de na ini na dienst
1943 109.794
1953 468.106 Gro: 358.312
1963 956.648 Gro: 488.542
1973 956.648 Gro: 488.542
1983 2.501.722 Gro: 845.049