Gi kotoigi e tjari Kownoekondre gro kon

„Meki Jehovah meki joe kon moro foeroe doesoen tron moro ete leki joe de, èn meki a blesi joe, joisti soleki a ben pramisi joe.” — DEUTERONOMIUM 1:11.

1, 2. (a) San Jehovah ben pramisi Israël? (b) Fa a ben meki en pramisi kontroe, ma foe san disi ben anga?

WAN GRO FOE DOESOENDOESOEN! Dati ben de na begi foe Mozes gi Jehovah „santa naatsi” Israël. Jehovah ben pramisi bigi sani gi na naatsi dati (Ex. 19:5, 6; loekoe ooktoe Genesis 12:2, 3). A ben meki den pramisi dati kontroe?

² We, sowan 500 jari baka di Mozes ben taki den wortoe di de na tapsé, wi e kisi foe jere: „Juda nanga Israël ben kon foeroe, so foeroe sma leki den aisanti di de na sekanti, ala di den ben e njan nanga dringi nanga e prisiri.” Na koningin foe Scheba, di ben komoto foe farawe foe si na glori foe na kownoekondre dati, ben bari a fesi foe Salomo: „Loekoe! den no ben ferteri mi afoe srefi. Joe ben psa na marki ini koni èn dati sani e waka boen san mi ben jere èn foe san mi ben arki. . .. Meki Jehovah, joe Gado, kisi blesi . . . bika Jehovah lobi Israël te ten di no abi marki” (1 Kown. 4:20; 10:7-9). Solanga na pipel dati ben dini Jehovah getrow leki en kotoigi, a ben meki foe troe sani waka boen èn a ben meki sani gro.

3. (a) Sortoe kotoigi Petrus ben gi ini a tori foe a „pipel foe Gado gi en nen”? (b) Foe san-ede meki a pipel dati nanga reti e tjari a nen Jehovah Kotoigi?

³ Moro leki doesoen jari baka na ten foe Salomo, na apostel Petrus ben kotoigi a fesi na kristen Tiri-Skin foe Jeruzalem èn ’ben ferteri soifri fa Gado foe na fositron ben poti en prakseri na tapoe den naatsi foe a teki a mindri den wan pipel gi en nen’ (Tori. 15:14). Den Israëlsma ben de pipel gi na nen foe foe Gado. Ma now Gado ben tjari „wan pipel gi en nen” kon agen makandra, na kristen gemeente, na jeje Israël di ben sa kotoigi ooktoe gi Jehovah èn ben sa meki en kownoekondreprakseri bekenti (Galaciasma 6:16). Nanga reti sma now e kon sabi na pipel disi na a heri grontapoe na a nen di Jehovah srefi ben poti kon a fesi soleki tanapoe ini Jesaja 43:10-12, namkoe ’Jehovah Kotoigi’. San de ini a tori, dati den de wan pipel gi Jehovah nen?

„Kotoigi foe mi”

4. (a) Foe san-ede Jehovah Kotoigi moe de ooktoe kotoigi foe Jezus? (b) Sortoe ekempre Jezus ben libi gi wi leki fa a bijbel e sori ini a tori foe na gi foe kotoigi foe Jehovah?

⁴ Jezus srefi ben gi na pipel disi na komando: „Oenoe sa de mi Kotoigi. . . te na den moro farawe kontren foe grontapoe” ( Tori. 1:8). „Kotoigi foe mi” — den wortoe disi foe Jezus wani taki dati foe Jezus èn no foe Jehovah, kotoigi ben moe gi? Kwetkweti! Na ini na ten dati foe teki wan bosroiti, Jehovah boen-ati ben komoto foe na Israël na skinfasi go na a Israël na jejefasi, a ben de fanowdoe foe gi wan kotoigi finifini foe Kristus, di de a fundamenti foe na njoen seti disi. Ma Jezus e tan alaten na ondro en Tata. A e gi oenoe na eksempre ini a tori foe a gi foe kotoigi foe Jehovah nen nanga kownoekondre. — Joh. 5:13; 6:38; 17:6, 26; 18:37.

5. (a) Foe sortoe sani di abi foe doe nanga Jezus wi moe gi kotoigi? (b) Fa wi e kon na ini disi ini den foetoemarki foe Jezus?

⁵ Jezus Kristus de na Mindriman foe na njoen verbontoe, èn den salfoe kristen di teki poti na ini e kisi na kari foe kisi na kownoekondre. En de „na prenspari wrokoman foe a libi”, di Jehovah e gebroiki foe bai den libisma kon fri foe dede. Jezus „moe tiri leki kownoe” te leki ala féjanti foe Gado èn libisma saka na en ondro èn wan moi paradijs kon baka na a grontapoe. En de „na Manpikin feo Gado” di e kari den dedesma ini wan opobaka komoto foe den grebi (Hebr. 9:15; Tori. 3:15; Ps. 110:1, 2, 5; 1 Kor. 15:25-28; Lukas 23:42, 43; Joh. 5:25-29). Leki Jehovah Kotoigi wi e gi kotoigi ooktoe foe na toemsi moi prati di na Manpikin abi ini na poti kon reti foe Jehovah nen. Na ini a pisi tori disi wi e waka ini den foetoemarki foe wi Meester, di ensrefi ben de wan Kotoigi foe Jehovah srefsrefi — „na Getrow Kotoigi”. — Openb. 1:5; 3:14; Joh. 18:37; 1 Petr. 2:21.

Soema e gi kotoigi?

6. (a) Soema de den wan enkri wan di na ini a ten disi e gi kotoigi foe na kownoekondre? (b) Foe san-ede wi kan taki dati den e doe „moro bigi wroko”?

⁶ Na ini a ten disi wan pipel di tjari kon na wan e gi kotoigi „te na den moro farawe kontren foe grontapoe”. A de a pipel di na apostel Petrus ben taki foe en — ’na pipel gi a nen foe Gado’ — di e gi kotoigi foe Jehovah èn en kownoekondre ini anoe foe Kristus Jezus. Ini a tori disi Jezus srefi ben taki gi en discipel: „A sma di e sori bribi ini mi, sa doe ooktoe srefi den wroko di mi e doe; èn a sa doe moro bigi wroko leki disi, bika mi e go na a Tata” (Joh. 14:12). Komoto foe en hemel positsi na a reti anoe foe en tata na kownoe Jezus Kristus e tiri now na moro bigi kotoigi-wroko di oiti ben doe dja na grontapoe. Soleki Jezus ben taki dan bakaten „na boen njoensoe disi foe na kownoekondre sa préki. . . na na heri grontapoe pe libisma e libi. . . leki wan kotoigi gi ala naatsi, dan „a kaba sa kon” — Matt. 24:14.

7. (a) Foe san-ede meki den sekte foe na kristenheid no e gi kotoigi? (b) Foe san-ede meki kontrari foe disi Jehovah Kotoigi e doe den dienst fajafaja?

⁷ „Na boen njoensoe disi foe na kownoekondre” de a moro bigi njoensoe di e graboe na prakseri foe wan sma èn di oiti ben préki gi libisma. A de a glori boen njoensoe di den kerkigroepoe foe na kristenheid no e taki foe en srefsrefi. Den no abi wan kownoekondre howpoe gi a ten di e kon. A no de wan ferwondroe sani dati den no e gi kotoigi foe en! Den no ben poti prakseri na tapoe na moro span sani di ps na ini na heri historia — Na konbaka foe na Manpikin foe libisma na ini glori foe teki presi tapoe en troon èn foe kroetoe den naatsi nanga pipel foe grontapoe. Dati de troetroe wan sani foe gi kotoigi foe en! Foe dat’ede, meki kotoigi foe Jehovah èn en Kristus now na ondro tiri foe den engel e meki ’tégo njoensoe bekenti leki prisiri ten gi den di e libi na grontapoe, èn gi ibri naatsi nanga lo èn tongo èn pipel’. Joe e teki prati fajafaja na a kotoigiwroko disi? — Openb. 14:6, 7; Matt. 25:31-33.

Wan bigi kotoigi na ini 1984

8. (a) Foe san-ede meki na bericht di e go foe na dienstjari 1984 moe meki oen de kolokoe? (b) Sortoe sani e hari njoen discipel?

⁸ Na bericht foe na dienstjari foe Jehovah Kotoigi na a heri grontapoe, di de na bladzijde 7 te nanga bladzijde 8 foe na tijdschrift disi, ben meki wi si o foeroe wi Gado, Jehovah ben blesi den moeiti foe en sakafasi Kotoigi. Ala nanga ala 203 kondre de ini na tabel. Foe na nomroe disi 172 kondre gi rapport foe wan gro na ini prékiman. Èn ai meki den kownoekondre prékiman disi ooktoe kolokoe foe kan taki: ’Masra ben meki den gro, ja, psa marki na ini lobi gi makandra èn gi ala sma’ (1 Thess. 3:12). Na lobi-ati wanfasi a mindri Jehovah pipel moksi nanga na kownoekondre kotoigi, e hari hinihipi njoen discipel kon. Gi den Jezus e taki: „Oenoe sa sabi a waarheid èn a waarheid sa meki oen kon fri.” — Joh. 8:31, 32.

9. (a) Fa na grani kan kon gi wi ooktoe foe gi wan bijdrage na ini a bericht disi? (b) San den nomroe e sori ini a tori foe Jehovah nanga en pipel?

⁹ Fa wi ben man foe meki wan toemsi moi dienstbericht disi? Nanga jepi foe na velddienstrapport di wi leki aparti kownoekondre prékiman e gi getrow ibri moen. Wi no kan prisiri dati wi ben gi wi pikin bijdrage na a toemsi moi èn bigi bericht disi? Den nomroe e meki wi si fa Jehovah ben kanti abra en kotoigi ’blesi leki wan bigi alen’ — „a pipel disi foe en nen” di tjar,i kon na wan na ini wan banti foe lobi-ati dienst na a heri grontapoe. — Mal. 3:10; Ps. 56:10, 11; Kol. 3:14.

10. (a) San e poti krakti a tapoe, dati kotoigi moe sori taki den e offer densrefi? (b) San den Santa Boekoe e taki foe sma di ben kibri den soifrifasi èn foe den paiman?

¹⁰ Foeroe foe a kotoigiwroko disi ben doe na ondro ferfolgoe noso pina èn ben kostoe foeroe offer foe wan sma srefi. Disi de wan sani foe ferwakti, bika na wortoe di gebroiki djaso „kotoigi” de wan vertaling foe na Griki wortoe màrtus ofoe màrtur, foe san ooktoe a wortoe „martelaar” — wan sma di e gi kotoigi nanga en dede, — ben komoto. Disi ben poti krakti a tapoe dati wi leki Jehovah Kotoigi moe sori dati wi de klari foe offer wisrefi, dati alaten wi moe de nanga a faste bosroiti foe gi wisrefi krinkrin ini a dienst foe Gado èn na ondro ala omstandigheid moe hori wi soifri retifasi, efoe a de srefi fanowdoe te na ini dede. — Luk. 9:23; teki gersi nanga Job 2:3; 27:5; 31:6; Tori foe den Apostel 22:20; Openbaring 2:10.

Den sma di e kibri den soifri retifasi, e kisi blesi

11, 12. (a) Sortoe garanti di e tranga wi Jehovah e gi wi? (b) Fa a pipel foe en ben kon leki winiman foe den kwinsi foe totalitaire makti?

¹¹ Na ini ten foe ferfolgoe Jehovah ’nen-pipel’ abi krakti fanowdoe „di e go moro fara leki san de normaal” foe kakafoetoe gi den hebi aanval foe Satan nanga en ogri jeje groepoe. Jehovah e gi a krakti dati, e fri en getrow kotoigi èn e meki sani waka boen gi den (2 Kor. 4:7-9; Jes. 54:17; Jer. 1:19). Loekoe foe eksompre na situwasi pikinso di na ini a ten foe na di foe Toe Grontapoefeti di ben de ini a ten foe den asmogendheden ondro a tiri foe Doisrikondre, Italië nanga Japan. Foe di Didibri e meki gebroiki foe takroe-ati dictatoriaal rigeri, ’meki a ben braak komoto foe en mofo wan liba’ foe ferfolgoe nanga a prakseri foe tapoe a mofo foe a kotoigiwroko di na hemel organisaatsi foe Gado di ben gersi wan oema ben moe tjari. Ma Satan ben man doe dati? Na no wan fasi! Jehovah ben tjari sani na tapoe sowan fasi dati den demokratis makti foe grontapoe bon swari dati. ’Den goddelowsoesma ben koti poeroe’ èn sani ben waka boen na wan wondroefasi now gi Jehovah loyaal kotoigi na ini den kondre dati. — Openb. 12:15, 16; Ps. 37:28, 29.

¹² A no langa psa kaba a ben de so dati na Wachttorengenootschap na ini den dri kondre dati ben bow bigi drukkerijen di ben moesoe kisi modern jepisani foe ben meki wan tra sortoe foe froedoe kon — wan froedoe foe miljoenmiljoen èn ete moro miljoenmiljoen bijbel nanga tra kownoekondre boekoe di abi leki marki foe bow na jejfasi foe Jehovah Kotoigi nanga tra sma di e angri foe na waarhied. Na ini Doisrikondre, Italië nanga Japan dan moro leki 300.000 prékiman e go now na den oso foe den sma foe gi kotoigi foe na kownoekondre èn alape na ini na veld foe na heri grontapoe Jehovah e blesi den reti-ati pipel nanga gro! — Teki gersi nanga Psalm 115:12-15.

13. (a) Fa na jaribericht e sori dati getrow kotoigi e libi akroederi nanga na jaritekst? (b) Fa disi moesoe gi wi dek’ati?

¹³ Ma Didibri di sabi taki en ten sjatoe e tan feti nanga den sma „di e hori den komando foe Gado èn di abi na wroko di de ini na gi kotoigi di e go foe Jezus” (Openb. 12:12, 17). Na gens foe Satan de spesroetoe wan takroe-ati wan ini kondre di wi skrifi foe den na ini a bericht dja na ini na tijdschrift leki „28 tra kondre”. Den kotoigi na ini den kontren disi ben libi getrow akroederl nanga wi jaritekst foe 1984 èn ’ben sori moro dek’ati srefi foe taki a wortoe foe Gado sondro frede’ (Fil. 1:14). Na gro foe den na ini prékiman foe 3,1% de wan sani di de foe prijse sref’srefi. Meki na eksempre foe den gi wi alamala dek’ati ’foe tan tjari gi Gado nanga faja wan srakti-ofrandi foe prijse, namkoe na froktoe foe den mofoboeba di e meki en nen bekenti na publiki’. — Hebr. 13:15.

14. (a) San na ini na geval foe wi kan kon tapoe a gi foe wan „kotoigi”? (b) Awansi sortoe situwasi de foe san-ede tokoe ete wi moe tan gi kotoigi nanga dek’ati?

¹⁴ O moro den toestand na ini na grontapoe e kon moro ogri, dan a no de foe taki dati ooktoe trawan na mindri wi sa kisi ferfolgoe, sa hari tjari go na fesi kroetoebangi èn sa poti go na ini straf’oso. Jezus ben poti baka makandra den sortoe ondrofeni disi na mindri den sani di „ben sa psa” bifo na kaba kon èn a ben taki morofara „a sa waka gi joe so, dati joe gi wan kotoigi.” Na ini ala situwasi Jehovah Kotoigi soboen moe tan gi kotoigi foe Gado nanga Kristus. Foeroe foe den e horidoro aladi bita gens de foe na sé foe na famiri, na spotoe foe mati, skoromati èn den sjen sani di den e kisi na ini na gebied pe den moe préki. Joe e gi nanga dek’ati kotoigi aladi omstandigheid de di de wan troetroe tesi? Dan Jezus e taki ooktoe gi joe: „Nanga horidoro foe joe sé joe sa kisi joe sili.” — Luk. 21:7, 9-19.

Kownoekondregro

15. San na wantoe foe den spesroetoe punt na ini na tabel tapoe na bladzijde disi?

¹⁵ „Kownoekondregro” — fa disi de wan thema di fiti gi wi district-congres di ben ori ini na bigi dréten foe 1984, bika disi te joe loekoe en foe a sé foe gro de troetroe a moro boen jari gi wi! Loekoe na tabel tapoe na bladzijde disi pikinso! Wi meki en foe den bericht di wi ben kisi foe 95 bijkantoro foe na Wachttorengenootschap di abi na loekoe abra na kotoigiwroko ini 203 kondre.

16. Ferteri foe wantoe aparti wortoe foe prisiri di kon foe na heri grontapoe.

¹⁶ Na ruimte no e gi oenoe pasi foe skrifi ala wortoe foe prisiri di wi kisi makandra nanga na jaribericht foe den bijkantoro disi, ma djaso wantoe eksempre de foe den difrenti pisi foe na grontapoe:

Alaska: Na heri dorpoe Metlakatla ben kon loekoe foe si fa 230 Kotoigi foe Jehovah ini 32 joeroe ben bow wan toemsi moi kownoekondrezaal. Na zaal wi ben wije na tapoe sonde foe nasrefi weekend dati.

Honduras: 3663 prékiman ben de te so fara na hémarki di noiti wi ben doro; te wi loekoe den 17.005 sma di ben de na tapoe na Memrefesa dan wi moe doe boen foeroe wroko ete.

Brasjon: Na wán hémarki baka a trawan e hipi ensrefi na ini 160.927 prékiman; 474.450 sma ben de tapoe na Memrefesa.

Thailand: Wan bruizende pionierprakseri de a mindri oenoe; 22 procent foe ala prékiman ben de ini april ini na pionierwroko.

Papoea Nieuw Guinea: Na moro hé nomroe foe wi jepipionier ben de 91 procent tapoe a di foe a jari di psa; den sm di ben de na tapoe na Memrefesa ben gro nanga moro leki doesoen èn ben de now 7704.

Oostenrijk: Na pionierprakseri e wroko leki wan faja èn tapoe a kontren dati wi ben abi féfi hémarki di ben waka baka makandra. Na hémarki foe wi 15.618 prékiman ben de a di foe sébi hémarki di ben waka baka makandra.

Zambia: Wi ben doro wan absoluut hémarki foe 58.925 prékiman; na nomroe foe sma di ben de na tapoe na Memrefesa ben de 393.431 — 110.447 moro leki a jari di psa.

17. (a) Fa na pionierveld e kon moro bigi? (b) Sortoe praktis marki wi e rikomanderi èn gi soema? (c) San na a njoen hémarki ini prékiman èn san kan meki disi doe kon?

¹⁷ Foe den bericht e kon na krin dati getrow zendeling nanga pionier na ini den fesi lin e tan feti na ini na gi foe kotoigi na ini njoen nanga owroe kontren. A de troetroe wan sani foe meki prisiri foe si fa den pionier e gro ini nomroe. Na nomroe foe jepipionier ala nanga ala di ben gi rapport ini april gro srefsrefi te doro wan hémarki di noiti a fesi wi ben kisi foe 323.644, wan gro foe 49%. Boen foeroe jepipionier ben teki na grani foe go ini na gewone pionierwroko. Boiti foe dati, foeroe foe wi jongoe kownoekondre prékiman e poti na pionierwroko leki marki foe den èn e sreka densrefi a tapoe na ini den laatste jari foe den tapoe na middelbare skoro na ini praktise zin. Na bakapisi te joe loekoe a eri tori de krin foe si na ini na toemsi moi gro ini a nomroe foe pionier. Disi ben meki ooktoe wan geest foe faja go a fesi na ini wi gemeente, di sondro degedege ben meki a njoen hémarki foe 2.842.531 prékiman kon na a heri grontapoe, 7,2% moro leki na hémarki foe 1983. Jo no bréti dati joe ben doe wan sani na ini na bigi go na fesi disi?

18. (a) Tapoe sortoe tra punt wan bigi gro ben doe kon ini 1984? (b) Sortoe mogelekheid foe gro de ete efoe joe loekoe na nomroe foe sma di ben de ete na a ten foe na Memrefesa èn fa wi lésiman kan doe wan sani nanga dati ete?

¹⁸ Na prisiri kotoigi di ben gi na ini 1984, de ooktoe foe si ini na prati foe tijdschrift nanga tra boekoe di ben gro, na rekord nomroe foe joeroe ini na velddienst, na moi gro ini gobaka na sma di abi belangstelling èn na ini na nomroe foe osobijbelstudi di e hori na sma oso. Nanga foeroe ferwakti wi e loekoe na fesi foe moro froktoe kon foe na faja dienst disi! Wan toemisi moi potentieel foe wan moro bigi koti foe froktoe de! Na aparti nomroe foe sma di ben de na tapoe na Avondmaal foe Masra tapoe 15 april foe na jari di psa e kotoigi foe disi. Na ini den gemeente foe Jehovah Kotoigi alape na grontapoe so wan 7.416.974 sma ben go na tapooe, foe soema 9081 ben gebroiki na brede nanga na win èn nanga dati den ben sori dati den de wan pisi foe na „pikin ipi” foe Masra. Meki ala wi lésiman tan gro na jejefasi sodati den kan meki presi foe abi wan prati na a moro bigi kotoigiwroko nanga na tjari kon makandra foe sma di de na wi fesi. — Teki gersi Efesesma 4:15; Filippisma 1:9-11.

19. Foe sortoe sani wi kan taki Jehovah grantangi èn san wi e begi foe a ten di e kon?

¹⁹ Foe troe, wi kan taki den wortoe foe Mozes ete wantron èn taki foe Jehovah Kotoigi, na disiten pipel gi en nen: „Jehovah, oen Gado, ben meki oen kon foeroe èn loekoe, oen kon so foeroe na a dé foe tide leki den stari na hemel” (Deut. 1:10). Wie begi wi Soeverein Masra Jehovah efoe a wani tan blesi na kownoekondre kotoigi wroko dati a waka boen èn efoe a wani gi en pipel moro gro ete!

San joe ben sa taki?

◻ Foe san-ede mekl Jehovah Kotoigi moe de ooktoe kotoigi foe Jezus?

◻ Sortoe toemsi bigi kotoigi feni presi na ini 1984 na ini grontapoe?

◻ San e sori dati Jehovah e blesi getrow kotoigi?

◻ Na sortoe fasi na bericht foe 1984 de wan dekati gi wi?

[Faki na tapoe bladzijde 11]

Bréti, kolokoe èn nanga tangi

Foe wan kondre pe lanti tapoe a wroko foe Jehovah Kotoigi now moro leki fotenti jari kaba na tori disi komoto: „Na moro bigi prisiri [gi wi] de a gro na ini na préki èn na leriwroko ini na veld. Foeroe ben de na ini na jepipionierwroko. Wan foe den ben tjari en firi kon ini wortoe na a fasi disi: ’Mi e prisiri, e bréti, èn kolokoe psa marki, èn abi troetroe satisfaksi na inisé.’ Wan tra jepipionier ben taki: „Mi de so breiti dati mi kan doe wan sani san e plisi Jehovah. Mi ben kan opo féfi njoen osobijbelstudi.” Wan trawan ben taki: ’Mi e taki Jehovah tangi, bika a ben jepi mi foe kweki na lobi di de fanowdoe foe jepi trawan.’ Wan gemeente foe 61 prékiman ben teri ini wan moen 38 jepipionier. A bakapisi ben de, dati 66 njoen osobijbelstudi ben opo.”

[Raportoe na tapoe bladzijde 7, 8]

1984 DINIWROKO RAPORTOE FOE JEHOVAH KOTOIGI NA HERI GRONTAPOE

(Loekoe a tijdschrift)

[Schema/Faki na tapoe bladzijde 10 di e tjari sani kon na krin]

Wan teki gersi nanga makandra foe na grontapoe bericht

1984 1983 Gro

Wachttorenbijkantoro 95 94

Kondre di e gi rapport 203 205

Hémarki ini prékiman 2.842.531 2.652.323 7,2%

Gemiddelde ini prékiman 2.680.274 2.501.722 7,1%

Gemiddelde ini pionier 258.936 206.098 25,6%

Jepipionier (april) 323.644 217.860 48,6%

Totaal velddienstjoeroe 505.588.037 436.720.991 15,8%

Boekoe di prati 36.639.925 36.039.400 1,7%

Abonnement di sroto 1.812.221 1.756.153 3,2%

Tijdschrift di prati 287.358.064 258.698.636 11,1%

Gobaka 195.819.093 174.687.309 12,1%

Gem. bijbelstudi 2.047.113 1.797.112 13,9%