Kisi tranga nanga jepi foe a krakti di psa ala san de normaal

’A krakti di psa ala san de normaal, de foe Gado èn no foe wisrefi’. — 2 KORINTESMA 4:7.

1. San Jehovah ben sabi langa ten psa kaba foe a pisten foe oen foe now ini a historia, èn fa a warskow den dienstknegti foe en?

LANGA ten psa kaba Jehovah ben sabi kaba foe den moeilek ten di ben sa kon abra ala naatsi foe grontapoe. A ben sabi na fesi taki na gridi èn godlosoefasi foe a libisma-famiri te foe kaba ben sa tjari wan ogri koti kon foe bidrigifasi èn tranga. Na jeje foe Jehovah ben bewégi na apostel Paulus foe barwroko foe na krin warskow di e kon now: „Ma sabi disi, dati ini den laatste dé, moeiliki ten sa doro, di tranga foe pasa. Bikasi den sma sa lobi densrefi nomo, lobi na moni, sa de asranti, abi hémemre, gongosaman, no gi jesi na papa nanga mama, sondro tangi, deloyaal, no abi wan reti lobi, no de klari foe meki no wan kroderi, e taki ogri, sondro foe dwengi densrefi, krasi, sondro lobi foe boen sani, toriman, no ke foe noti, abi bigi memre, nanga moro lobi gi prisiri leki lobi gi Gado, di abi wan fasi foe dini Gado nanga respeki, ma no e sori a krakti foe en” (2 Timotéus 3:1-5). Séker wan kefarlek libiklimaat foe den sma di e proeberi foe dini a Gado foe waarheid!

2. A ben sa de makriki gi den kotoigi foe Jehovah foe meki den sani di Jehovah ben abi ini prakseri nanga den kontroe, èn san den ben sa abi fanowdoe foe sani waka boen?

² Tokoe Jehovah ben abi na en prakseri foe meki en nen nanga en Kownoekondre meki bekenti na alasé foe grontapoe na mindri foe den fasi disi. Nanga jepi foe soema? Nanga jepi foe wan pipel, di a ben sa tjari en nen di wini taki so foeroe nanga en prakseri kon a krin gi den — Jehovan Kotoigi (Jesaja 43:10-12). A ben sabi na fesi taki den ben sa ondrofeni gens foe a sé foe tiriman di ben sa si a kownoekondre foe Gado leki wan factor foe tjalansi èn stré nanga den (Psalm 2:2, 3). A ben sabi ooktoe taki den kotoigi foe en ben sa abi foe njan problema nanga skinati di ala tra sma abi foe doe nanga den. Den ben sa abi krakti fanowdoe di ben sa psa san densrefi ben sa man foe tjari. Den Gado ben sreka na spesroe toe fanowdoe dati?

3. San Jehovah ben gi Paulus, san a e gi ooktoe na den dienstknegti foe en na ini a moeilek ten disi?

³ Den ondrofeni foe na apostel Paulus e gi na piki tapoe na aksi dati. Wantoe foe den kefar foe san a ben tanapoe a fesi e kari na ini 2 Korintesma 11:23-27. Foedi Jehovah ben poti Paulus leki apostel èn lerari foe den naatsi, a moro bigi prakseri ben poti na tapoe a leriwroko (Romeini 11:13). Ma fa a ben man psa ala den kefar èn klari a wroko di a ben kisi foe doe foe Gado? Jehovah ben e ori wakti na abra en loyaal diensknegti èn tapoe ala moeilek momenti a ben e fri en — foeroetron tapoe a laatste momenti. Foe meki Paulus ben kan doe na kristen diniwroko dati a waka boen, Gado ben gi en „krakti di e psa ala san de normaal” (2 Korinte 4:7). Disi ben meki na apostel ben man foe kakafoetoe gi skinati nanga pina. Paulus ben e èrken na publiki taki a ben e kisi na jepi disi foe Gado di a ben skrifi: „Gi ala sani mi abi na tranga nanga jepi foe en di e gi mi krakti.” — Filippisma 4:13.

4. Paulus ben e èrkèn a jepi di a ben e kisi foe Gado, èn fa disi ben e wroko na en tapoe?

⁴ A gersi data a de so dati foe Paulus ede Gado no wawan ben kon a mindri nanga jepi foe wondroe, ma a ben e jepi en ooktoe foe di a ben ’e gi en krakti’. Disi ben meki en mogelek gi na apostel foe oridoro a wan boen fasi, èn foe doe en diniwroko te a klari. Foe dat’meki a ben skrifi ooktoe dan: „Mi no e sjen foe a boen njoensoe; a de foe troe a krakti foe Gado gi ibriwan sma di abi bribi foe kisi jepi” (Romeini 1:16). No soso na mene èn a gebroiki foe foeroe profétitori foe owroeten, ben tjari kon na krin gi Paulus, ma ooktoe a boen njoensoe ben tjari kon a krin gi en, èn a ben abi na overtoigi foe na waarheidsgetrowfasi foe en. A no a misi dati sabi foe na waarheid nanga waarderi foe dati ooktoe ben kon de fonten foe krakti gi en.

Den froewondroe sani di Jehova seti

5. Jehovah ben poti moro mendri prakseri tapoe den sani di en kotoigi di e libi now na grontapoe abi fanowdoe?

⁵ Ma fa a de nanga den dienstknegti foe Jehovah di de ini den laatste dé disi na grontapoe? Jehovah ben sorgoe gi den? Ja, foetroe! Neleki na apostel Paulus wi abi ooktoe den moi profétitori ini a Santa Boekoe. Foedi Jehovah ben sabi na fesi san en pipel ben sa abi fanowdoe, meki tapoe boen-ati fasi foe a boen foe den a ben sorgoe foe den boekoe disi sodati den ben kan kisi dek’ati nanga trowstoe foe den. Sma ben sa ferstan den profétitori disi moro boen te a ten foe a kontroe foe den ben doro.

6. Fa a profétitori di Gado ben gi Jesaja, gi trowstoe èn krakti na a pipel foe Jehovah ini a ten disi?

⁶ Wan foe den profétitori Jesaja, a manpikin foe Amos, ben skrifi pikinmoro sébi hondro jari bifo Jezus ben gebore (Jesaja 1:1). Jesaja ben skrifi krakti kroetoeboskopoe di no ben de soso foe en égi naatsi, ma ooktoe tége den kondre di ben didon a lontoe, bigi nanga pikinwan. A mindri den kroetoeboskopoe disi a proféti ben e meki boen njoensoe bekènti ooktoe gi den loyaal anbegiman foe Jehovah — njoensoe di ben sa gi den trowstoe ini ala den benawtoe. Èn neleki den getrow djoe ini Jesaja ten ben e feni krakti nanga howpoe ini a boen njoensoe foe Jehovah, na so den loyaalwan foe disten e feni trowstoe, èn e kisi krakti èn blesi foe di den bigi pramisi foe Jehovah di abi foe doe nanga den e kontroe.

7, 8. (a) Fa den wortoe foe Jesaja 32:1, 2 ben gi krakti nanga dek’ati na den respeki djoe ini Jesaja ten, èn spesroetoe nanga ai tapoe sortoe omstandigheden? (b) Fa den srefi wortoe kan gebroiki tapoe na situwasi a mindri den Jehovah Kotoigi foe a ten disi?

⁷ Ini Jesaja kapitel 32 wi e kisi sowan dek’ati. Den fosi toe vers abi wan pramisi di kontroe kaba na ini wi ten: „Loekoe! Wan kownoe sa tiri gi soso regtvaardikifasi, èn foe taki foe granman, den sa tiri leki granman foe soso geregtigheid. Dan ibriwan moe de leki wan kibripresi gi na winti èn leki wan kibri presi gi na alen, leki watrafonten na ini wan kondre sondro watra, leki wan kowroe foe wan hebi, let’opoe stonbergi na ini wan dré kondre.” Fa disi ben sa de ini a ten foe Jesaja boen njoensoe gi den opregti anbegiman foe Gado, baka a langa ondrofeni foe den nanga kownoe èn tiriman di no ben de getrow!

⁸ Fa disi de wan boen njoensoe gi Jehovah Kotoigi na ini a ten disi! Spesroetoe sensi 1914 a Kownoe Jezus Kristus di poti tapoe a troon ben tjari safrisafri wan toemsi moi toestand kon a mindri den bakaman foe en a grontapoe. A poti „tiriman” a mindri den (Hebrew: sarim) di foetroe nanga regtvaardikifasi èn lobifasi ben e loekoe den. Kontrari nanga den tiriman na alasé foe grontapoe di de so foeroe e onderdruk sma èn e handri foe den égi belang, a Kownoe foe Gado organisaatsi meki frantwortoe man kon di no e kisi grani soleki den orde foe „kerkigranman” ofoe wan sani so. Prefoe foe dati den de dinari nanga sakafasi, man di e ke troetroe foe a boen foe sma di gersi nanga skapoe di Jehovah tjari kon na wan ini wan ipi. Na ai di den man disi, di de toe „tiriman” foe a ten di e kon foe na Njoen Ordening, sa ori na tapoe sani, sa de troetoe wan sani di e gi wan switi firi.a

9. Sortoe kenki ben feni presi a mindri a pipel foe Jehovah?

⁹ Fa disi ben tjari wan kenki kon na ini na organisaatsi foe Jehovah dienstknegti na grontapoe! A de precies so leki fa a ben tanapoe na ini Jesaja 32:3: „Èn den ai foe den sma di e si no sa tapoe, èn srefi den jesi foe den sma di e jere sa arki boen.” Foe di den abi na faja lostoe foe gi Jehovah grani èn dini en, meki a ben opo den ai foe den ati èn den jesi foe den ferstan. A ben meki den kon si na wondroefasi san en wani de gi den. Loyaal Kotoigi no e abi na firi foe doe sani tapoe wan democratisch fasi nanga wrokofasi. Den sabi heri boen taki den e dini ini wan theocratisch organisaatsi, wan organisaatsi pe sma e go ondrosoekoe san de a wani foe Gado èn e handri moro fara akroederi a wani dati. A grani e go na a Bigi Theocraat foe di a e meki sakafasi dienstknegti di wani foe wroko a grontapoe kon sabi en prakseri.

10. San de wan toe foe den blesi ini san a pipel foe Jehovah di kisi boen leri e prisiri na ini?

¹⁰ Teri pikinso, efoe joe wani, den blesi di den srafoe foe Jehovah ben kisi. Wan foe den sani san e meki den prisiri na a soifri sabi foe Jezus Kristus de-noja na ini kownoefasi sensi 1914, na krin lin di e prati Gado organisaatsi di de foe si nanga di foe Satan, na go boen fara foe a prékiwroko di moe doe bifo na kaba foe Satan grontapoe kon, na santa fasi foe broedoe, na prenspari fasi foe gi Gado san na foe Gado, na kon boen baka foe a tiri ini na organisaatsi foe Jehovah Kotoigi so leki fa dati ben de mindri den fosi eeuw kristensma. Na paradijs toestand foe now mindri den troe anbegiman de ooktoe wan goedoe blesi. Ala den punt disi èn foeroe moro de alamala presenti foe Jehovah di ini na moeiliki ten disi ini a historia no wawan e gi wi krakti, ma ooktoe vréde, wanfasi nanga tevrédefasi.

11. Fa Jehovah ben leri den grontapoe vertegenwoordigers foe en tapoe tranga fasi, èn sortoe tekst e sori taki disi ben de fanowdoe?

¹¹ Jehovah dienstknegti kisi wan konsensi di de na tapoe a bijbel, sodati den e jere den fermane foe en, èn e teki den na ini densrefi èn poti den na ini den aladé libi (Psalm 25:10). Den kisi warskow foe den doti èn fisti wroko di Gado no wani si na ai. Den gridi, hoeroedoe, bakabaka sani di son sma ben doe na ini a ten di psa, didon na wi baka now; den broko krinkrin nanga den (1 Petrus 4:3). Disi de so gi alasma di wani prisiri ini Kownoekondreblesi. Alamala moesoe de krin na jeje, moreel èn na skinfasi te wi wani foe abi na grani foe pristeri Jehovah den ofrandi foe prijse, ’wan ofrandipresenti na ini regtvaardikifasi’ (Maleachi 3:3; Jesaja 52:11). Ma fa wan kefarlek firi foe sékerfasi e kon abra loyaal Kotoigi te den e miti makandra nange bigi ipi sma di troetroe bondroe kon na wan na ini na kolokoe dienst foe na Mekiman!

Leri foe Gado

12. Fa Jesaja 32:4 kontroe na mindri den dienstknegti foe now?

¹² Moro fara Jesaja 32:4 e taki: „Èn srefi na ati foe den sma di gaw foe doe sani sondro foe prakseri fosi sa poti prakseri na tapoe sabi, èn srefi na tongo foe den wan di e gagoe sa kon koni na ini a taki foe krin sani.” Ini a ten foe a Fosi Grontapoefeti a fikapisi foe den salfoewan no ben e si sani soifri, den ben doti ete nanga den prakseri foe Babylon èn a theocratisch fasi foe wroko no ben tjari kon na mindri den ete. Ma ini 1919 Jehovah ben meki den kon fri foe a katibo foe Babylon èn a ben bigin foe gi den moro sabi foe den waarheid foe en. Nanga den waarheid disi den ben leri foe de rédelek èn foe no de gaw nanga den mofoboeba. Now den e taki nanga sékerfasi foe bribi èn den no e aka-aka moro foe frede nanga onsékerfasi ede. Èn fa oen persoonlek kan de lepi, dek’ati prékiman foe a boen njoensoe? Te den njan boen foe a leri foe Gado, di e gi moro foeroe tapoe konmakandra ini na Kownoekondrezaal foe Jehovah Kotoigi. Foe eksempre degedege no de foe na theocratisch diniwrokoskoro taki a de wan wrokosani nanga san Jehovah blesi den dienstknegti foe en èn gi den krakti foe meki na waarheid bekènti sondro frede èn krin.

13. Foe sortoe taki wi moe kibri oensrefi?

¹³ Sosrefi toe a leri foe Gado ben leri den dienstknegti foe Gado foe no gi wan pramisi di den no sa hori ofoe foe gongosa ofoe foe taki wan sani di e hati wan sma. Séker a blesi foe Gado e rostoe tapoe den sma di e poti prakseri na tapoe a rai ini Prékiman 5:2: „No hasti joesrefi nanga joe mofo; èn foe taki foe joe ati, no meki a de esi foe taki wan wortoe na fesi foe na troe Gado. Bika na troe Gado de ini hemel ma joe de na grontapoe. Foe dat’ede den wortoe foe joe moe de troetroe pikinso”. Soboen a de toemsi prenspari foe no opo oen sten noiti ini bita kritiek tapoe na organisaatsi foe Masra ofoe tapoe den sma di e teki fesi foe dati di poti. Jehovah de na Kroetoeman di sabi ala sari èn di wi moesoe gi frantwortoe foe den wortoe disi èn tra soso wortoe toe. — Mattéus 12:36, 37; Leviticus 19:16; Judas 8.

14. Sortoe warskow Jehovah pipel e kisi dja, èn fa Odo 29:20 e poti wan strépi na ondro disi?

¹⁴ Na mindri den sma di no abi respeki gi na leri foe Jehovah, joe abi ooktoe sma di abi kritiek èn kragi tapoe Jehovah krin organisaatsi nanga den regel di a poti foe ori na vréde nanga a boen orde. Soso wan smara lin di e prati sani de a mindri den sma disi; nanga den di de troetroe oproeroeman foe troe. Dati Korach nanga en bakaman ben kon sabi di den ben prefoeroe foe de gaw nanga den mofoboeba èn foe opo tège Mozes a dienstknegti foe Gado — a ben wani taki dati den ben waipoeroe krinkrin (Numeri 16:1-40). Odo 29:20 e taki foe a tori disi: „Joe ben si wan man di de esi nanga en wortoe? Moro howpoe de gi wan sma sondro ferstan leki gi en.”

15. Fa den dienstknegti foe Jehovah foe noja e gebroiki den wortoe foe Jesaja 32:5, 6?

¹⁵ Jehovah ben blesi en pipel nanga koni foe kan si boen aparti foe ogri. Den e loekoe boen nanga sma di e kon nanga moi wortoe èn moi redenering, èn kande srefi nanga boen presenti, nanga na prakseri foe kori na ati foe den sma di no e loekoe boen. (Teki gersi 1 Timotéus 6:20, 21; Judas 16.) Den sma di e go na den kerki ben sa proeberi foe tjari boen njoensoe gi den, di de difrenti foe san den ben kisi kaba foe Jezus Kristus nanga en apostel. Na tapoe foe dati, sma di no e gebroiki den ferstan èn di e libi sondro den gronprakseri no e kisi aanstelling ini Jehovah organisaatsi leki dinari. Disi e akroederi nanga den wortoe: „Na lawwan den no sa kari moro langa wan sma di lobi gi trawan sani; èn foe taki foe a man di e libi sondro gronprakseri, foe en den no sa taki dati a de boen; bika wan lawman sa taki foe en sé soso lawsani, èn en ati srefi sa wroko tapoe san de takroe, foe wroko na a fadon komoto foe sma foe bribi èn foe taki tége Jehovah san de lawsani, foe meki na sili foe na sma di abi angri kon de légi èn a de meki a sma di abi dré-watra de srefi sondro dringi.” — Jesaja 32:5, 6.

16. (a) San de wan toe idee san den di fadon ben wani tjari kon? (b) San taki ini Jesaja 32:7 foe disi?

¹⁶ A no de so taki den sma di ben gwe libi wi na ini den jari di psa, foe di den „no ben de foe wi sortoe”, èn di e proeberi foe meki trawan waka na baka na srefi kefarlek libifasi disi, ben koti den srefi poeroe foe na fonten foe tranga jeje njanjan èn libiwatra di e kowroe ati? (1 Johannes 2:19) Èn den disi di de sondro ferstan no e gi trawan sani srefisrefi èn den no e gi nanga prisiri na sma di angri èn di e dré watra na regtvaardikifasi; kontrari foe dati den no e si a tranga fanowdoe taki ini oenoe ten a prékiwroko e doe tapoe orga fasi. Den e mene taki ibriwan sma moe kisi na fri foe tjari ensrefi nanga san en persoonlek e lési na ini bijbel èn nanga san en e ferstan foe dati, na presi foe de wan pisi foe wan wánfasi foe sma di e kisi leri foe libi èn waka leki fa den hégronprakseri foe na fermane foe Gado Wortoe e taki (Psalm 133:1-3; 1 Korintesma 1:10). Den wani mofinasma bribi dati Jehovah sa tan gi pardon na sondari foe tégo solanga den e sori beraw nomo. San e taki foe disi ini Jesaja 32:7 foe den di fadon foe bribi ini a Israël foe owroe ten, e wiki oen belangstelling: „Foe taki foe a man di e libi sondro gronprakseri, en wrokosani [sani foe doro en marki] de takroe; èn ensrefi ben gi rai ini a tori foe loesoe-fasi-foe-libi, èn foe trowe den mofinawan go na ini ongolokoe nanga jepi foe léwortoe, srefi te wan póti sma e taki san de reti.”

17. (a) Soema Jezus teki poeroe leki en bakaman? (b) Sortoe aksi e kon foe den activiteit foe den di moe kon ete na ondro den toestand ini a grontapoe di dé foe dé e kon moro takroe?

¹⁷ Foe den troe bakaman foe Jezus, di a ben teki poeroe foe di den ben ferstan na jeje nowtoe foe den, dan séker wan sma kan teki dati den e ’taki san de reti’. Ma den gensman di no e gebroiki den ferstan no abi belangstelling gi na troetroe tanboen foe den sma di e soekoe waarheid. Den de nomo foe hari sma foe waka na den baka, awasi sortoe kefar a sa tjari gi densrefi nanga gi trawan. Jehovah sa gi pasi meki reti-ati sma go ini a trapoe foe falsi redenering? A sreka sani foe blesi den dienstknegti foe en nanga den prékiwroko di den e doe na a heri grontapoe?

[Foetoewortoe]

San joe ben sa piki?

◻ Fa Jehovah e gi en kotoigi krakti na ini a ten disi?

◻ Fa den wortoe ini Jesaja 32:1, 2 kan gebroiki ini a situwasi mindri Jehovah Kotoigi?

◻ San de wan toe foe den blesi ini san a pipel foe Gado di kisi boen leri e prisiri?

◻ Fa Jesaja 32:5, 6 kan gebroiki na ini a ten disi?