Poti joesrefi na ini lin nanga na „denki foe Jehovah” di tjari kon now na krin
1. Sortoe naatsi ben kon na ini a presi foe na Israël na skinfasi, èn na ini sortoe verbontoe den ben teki na naatsi dati poti?
NA MANPIKIN foe Gado kon na ini na presi foe na proféti Mozes, di ben de na mindriman foe na Wetsverbontoe na mindri Gado nanga na Israël na skinfasi. Jezus Kristus ben tron na Mindriman foe Jehovah njoen verbontoe di ben taki a fesi. Na verbontoe disi ben meki nanga na naatsi di ben kon na ini na presi foe na Israël na skinfasi foe owroe ten èn di de wan jeje Israël, „na Israël foe Gado” (Galaciasma 6:16). Den Tin Komando nanga ala tra wet foe a ferbontoe di abi foe doe nanga den èn di na onvolmaakti man Mozes ben de na mindriman foe den, den ben skrifi poti pa boekoe, ma no troetroe tapoe na ati nanga ferstan foe djoesma ofoe Israëlsma na skinfasi di ben besnij. Jehovah Gado, di ben taki dati disi ben de na mankeri na ini na wetverbontoe foe Mozes, ben taki nanga mofo foe na proféti Jeremia dati a ben sa meki wan njoen verbontoe. Wi e feni disi skrifi na ini Jeremia 31:31-34.
2. (a) Fa Jezus ben tron na Mindriman foe na njoen ferbontoe? (b) Fa èn oten disi ben bigin wroko?
2 Jezus Kristus ben poti wan ségelmarki tapoe na pramisi „njoen verbontoe” dati nanga en égi libi broedoe di a ben dede leki wan bakapisi foe wan ati di ben broko na a pina-oedoe. Di Jezus ben hori na laatste Pascha-avondmaal nanga en getrow apostel soleki a ben gi jesi na a Wetsverbontoe foe Mozes, èn dati ben de a neti a fesi foe en dede, a ben gi na beker nanga win a den èn a ben gi wan njoen betekenis na dati di a ben taki: „Na beker disi wani taki na njoen verbontoe ini a krakti foe mi broedoe, di sa fadon foe na boen foe oenoe” (Lukas 22:20; 1 Korintesma 11:23-26). Tapoe a fasi dati a ben tron na mindriman foe na njoen verbontoe dati, di ben de wan „moro betre verbontoe” leki na Wetsverbontoe foe Mozes (Hebrewsma 8:6; 9:11-28). Foe sensi na momenti di a ben pristeri na waarde foe en volmaakti libibroedoe na ini 33 G.T. na ini hemel, a ben doe wroko soboen leki Mindriman gi den discipel di Jehovah Gado ben teki poti na ini na njoen verbontoe. — 1 Timóteus 2:5, 6.
3. Tapoe san leki fa Hebrewsma 10:15, 16 ben taki Jehovah ben skrifi den wet foe na ferbontoe disi?
3 Te na apostel e taki na ini Hebrewsma 10:15, 16 foe na njoen verbontoe, ai teki na profétitori foe Jeremia leki fa a tanapoe na ini na Griki Septuagintavertaling èn e skrifi: „Boiti foe dati na santa jeje e gi kotoigi na wi bika baka di a ben taki: ’„Disi na a verbontoe di mi sa meki, baka den dé dati ini a tori foe den”, Jehovah e taki. „Mi sa poti mi wet na ini den ati [kárdias] èn na ini den ferstan [dianoi’an] mi sa skrifi den.”’”
4. (a) San na a difrenti a mindri na agersi ati nanga na ferstan? (b) Fa kristensma di ben teki poti na ini na njoen ferbontoe e gebroiki na ati nanga na ferstan foe den ini akroederi nanga Psalm 119? (c) Oten èn fa na skrifi foe na wet foe Gado na tapoe na ati nanga na ferstan ben bigin?
4 Ini akroederi nanga na wroko foe na a agersi ati èn na ferstan dan den kristen di via Kristus na Mindriman ben sa teki poti na ini na njoen verbontoe, ben sa lobi nanga den ati Jehovah wet èn na so fasi den sa poti go ini boewégi foe gi jesi a den wet disi, èn ooktoe den ben sa hori den wet disi foe Gado na ini prakseri. Na psalmsingiman ben tjari disi kon so na ondro wortoe: „Fa mi lobi den wet foe joe! Na heri dé den abi na belangstelling foe mi srefsrefi [„a de na sani di mi e prakseri foe en” Leidse Vertaling]” (Psalm 119:97). Dati den wet foe Jehovah ben poti na ini na agersi ati foe den discipel foe Jezus Kristus èn ben skrifi na ini na ati foe den, ben bigin na ini na dé foe na pinksterfesa ini na jari 33. G.T. Ne na santa jeje ben kanti tapoe den discipel foe Jezus Kristus di den ben e wakti èn „tongo leki faja” di ben de foe si ben de tapsé na ede foe den 120 discipel, èn bakadati den ben bigin taki na ini vreemde tongo di den no ben stoeka ofoe leri. Foe troe a ben de wan wondroe! Leki wan bakapisi foe na kotoigi di ben gi na den hipihipi sma di ben lon kon soekoe, joe ben abi 3000 sma di ben teki dopoe leki bribiman na ini Kristus ofoe na Messias èn di ben teki poti na ini na njoen verbontoe nanga en leki den Mindriman. — Tori foe den Apostel kapitel 2; Joël 2:28-32.
5. Soema na ini a ten disi teki èn poti na ini na njoen ferbontoe èn san e meki den kon sabi den leki „bontaki”?
5 Na ini a ten disi, 1900 jari a baka, joe abi wan fika pisi foe „na Israël foe Gado”. Den memre foe en e sori dati den teki poti na ini na njoen verbontoe èn dati den kisi dopoe nanga a santa jeje. Den e sori dati den wet foe Jehovah Gado poti na ini na agersi ati foe den èn ben skrifi na tapoe den ferstan. Den e doe san na Mindriman foe den ben taki a fesi èn san tanapoe na ini Mattéus 24:14 nanga Markus 13:10. Den de „bontaki” di de na a jeje olijfbon di na apostel Paulus skrifi foe en na ini Romeini kapitel 11, èn den e meki foeroe froktoe.
6. (a) Sortoe tra pisi foe Jehovah „denki” noso „prakseri” ben kon na krin sensi 1935? (b) Fa den „tra skapoe” e sori, na tapoe wan fasi foe overtoigi wan tra sma, na lobi foe den gi Gado „wet” di de foe a ten disi?
6 Ete wan sani foe san Jehovah ben abi na ini en denki ofoe prakseri, ben tjari kon na krin sensi na congres foe Jehovah Kotoigi di ben hori ini 1935 ini Washington D.C. San ben de Jehovah prakseri na ini a tori foe Openbaring 7:9-17 foe na „bigi ipi” di den taki foe en na fesi? Na bigi ipi prijseman disi foe Jehovah Gado èn foe en Manpikin, Jezus Kristus di den ben taki foe den na fesi, èn di e dini Gado ini en agersi tempel, ben kon na fesi sensi 1935 foe sma si den. Moro nanga moro sma ben teki go moksi te nanga na dé foe tide na den 840 sma di bakadati ben teki dopoe tapoe satra 1 juni ini Washington. Nownow joe abi na a heri grontapoe moro leki toe nanga afoe miljoen foe den tra skapoe disi foe na Toemsi Boen Herder Jezus Kristus di alaten e kon makandra nanga den discipel foe Jezus di kon gebore njoen nanga na jeje foe Gado èn di ben teki poti ini na njoen verbontoe èn di abi wan prati na a kownoekondre kotoigiwroko di ben taki ini Mattéus 24:14 a fesi (Johannes 10:16). Neleki na psalmsingiman a so den e sori na tapoe wan overtoigi fasi taki den lobi a „wet” foe Jehovah di de foe na „bosroiti disi foe na seti foe sani” èn dati en „wet” de wan sani di nanga den ferstan den e go denki dipi foe en èn di nanga den heri ati den e hori densrefi bezig nanga en.
Ferloesoe nanga jepi foe bribi èn taki na fesi foe ala sma
7, 8. (a) A kisi foe ferloesoe e anga soso foe wan sabi foe den troe tori? (b) San Romeini 10:5-10 e tjari kon na krin foe na wisselwerking a mindri na agersi ati nanga na ferstan?
7 Dati wan sma e kisi ferloesoóe, efoe a de na ini Jehovah hemel kownoekondre noso tapoe na paradijs grontapoe na ondro na doesoen jari tiri foe Jezus Kristus, no de soso wan afersi foe abi sabi foe troe tori, wan afersi foe a ferstan. Na apostel Paulus ben tjari disi kon a krin na ini Romeini 5:10. Drape a e taki foe na situwasi foe kristensma di ben abi wan natuurlek ati foe meti, no wan ati di den ben teki foe wan tra sma poti gi den èn ooktoe no wan ati di de wan masjien. Ai go moro fara nanga den bewijsi na a fasi disi:
8 „Bikasi Mozes e skrifi dati na sma di ben doe na regtvaardikifasi foe na wet, sa kisi libi nanga na wet, ma na regtvaardikifasi di e kon foe bribi, e taki na a fasi disi: ’No taki na ini joe ati: „Soema sa opo go na hemel?” namkoe foe meki Kristus saka kon na gron; ofoe: „Soema kan saka go na ini na peti?” namkoe foe meki Kristus opo komoto foe dede.’ Ma san a e taki? ’Na wortoe de krosbé foe oenoe, na ini oen égi mofo èn na ini oen égi ati’, dati wani taki, na ’wortoe’ foe na bribi, san wi e préki. Bika efoe oenoe e taki na fesi foe ala sma na ’wortoe dati ini joe égi mofo’, dati Jezus na Masra èn joe e sori bribi ini joe ati dati Gado ben wiki en poeroe foe dede, dan joe sa kisi loesoe. Bika nanga na ati wan sma e sori bribi foe kisi regtvaardikifasi, ma nanga na mofo wan sma e taki na fesi foe ala sma foe kisi ferloesoe.”
9. (a) San de ini a tori foe kisi jepi, èn foe san-ede joe ben piki so? (b) San wan kristen moe bribi troetroe na ini en ati? (c) San ben de a fasi foe den Athenesma èn foe san-ede?
9 Foe na tekst disi e kon na fesi dati na afersi e go moro dipi leki soso nomo na ferstan. A no de wan afersi nomo foe kisi bodoi, di joe e poti ini joe ferstan baka makandra èn di joe kan taki foe en baka na joe ede foe sma jere. No na ferstan nanga en sabi de na beslissende faktor; gi Jehovah na den réde di e boewégi na ati di e teri. A bribi foe wan kristen moe abi leki fundamenti den réde di na agersi ati e gi en. A moe bribi nanga en heri ati ini na opobaka foe Kristus, bikasi a abi bigi warderi gi na wondroe disi di na Almakti Gado ben doe. Disi na wan sani di Kristus no ben kan doe gi ensrefi, èn ooktoe wan tra sma no ben kan doe, soso Gado ben kan wiki foe dede en Manpikin di ben dede foe kisi libi na ini hemel (2 Korinte sma 4:13). Wi e memre dati sonwan foe den koni man na mindri den man foe Athene ini a ten foe na apostel Paulus ben wani foe „spotoe” di den ben jere foe wan „opobaka foe den dedewan”, aladi trawan no ben teki wan bosroiti wantenwanten ini na afersi, ma ben taki: „Wi sa jere foe joe wan tra lési.” Na ferstan foe den di ben foeroe nanga sabi ben tapoe den foe teki den bodoi, aladi den ben abi den fundamenti na tapoe troetroe tori. Soso sonwan ben tron bribiman èn ben kon moksi den srefi na Paulus. — Tori foe den Apostel 17:21, 32-34.
10. (a) Sortoe réde foe boewégi wan sma na ati moe gi? (b) Sortoe toe sani Jehovah e aksi foe dat’ede?
10 Soboen wan sma ati moe boewégi en foe bribi. Nanga en ati a moe sori bribi. Te a e doe disi, dan na ati — na inisé sma — foe na bribiwan sa poesoe en foe taki nanga en mofo na fesi foe tra sma. A moe sori bribi nanga en heri ati. Na taki na fesi ala sma nanga en mofo, di na ati di e bribi e gi réde foe dati, sa kon dan nomo.Te wan briibi sma e dipi go na ondro watra leki wan symbool di a gi ensrefi abra na Jehovah Gado nanga jepi foe Jezus Kristus, a e taki na fesi foe ala sma, èn disi e tjari jepi kon. Jehovah Gado no e ondrosoekoe wawan na agersi ati foe si efoe wan faja bribi de na ini, ma a e arki ooktoe efoe ai jere na taki na fesi foe ala sma.
Tan loyaal foe wan „ati di no prati” ede
11. (a) Fa David ben kan tan loyaal na Jehovah? (b) Foe san-ede meki David ben kan begi awinsi a ben sondoe soleki a ben doe disi na ini Psalm 86:11? (c) Soema ben waka na baka na toemsi moi eksempre foe David?
11 David foe owroe ten ben kon de net leki wi libisma nanga sondoe èn ini sondoe en mama ben kisi en, ma foe di a ben abi wan agersi ati di „no ben prati” na fesi foe na Gado foe na naatsi Israël, a ben tan loyaal na en Gado Jehovah (Psalm 51:5). Na foe disi 1 Kownoe 15:3 e taki: „En ati [Abíam ati] no ben sori taki a ben de prati na fesi foe en Gado Jehovah, soleki na ati foe en fosten tata David.” A de troe dati David ben gi ensrefi abra ini a tori foe Uría, na Hethietsma, na wan tegoe sondoe, ma a ben abi opregti beraw foe disi èn en ati ben sori taki a ben de sondro foe prati èn sondro foe sekseki na ini na dini foe Jehovah leki en Gado (1 Kownoe 5:4, 5). Nanga leti David ben kan begi: „Tjari mi ati kon na wan foe frede joe nen” (Psalm 86:11). A ben gi den sma di ben sa teki en presi na ini na kownoe wroko abra Israël wan toemsi moi eksempre èn kownoe Asa ini disi ben de wan sma di ben waka na baka David bika na ini 1 Kownoe 15:14 wi e lési: „Na ati foe Asa ben sori srefi dati a de sondro prati na fesi Jehovah ala en dé”.
12. Pe dek’ati nanga eerlekfasi de fanowdoe èn fa Hizkía ben sori dati?
12 Foeroe dek’ati séker de fanowdoe èn ooktoe wan sma moe de eerlek nanga ensrefi te a wani begi na Moro Hé Gado, na ondrosoekoesma foe libisma ati, foe sari en èn sori en lobi boenfasi. Ma kownoe Hizkía foe Israël ben doe disi. Di a ben kon siki wan siki di ben sa tjari na dede foe en kon efoe Gado no ben kon a mindri, Hizkía ben begi: „Mi e begi joe, o Jehovah, prakseri tangitangi fa mi ben de getrow èn nanga wan ati di no prati na joe fesi mi ben waka èn ben doe san boen ini joe ai.” — Jesaja 38:3.
13. San salfoe kristen moe poti alaten na ini prakseri foe di den e waka na baka na eksempre foe Jezus?
13 Nanga so wan eksempre den salfoe kristen foe disi ten di teki poti na ini na ’verbontoe foe na hemel kownoekondre’ nanga Jezus Kristus moe hori alaten na ini prakseri dati na plekti de na tapoe den foe waka a fesi foe Jehovah „nanga wan ati di no prati”. Neleki en fosten tata David di ben de kownoe, na so Jezus Kristus ben waka, di a ben de leki wan volmaakti man na grontapoe „nanga wan ati di no ben prati” na fesi foe en hemel Tata, Jehovah. Jehovah Gado di e poti kownoe tapoe den troon, ben abi foe dat’ede prisiri srefsrefi foe gi Jezus na tirimakti na ini na hemel kownoekondre, foe tiri drape leki „kownoe foe den kownoe èn Masra foe den masra”, wan tirimakti pe en reti-ati discipel e kisi wan prati leki kownoe nanga masra di de na en ondro. — Lukas 22:29; Openbaring 19:16.
14. Foe sortoe réde den „tra skapoe” ben tjari kon na ini na ’wan ipi’ na ondro na ’wan herder’?
14 Na „bigi ipi” „tra skapoe” foe Kristus e ferwakti foe psa libilibi na „bigi benawtoe” èn foe de den fosi onderdaan foe na doesoen jari tiri foe Jezus Kristus nanga en 144.000 kompe-tiriman (Openbaring 7:9, 10; Johannes 10:16; Openbaring 14:1; 20:4-6). Sensi na jari 1935 di warti foe wi memre, den memre foe na „bigi ipi” dati tai densrefi na na fika-pisi foe den kownoekondre erfgenaam dati, di e waka nanga wan ati di no prati na fesi foe Jehovah Gado. Foe di den „tra skapoe” disi foe na toemsi Boen Herder, Jezus Kristus, e feti foe waka „nanga wan ati di no prati” na fesi foe Jehovah Gado, meki den de now „wán ipi” nanga na fika-pisi foe den kownoekondre erfgenaam na ondro na ’wan herder’, Jezus Kristus. Foe di den e kibri den soifrifasi nanga sowan ati di tjari kon na wan èn di no prati, meki den sa abi na grani foe abi wan prati na a poti reti foe na universele soevereiniteit foe na Gado di den de kotoigi foe en, Jehovah. — Jesaja 43:10, 12,
15. Foe sortoe sani wi alamala kan de grantangi now?
15 Na a fasi disi, wi alamala leki discipel foe na Manpikin foe Gado, wi Toemsi Boen Herder, e poti wisrefi na ini lin nanga a „denki” foe Jehovah soleki dati tjari kon now na krin gi en dopoe anbegiman di gi densrefi abra. Fa wi kan de èn moe de nanga tangi, dati na Moro Hé Gado na ini hemel e tjari kon na krin san ben kon leki nomroe wán na ini en „prakseri” èn san no ben komoto na ede foe no wan libisma di ben meki foe meti nanga bonjo! Na réde dati moe boewégi wi foe denki net soleki en na ini a tori foe Jehovah glori prakseri.
16, 17. (a) San 1 Korintesma 2:16 e sori na ini a tori foe na „denki foe Jehovah” èn na „denki foe Kristus”? (b) San Filippisma 2:5-8 e tjari kon na krin na ini a tori foe na „denki” ofoe „jejefasi” foe Kristus?
16 Wi abi warderi gi na sani di tanapoe na ini 1 Korintesma 2:16 namkoe: „Bika ’soema ben leri sabi na denki foe Jehovah, dati a ben sa kan leri en?’ Ma wi abi wel na denki foe Kristus.” Na Griki wortoe foe „denki” de ini ala den toe geval disi nous.
17 A no wan sani foe degedege dati na „denki” noso na „jejefasi” foe Kristus e kroederi dorodoro nanga makandra nanga a „denki foe Jehovah”. Den wortoe na ini Filippisma 2:5-8 e jepi wi srefi foe iti wan ai na ini na „denki” foe na Manpikin foe Gado di ben libi kaba bifo a ben de wan libisma, bika wi e lési da pe: „Kibri na jejefasi ini joe di ben de ooktoe ini Kristus Jezus, aladi a ben de na ini na gedaante foe Gado, no ben go denki foe teki sani nanga tranga, namkoe foe de speri na Gado. Nono, ma a ben saka ensrefi èn ben teki na fasi foe wan srafoe èn a ben tron leki den libisma. Moro ete, di a ben de leki wan libisma a ben saka ensrefi èn a ben gi jesi na dede, ja na a dede na wan pina-oedoe.”
18. San den aksi foe na Manpikin efoe a ben wani tjari ensrefi akroederi na „denki” foe en Tata?
18 Jehovah Gado ben teki na prakseri foe bai na libismafamiri kon fri foe na tégo dede, èn na wan enkri gebore Manpikin foe Gado ben de klari na ini na tori disi foe poti ensrefi ini lin foe na „denki” foe en hemel tata, awinsi disi ben sa wani taki gi en hebi pina na grontapoe.
19. (a) Tapoe san wi kan poti wi agersi ati na ini a tori foe na „denki” foe Jehovah? (b) San wi moe doe now na ini a tori foe na „denki” foe Kristus?
19 Na so a de ooktoe na ini a ten disi nanga wi. Efoe wi poti wisrefi na ini lin nanga na „denki foe Jehovah” dan wi moe saka wisrefi ooktoe na a fasi foe Kristus èn saka wisrefi sondro kondisi na a wani foe Gado. Disi e poti na tapoe wi leki wan ferplekti foe de Kotoigi foe Jehovah, èn wan lobi ati di de loyaal sa gi wi na réde foe dati, foe doe san Kristus Jezus ben abi na ini prakseri gi na fara toekomst di a ben taki: „A boen njoensoe disi foe na kownoekondre sa préki na tapoe na heri grontapoe pe libisma e libi leki wan kotoigi gi ala naatsi”, te na a kaba. — Mattéus 24:14; Markus 13:10.
20. (a) San e meki wan wánfasi activiteit kon na a heri gronatpoe? (b) Na ini a waka boen foe sortoe sani na wánfasi ipi foe Gado pipel e prisiri now?
20 Wi leki dopoe Kotoigi foe na moro Hé Gado di gi densrefi abra wani de alamala „foe na srefi denki” na ini a tori foe na grani foe dini en (Filippisma 4:2). Disi e meki dati na ini na heri grontapoe wan verenigde activiteit e de. Foe dat’ede meki Jehovah Gado e blesi den „bigi ipi” foe Kristus „tra skapoe” èn na salfoe fika pisi foe Kristus kownoekondre erfgenaam nanga na toemsi moi succes di den e kisi nownow na ala presi foe grontapoe na ini na tjari kon makandra ala „tra skapoe” èn na préki foe na laatste warskow ini na heri libismafamiri bifo en glori wini kon èn na poti reti foe en universele soevereiniteit na Armageddon de wan troetroe tori. — Openbaring 16:16.
Wantoe aksi foe loekoe san wi ben leri:
◻ Fa Jehovah e skrifi a „wet” foe na njoen ferbontoe na ini na „ati” èn na ini na „ferstan”?
◻ Sortoe toe sani de na ini na kisi foe jepi ini a tori?
◻ Fa wan ati „di no prati” e jepi wi foe tan loyaal?
◻ Fa wi kan sori dati wi abi „na denki foe Jehovah” èn „na denki foe Kristus”?
[Prenki na tapoe bladzijde 8]
Jehovah ben skrifi na „wet” foe en njoen verbontoe tapoe na ati èn ferstan foe den salfoewan. Na wan prisirifasi „tra skapoe” e sroiti densrefi now na den ini santa dienst
[Prenki na tapoe bladzijde 9]
Hizkía ben sori taki a abi wan ati „di no prati” di a ben ondrofeni gens. Wi kan sori dati toe?