Den sani di libisma meki doe kon kan drai wan rampoe poeroe?
„A no de na wan man di e waka foe poti en foetoe na pasi.” — JEREMIA 10:23.
1, 2. San de wantoe foe den sani di libisma na ini na di foe twenti jarhondro disi ben meki doe kon?
DEN LIBISMA ini wi jarhondro di meki twenti ben meki ferwondroe sani doe kon. Den go srefsrefi a fesi tapoe na kontren foe skoroleri nanga wetenschappelek ondrosoekoe. Ooktoe na tapoe na kontren foe tekniek den go foeroe na fesi. Now foeroe sma e njan boen na ini den aladé libi foe den froktoe foe dati. Na ini wan lo kontren den sma abi na oso modern makriki sani, soleki elektrik faja, boen sanitaire seti foe sani èn foeroe aparaat foe doe osowroko. Ooktoe na sabi foe datrawroko e tjari a porsi foe en kon toe. Prakseri pikinso na a stop foe bepaalde siki, soleki poki, di wan dé ben de wan krawasi.
2 Ooktoe na tapoe na kontren foe kommunicatie nanga transport libisma go foeroe na fesi, nanga jepi foe telefon, oto, boto nanga opolangi wi kan meki kontakti nanga makandra moro esi ofoe reis go na bepaalde presi moro gaw leki oiti wi fosten papa nanga mama ben man denki taki a ben kan. Na ini a ten disi satelliet na ini loktoe kan ferteri wi wantewante sani, di psa na a tra sé foe grontapoe.
Prenspari sani di no doe kon
3, 4. Sortoe kefarlek prenspari sani sma no ben kan meki kon soleki ben taki soifri na fesi na ini bijbelprofétitori?
3 Ala joeroe wan skreki kernrampoe e anga tapoe na ede foe libi sma, èn toemsi prenspari sani de di libisma no ben meki doe kon. Foe eksempre, na go na fesi foe skoroleri ben go anoe nanga anoe nanga wan srefi go na fesi na ini leri di abi na prakseri foe leri libisma foe de moro eerlek èn foe lobi waarheid moro èn foe libi akroederi moro hé moreelfasi? Na ini den Verenigde Staten ala jari a bidrigifasi foe pai belasting e gi wan lasi foe moro leki 100 miljard dollar. Na ini wan tra kondre soso nomo na ini wán bigi foto, soleki den taki, 17.000 skowtoe ben lasi wroko ini sébi jari ten foe bidrigifasi ede. Sowan oneerlekheid e meki wi prakseri na a bijbelprofétitori di tanapoe na ini 2 Timóteüs kapitel 3, pe ben taki na fesi dati den sma na ini den „laatste dé” disi ’ben sa lobi densrefi nomo, ben sa lobi moni èn ben sa de deloyaal èn sondro lobi foe san de boen’.
4 Dan wi abi na seks hoeroedoe. Soetadoe nanga hoeroedoe de sowan kewon sani dati na ini film, televisie, tapoe komedie ofoe ini lobi tori ini boekoe, pikinso nomo ete wan sma kan si dati den tjari wan moreel hé osofamiri kon na fesi. Èn hoeroedoe e meki dati ibri jari na ini na heri grontapoe sowan 55 miljoen oema e meki den poeroe bere gi den! Disi e akroederi nanga na kiri foe wan bevolking di moro bigi leki di foe Argentinië, ofoe Canada, ofoe Frankrijk, ofoe Polen, ofoe 145 tra naatsi — ini soso wán jari! Soboen aladi na wan sé foe na sabi foe datrawroko e naki borsoe tapoe na go na fesi sodati na libi foe son pikinnengre no e lasi gwe, tokoe miljoenmiljoen pikin di no gebore ete wan tra sé foe na srefi sabi foe datrawroko e kiri. Precies soleki a bijbel e taki a fesi, dati foeroe sma kan na ini „den laatste” dé disi de „sondro dwengi densrefi” èn den no abi „natuurlek lobi”. — 2 Tim. 3:3.
5. San de wantoe bakapisi foe na disiten hoeroedoe di sma no kan tapoe foe na sé foe na gesontoe foe libisma?
5 Na sekshoeroedoe e meki wan pestsiki kon foe siki di doe kon foe na sekskontakti. Foeroe sortoe foe den siki disi de nownow resistent, dati wani taki, dati datra dresi no e man poeroe den moro. Te so fara no wan dresi den feni tége na siki di panja na alape èn di sma sabi leki genitale herpes. Èn na nomroe foe bébi nanga herpes, di gebore foe mama di abi a siki disi, e kon moro nanga moro. Pikinmoro afoe foe den bébi disi e dede, èn foe den trawan di e tan, afoe foe den e abi na skinfasi, èn na den ferstan sani di no e wroko boen. Ooktoe te nanga now no wan dresi den no feni tége AIDS (syndroom van de verworven verhoogde vatbaarheld), a siki di e tjari dede kon èn di e poti datra krinkrin na fesi wan laitori. AIDS soetoe ede kon na ini sowan 33 kondre „èn de now gi na heri grontapoe wan kefar gi na gosontoe”, na so wan njoensoe foe Associated Press e taki. Na siki e sori ensrefi spesroetoe na homoseksueel man, san de meki wi denki a Romeini 1:27.
6. Datra wroko ben man foe stop siki na a heri grontapoe?
6 Na sabi foe datrawroko no man drai na kon moro foeroe foe foeroe tra siki. Soso wawan kaba ini Afrika miljoenmiljoen sma abi malaria, sribisiki, lepra nanga tra siki. Ini moro ontwikkelde kondre kanker, atisiki. soekroesiki, lefresiki, nanga siki foe wan sma firi e kon moro foeroe. Sowan foe den siki disi e kon moro ogri foe na spanning ofoe den bijverschijnselen foe na modoern industriële maatschappij. Trawan foe den de a bakapisi foe wan libifasi pe sma e gi sani pasi.
7. A de wan sani di kan, dati nanga na go na fesi tapoe na kontren foe datra wroko wi sa kan tan gesontoe alaten?
7 Efoe moro siki ben kan tjari kon na ondro controle, dan na sabi foe datrawroko ben sa man foe hori wi gosontoe foe alaten? Nono, foeroe koniman e taki. Den e sori krin, dati aladi na libimarki ben sa tan kon moro langa nanga wantoe jari, dan tra siki ben sa aksi baka moro sma libi. Wan koniman ben kon na a bosroiti disi: „Pikinso kans de dati na ini na krosbé ten na wi fesi wi ben sa kan langa na ferwakti foe libi kon boen foeroe ofoe ben sa kan meki na proces foe kon owroe no go so esi.” Langaten psa kaba na bijbel ben taki ini Psalm 90:10: „Den dé foe wi jari de . . . sébitenti jari, èn efoe foe spesroetoe krakti ede, aititenti jari; tokoe den sani di den e aksi tranga de moeiti nanga ogri sani, bikasi a moesoe psa gwe es’esi.”
Na problema foe pina no loesoe
8. Fa na bijbel ben taki soifri na fesi dati na technologie no ben sa man loesoe na problema foe pina?
8 A de troe dati na technologie meki na libi foe son sma kon moro switi èn makriki, ma foeroe tra sma no abi nofo moni foe bai den sani foe na technologie. Na boekoe World Military and Social Expenditures 1983 (Den moni di den gi foe sroedati wroko nanga wetenschap 1983) e ferteri: „Toe miljard sma e libi nanga wan moni di de ondro $ 500 (Amerkan dalla) wan jari.” Na artikel e go moro fara: „Moro pikinso wán tapoe den féfi sma de na ini wan fasi foe pina srefsrefi, wan toestand foe sowan pina foe sani dorodoro, dati a wani taki wan safrifasi foe genocide (a kiri poeroe foe wan pipel).” Dan na boekoe disi ben ferteri dati ibri jari „erfoe miljoen bébi e dede bifo a fosi frijaridé foe den foe di den no e kisi nofo njanjan ofoe den abi wan noso tra siki.
9. Sortoe sari situwasi de na ini foeroe kondre?
9 Na ini son kondre na so The Detroit News e ferteri, „foeroe oema de ini wan situwasi dati den abi toemsi foeroe pikin èn no abi den sani foe sorgoe gi den. Ma nofotron baka den mama disi e poti den pikin disi di den no wani eenvoudig tapoe strati”. Miljoenmiljoen foe den sortoe pikin disi de. Na tra presi pikin e libi den papa nanga mama gwe. Wan koranti skrifiman na ini Azië e skrifi: „Doesoendoesoen owroe sma den e poti a dorosé foe den oso foe den, foe di a famiri foe den no kan gi den moro foe njan. Organisaatsi foe gi jepi no de. Nofotron den pikin foe den owroesma disi e go nanga den ini wan loko èn den e poti en na wan presi noso libi den na wan station a den lot abra.” Na skrifiman e taki moro fara: „Fa disi de wan skreki kenki ini wan koeltoeroe pe sma ben abi someni respeki gi granisma.” A ten foe wi de soboen kotoigi foe o troe Odo 30:11 de, pe tanapoe: „Wan geslakti de di srefi e aksi foe ogri foe kon tapoe en papa èn di srefi no e blesi en mama.”
10. O séker na moni situwasi foe na grontapoe de, èn na sortoe profétitori foe Jezus ai meki wi denki?
10 Libisma rigeri no man foe loesoe a problema foe pina di de na a heri grontapoe. Ontwikkelingskondre e go boekoendoen na ondro na bigi lai foe wan paiman di e kon moro bigi èn di den no man foe pai. Srefi ontwikkelde kondre abi wan kefarlek hé moni-paiman. Wan marki foe disi de dati a jari di psa tintin bank na ini den Verenigde Staten ben bankroet. Di wan foe den moro bigi bank ben de na a lanki foe wan bankroet dan den ben kan meki dati wan rampoe no ben kon, soso foe di na rigeri ben djompo kon nanga miljardmiljard dollar. Den sma ben frede dati efoe sowan bigi bank ben sa bankroet, „tra bank nanga disi ben sa soigi go na ini toe, san ben sa de wan gevaar gi na heri moni sistema”, na so a tori ini New York Times e taki. Soboen a e de moro nanga moro moeilek foe drai wan rampoe poeroe. Te joe loekoe en boen, dan ibri jari moro nanga moro na sani di ben taki na ini na Ingrisi Guardian e wani taki wan sani. Drape ben tanapoe: „Grontapoe de na a lanki foe wan libisma rampoe èn wan politiek rampoe. . . .Heri bigi pisi foe a grontapoe ben si a howpoe foe den gi na ten di e kon gwe leki ini wan smoko.” — Luk. 21:25, 26.
Na krakti di na technologie abi tapoe oorlokoe
11. Sortoe tra problema di tiri no kan loesoe, na technologie e meki kon moro ogri?
11 Wan tra sani de ete di kon moro ogri nanga na technologie, wan sani pe rigeri no man tjari wan stop kon na en: oorlokoe. A ben de na technologie di ben meki na fosi grontapoe oorlokoe tron so wan srakti partij pe den ben gebroiki boen foeroe masjien gon, ondroseboto, oorlokoe-opolangi, tanks nanga opolangi di e fringi faja. Na Ingrisi skrifiman Richard Rees ben taki: „Na Oorlokoe foe 1914-18 tjari toe sani kon na krin: ini a fosi presi dati na technologische ontwikkeling ben doro wan marki foe pe soso wan wánfasi grontapoe a kan go moro fara ete sondro foe doro wan rampoe, èn na di foe toe presi dati den politiek nanga sociaal organisaatsi di de ini a grontapoe ben meki na kon wán foe en de wan sani di no kan.” Na di foe Toe Grontapoe oorlokoe ben bewijsi dati a ben abi leti, di moro njoen wapen ben kiri sowan 55 miljoen sma.
12. Na fesi foe sortoe gevaar na libismafamiri na ini a ten disi tanapoe na en fesi?
12 Na ini a ten disi den oorlokoe fetisani de moro ogri ete, èn den rigeri no man foe tjari sani kon na wan kwetkweti. Ini a tori foe kernwapen na skrifiman Herman Wouk ben taki: „Na ferstan, na wroko èn den goedoe di poti go ini a law disi, de troetroe foe joe ai drai. Efoe den naatsi no ben sa leri foe feti moro troetroe, dan noti moro ben sa de di den libisma no ben sa man.” Na astronoom Karl Sagan ben taki foe wan kernoorlokoe: „Degedege no de dati a heri grontapoe beschaving ben sa pori.” Èn ala di na libisma famiri de na ini na gevaar foe so wan rampoe foe na heri grontapoe dan foeroe tra stré e aksi wan lo libismalibi. Na Amerkan Centrale Inlichtingendienst foe Defensie afersi e ferteri dati ini 1984 tapoe a srefi pisten 42 difrenti oorlokoe nanga oproeroe ben de! Den rigeri no man drai srefi na froedoe foe kiri nanga tranga na ini den ègi kondre, no foe taki dan foe tjari grontapoe vréde kon.
13. A de ini akroederi nanga bijbelprofétitori dati a doe foe ogri nanga na tra sma de wan marki na a heri grontapoe foe wi ten?
13 Ala disi e kroederi nanga na profétitori foe Openbaring 6:4 foe na rij di ben bigin ini 1914 foe wán foe den ’fo asiman foe na Apocalyps’: „Wan trawan ben kon na doro, wan redi kloroe asi; èn a sma di ben sidon a tapoe, ben kisi pasi foe poeroe na vréde foe grontapoe, sodati den ben sa srakti makandra èn a ben kisi wan bigi feti-owroe.”
Foe san-ede den moeiti foe libisma e misi na marki
14, 15. San de wan prenspari réde foe san-ede libisma no kan meki den marki di poti na den fesi now kon troe?
14 Foe-san-ede meki wi abi ala réde foe frede dati den moeiti foe libisma no sa man wai wan rampoe poeroe ? Ija, foe san-ede libisma no man foe meki den marki di den poti a den fesi kon troe? Na bijbel e gi leki wan foe den moro prenspari réde, dati „nanga wán libisma sondoe ben kon ini grontapoe èn nanga jepi foe na sondoe a dede, èn a sofasi na dede ben panja go na libisma foe di den alamala ben sondoe” (Rom. 5:12). Den fosi papa nanga mama foe wi, Adam nanga Eva, Gado ben meki den volmaakti na skin èn na ferstan. Wan foe den kondisi foe ben tan hori na volmaaktfasi, ben de dati den ben sa boewégi densrefi na inisé foe den skotoe foe den boen wet di Gado ben gi den. Na inisé foe den skotoe foe den wet dati, den ben kisi bigi fri foe bosroiti san den wani. Ma soleki Genesis kapitel 3 e sori, dan den fosi papa nanga mama foe wi ben poti wan stap go toemsi fara foe na fri di den ben abi foe taki san den ben wani teki. Den ben wani foe de onafhankelek foe Gado nanga en wet. Den ben wani bepaal srefi san ben de boen èn san ben de ogri, wan bevoegtoe di soso Gado wawan abi. Di den ben teki na bosroiti dati kaba, dan den ben kon tanapoe a tapoe densrefi. A bijbel e taki: „Jehovah de nanga joe solanga joe bewijsi taki joe de nanga en; ma efoe joe gwe libi en, en sa gwe libi joe” (2 Kron. 15:2). Aparti foe Gado Adam nanga Eva ben bigin go a baka na skinfasi èn na jejefasi. Siki nanga sari ben tron a porsi foe den èn te foe kaba den ben dede. — Gen. 2:16, 17,
15 Bakadi den fosi papa nanga mama foe wi ben kon de onvolmaakti, dan den wet foe na genetica ben sori dati heri na pransoen foe den ben kisi onvolmaaktfasi. Na psalmsingiman ben erken: „Nanga fowtoefasi mi ben doe kon nanga pen foe wan oema di e meki pikin, èn ini sondoe mi mama ben kisi mi” (Ps. 51:5). Na sabi foe datrawroko no man poeroe na no wan fasi den bakapisi foe onvolmaaktfasi di den kisi. Te datra e soekoe wan fasi foe porroe siki nanga dede, dan a de leki a soekoe foe wan sani san libisma no kan doe noiti ofoe no wan ten.
16. Fa na onvolmaaktifasi ben wroko na tapoe na mentaliteit foe libisma?
16 Na onvolmaaktfasi di wi ben kisi de ooktoe wan sani di abi krakti tapoe wi mentaliteit. Wi alamala e gebore nanga na firi foe doe san de fowtoe. Disi natuurlek no wani taki dati libisma no kan basi den doe foe den. Dati den kan wel, efoe den doe stap foe meki sani kon moro boen. Disi e kon na krin na ini Odo 3:6, pe tanapoe: „Poti na ini ala joe pasi prakseri tapoe en [Jehovah], en sa meki joe pasi kon reti.” Ma te sma e poti na joisti pasi a wan sé, dan den e kon na ini moro bigi moeilekheid. Èn o moro moro aparti sma nanga naatsi e kon farawe foe den wet foe Gado, o moro takroe den e handri, di den e libi densrefi abra na den firi di den ben kisi foe prakseri densrefi nomo. Na ini a tori disi wan artikel na ini The New York Times ben taki: „Te wi iti wan ai es’esi tapoe den ede ini den koranti foe tide dan a nofo kaba foe aksi wisrefi pe a e go nanga a grontapoe. . . . Loekoe san e psa te sma, instelling nanga naatsi e poti den gridifasi afersi a fesi foe ala tra sani. . . Den troetroe tori ini ala kondre de, dati wi no e doro pe wi moe doro te wi e pré a pré foe prakseri wisrefi nomo.”
Na krakti foe Satan
17, 18. Sortoe tra prenspari sani e jepi foe ferklari foe san-ede libisma no kan meki den marki di a poti na en fesi kon troe?
17 Ete wan prenspari sani di e jepi foe ferklari foe san-ede libisma no man doro den marki di den poti a den fesi èn no man wai na rampoe poeroe, de na krakti di 2 Korintesma 4:4 e poti wi prakseri a tapoe. Djaso den e taki foe „na gado foe a seti foe sani diisi”. Son sma di no de so boen bekenti nanga na bijbel e denki kande dati na gado di den e taki foe en dja, de na Almakti Gado. Ma a srefi vers e taki dja taki na gado disi „e breni a ferstan foe den sma di no e bribi”. Na lobi-ati Mekiman no ben sa doe séker sowan sani. Na gado tapoe soema den e poti prakseri dja, de na srefi wan di 1 Johannes 5:19 e taki foe en pe tanapoe: „Na heri grontapoe didon na ini na makti foe na ogriwan”.
18 Na gado di e basi na disiten grontapoe, Openbaring 12:9 e meki wi ben sabi en leki a sma di den e kari Didibri nanga Satan, di e kori na heri grontapoe pe libisma e libi”. Na nen Satan wani taki „Haswaman” ofoe „Gensman”. Na nen Didibri wani taki „Falsi kragi man” ofoe „Léman”. Disi de nen di fiti bikasi na oproeroe man disi ini na jeje kondre ben soetoefaja gi Adam nanga Eva foe meki oproeroe. A en ben de a sma di te joe ben loekoe en leti ben taigi Eva: ’Joe no abi den wet foe Gado fanowdoe. Joe kan teki gi joesrefi bosroiti san boen èn san ogri.’ Foe di a ben drai ensrefi foe na troe Gado meki Satan ben kon pori ensrefi na jejefasi. Disi de foe si na den wroko foe en, bikasi loekoe pikinso na a grontapoe di a e basi! Den tegoe, ogri-ati historia foe na libismafamiri e bewijsi dati wan tegoe, ogri-ati krakti de a baka.
Sortoe howpoe de?
19. San son sma di e loekoe sani boen ben rikomanderi leki dresi gi den siki foe na grontapoe disi?
19 Wantoe sma di e loekoe den broejbroeja sani na grontapoe ben taki foe na dresi foe den siki foe na libisma famiri wantoe moi sani. Na Gazzette foe Montreal ben taki: „Sowan groepoe foe nationaal politiekman e hari go na ini difrenti richting èn e meki na planeet grontapoe hari go na ini broeja. Tokoe a moro bigi pisi foe den bigi problema na grontapoe de ooktoe na alape na grontapoe, foe di den modern sani foe transport nanga kommunikatie ben meki a grontapoe krempi kon tron wan birti di lontoe na heri grontapoe.” Na ini na artikel den e rikomanderi moro fara: „Wan ofoe tra vorm foe grontapoe tiri sa de fanowdoe.” Na socioloogman Eric Fromm ben taki dati den siki foe na grontapoe disi ben kan dresi wawan „efoe na heri [sociaal nanga politiek] seti soleki ben de na ini den 6000 jari di psa ben kan komoto a pasi gi wan fundamenteel tra seti”. — Wi e poti wan strepi na ondro den wortoe.
20. (a) Foe san-ede meki den marki di sma wani sote no sa kontroe noiti nanga jepi foe den moeiti foe libisma? (b) Tapoe soema wi moe poti wi fertrow na ini a ten di e kon?
20 Den sma disi di e loekoe sani no ben ferstan en, ma na heri sociaal nanga politiek seti sa moe wai komoto a pasi gi „wan fundamenteel tra seti”. Djonsro de soso wan grontapoe rigeri sa de gi na heri libismafamiri ma disi no sa de nanga na moeiti foe libisma. Libisma eenvoudig no man foe drai wan rampoe poeroe. Soleki na historia ben sori, dan den no kan poti wan moro betre seti na ini na disiten seti foe sani. Den no kan poeroe den onvolmaakti fasi, siki nanga dede di den kisi. Èn den no kan poepoe Satan nanga en ogri jeje. Na historia di psa kaba foe libisma ben bewijsi moro foeroe o troe den wortoe de di skrifi ondro krakti foe santa jeje: „A no de a wan man di e waka srefi foe poti en foetoe na pasi” (Jer. 10:23). Foe dat’ede meki a Wortoe foe Gado e taki: „No poti fertrow na tapoe gransma, no a tapoe na manpikin foe libisma na grontapoe, na soema ferloesoe no de” (Ps. 146:3). Tapoe soema joe moe poti dan joe fertrow? Odo 3:5 e gi na dek’ati: „Fertrow tapoe Jehovah nanga joe heri ati èn no engi tapoe joe égi ferstan.” Foe san-ede meki wi moe abi sowan fertrow na ini Jehovah? Foe di a kan doe san libisma no kan doe soleki sa kon a kin ini a artikel di e kon,
Wantoe aksi foe loekoe sjatoe san wi ben leri
◻ Sortoe toemsi prenspari sani libisma no ben meki doe kon?
◻ Fa na technologie ben meki oorlokoe kon moro kefarlek srefi?
◻ Foe san-ede libisma moeiti e misi a marki so foeroetron?
◻ San de a koni libifasi, te joe loekoe a bericht di libisma ben bow?
[Prenki na tapoe bladzijde 2]
Na sabi foe datrawroko no ben man drai na konmoro foeroe foe siki nanga dede
[Prenki na tapoe bladzijde 3]
Libisma rigeri no man poeroe krinkrin na pinalibi di de na heri grontapoe