Wan tiri di e meki sani doe kon di libisma no man meki kon
„Kon èn loekoe den wroko foe Gado. Na fasi fa ai handri nanga den manpikin foe libisma, de wan sani di e gi joe frede.” — PSALM 66:5.
1, 2. (a) Fa na universum di wi kan si nanga ai e kotoigi foe na ferwondroe krakti foe na Mekiman? (b) Foe san-ede wi moe bribi san Jehovah proféti wortoe e taki foe wi ten?
JEHOVAH abi na makti foe doe san libisma no kan doe. Teki foe eksempre pikinso na sani disi: Libisma abi dipi respeki gi na krakti foe na atoombom, ma na krakti dati no de noti te joe teki en gersi nanga na kefarlek bigi krakti di de na ini na son foe wi. Ma tokoe ete na son de soso wan foe den sowan 200 miljard stari di de soso na ini wi merkipasi-sistema. Den astronoomman e denki taki na ini na heri universum sowan 100 miljard merkipasi-sistema de, èn ibriwan foe den e teri miljardmiljard stari. Fa disi de wan krakti di no de foe ferstan èn di ben de fanowdoe foe meki ala den sani dati! (Jes. 40:26) Te joe teki na krakti foe libisma èn san den man foe doe èn agersi dati nanga na kefarlek bigi makti di e gi joe respeki foe na Mekiman, dan a no de notnoti. — Jes. 40:15.
2 Soboen no wan sma man degedege na ini dati Jehovah abi na krakti èn a man foe doe san a e taki dati a sa doe (Jes. 46:9, 10; 55:11). Wi moe bribi en te en proféti wortoe e ferteri wi taki wi doro a kaba foe na skotoe ten di libisma kisi pasi foe waka wan onafhankelijk pasi. Na historia e sori dati san den ben doe nanga na libismalibi, na libi foe meti nanga na grontapoe de wan sjen, wan flaka tapoe na universum foe Gado. A de foe dat’-ede nanga leti srefsrefi dati Jehovah figi poeroe na flaka disi wantron èn foe alaten. — Hosea 4: 1-3; Judas 14, 15.
3. San den bijbelprofétitori e taki foe na krosbé ten di e kon?
3 San e psa now na grontapoe, de na krin bewijsi dati na seti foe sani disi de troetroe ini na laatste pisi foe den „laatste dé” di 2 Timóteüs kapitel 3 ben taki a fesi. Djonsro Jehovah sa masi broko na seti disi èn tjari wan kaba kon na en, èn poti na edeman foe en, Satan Didibri sondro foe abi wroko. Na doe dati sa waka a fesi foe wan heri njoen seti foe sani a grontapoe, di sa tiri nanga jepi foe na hemel tiri di Jezus ben leri en bakaman foe begi foe en, di a ben taki: „Joe Kownoekondre moe kon, joe wani moe psa soleki a ini hemel, so ooktoe na ini grontapoe.” — Matt. 6:10; Dan. 2:44; Rom. 16:20.
Na gronprakseri foe bai kon baka
4. Fa Jehovah ben handri na ini na owroe Israël akroederi na gronprakseri foe bai sani kon baka?
4 Den rigeri foe libisma no kan poeroe sondoe, siki, nanga dede. Tokoe a tiri foe Gado sa doe san libisma no ben kan doe. Wi e kisi wan loekoe ini na fasi fa disi sa go te wi ondrosoekoe fa Jehovah ben handri nanga en pipel ini Israël na ini owroeten. Na ini a ten dati Gado ben handri na gronprakseri foe bai kon baka ofoe pai foe wan loesoe prijs. Foe eksempre efoe wan Israëlsma ben kon póti, dan a ben kan de dati a ben moe seri ensrefi na wan sma di no ben de wan Israëlsma, ma wan krosbé famiri ben kan bai en baka ofoe bai en kon fri efoe a ben abi na fanowdoe moni. — Leviticus 25:47-49.
5, 6. (a) Fa na gronpraksersi foe bai kon baka ben gebroiki na ini na meki kon fri foe na libismafamiri foe sondoe di den ben kisi? (b) Ala sma automatis e kon fri foe sondoe?
5 Tapoe den sortoe fasi dati Gado ben seti sani dati a libisma-famiri ben kan bai baka komoto foe sondoe. Na prijs ben moe kroederi precies nanga san ben lasi gwe (Deut. 19:21). Adam ben lasi, tégo libismalibi. Foe di noti san sondoe libisma abi kan kroederi ini waarde nanga dati, meki den no ben kan ’bai wan brada fri’ srefi (Psalm 49:7). Ma na bijbel ben taki a fesi foe na kon foe na sma di ben kan doe disi gi Gado. Jezus Kristus ben sori taki a ben de a sma dati. A ben kon na krin dati Jezus ben abi libi na ini hemel bifo a ben tron libisma. Ma a libi foe en ben tjarl abra go na a moeroe foe Maria nanga jepi foe a krakti foe Jehovah. Tapoe a fasi dati a ben gebore leki libisma. Foe di Gado ben de en Tata meki a no ben kisi na sondoefasi di ben meki na tra pisi foe libisma ben de so onvolmaakti. — Matt. 1:18-21; Joh. 1:1, 14; 1 Petr. 2:22.
6 Soboen Jezus ben abi na wan enkri sani di ben de gelijk nanga wan volmaakti libismalibi — en égi volmaakti libismalibi. Ma kontrari nanga na trangajesi Adam Jezus ben gi jesi na Gado. Èn di a ben gi en libi abra gi na libismafamiri, Jehovah ben teki disi leki na bai kon baka ofoe fri ferloesoeprijs di fiti (Gal. 1:4). Ma disi wani taki dati ibri sma e kon fri automatis foe sondoe èn e kon na ondro na Kownoekondretiri na ini volmaaktifasi? Nono, bika na ini Johannes 3:16 tanapoe: „Gado ben lobi grontapoe sote, dati a ben gi en wan enkri Gebore Manpikin, sodati ibri sma di e sori bribi ini en, no ben sa kisi pori, ma ben sa abi tdgo libi.” Soso efoe wi teki na seti foe bai kon baka èn foe doe wan sani ini a tori dati wi sa ondrofeni na ini wi skin èn wi ferstan na ini na paradijs wan proces foe kon njoen baka te leki wan sma de volmaakti. — Openb. 21:4.
Leri na ini na Njoen Seti
7, 8. Sortoe krakti na libisma edetonton abi ini na teki foe sabi ini na njoen seti?
7 Srefi na ini na disiten onvolmaaktifasi foe libisma, na ferstan kan teki na ini en wan kefarlek bigi hoeveelheid sabi. Ma disi de soso wan pikinpisi foe san na ferstan sa kan teki na ini en ini na njoen seti foe na sé foe njoen sabi èn pe sondoe no sa tapoe na kontren foe na wroko foe na ferstan. Na ini The Brain Book a skrifiman e taki: „Na ini wi égi ede joe abi wan foe den moro moeilek sistema foe na universum di wi sabi. Na man di a man foe doe sani èn den foeroe sani di a kan doe e psa a ferwakti foe ibri computer di libisma meki srefsrefi.” A e taki moro fara: „Someni tron baka sma e taki dati wi e gebroiki soso 10 procent foe san wi man nanga wi ferstan. Disi de now wan sani pe den schat en behoorlek hé. Kande a de so, dati wi no e gebroiki srefi wan procent èn kande moro ete soso 0,1 procent ofoe moro mendri.”
8 Go prakseri pikinso san libisma sa kan doe te na ini na njoen seti a sa abi na heri kapaciteit foe en edetonton. Prakseri pikinso na ala den moi ferwondroe sani di Jehovah poti na a grontapoe disi èn di wi kan leri foe den, soleki na libi foe den meti na ini se, èn a libi foe den bon. Prakseri ooktoe san sa de foe leri foe na kefarlek boen bigi universum nanga en miljardmiljard merkipasi-sistema. Go prakseri pikinso foe ala den koni di wan sma kan leri na tapoe na kontren foe a meki foe sani leki popki nanga skedré, pokoe, wroko di e doe nanga anoe èn tapoe wan lo tra kontren moro.
9. Sortoe leri ini na njoen seti sa tjari den moro bigi blesi kon?
9 Na ini na njoen seti ete wan tra sortoe foe leri sa de, foe san den moro bigi blesi sa kon foe dati. Jezus ben taki: „Den alamala Jehovah sa leri” (Joh. 6:45). Disi de na moro hé sortoe foe leri. Èn a sa de foe kisi gi ala onderdaan foe Gado kownoekondre, ooktoe den sma di e psa libilibi na kaba foe na seti foe sani (Openb. 7:9, 14). Tra onderdaan foe na kownoekondre den e kari na ini Johannes 5:28, 29, di Jezus ben taki: „A joeroe e kon pe ala sma di de na ini den memre grebi, sa jere en sten èn sa kon a doro.” Na opobaka disi foe miljardmiljard sma — san libisma no man foe tjari kon kwetikweti — wani taki dati foe na boen foe den wan bigi leriwroko sa bigin.
10. Fa a sa de nanga a leri foe sma ini na Njoen Seti foe sani?
10 Na a momenti disi joe abi foeroe leri-sistema di de kontrari makandra. Ma ini na njoen seti dan a hemeltiri foe Gado sa sorgoe foe wan leri-sistema na a heri grontapoe foe leri den sma tapoe wan fasi foe tjari den kon na wan na ini na waarheid di e go foe Jehovah. Na leri foe na joisti matifasi na mindri libisma sa de wan pisi foe dati. No wan sma sa kisi leri dati a moe meki bigi foe en ras, nationaliteit noso maatschappeleke status. Den sma di e libi na grontapoe nanga a tra sé sa leri foe lobi makandra nanga respeki gi na waartifasi foe trawan. A sortoe foe lori disi sa abi leki bakapisi dati gosontoe kenki sa tjari kon ini a sma di den de, sodati den e go sori den hé égifasi foe Jehovah. — Tori. 10:34, 35; Kol. 3:9-12.
11, 12. Fa wi kan de séker dati a sortoe leri disi sa waka boen na ini na Njoen seti?
11 A sortoe foe leri disi abi tjans foe waka boen? Wi no de séker wawan dati, a sa kan waka boen, ma dati a sa waka boen toe. Wan réde de dati Jehovah, di no kan lé, e taki dati a sa waka boen (Tit. 1:2). Boiti foe dati, a de so dati a sortoe foe leri disi now kaba e waka boen! Jehovah abi wan organisaatsi na a heri grontapoe foe leri sma èn di e gi na miljoenmiljoen sma leri foe en kownoekondre tiri èn den marki foe dati. Disi e psa foe di na kownoekondre-tirimakti ben e wroko foe sensi a bigin foe den „laatste dé” ini na jari 1914.
12 Foe sensi a ten dati na profétitori di skrifi ini Mattéus kapitel 25 e kon troe. Drape e sori dati Jezus e kisi kownoekondre makti aladi den féjanti foe Gado ben de na grontapoe. Vers 32 e taki: „Ala naatsi sa tjari kon makandra na fesi en, èn en sa prati den sma foe makandra, soleki wan herder e prati den skapoe foe den bokoboko”. Den sma disi di gersi skapoe e kisi leri now foe Jehovah nanga jepi foe en organisaatsi di de foe si èn di e kon moro bigi dé foe dé. Foe di den e warderi san den e leri, meki den e doe den moeiti foe kenki a sma di den de foe a de akroederi a prekti foe Gado. Èn foe di na leri disi abi now wan boen wroko tapoe miljoenmiljoen sma, meki a e meki wi si sondro foe taki a no de so, dati disi sa psa na ini bigi ini Gado njoen seti na grontapoe ini wan paradijs.
A bow foe wan paradijs
13. Sortoe toemsi bigi opbow-wroko sa feni presi na ondro na kownoekondretiri?
13 Wan heri tra wroko na ondro na kownoekondretiri sa de a kenki foe na grontapoe disi kon ini wan paradijs. Èn ini wan paradijs wi no kan taki foe brokobroko oso noso pina. Soema wani wan boen oso èn gron lontoe na oso pe bon, bromki nanga wan djari de. Den sma di de klari foe Gado leri den, sa prisiri séker na ini disi. Na ini Jesaja 65:21, 22 ben taki a fesi: „Èn séker den sa bow oso èn sa libi na ini, èn séker den sa prani froktoedjari èn njan a froktoe foe en. . . . Den no sa bow èn wan tra sma e go libi na ini; den no sa prani èn wan tra sma e njan foe en. . . . a wroko foe den égi anoe den sma di mi ben teki poeroe sa gebroiki dorodoro.”
14, 15. Foe san-ede meki wi kan fertrow a tapoe dati Jehovah dienstknegti sa bow wan paradijs?
14 Èn no degedege san Jehovah sa doe nanga den ati nanga anoe foe en pipel ini wan njoen seti di de klari foe doe wroko. Srefi na ini a ten disi na gronapoe disi e ferwondroe foe den boen wroko san Jehovah Kotoigi e meki te ai go foe meki oso. Prakseri na den esesi bowprojekt foe kownoekondrezaal. Di so wan zaal ben bow na ini den Verenigde Staten foe Amerkankondre, dan ben tanapoe na ini wan artikel na ini koranti na sani disi: ’Nanga anoe foe den 2000 friwaniwrokoman dati, wan sani ben meki di abi moro waarde leki wan oso. Na tiri foe na foto èn den sma di abi makti foe a presi dati moe go ondrosoekoe moro fini san ben psa a weekend di psa. Faja, gi joesrefi krinkrin nanga a lostoe foe doro wan marki, ben poti go ini a stré, nanga ferwondroe bakapisi. Efoe groepoe na ini a presi dati ben sa man foe bondroe den srefi krakti dati kon na wan, dan ibri marki — efoe a de now recycling, doe sani foe tapoe ogridoe noso efoe a de a ontwikkeling foe a gemeente — ben sa de ini a makti foe den. Wan legre foe wrokoman ben bewijsi sortoe potentieel de ini libisma te wanfasi de ini wan gemeenschap. Wi howpoe dati na kownoekondrezaal de na presi pe na gemeente foe Jehovah Kotoigi sa feni wan krakti foe doe sani. A de foe na zaal de kaba wan krakti gi ala sma foe wi.’
15 Nanga a de klari disi foe doe sani èn na kisi moro koni foe doe sani foe na sé foe Jehovah dienstknegti sa gebroiki moro ete nanga moro boen bakapisi na ini Gado njoen seti. Èn fa a sa de wan switi sani foe meki ala presi di no de so switi komoto a pasi gi moi oso ini wan moi birti! Fa a sa de wan sani di e gi satisfaksi foe kan sabi, dati na grontapoe ibri dé e kon moro krosbé a wan grontapoe paradijs toestand nanga jepi foe den moeiti di joe e doe foe joe sé!
Wan wanfasi famiri na a heri grontapoe
16. Foe san-ede meki den sma di e libi na ini na Njoen Seti noiti a doe foe ogri sa de wan gefar gi den?
16 Ooktoe den sma foe na njoen seti noiti sa firi dati ogridoe, broeja ofoe oorlokoe sa waka kon misi den. Psalm 46:9 e taki: „Gado e meki oorlokoe kon na wan kaba te na den oekoe foe grontapoe.” Na „Vrédekownoe” Jezus Kristus, sa meki Vréde di e tan kon na alape na grontapoe, bika „na a kownoetiri di de psa marki èn na vréde, wan kaba no sa kon” (Jes. 9:6, 7). Te troe vréde de èn na heri libismafamiri e kisi leri ini den srefi hé markitiki, dan ala sma sa tjari kon na ini wan banti foe lobi di no kan broko. Dan nationaal skotoe di e tjari prati kon no sa de moro.
17. O fara na vréde nanga wanfasi e go kaba, di den dienstknegti foe Gado abi now srefi kaba?
17 Den sortoe foe pramisi disi de toemsi moi foe kan bribi den? Nono, bika vréde nanga wanfasi de kaba wan troe sani a mindri den sma di e saka densrefi loyaal na kownoekondre tirimakti! Go prakseri pikinso na a sani disi: Na a heri grontapoe joe abi moro leki toe nanga afoe miljoen kotoigi foe Jehovah. Tokoe den meki kon troe kaba san tanapoe na ini Jesaja 2:4: „Èn den sa moe naki den feti-owroe foe den tron ploegoe èn den lansri tron kronnefi. Naatsi no sa opo owroe tége naatsi, èn den no sa leri feti moro.” Na no wan enkri fasi Jehovah Kotoigi sa teki foe espresi na libi foe den brada ofoe tra sma poeroe, awinsi ini sortoe kondre den e libi. A de so dati na Italiaanse boekoe Il Corriere di Trieste ben taki: „Den e wani dede moro leki den pasa na fundamenti gebod di de na ini na komando JOE NO MOE KIRI!” Foe di Jehovah Kotoigi e hori tranga na den markitiki foe Gado meki troe vréde nanga wanfasi de a mindri den, wan sani di a grontapoe disi no man foe doro. Èn foe di miljoenmiljoen foe den doro disi kaba na mindri foe a grontapoe di trobi priti a pispisi, meki dati disi e sori krin san sa psa te Gado kownoekondre sa tiri ala afersi na grontapoe. Joh. 13:34, 35; 1 Joh. 3:10-12.
18, 19. San na wan toe tra winimarki di de na bakapisi foe na hori di wi moe hori wisrefi an den hé markitiki foe Gado?
18 Na ori tranga na den hé markitiki foe Gado e tjari boiti na internationaal vréde nanga wanfasi ooktoe sma kon di e broko den ede nanga den birti nanga den goedoe foe den birti foe den. Foe dat’ede ’den e tjari densrefi na wan eerlek fasi na ini alasani (Hebr. 13:18). Na ini na pisi tori disi wan Fransi-Canadees korantiskrifiman ben skrifi foe Jehovah Kotoigi na ini Le Journal de Montreal: „Efoe den ben de den wan enkri sma na ini grontapoe, dan neti wi no ben a foe sroto wi doro nanga greni èn poti alarminstallatie.”
19 Den loyaal onderdaan disi foe Gado tiri no sabi ini den égi mindri a problema foe ogridoe, ala di ini na grontpoe disi den no kan stop en moro. Èn foe di den e hori na den moreel markitiki, meki siki no e trobi den di e kon foe seks kontakti ofoe foe na problema foe poeroe bere di ini ibri naatsi e kon moro bigi. Boiti foe dati, Jehovah dienstknegti abi dipi respeki gi na trowlibi, wan sani di de leki dé èn neti ini na loekoe foe na grontapoe foe loekoe psa sani ini na tori foe a seti foe a trow. Foe san-ede Jehovah Kotoigi kan hori den sortoe fasi disi? Foe di Jehovah e tjari en loyaal anbegiman, èn „na Gado ala sani kan”. — Matt. 19:26.
Go moksi joesrefi na a troe anbegi
20. San de na toemsi bigi ferwondroe tjari konmakandra foe libisma na ini a ten disi?
20 Efoe den sma e ferstan en now ofoe no, dati na a heri grontapoe sma di gersi skapoe e lon go na Jehovah organisaatsi, de wan toemsi ferwondroe tjari konmakandra foe sma na ini disi ten. Nanga disi na moi profétitori foe Jesaja 2:2, 3 e kon troe: „Èn a moe psa na ini a laatste pisi foe den dé dati na bergi foe na oso foe Jehovah [na hé troe anbegi foe en] sa poti stéfi na tapoe na ede foe den bergi, èn séker a sa poti hé tapoe den pikin bergi, èn na drape ala naatsi moesoe lon go. Èn foeroe pipel séker sa go èn taki: ’Oen kon èn meki wi go na a bergi foe Jehovah . . .. èn en sa leri wi foe en pasi, èn wi sa waka séker den pasi foe en.’”
21. Sortoe dek’ati opregti sma e kisi?
21 Wi e gi dek’ati na ala opregtisma, foe go tron wan pisi foe na span boewégi disi na a heri grontapoe di ini bigi ipi e lon go na a troe anbegi èn di e poti densrefi na ondro na regtvaardiki tiri foe Gado. Njan boen foe den blesi di nownow kaba e kon foe na demakandra nanga wan pipel di kisi leri ini den wet nanga gronprakseri foe Gado. Go saka joesrefi loyaal na a kownoekondretiri di djonsro sa meki wan bigin foe kenki a grontapoe disi kon ini wan paradijs. Poti joe fertrow ini na kownoekondre dati èn no ini den plan foe na grontapoe disi, bikasi Psalm 127:1 e taki: „Efoe Jehovah srefi no e bow na oso, dan foe soso den basi e wroko tranga na en.” Teki na kari ini Psalm 66:5: „Oen kon èn loekoe den wroko foe Gado. A fasi fa a e handri nanga den libisma pikin de wan sani di e meki joe frede.” Kon soboen na a Gado di e gi a djaranti foe a moro boen tiri gi libisma, na tiri di sa meki doe kon san libisma no man meki kon, na tiri di na ini na krosbé ten na wi fesi sa de na wan enkri tiri na a grontapoe disi.
Fa joe ben sa piki den aksi di e kon now?
◻ Foe san-ede wi kan de séker dati Jehovah sa meki en prakseri kontroe?
◻ Fa wan sma e kon fri tapoe na gron foe na gronprakseri foe bai kon baka foe sondoe?
◻ Sortoe bigi leriwroko èn sortoe bowwroko sa feni presi na ini na njoen seti?
◻ Sortoe bewijsi de now dati ini na njoen seti ala pe a grontapoe vré, wanfasi nanga lobi sa de?
[Prenki na tapoe bladzijde 7]
Ondro na Kownoekondretiri a sa de so dati sma, di lobi waarheid, „sa kisi alamala leri foe Jehovah”
[Prenki na tapoe bladzijde 9]
Vréde nanga wanfasi de wan troetroe sani kaba a mindri den sma di e saka densrefi ondro na kownoekondre tiri