’Sai psa marki, koti psa marki’
„A sma di sai pikinso, sa koti pikinso, èn a sma di e sai psa marki sa koti ooktoe psa marki.” — 2 KORINTE 9:6.
1. Foe san-ede Jehovah de a moro kolokoe sma na ini na universum?
NA GADO FOE WI Jehovah de „na kolokoe Gado”. Wan réde foe disi de sondro degedege dati a de sowan sma di e gi sani psa marki. En Manpikin, Jezus Kristus, ben ferklari: „A de moro kolokoe foe gi sani leki foe kisi sani” (1 Timóteus 1:11; Tori foe den Apostel 20:35). Nowan sma ben gi moro leki Jehovah, foe sensi a pisten di a ben meki en wan enkri gebore Manpikin, na Logos, te leki a dé foe tide. Sondro foe kan degedege pikinso wi kan taki soboen dati a de a moro kolokoe sma na ini na heri universum.
2, 3. (a) Na ini sortoe fasi Jehovah ben sai psa marki? (b) Foe san-ede wi kan taki dati Jehovah koti psa marki èn sa doe disi ooktoe na ini a ten di e kon?
2 Net so wan srefi sortoe gronprakseri e kon na fesi na ini 2 Korinte 9:6: „A sma di e sai pikinso, sa koti ooktoe pikinso, èn a sma di e sai psa marki, sa koti ooktoe psa marki.” Èn fa Jehovah ben sai psa marki ini a tori foe den mekiwroko foe en! En Wortoe e ferteri wi foe na de foe hondrohondro miljoenmiljoen jeje mekisani (Openbaring 5:11). Go prakseri ooktoe den starisistema nanga den starihemel di no de foe teri, di ibriwan foe den baka abi miljardmiljard stari. Èn te wi e loekoe na grontapoe disi, dan fa wi e si wan difrenti di no abi kaba foe sani di abi libi èn di no abi libi, èn di Jehovah Gado ben meki den alamala! Na grontapoe séker de ’foeroe nanga den sani di a ben meki’ (Psalm 104:24). Èn boiti foe dati, fa a ben prakseri wi na ini wan fasi di psa marki te wi loekoe wi ferstan, den zintuig foe wi (si, jere, firi, tesi, smeri) nanga wi skin. Foe troe den ben meki wi ’na wan wondroefasi’. — Psalm 139:14.
3 Degedege no de na ini dati Jehovah Gado ben sai psa marki. Disi no wawan de so ini a tori foe en mekiwroko, ma ooktoe ini a tori foe na fasi fa a e handri nanga den grontapoe mekisani foe en. Ma a ben koti ooktoe psamarki? Ija! Na ini sortoe fasi? Foe di bigi nomroe foe mekisani di a gi ferstan ben dini en alaten, e dini en èn sa dini en ete nanga lobi. Dati den e doe disi e meki a ati foe Jehovah prisiri, spesroetoe foe di nanga disi a bewijsi e gi dati na Didibri di e spotoe en de wan léman. — Odo 27:11.
4. Fa na gronprakseri na ini 2 Korinte 9:6 ben kon troe alaten, ooktoe na ini wi ten?
4 A bijbel e kotoigi psa marki dati, foe bigin nanga na Logos, foeroe getrow dienstknegti foe Jehovah Gado ben sai ooktoe psa marki èn ben koti psa marki. Na so a moesoe de ooktoe foe di den gronprakseri foe Jehovah de asrefi alaten èn gi ala sma. Na gronprakseri foe sai foe dat’ede kan poti ooktoe ini joe libi.
5, 6. a) Sortoe féjanti e meki en moeilek gi wi foe sai psa marki? (b) Wi moe de klari foe doe san, èn ini a tori foe sortoe pisi foe wi santa dienst?
5 Aladi na bijbel foeroe nanga réde foe sainde wi moe sai psa marki èn nanga eksempre di e tjari disi kon na krin, dan tokoe a no de makriki. Foe san-ede? Foe di wi abi dri féjanti di e gens wi na ini disi na wan krakti fasi. Na a fosi presi wi égi firi di wi kisi foe lobi wisrefi nomo. Na ini Genesis 8:21 wi e lési: „Na firi foe libisma ati de takroe foe en jongoe jari kaba.” Na Wortoe foe Gado e ferteri dati na libisma ati de ferraderlek èn no e si psa noti (Jeremia 17:9). Na ini a di foe toe presi wi moe feti nanga na druk foe na godelowsoe grontapoe, di de ini na makti foe na godelowsoewan (1 Johannes 5:19). Èn na ini na di foe dri presi Didibri srefi de klarklari foe swari wi efoe wi meki a de di wi moe de na ai kon slap. — 1 Petrus 5:8.
6 Joe e loekoe boen alaten gi den dri féjanti disi? Foe di den dri gensman disi de meki nanga ala prisiri wi moe ’arki na rai èn teki trangaleri, sodati wi kan de koni na ini a ten di e kon gi wi’ (Odo 19:20). Te joe loekoe en boen dan netleki na apostel Paulus wi moe de ’tranga gi wi skin èn tjari en leki wan srafoe’, sodati na prijs te foe kaba no sa komoto ini wi anoe (1 Korinte 9:27). Na gronprakseri dati efoe wi sai psa marki wi sa koti ooktoe psa marki, kan tjari kon na tapoe ala den difrenti fasi foe na santa dienst di ala kristen Kotoigi foe Jehovah e teki prati na den, Ija, awinsi na ini sortoe sé wi e drai wi fesi go, efoe wi e soekoe en now na tapoe na kontren foe persoonlek studie, go na komakandra, begi, gi kotoigi ofoe okasi-préki èn ini den osofamirimatifasi nanga makandra, wi e si dati na gronprakseri disi e wroko.
Sai psa marki ini a tori foe bijbelstudie
7, 8. (a) San wi moe abi foe sai psa marki ini a tori foe wi persoonlek bijbelstudie? (b) Sortoe marki wi moe poti, èn fa wi kan doro disi?
7 Efoe wi wani de dinari foe Jehovah di e meki froktoe, dan ini na fosi presi wi moe sai psa marki ini wi persoonlek studie foe a bijbel. Foe di wi e ferstan dati wi no e libi wawan foe sani na skinfasi, meki wi moe abi wan boen jeje apteiti. Foe di ala sortoe activiteit foe aladé e poti druk na tapoe wi, meki moeiti pe wi o go prakseri go kon de fanowdoe foe poti boen na wi prakseri san wi jeje nowtoe de (Mattéus 13:19). A ben sa de foe troe wan moi sani te wi persoonlek ben sa abi nasrefi warderi gi na Wortoe foe Gado leki na Psalmsingiman di a ben skrifi: „Mi abi prisiri psa marki foe na wortoe foe joe, net soleki wan sma di e feni foeroe sani di a wini.” — Psalm 119:162.
8 Wi e kisi séker jepi na ini disi te wi e poti prakseri na tapoe na rai ’foe loekoe boen fa wi e waka no leki don sma, ma leki konisma, e bai na ten di fiti gi wisrefi’ (Efese 5:15, 16). Tapoe a punt disi kande joe ben sa kan ondrosoekoe joesrefi. Aksi joesrefi: Mi e seti mi afersi so foe di mi e meki ten foe lési ibri uitgave foe Na Wachttoren nanga Ontwaakt! so esi leki mi kisi den? Èn fa a de nanga na Jariboekoe èn ooktoe nanga den boekoe nanga tra lektuur di wi e kisi tapoe den kongres? Kande a no e luk wi alaten foe gi wan ofoe toe joeroe foe lési den publikatie disi, ma te wi e soekoe okasi, dan wi kan feni dja ofoe jana wantoe minuut foe lési wan kapitel foe a bijbel ofoe wan artikel ini wan tijdschrift. Joe abi boen foeroe kristen di ibridé e opo tin ofoe tinaféfi minuut moro frokoe sodati den kan lési wan sani te a ferstan foe den de so fris leki a kan. Trawan e si dati den kan lési foeroe te den e reis nanga bus nanga tra sani. Fa a de nanga joe?
9. Fa wi kan koti psa marki ini a tori foe wi persooniek bijbelstudie?
9 Te joe e sai na den fasi disi psa marki, dan wi kan ferwakti ooktoe foe koti psa marki. Na sortoe fasi? We, wi sa abi wan moro krakti bribi, na howpoe foe wi sa de moro krin èn wi sa de na ini wan kolokoe èn positief jejefasi. Moro leki dati, wi sa de srekasreka moro boen foe gi kotoigi na tra sma. Wi kan jepi foe abi wan moro boen takmakandra èn jepi wi brada nanga sisa te okasi e sori densrefi. Loekoe pikinso san kan de a bakapisi leki fa 1 Timóteus 4:15, 16 e taki.
Sai psa marki ini a tori foe go na komakandra
10. Fa wi fasi moe de nanga wi komakandra?
10 Joe e aksi kande: Na gronprakseri disi dati wi moe sai psa marki efoe wi wani koti psa marki abi ooktoe foe doe na a fisiti foe gemeente komakandra? Séker! Wi moe denki na a srefi fasi foe disi leki a psalmsingiman David di ben taki: „Mi ben prisiri di den ben taigi mi: ’Meki wi go na na oso foe Jehovah.’” Ija, a moe de wan sani di e hari wi foe kon makandra nanga wi brada nanga sisa. — Psalm 122:1.
11, 12. Fa wi kan sai èn koti psa marki ini a tori foe wi komakandra?
11 San disi e aksi foe wi? A wani taki dati wi moe go geregeld na den féfi ala wiki komakandra foe wi getrow èn no gi pasi taki wan pikin takroe weer ofoe di wi skin no firi switi pikinso de wan pardon foe tan na oso. O foeroetron wi e si dati na weer, waran ofoe kowroe, nati ofoe dré, e tapoe wi foe go na den komakandra? Tokoe a de so dati omoro moeilekheid wi moe wini foe go na komakandra, omoro bigi a gersi taki na blesi de di Jehovah e gi wi. Wi kan sai psa marki ooktoe, sodati bifo den komakandra wi kan abi pikin takimakandra di e bow trawan, aladi baka den komakandra wi kan tan moro langa foe asrefi prakseri disi. Fa a de nanga wi na ini disi? Joe moe proeberi foe sai moro psa marki? Ooktoe wan boen sreka tapoe na Wachttorenstudie e pré ini disi wan rol. Na réde foe disi de dati wi kan sai dan psa marki foe di wi e gi kommentaar efoe na okasi e sori ensrefi.
12 Na ini sortoe fasi wi kan ferwakti dati disi sa tjari wan koti kon di sa de psa marki? Wi no kan taki wortoe di e gi tra sma dekati dati wisrefi kisi tranga foe en. Wi no kan gi tranga na wan sma di brokosaka sondrodati wi égi ati e kisi tranga foe en. Ija, na tapoe komakandra wi no kan gi wan kommentaar sodati wi égi bribi ini den waarheid san wi taki kan kon moro tranga. A de makriki: „Na sili di lobi foe gi sani ensrefi sa kon fatoe, èn wan sma di e gi tra sma watra fri, ensrefi sa kisi watra fri.” — Odo 11:25.
Sai psa marki ini a tori foe den begi foe wi
13, 14. Fa wi kan (a) sai psa marki, (b) koti psa marki ini a tori foe den begi foe wi?
13 Na gronprakseri foe bijbel dati wi moe sai psa marki, de ooktoe gi wi persoonlek begi. Den begi foe wi de asrefi netleki wan masjin , èn alaten baka wi e go taki densrefi sani, ofoe den e komoto troetroe foe wi ati? Den begi foe wi no wawan de soso sani di wi e aksi, ma abi ooktoe prijse singi nanga tangi di e komoto foe wi ati èn wawantron tranga begi? Wi e teki na diri grani foe begi troetroe sondro foe spotoe? Wi e poeroe wi ati krinkrin gi wi hemel Tata? Ofoe wi e taki wi begi es’esi ofoe sontron abi en druk foe begi? Na ini den kristen Griki Skrifi e kon a krin dati begi ben teki wan bigi presi na ini na libi foe Jezus Kristus èn na apostel Paulus. — Lukas 6:13, 13; Johannes 17:1-26; Mattéus 26:36-44; Filipi 1:9-11; Kolosse 1:9-12.
14 Na ini na marki dati wi e sai psa marki na ini a tori foe na begi foe wi, na ini na marki dati wi kan ferwakti toe foe koti psa marki foe di Jehovah di e jere den èn foe di wi e de na ini wan boen matifasi nanga en. Begi nanga na heri osofamiri e meki dati den osofamirman e kisi wan moro krosbé banti nanga na sma di e begi. Meki wi hori den wortoe foe Jezus na ini prakseri ini Mattéus 7:7: „Tan aksi, èn joe sa kisi; tan soekoe, èn joe sa feni; tan naki doro èn den sa opo gi joe.”
Sai psa marki ini a tori foe a diniwroko foe wi
15. Tapoe sortoe kontren spesroetoe wi moe sai psa marki foe koti psa marki?
15 Kande na thema foe wi no e kon no wan tra presi moro krin leki ini a tori foe na kotoigiwroko foe wi. A de krin dati omoro ten wi e gi na dati omoro kande séker a de dati wi sa koti moi ondrofenitori, gobaka nanga osobijbelstudie di e tjari froktoe kon, èn pe libi rikomanderibrifi e kon foe dati. — 2 Korinte 3:2.
16, 17. (a) San den e aksi foe wi te wi sai psa marki ini a tori foe na velddienst? (b) Sortoe bakapisi wi kan ferwakti efoe
16 Sai psa marki ini a tori foe na velddienst no de soso wan afersi foe wan bigi nomroe, ma ooktoe kwaliteit. Te wi e teki prati na a diniwroko, dan wi moe de „faja ini jeje” (Romeini 12:11). Wi moe go taki nanga sma fri èn sondro frede nanga wan waran switi lafoe fesi, efi wi e go na oso foe oso ofoe e abi wan prati na a kotoigiwroko tapoe strati. Efoe na njoen jepisani, na boekoe Tak-go-tak-kon nanga jepi foe den Boekoe, de ini na tongo foe wi te wi e gi kotoigi, dan a boekoe disi moe jepi wi alaten foe doe a wroko moro boen èn na so fasi ooktoe meki moro froktoe èn koti moro foe na ten nanga na krakti di wi e poti na ini na diniwroko.
17 Èn sai psa marki na ini a tori foe wi velddienst no wani taki ooktoe dati nanga wi heri konsensi wi e skrifi sani foe na belangstelling di wi ben feni? Tai nanga disi de dati wi moe teki ooktoe na ferplekti foe go agen a den sortoe adres disi èn wiki na belangstelling go moro fara, sodati sonten wi kan opo wan bijbelstudie. Moro leki dati, wi moe loekoe soifri dati wi e bow nanga materiaal di kan bel faja. Disi wani taki dati wi moe gi kotoigi nanga overtoigi, ma ooktoe nanga firi gi tra sma èn foe kroetoe sani boen di wi e si èn tjari na bijbelstudenti na wan konifasi kon so fara foe ferteri a fasi foe den fa den e si bijbelgronprakseri. Soso te ini den fasi disi wi sai psa marki, dan wi kan abi na ferwakti nanga howpoe foe meki kristen di abi den égifasi di sa man foe kakafoetoe gi den aanval foe Satan nanga en seti foe sani. — 1 Korinte 3:12-15.
Sai psa marki ini a tori foe a osofamirilibi
18. Sortoe rai wi moe hori na prakseri ini a tori foe na osofamirilibi?
18 Na theokratis gronprakseri, dati wi e koti akroederi na fasi fa wi e sai, abi foe doe ooktoe nanga na osofamiri. Dja wi kan ori den wortoe foe Jezus Kristus ini Lukas 6:38 ini prakseri: „Leri foe gi, èn den sa gi joe wan marki di foeroe, di stampoe, di seki èn di pasa, den sa poti ini joe bowtoe. Bika nanga na marki nanga san joe e marki den sa marki joe ooktoe.”
19. Fa trowman èn trowoema kan sai psa marki èn ondrofeni wini foe dati?
19 Trowman nanga trowoema abi someni okasi foe sai psa marki foe di den e doe lobi wroko di e kotoigi foe na ori foe trawan na prakseri èn pe den no e prakseri densrefi nomo! Na apostel Paulus e gi na ini Efese 5:22-33 moi rai. Lési den vers grantangi aladi joe e go prakseri fa joe kan sai moro psa marki. Na ini na marki di wan kristensma troetroe e saka ensrefi èn e gi a wroko-makandra èn na jepi foe en, na ini a marki dati kande séker a sa koti psa marki. Na ini san na koti dati sa de? Na ini na faja lobi èn a lobi di e sori a warderi foe en masra, di tjari kon ini boewégi foe lobi en leki en égi skin. Èn disi de so ooktoe gi wan kristen masra, bika na ini a marki di ai poti ensrefi a tapoe foe sori taki a lobi foe sorgoe sani soleki 1 Petrus 3:7 e sori tranga èn foe lobi sondro gridi di ai sori di Efese 5:28, 29 e poti krakti a tapoe, na ini a marki dati a kan ferwakti na saka di en oema sa saka ensrefi, èn kisi na loyaal jepi foe en.
20. Fa joe kan sai psa marki ini a tori foe na kweki foe pikin, èn nanga sortoe bakapisi?
20 Ooktoe wi no moe loekoe psa na frantwortoe foe wi foe kweki wi pikin ini na tranga leri èn na makti rai foe Jehovah (Efese 6:4). Te joe loekoe en boen dan na frantwortoe disi e kon bifo tra theokratis wroko nanga grani. Ma a wan sari sani foe si taki dati disi de wan gronprakseri di wantoe kristen papa nanga mama e psa en. Na a tra sé papa nanga mama de klari foe offer prisiri nanga a makriki fasi di den wani abi foe na boen foe na jeje tanboen nanga firi foe den pikin foe den èn den de klari foe psa wan rédelek hoeveelheid ten nanga den makandra èn foe gi den boen foeroe lobi. Na a tra sé a de so dati papa nanga mama moe sori taki den de sma di no e meki spotoe. Den e kisi na rai: „Strafoe joe manpikin èn a sa gi joe rostoe èn joe sili foeroeprisiri.” Doe tapoe den fasi disi saiwroko èn a kan de séker taki joe sa koti psa marki di joe sa abi pikin di e kibri den soifri reti-fasi èn di abi respeki gi joe èn di e firi densrefi krosbé nanga joe. — Odo 29:17.
De wan kotiman foe winimarki!
21, 22. Tapoe sortoe difrenti fasi wi kan sai èn koti psa marki ini a tori foe wi santa dienst èn na osofamirilibi?
21 Wi e si foe datede dati na gronprakseri dati wi e koti na a fasi fa oen sai-wroko de gi ala pisi foe a kristendom. Efoe wi e sai psa marki ini a tori foe persoonlek bijbelstudie dan wi sa abi wan tranga bribi èn koti wan brenki howpoe èn de srekasreka boen tapoe diniwroko. Efoe wi e sai psa marki ini a tori foe komakandra, dan wi égi bribi sa kon tranga èn wi sa tranga na bribi foe trawan. Efoe wi e sai psa marki ini a tori foe begi, dan san wi sa koti sa de ini disi, dati wi sa kon na ini wan boen matifasi nanga wi hemel Tata èn dati a sa jere wi begi. Èn efoe wi sai psa marki ini a tori foe wi kotoigiwroko dan wi sa koti persooniek winimarki èn wi kan abi a howpoe dati wi sa kisi wan kroon foe rikomanderibrifi.
22 Meki wi no frigiti ooktoe noiti dati na gronprakseri disi abi foe doe nanga na osofamirilibi. Sai psa marki foe di tapoe wan lobifasi wi poti prakseri tapoe trawan èn e wroko sondro foe prakseri wisrefi, abi leki bakapisi gi wi leki trowman, trowoema, papa nanga mama ofoe pikin dati wi kan abi na ferwakti foe koti wan osofamirilibi di foeroe psa marki na ini boen demakandra èn ondrofeni. Nanga disi wan boen kotoigi sa gi ooktoe na den sma di de na dorosé, foe di a sa de wan boen rikomanderi foe na libifasi foe wi.
23. Tapoe sortoe rai wi moe poti prakseri nanga leti?
23 Meki ibri Kotoigi foe Jehovah aksi ensrefi soboen: Mi sa kan sai moro psa marki? Paulus wortoe na ini 1 Thessalonika 4:1 fiti srefsrefi: „Te foe kaba oen brada, wi e begi èn fermane oen na Masra Jezus dati oen, soleki oen ben kisi na leri na a fasi fa oen e waka èn e plisi Gado, soleki oenoe e waka kaba te joe e loekoe en boen, tan doe en moro boen.” Ija, foe troe, meki wi alamala proberi foe sai moro psa marki, sodati wi kan koti moro psa marki leki wan grani gi Jehovah èn leki wan blesi gi wisrefi èn gi wi brada nanga sisa.
Punt foe loekoe san wi ben leri
◻ Fa na waarheid foe 2 Korinte 9:6 e kon a krin foe den foeroe sani di Jehovah ben doe?
◻ San joe kan doe foe koti psa marki ini a tori foe bijbelstudie nanga kristen komakandra?
◻ Fa joe kan sai èn koti moro psa marki ini a tori foe na velddienst?
◻ Nanga sortoe praktis stap joe osofamiri kan kisi jepi foe sai èn koti moro psa marki?