Joe e sai bogobogo?
1 Wan sani di sma e taki, na disi: „Omoro moeiti joe e doe gi wan sani, omoro joe kan kisi foe en.” Disi spesroetoe de troe na ini wi anbegi. Omoro ten nanga moeiti wi e teki foe sreka gi den konmakandra, a preiki foe a Kownoekondre boskopoe, èn sori lobi gi wi brada, omoro wi sa wini ini a gro di wi e gro na jejefasi. A tra sei foe en, de troe toe. Efoe wi no wani foe doe moeiti noso wi no e doe sani nanga wi heri ati, wi kan froewakti dan taki troetroe wi o kisi boen bakapisi?
2 Na apostel Paulus ben taki heri boen foe a gronprakseri disi na 2 Korentesma 9:6: „A wan di e sai pikinso nomo, sa koti pikinso nomo toe; èn a wan di e sai bogobogo, sa koti bogobogo toe.” Joe e sai bogobogo?
3 Persoonlijk bijbelstudie: Foe de dinari di e gi foeroe froktoe, dan wi moesoe sai bogobogo fosi ini wi persoonlijk studie. Wi moesoe abi wan fajafaja angri gi jeje afersi (Ps. 119:97, 105; Mat. 5:3). Nanga ala den broko-ede foe na ala dei libi di e druk tapoe wi, a de fanowdoe taki wi e meki moeiti foe meki a de di wi de na ai troetroe gi den fanowdoe foe wi na jejefasi, gro. Gi moro foeroe foe wi, a e aksi foe „bai a joisti ten” (Ef. 5:16). Sonwan e seti sani so taki den kan wiki moro froekoe tapoe spesroetoe dei foe doe persoonlijk studie. Trawan e teki wan toe neti foe doe dati. Na sortoe fasi wi e koti bogobogo? Wi e kisi wan moro tranga bribi, wan moro krin howpoe, èn wan moro kolokoe èn moro positief fasi foe si sani. — Rom. 10:17; 15:4; 1 Petr. 1:13.
4 Gemeente konmakandra: Na Psalm 122:1, David ben taki: „Mi ben breiti te den ben taigi mi: ’Meki wi go na a oso foe Jehovah.’” Joe e firi a srefi fasi? Foe sai bogobogo wani taki foe fisiti den feifi alawiki konmakandra foe wi doronomo. Teki a bosroiti foe no meki takroe weer hori joe foe no go na den konmakandra. Moro foeroe a de so, taki omoro problema wi e loesoe, omoro bigi den blesi foe wi de.
5 Kon froekoe èn draidrai baka a konmakandra foe taki makandra nanga joe brada na wan fasi di e bow sma. Meki a demakandra di joe abi kon moro bradi, foe di joe e taki toe nanga someni difrenti sma leki joe kan. Sreka boen gi a Waktitoren-studie nanga den tra konmakandra so taki joe kan sai bogobogo foe di joe e gi komentaar te joe abi na okasi. Sma sa gi joe „foe dringi foeroe”, te joesrefi e gi den „foe dringi foeroe”. — Odo 11:25.
6 Velddienst: Kande no wan presi a gronprakseri disi, foe sai bogobogo de moro troe leki ini a velddienst. Omoro ten joe e gi na en, omoro a kan de so taki wi o koti moi ondrofenitori, gobaka di e gi froktoe, nanga bijbelstudie di e go na fesi.
7 Foe sai bogobogo ini a velddienst, wani taki toe, o boen joe e doe en èn ofoeroe joe e doe. Wan toemoesi moi jepi foe meki a diniwroko foe wi kon moro boen, na a Taki-go-taki-kon boekoe. Bladzijde 9-15 e kari moro leki 40 inleiding di abi foe doe nanga 18 tori foe jepi foe wiki a belangstelling na den doro. Te joe feni belangstelling, de seiker taki joe hori dati na prakseri, so taki joe kan go baka foe koti den froktoe foe a sai di joe ben sai. A de foe howpoe taki joe moeiti sa meki joe feni wan bijbelstudie, pe joe kan leri wan tra sma fa a kan sai bogobogo.
8 Te wi e sai bogobogo, dan wi kan froewakti moro bigi blesi foe Jehovah. — Mal. 3:10.