Te wi e sai pasa marki dan wi sa kisi furu blesi
1 Wi alamala e fruwakti a kontru fu den bigi pramisi di skrifi na ini Gado Wortu. Na ini a ten disi kaba, Yehovah e gi wi furu blesi di e meki wi kisi moro prisiri na ini wi libi. A fasi fa wi kan kisi wini e anga moro furu fu a muiti di wi e du fu feni dati. Neleki fa na apostel Paulus taki, „a sma di e sai pasa marki, sa koti pasa marki tu” (2 Kor. 9:6). Poti prakseri na tu fasi fa wi kan gebroiki a gronprakseri disi.
2 Wi eigi preikiwroko: Te wi e preiki a bun nyunsu gi sma awinsi o ten wi man, dan wi sa kisi furu blesi (Odo 3:27, 28). A de fu prèise taki furu preikiman e sai pasa marki te den e du moro na ini a preikiwroko, fu di den e dini leki yepipionier noso leki gewoon pionier. Wi alamala kan sai pasa marki te wi e du muiti trutru fu go baka na den sma di arki èn te wi e aksi sma fu studeri Bijbel nanga den te wi si taki wan okasi de gi dati (Rom. 12:11). Te wi meki tranga muiti na den fasi disi, dan a bakapisi sa de taki wi sa kisi ondrofeni di e gi deki-ati èn wi sa kisi moro prisiri ini a preikiwroko.
3 Horibaka gi Kownukondre afersi: Di Paulus ben taki fu a ’sai di wi musu sai pasa marki’, dan a ben abi materia sani na prakseri (2 Kor. 9:6, 7, 11, 13). Na ini a ten disi, wi kan hori baka gi Kownukondre afersi na skin fasi èn na materia fasi. Wi kan yepi nanga a bow fu Kownukondre zaal nanga Kongreshal. Wi kan teki prati tu na ini a wroko fu hori den konmakandra-presi fu a tru anbegi krin. Boiti dati, wi kan gi moni fu horibaka gi a gemeente pe wi de na ini. Ma wi kan gi moni sosrefi gi a Kownukondre preikiwroko nanga a wroko di abi fu du nanga a meki fu disipel di e du na heri grontapu. Te wi alamala e du san wi musu du, dan wi kan prisiri te wi si fa Yehovah e blesi a wroko pasa marki di a gi wi fu du!—Mal. 3:10; Luk. 6:38.
4 Gado Wortu e gi wi a frumane „fu du bun, fu de gudu ini bun wroko, fu lobi fu gi, fu de klariklari fu prati nanga trawan”. Te wi e poti prakseri na a frumane disi, dan wi kan prisiri nownow kaba nanga den furu blesi. Na a srefi ten wi e ’kibri wan gudu gi wisrefi leki wan bun fondamenti gi a tamara èn gi a trutru libi’ di musu kon ete.—1 Tim. 6:18, 19.