Luku bun nanga „Vrede nanga seikerfasi” soleki den natie e meki mofo fu dati
„Te den e taki: ’Vrede nanga seikerfasi!’ [vrede nanga tanboen, Willibrordvertaling]” — 1 THESSALONIKA 5:3.
1, 2. (a) Fa san-ede a ferstan wawan e taki dati a de moro betre fu feti baka vrede? (b) Sobun, feianti politiek seti sa agri tapu sortu sani?
NA GRONTAPU fu libisma noiti ete ben de so onveilig leki ini a ten disi. Libisma e frede wan di fu dri grontapufeti na san natie sa teki prati di na wan bun heifasi sreka na srudati sei èn di abi now na superfetisani — na atoombom. Dati natie man fu meki atoomkern wroko ini na feti ben tyari den go so ongeveer na a laatste pisi ini a tori fu a makti di den abi fu srakti libisma na wan bigi fasi. Na fu dat’ede a ferstan e taki kaba dati a moro bun fu feti baka vrede.
2 Iya, fu tru, bika wan di fu dri Grontapufeti di ben sa kan feti ini wi ten nanga na gebroiki fu den sortu fetisani disi ben sa wani taki noti moro leki a kiri fu a heri grontapu pe libisma ben sa panya sondro dati furu tan abra fu den ofu ben sa dede fu a bakapisi fu wan nucleair srekisani. Srapu politiekman nanga srudati komanderiman de sabisabi na wan fasi di e hati den fu na tori disi. Den no wani dati na frantwortu fu sowan grontapu rampu kon de a tapu den. Fu dat’ede meki politieksistema di tanapu leti abra makandra e feni en wan sani di fiti fu doro wan akruderi, iya a ben sa kon de bun gi den efu den ben sa meki na grontapu koni filosofie fu „libi èn meki trawan libi” tyari den.
3. Fu sortu reide meki den natie sa meki „vrede nanga tanbun” bekenti?
3 Toku den natie no e fertrow makandra helemaal. Leki wan fasi fu sorgu fu sani a fesi meki den e meki den srudatimakti fu den bun tranga. Den tiriman sa moksi densrefi kon a wan fu dat’ede fu opregti èn tru lobi ede gi makandra leki memre fu nasrefi libismafamiri fu kan meki na heri libisma grontapu yere leki ini wán mofo na meki bekenti fu „vrede nanga tanbun”? Nono, a sa de moro furu gi den fu dodoi na frede di den sma abi nanga reti. — 1 Thessalonika 5:3.
A fasi fa den kerkifesiman e teki na meki bekenti di e kon
4, 5. (a) Fa den sma soleki a ferwakti de sa du ini algemeen ini a meki bekenti ini a ten di e kon? (b) Sortu aksi e kon afesi ini a tori fu a afersi ofu Gado sa gi en yepi na a bekenti fu sani ini a ten di e kon, aladi den kerki fesiman du disi wel?
4 Te na meki bekenti disi te fu kaba sa du, dan na a heri grontapu ini algemeen den sma sa teki dati tapu wan positieffasi. Sondro degedege den kerkitiriman fu na grontapu makandra nanga den katholiek èn den anitri kerkifesiman fu na kristenheid, sa bar’odi gi na internationaal sani disi. Soleki na winti e wai, na so na dyaktifu den kerki fesiman wai fu kan tan ini a bun ati fu den sma èn fu dyaranti densrefi fu na yepi èn respeki fu na sei fu den politiekman.
5 Dati den kerkifesiman e gi na yepi fu den na a politiek kruderi di meki bekenti na ala sei no e wani taki dati na Gado fu na universum, makandra nanga na grontapu fu wi, e tanapu na den baka. A kan de dati den kerkifesiman ini den kerki-oso fu den e seni langa èn tranga begi ini na yesi fu den kerkiman èn e aksi a blesi fu Gado tapu den maatregel di teki ini politiek kontren fu meki vrede nanga tanbun go na fesi. Ma ala den sortu deftig begi disi, tapu san den gemeente di e arki e taki wan krakti amen a tapu, de wan sani di na Gado fu na universum disi e teki? A kan de tapu a futu fu vrede nanga wan grontapu di na kerkisei prati, di e seni begi fu vrede nanga tanbun na ini san den prakseri fu den kerki sekte nanga dominatie a mindri makandra de kontrari makandra?
6, 7. (a) Sortu libifasi na kristeneid teki netleki den dyu fu owruten? (b) San sa de na bakapisi fu na yepi di den kerkifesiman e gi na a bekenti fu vrede nanga tanbun?
6 No wan tra pe den e meki so tranga bekenti dati Gado de na a sei fu den leki a den natie fu na kristenheid. Ma a Gado fu na universum no de a sma di e tiri abra na kristenheid. Na libifasi di den e waka na en baka e kruderi nanga den Israëlsma fu owruten. Di den no ben de tevrede nanga a fasi di Yehovah ben poti fu tiri na natie, èn ben go denki dati na politiek strokturu fu den heiden natie di ben de lontu den ben de moro bun, dan den ben go na Yehovah profeiti Samuël èn ben aksi en fu poti wan kownu a tapu den. Disi no ben plisi Samuël kwetkweti èn a ben sari srefsrefi. A no moro weiniki disi ben de so nanga na Gado fu suma a ben du wroko gi leki profeiti.
7 Nanga leti Yehovah e firi sari fu na aksi disi fu no hori moro langa tranga na en theokratisfasi fu tiri Israël. Èn a ben meki en profeiti Samuël sabi: „A no yu den ben trowe, ma mi den ben trowe, dati mi no ben sa de kownu tapu den” (1 Samuël 8:4-9). Disi ben de wan agersifasi fu na libifasi di na kristenheid ben sa waka na en baka ini na di fu twenti yarhondro disi. Dati den kerkifesiman ini a ten di e kon sa agri sobun nanga na meki bekenti fu „vrede nanga tanbun” no kan abi wan bun bakapisi, èn no sa abi na blesi fu Gado.
Dodoi den libisma ini sribi
8. Sortu rol den Verenigde Natie seiker sa prei ini na meki bekenti fu sani ini a ten di e kon, èn fu sande na organisatie disi e dodoi den sma ini sribi?
8 Den Verenigde Naties kan taki ini a ten disi dati den abi 159 memrekondre, dati wani taki pikinmoro ala natie fu grontapu. Sondro degedege dan den Verenigde Naties te na ten doro sa de a fesi ini a tori fu na meki bekenti ini a ten di e kon fu „vrede nanga tanbun”. Ma na wan sari sani fu taki dati na grontapu organisatie e dodoi den miljardmiljard memre fu den libismafamiri ini sribi. Fa so? Fudi sowan vrede awinsi ala kerki organisatie fu na grontapu disi tanapu a baka, makandra nanga di fu na kristenheid, no wani taki vrede nanga na Mekiman fu na universum, di nanga na krutu bosroiti fu prenspari afersi ini hemel nanga grontapu abi na makti fu gi libi ofu fu teki libi.
9, 10. Sortu sei Yehovah Kotoigi e teki ini a tori fu na „vrede nanga tanbun” soleki den natie e meki mofo fu dati, èn fu san-ede?
9 Ini na proféititori fu Yesaya na Mekiman e taki krin: „Na hemel na mi troon èn na grontapu mi futubangi” (Yesaya 66:1). Den natie dya na grontapu tapu en futubangi no e meki a kon moi nanga na organisatie fu den fu den Verenigde Naties. Den pruberi nanga politiek yepisani fu hori grontapu vrede nanga tanbun èn nanga dati fu dyaranti na tan go doro fu den Verenigde Naties. Den Kotoigi fu Yehovah na grontapu di gi densrefi abra na en no kan bemui nanga na grontapu fudi den e go bow tapu den maatregel di libisma meki èn di e seti fu dyaranti vrede nanga seikerfasi fu den grontapu natie. Den e teki den wortu fu Yakobus 4:4: „Sutaduman, unu no sabi dati na matifasi nanga na grontapu de feantifasi nanga Gado? Alasma fu dat’ede di wani de wan mati fu na grontapu, e meki ensrefi tron wan feanti fu Gado.”
10 Aladi Yehovah Kotoigi no e kakafutu actief gi na vrede nanga tanbun di den natie meki mofo fu en, toku den no kan rikomanderi dati na den milyunmilyun sma di e suku wan presi fu tanbun pe den sa kisi kibri te tapu a grontapu disi na moro bigi ten fu muilekheid sa lusu kon di sa meki wan kaba kon na a seti fu sani disi (Mattéus 24:21). Bika a de Gado nyun seti fu sani nanga san grontapu tanbun èn seikerfasi ondro na „Kownu fu vrede”, Yesus Kristus, sa du kon. — Yesaya 9:6, 7.
11. Fa den kerkifesiman ben si na sani di ben tyari kon a fesi fu opo a Folkubontu baka na Fosi grontapufeti?
11 Na historia e kotoigi dati libisma programma fu vrede ben misi a marki. Wi e memre dati na a kaba fu na Fosi Grontapufeti ini 1918 na opo fu na Folkubontu ben tyari kon a fesi fu meki grontapu feti ini a ten di o kon no ben feni presi moro. Na Federale Rai fu Kerki fu Kristus ini Amerika ben bari odi gi na sani disi èn ben taki: „Sowan sortu bontu no de soso wan politiek yepi fu ferlusu, ma morofuru na politiek nen fu na kownukondre fu Gado na grontapu.” Ma na sokari politiek nen fu Gado kownukondre na grontapu ben tyari vrede nanga seikerfasi di tan?
12. (a) Fa Openbaring 17:8 kontru? (b) Suma ben go doro fu rèi tapu ’na redi kloru wilder meti’, èn fu olanga?
12 Netleki na agersi ’redikloru wilde meti’ fu Openbaring kapitel 17, tapu san na owru huru-uma „Babylon na Bigiwan”, ben go sidon, na so a Folkubontu disi di na meti disi e agersi ben go „ini a peti di no abi gron” di ini 1939 na di fu Tu Grontapufeti ben bigin. Nanga disi na huru-uma di ben sidon a tapu ben si a fanowdu fu dyompo komoto fu en. Bakadi na ini 1945 na di fu tu grontapufeti ben kon na wan kaba, dan na organisatie fu den Verenigde Naties ben opo, leki na organisatie di ben kon ini na presi fu na Folkubontu di ben kon na wan kaba. A abi furu moro memre leki na Folkubontu ben abi èn a ben sa mu de wan moro tranga organisatie na ini san na grontapu fu libisma nanga leti ben sa mu kan poti wan moro bigi fertrow na ini en. Èn a so na agersi „redikloru wilde meti” ben opo komoto na ini 1945 „fu na peti di no abigron” èn na agersi huru-uma „Babylon a Bigiwan” ben kren agen go baka tapu en baka, pe a sidon te na a dei fu tide sondro fu syen na nowan enkri fasi (Openbaring 17:3, 5, 8). Leki fa Openbaring 17:16—18:24 e taki afesi, dan a no sa tan sidon drape now solanga moro. Fu san-ede?
13. (a) San na den Verenigde Naties? (b) Fa langa ten psa den ben agersi na skin disi?
13 Den Verenigde Naties te yu luku en bun de wan grontapu bontu fu natie di de teige Yehovah Gado nanga en Kotoigi na grontapu di gi densrefi abra. Na skin disi de fu tru wan komplot, pe den grontapu natie-sutu ede kon na makandra èn e taki nanga makandra san den sa du na organisatie fu Yehovah Gado na grontapu di de fu si nanga ai. Leki wan sani di ben sa psa ini na „bosroiti fu na seti fu sani disi”, a ben de wan agersifasi fu a komplot na san Yesaya 8:12 e sori a tapu. — Mattéus 24:3.
Luku na Yehovah fu kisi vrede nanga tanbun
14. Fu san-ede na tin-lo kownukondre Israël ben meki wan ferbontu nanga Syria, èn sortu aksi ben kon a fesi ini a kownukondre Yuda?
14 Na fesi a ten fu Yesaya dan na afersi fu na kownuwroko ben tyari wan prati kon fu den twarfu lo di na natie Israël ben abi. Disi ben psa baka na glori tiri fu kownu Salomo. Den tin lo ini noordsei di ben prati densrefi puru ben opo wan kownukondre di sma ben kon sabi leki na kownukondre Israël nanga Samaria leki mamafoto. Den tu tra lo di ben tan abra, na lo Yuda nanga Benyamin ben tan getrow na a kownulin fu kownu David ini na mama foto Yerusalem. Na tin-lo kownu kondre Israël ben poti ensrefi leki feanti teige na tu-lo kownukondre Yuda, te wan pisten na kownukondre Israël ben go meki wan ferbontu nanga na kownukondre fu Syria, di ben abi Damaskus leki mamafoto. Na prakseri ben de fu trowe na kownukondre Yuda na gron èn fu hori en na ondro den. Na kownukondre Yuda fu dat’ede ben mu suku fu meki wan ferbontu nanga wan tranga natie fu kakafutu gi na aanval fu na natie Israël, di ben tai densrefi ini wan komplot nanga na heiden natie Syria? — Yesaya 7:3-6.
15. (a) Son sma ini na kownukondre Yuda ben de fesiman fu sortu sani, èn san ben kon a krin ini na yeyefasi disi? (b) Sortu taki na profeiti Yesaya ben hori teige so wan sortu yeyefasi?
15 Ini na pikin kownukondre Yuda sma ben de di ben lasi a bribi fu den ini na Gado fu na natie fu den, Yehovah. Den ben de fesiman fu wan ferbontu ofu komplot nanga wan makti heiden kownukondre fu na grontapu disi. Sonwan fu den di ben de fesiman dati Yehovah kownukondre Yuda tapu sowan ontrowfasi ben go makandra nanga wan kownukondre fu a goddelowsu grontapu ben taigi den wan ini na kownukondre Yuda di no ben man teki wan bosroiti: „Wan komplot!” Na sofasi den ben sori a mankeri fu den fu bribi èn fertrow ini a Gado fu suma en tempel ben de ini Yerusalem. Na profeiti Yesaya ondro a krakti fu santa yeye ben kon so fara fu taki teigi sowan sortu komplot fudi ai taki ini kapitel 8, vers 12 den wortu: „Unu no mag taki: ’Wan komplot!’ ini a tori fu ala sani fu san a pipel disi e tan taki: ’Wan Komplot!’ èn na sani fu a frede fu den unu no mag frede, èn unu ooktu no mag frede fu den.”
16, 17. San ben dyaranti tru vrede nanga seikerfasi gi Yehovah pipel ini owruten èn fa disi ben de fu si di na Assyria kownu Sanherib ben taki skreki wortu teige Yerusalem?
16 Dati Yehovah ben de nanga a pipel di ben de na ini wan ferbontu matifasi nanga den ben wani taki vrede nanga tanbun gi den. Disi ben demonstreer di na Assyria kownu Sanherib ben seni wan komte fu dri hei lantiman go fu taigi kownu Hizkia nanga den sma di e libi na ini Yerusalem fu gi densrefi abra na kownu Sanherib. Na lantiman fu Assyria nanga takiman, Rabsaké ben tanapu na fesi den skotu fu Yerusalem aladi a ben soso Yehovah Gado na wan syen fasi soso fu swaki ofu broko na fertrow di den dyu ben abi na ini en. Kownu Hizkia di ben sari na wan hatifasi fu na broko di den ben brokosaka na wan enkri libi èn tru Gado Yehovah èn di nanga leti ben ferstan ini sortu bigi kefar Yerusalem ben de now di a foto ben tanapu fesi na kefarlek bigi legre makti fu Assyria, ben go na a tempel è ben poti na afersi a fesi Yehovah Gado. Fudi Yehovah Gado ben prisiri sote nanga na sori disi fu bribi na ini en èn fudi den ben aksi en fu sori en universele soevereiniteit, meki a ben gi wan bun piki. En profeiti Yesaya ben moksi ensrefi na ini disi nanga wortu di ben tranga a bribi. Na Assyriaman Rabsaké, di ben pruberi fu tapu skreki gi den dyu no ben kisi no wan piki, precies soleki kownu Hizkia ben gi komando. — 2 Kownu 18:17-36; 19:14-34.
17 Rabsaké, di sondro degedege ben ferwondru fu disi, ben drai go baka na a kampu fu Sanherib di ben e feti na a ten dati teige Libna (2 Kownu 19:8). Bakadi Sanherib ben yere a verslag fu Rabsaké, a ben seni brifi go na Hizkia fu tapu skreki gi en èn pe a warskow di e kon now ben tanapu na ini: „No meki a Gado fu yu, tapu suma yu e fertrow, bedrigi yu fu taki: ’Yerusalem no sa kon ini na anu fu na kownu fu Assyria’” (2 Kownu 19:9, 10). Bakadi neti ben doro dan Yebovah Gado srefi ben gi na Assyria takiman Rabsaké a piki èn ensrefi ben piki Sanherib brifi di ben tapu skreki fu buweisi taki a ben de moro bigi leki na gado fu na Assyria kownukondre. Na bosroiti fu na tori ini na pistori disi, soleki disi tanapu na ini 2 Kownu 19:35 e taki: „A ben psa now ini na neti, dati na engel fu Yehovah ben hari go èn ini na legre presi fu den Assyriasma ben naki 185.000 man kiri. Di den sma ben opo mamanten fruku, luku, den alamala ben dede, dedeskin.” Na a opo fu dei, di den Assyriasma di ben tan na libi na ondro suma kownu Sanherib nanga Rabsaké ben opo, den ben si lontu den na takru tafereel fu den sma di Yehovah Gado ben srakti.
18. (a) Fa a ben waka nanga Sanherib di ben suku grani? (b) Sortu eksempre na historia tori disi mu gi den disiten Kotoigi fu Yehovah?
18 A brokosaka di a ben kisi ini na suku fu grani teige Yehovah organisatie èn na bigi lagi di a ben kisi, meki Sanherib ben hasti ensrefi „nanga syen fesi” go baka na en nationaal mamafoto Ninevé pe tu fu en manpikin ben kiri en (2 Kronieken 32:21; 2 Kownu 19:36, 37). Noiti moro na Assyriakondre ben de wan kefar gi na organisatie fu Yehovah di ai ben kan si. Dyaso trutru yu ben kan taki fu wan kon regtvaardiki fu na universele soereiniteit fu na Moro Hei Gado di e psa ala sani. Boiti fu dati dan na tan na wan bun fasi fu Yerusalem de wan tumsi moi eksempre di e sori na suma Yehovah disten Kotoigi mu poti fertrow dorodoro na ini fu abi vrede nanga tanbun di e tan èn di no e trubu — no ini wan politiek komplot ma ini Yehovah Gado.
Tan na ai
19. San na Wachttorengenootschap sa tan du?
19 Fu yepi yu fu tan na ai, meki na Wachttoren Genootschap sa go doro fu gi ini en publikatie gi den sma di e leisi biten warskow, sodati wan asranti meki bekenti fu „vrede nanga tanbun” ini a ten di e kon no fadon onferwakti kon, soleki den natie fu na owru seti fu sani disi e taki fu en.
20. Fu san-ede Yehovah Kotoigi ini no wan fasi sa meki propaganda fu poti fertrow ini na „vrede nanga tanbun” ini a ten di e kon, èn fu san a de now a ten sobun?
20 Yehovah en kotoigi di gi densrefi abra no kan meki kwetkweti fertrow bekenti ini na „vrede nanga tanbun” di nanga ala overtoigi den grontapu natie sa meki bekenti. Èn ooktu den no kan fristeri den sma di e meki mofo fu sowan internationaal „vrede nanga tanbun” èn na asrefi ten tan hori na bunati fu Yehovah Gado. Den e luku bun fu no meki wan ferbontu nanga den natie fu na owru seti fu sani disi. Den e tan memre densrefi dati ini a yari 1919 baka na feti wan nyun natie ben gebore di de aparti fu na Bontu fu den natie ofu Folkubontu. A nyun „natie” disi e tan gro èn e panya ensrefi na a heri grontapu, precies soleki Yesaya 60:22 ben taki a fesi: „Na pikinwan srefi sa tron dusun èn a mendriwan wan makti natie. Misrefi, Yehovah, sa meki a psa es’esi na en reti ten.” Iya, a de now a ten dati ala sma mu luku bun fu na vrede nanga na tanbun fu a ten di e kon soleki den natie e meki mofo fu dati.
Fa yu ben sa piki?
◻ Fa den sma ini algemeen kande sa du tapu na meki bekenti fu „vrede nanga tanbun”?
◻ San na „komplot” di Yesaya 8:12 e taki fu en ben agersi?
◻ Fa den VN e dodoi den sma ini sribi?
◻ Fu sanede sani no sa fadon kon onferwakti tapu Yehovah Kotoigi?
[Prenki na tapu bladzijde 2]
A no de fu taki dati den V.N. sa tanapu na a fesi lin ini na barwroko fu „vrede nanga seikerfasi” ini a ten di e kon