Tan saka yusrefi na ondro „na yeye di e gi libi”
„A de a yeye di e gi libi; na skin no abi waarde kwetikweti.” — YOHANNES 6:63.
1. Yehovah yepi en pipel fu kakafutu gi na krakti di na „loktu” fu na grontapu disi abi? (b) Fa na kweki fu na froktu fu Gado yeye sa yepi wi fu abi na yoisti yeyefasi?
EFU wi wani kakafutu gi na krakti di na „loktu” fu na grontapu disi abi ofu den yeyefasi di a e kweki, dan wi abi na santa yeye di e kon fu Gado tranga fanowdu (Efese 2:1, 2). Wi abi ooktu na bijbel fanowdu na ini san den prakseri fu Gado tanapu di skrifi ondro na tiri fu santa yeye. Èn wi mu abi wan sakafasi kristen yeyefasi, di e du kon nanga a kweki fu na froktu fu Gado yeye — „lobi, prisiri, vrede, langapasensi, switifasi, bunfasi, bribi, safri-atifasi, dwengi yusrefi”. Na apostel Paulus ben gi wi tranga: „Tan waka nanga yeye èn yu no sa du kwetkweti nowan skin lostu. Bika na skin e go, te yu luku en lostu, kontrari na yeye, èn na yeye kontrari na skin; bika den disi tanapu leki feanti abra sei fu makandra, sodati unu no e du yoisti den sani di unu ben sa wani du.” — Galacia 5:16, 17, 22, 23.
2. Fa den sani di a yeye fu Yehovah e tyari kon de kontrari den bakapisi di a abi te wan sma meki na yeye fu na grontapu tyari en?
2 Paulus ben skrifi ooktu: „Wi no ben kisi na yeye fu na grontapu, ma na yeye di e kon fu Gado, sodati wi ben sa sabi den sani di Gado ben gi unu fu en bunati ede” (1 Korinte 2:12). Na „loktu” ofu yeyefasi fu na grontapu disi e tyari dede kon, ma san Gado e gi nanga yepi fu santa yeye, e tyari go na tego libi gi den sma di e teki na yeye disi. Yesus ben taki: „A de na yeye di e gi libi; na skin no abi waarde kwetkweti. Den wortu di mi ben taki gi unu, de yeye èn libi” (Yohannes 6:63). Fudi ’na skin no abi waarde kwetkweti’, meki wi abi yepi fu Gado fanowdu fu wini sondu èn fu kakafutu gi na yeye fu na grontapu.
3, 4. (a) San na bigi-aifasi, èn fa na „tiriman fu na loktu” e wroko tapu a skin lostu fu abi gudu? (b) Na sortu fasi wan bigi-ai sma na wan sma di e anbegi kruktu gado?
3 Ini na artikel a fesi wi ben taki fu tu kefarlek pisi fu na „loktu” fu na grontapu disi — na prei nanga hurudusani èn wan krosi stijl èn na dorosei sorgu gi wan sma skin di no de yoisti. Ma furu tra pisi de. Na loktu fu na grontapu disi de fu eksempre bun furu nanga „bigi ai”, nanga wan bigi gridi lostu fu kisi wini na skinfasi ofu sani na skinfasi. ’Na tiriman fu na loktu’ ben sorgu dati a propaganda fu na grontapu disi èn en reklame campagne e gi yu wan firi di no kisi sati-faksi efu yu no abi gudu na skinfasi psa marki. Na pisi disi fu na „loktu” fu na grontapu kan tyari yu go krinkrin ini a makti fu na prakseri dati disi de den sani ini a libi di trutru e teri. Na „loktu” disi fu gudu abi krakti tapu yu?
4 Na bijbel e taki: „Nowan huruduman ofu sma di no de krin ofu bigi-aisma san wani taki wan anbegiman fu kruktu gado — abi wan pisi ini na kownukondre fu Kristus èn fu Gado” (Efese 5:5). Luku dati wan bigi-aisma trutru de wan anbegiman fu kruktu gado. Kande yu e denki: ’Seiker mi no sa kon so fara dati mi tron wan anbegiman fu kruktu gado.’ Ma san na a dini fu kruktu gado? A no e kon ini disi dati wan sma e poti wan tra sani ini a presi fu Yehovah nanga en anbegi, fudi ai poti prakseri tapu disi na presi fu Gado nanga en dienst? Na ini a tori fu bigi-ai dan na trutru anbegi fu moni nanga makti èn na krakti fu en kan de ini a tori. Efu na bai fu wan nyun oto, wan video-cassette recorder ofu sortu tra gudu tu fu e feni moro prenspari leki a kon moro furu fu yu okasi ini Yehovah dienst dan yu no e sori dan dati na „loktu” fu na grontapu disi abi wan takru krakti tapu yu? Gudu na skinfasi no e tron dan kruktu gado gi yu?
5. Na sortu fasi na „loktu” fu na grontapu disi furu nanga a gridi lostu fu kisi gudu?
5 Efu yu e feti na baka wan moro hei leri efu wan wroko di e gi furu moni, yu e du disi dan fu kon gudu èn fu nyan bun fu moro wini na skinfasi leki yu abi fanowdu? Sani fu kon gudu esesi e wroko na tapu yu èn yu wani go moksi yusrefi ini dati? Na gridilostu fu kon gudu èn na yeye fu dukrun psa a pai fu belasting de wan pisi fu na „loktu” fu na grontapu disi. Sowan loktu de na yoisti klimaat fu dobbel èn den sortu activiteit dati. No meki sani tyari yu go ini tesi. Den wan di e tan farawe fu na krakti fu na „loktu” fu a grontapu disi di lai nanga bigi-ai, e si dati tru koloku e kon fu disi dati den de tevrede nanga den fanowdu sani fu na libi èn e gi na fosi presi na den kownukondre belang. — Matteus 6:25-34; 1 Yohannes 2:15-17.
Wan yoisti gebroiki fu na tongo
6. Sortu krakti den gwenti fu taki fu na grontapu disi kan abi tapu wi leki kristen?
6 Fa a de nanga wi gwenti fu taki? Dot’taki, atibron wortu, lei — na „loktu” fu na grontapu disi doti srefsrefi nanga den sortu pori taki disi. Iya, srefi den wortu fu wantu sma di de wan pisi fu na kristen gemeente, wawantron abi a marki fu grofufasi, iya, sonton srefi tapu san de dot’taki. Na disipel Yakobus e gi wi krakti rai: „Fu na srefi mofo blesi nanga fluku e kon. A no de yoisti, mi brada, dati den sani disi e tan psa so. Wan fonten no e meki toku kuku kon a tapu fu na srefi olo switi nanga bita watra?” (Yakobus 3:10, 11). Yu ben teki pikinso fu na wakamantaal ofu skotutaal abra fu na grontapu disi? Yu abi wan dobru grupu fu wortu, wan di yu e gebroiki a mindri kristen èn wan di yu e gebroiki na tra presi? Paulus ben skrfi: „No meki no wan pori wortu komoto fu yu mofo, ma ibri wortu di de bun, fu bow sma, pe a de fanowdu, sodati nanga dati wan sani e prati san de bun gi den sma di e arki” (Efese 4:29). Fa a de so prenspari dati wi gebroiki alaten joisti èn krin wortu.
7. San a wani taki fu ’puru lei èn taki waarheid’?
7 Wi mu luku bun ooktu dati alaten wi taki a waarheid. Te wi no de eerlijk ofu fu espresi fu no teki a frantwortu fu wan sani, dan disi e kon tapu lei. Sobun poti prakseri bun tapu a rai fu Paulus: „Now di yu ben poti lei a wan sei, taki waarheid, ibriwan sma fu yu nanga en naaste, bika wi de memre di de fu makandra.” — Efese 4:25; Odo 3:32.
8. (a) Fa furu grontapu sma e handri te den atibron? (b) San wi mu du te sani trobi wi fu kisi atibron?
8 Rigeri fu atibron ede sondro fu man dwengi yusrefi de ete wan marki fu na yeye fu na grontapu disi. Furu grontapusma e lasi makriki a dwengi di den mu dwengi densrefi. Den e ontplof èn e aksi pardon bakadati fudi den e taki dati na soso den ben gi pasi fu a atibron kon a doro. Ma disi no de a rai di Paulus ben gi, bika a ben skrifi: „Ala takru bita-atifasi èn atibron èn faya ati èn babari èn skempitaki mu puru fu un mindri, net soleki ala takrudu” (Efese 4:31). Ma efu wi e firi now dati wi ati e kon bron, aladi wi e kweki a dwengi di wi mu dwengi wisrefi èn tra froktu fu a yeye? „Kisi atibron èn tog no sondu”, Paulus ben skrifi. „Meki a son no dongo aladi yu de ini wan atibronfasi èn no gi Didibri nowan pasi” (Ef. 4:26, 27). Efu sani e tigri unu fu kisi atibron, dan wi mu sreka esesi na afersi, bifo a dei kon na wan kaba. Noso bitafasi nanga ogri-atifasi e bigin meki rutu ini wi ati, èn a muiliek fu puru den sani dati radicaal. No gi pasi dati yu hari go na ini yu na „loktu” fu na grontapu disi fu atibron nanga ogri-atifasi! — Psalm 37:8.
9. San na wantu fasi di de algemeen na mindri wrokoman èn fu san-ede wi mu go ondrosuku den wrokogwenti fu wi?
9 Fa a de nanga den wrokogwenti fu yu? Kiri a ten na tapu wroko èn fufuru sani fu wan basi de ini a ten disi gewoon sani. Yu ben hari pikinso fu na „loktu” disi go na ini yu? Na fasi dati ’ala sma’ e du en ben kisi yu pikinso? No frigiti noiti dati na fasi tapu fa wi e du wi wroko leki kristen, e trowe wan bun ofu wan leti di no bun tapu Yehovah nanga en tru anbegi. Yu ben sa wani sote dati, na fasi tapu fa yu e tyari yusrefi tapu yu wroko kan de gi wan sma fu no teki na waarheid di wan sma fu Yehovah Kotoigi e tyari go na en doro? „A sma di e fururu no mu fufuru moro,” Paulus ben taki, „ma meki a wroko moro furu tranga. . . sodati a abi wan sani fu kan prati gi den mofinawan.” — Efese 4:28.
10. Fa wi kan sori nanga na fasi tapu fa wi e du grontapuwroko dati na gridi „loktu” fu na grontapu disi no abi krakti tapu wi?
10 Aladi na masra-srafu fasi di ben de na ini na fosi yarhondro no de fu feni furu moro, toku kristen wrokoman kan leri wan sani fu san Paulus ben skrifi ini Efese 6:4 gi kristen srafu. Drape wrokoman e kisi tranga ’fu gi yesi na den sma gi suma den e wroko, no soso leki sma di e plisi libisma, ma leki Kristus srafu’. Sobun wan kristen noiti nanga triki mu pruberi fu komoto a pasi fu du wan furudé-wroko ofu fu pruberi fu no gi pramisi sani ofu dienst. Efu wi e du sani „leki gi Yehovah”, dan wi sa abi na yoisti fasi èn no meki na gridi èn lesi „loktu” fu na grontapu disi abi krati tapu wi.
Nyanyan, tranga dringi nanga prisiri
11. Fa wan grontapu fasi ini a tori fu nyanyan nanga tranga dringi ben abi krakti tapu someni fu Yehovah pipel ini bijbel ten?
11 Na fasi tapu fa na grontapu e meki gebroiki psa marki fu nyanyan nanga tranga dringi ben abi krakti tapu yu? Na fasi fu den de ’nyan, dringi, abi-prisiri, bika tamara wi dede kande’ (1 Korinte 15:32). Èn fu sensi owruten kaba na yeye disi ben abi krakti srefi tapu wantu sma fu den dienstkengti fu Gado. Denki pikinso san ben psa ini na sabana di den Israëlsma ben „go sidon fu nyan èn dringi èn den ben opo moro fara fu meki prisiri” (Exodus 32:6). Na „meki prisiri” dati ben tyari go na lusufasi fu libi pe skotu no de èn a dini fu kruktu gado sodati na atibron fu Gado ben lusu kon teige den. Meki wi no waka noiti na baka a lusufasi fu den. — 1 Petrus 4:3-6.
12. San wi mu du efu a de fanowdu fu poti prakseri tapu wi gwenti fu nyan èn dringi?
12 Yehovah ben gi wi wan difrenti fu bun furu fu switi, kloru èn vitamin nyanyan nanga dringi, ma a wani dati wi gebroiki den nanga marki. A bijbel e krutu fu nyan psa marki èn fu drungu (Odo 23:20, 21). Sobun de eerlijk èn aksi yusrefi: presi de pe mi kan tyari kenki kon na ini mi nyan nanga dringigwenti? Efu a de fanowdu fu yu sori moro dwengi fu yusrefi, erken disi dan èn handri na ini akruderi nanga den begi fu yu na ini san yu e aksi Gado fu yepi nanga en yeye fu wini a problema disi. „No dringi ooktu furu fu win, na ini san furu lusufasi fu libi de, ma tan kon furu nanga yeye”, Paulus ben taki (Efese 5:18). Iya, kon furu nanga Gado yeye èn no broko kindi gi na yeye fu na grontapu disi di no e abi skotu! „Efu fu dat’ede yu e nyan ofu e dringi ofu e du wan tra sani, du ala sani fu Gado kisi bigi nen” (1 Korinte 10:31). Ma efu tapu a kontren disi yu abi problema di tranga srefsrefi, kari dan na yepi fu yeye lepiman ini a gemeente. — Galacia 6:1; Yakobus 5:14, 15.
13. (a) San e sori krin dati Didibri pori furu fu na disiten prisiri di de? (b) Fa wi kan tan farawe fu na yeyefasi fu na grontapu disi fu na tori fu prisiri?
13 A grontapu disi de leki wan srafu srefsrefi fu sport, poku nanga difrenti sortu fu prisiri. Efu a no de a pasa fu bijbel gronprakseri, dan a no a fu de wan fowtu sani fu nyan bun fu den sortu sani disi. Ma a problema de dati Satan na „tiriman fu na makti fu na loktu”, pori furu fu na disiten prisiri di de fu kisi (Efese 2:2, Willibrordvertaling). Nofotron propaganda e meki gi hurudu, tranga-ogridu sma e luku leki noti èn bedrigifasi, èn srefi kiri fu sma de leki wan sani di de wan bun sani. Te wi e luku na den sortu prisiri disi, dan wi e hari den yeyefasi disi bun dipi go na ini unu èn den vergiftig bakapisi fu en sa du wi seiker ogri. Boiti fu dati, a de so, dati awinsi wantu vorm fu prisiri akruderi a bijbel no de takru, toku a kefar de dati wi kan kon de srafu fu den sodati pikinso ten e tan abra gi yeye sani. Sobun wi mu de selectief. Teki ten fu nyan bun nanga marki fu san de gesontu èn bun ontspanning, ma tan farawe fu waka na baka den exces fu na grontapu. Ofu na „loktu” fu na grontapu disi e panya wan switi ofu wan tingi smeri, a abi doti èn ai tyari dede kon. — Odo 11:19.
Heimemre fu na ras — wan ogri winti
14. Fa na „loktu” fu na grontapu disi kan abi krakti tapu wi ini a tori fu maatschappelijke problema?
14 Wan finifini pisi fu na „loktu” fu na grontapu disi na heimemre fu na ras èn nationaliteit. Son sma e meki reclame gi na fowtu denki dati bepaalde ras de moro hei èn trawan moro lagi. A nationalisme gi tranga na sma fu si a gebortu kondre fu den leki moro hei leki tra kondre. Te yu e luku en bun dan furu sma e nyan pina fu soso èn den no e kisi den fundamenti libismareti èn den fanowdu sani fu tan a libi fu na gridifasi èn a krutu fu sani a fesi ede fu trawan. Ogri-ati fasi, èn srefi tranga ogridu, de a bakapisi fu en. Furu sma e opo densrefi èn ini a fertrow dati den kan lusu maatschappelijk problema tapu den eigi fasi, dan den e go prei den eigi krutuman. Ooktu wisrefl kan go krinkrin na ini den denki disi. Efu wi no e luku bun, dan te wi e si onregtvaardikifasi ofu e de wan sma di mu nyan pina fu dati èn dan e arki na sma di e feti dati sociaal kenki mu kon dan disi kan abi krakti tapu wi. Wi ben sa kan go poti wi neutrale positie na wan sei èn go teki wan sei (Yohannes 15:19). Èn san de moro seryusu ete wi ben sa kan meki den kori wi fu teki prati na staking èn fu go meki propaganda, ofu wi ben sa go gi wisrefi abra na tranga ogridu fu dwengi dati wan kenki kon.
15. Sortu libifasi na bijbel e rikomanderi te wi e firi fu ’teki refensi’?
15 Na yeye fu wan gemeente tapu wan takrufasi a firi fu ras ofu nationaliteit kan wroko a tapu. (Teki gersi Tori fu den Apostel 6:1-7.) Ma wi sa abi na yoisti yeye efu wi poti prakseri na tapu na rai: „De efu a kan, fu sofara a e anga fu yu, nanga vrede na fesi fu ala sma. No teki refensi, lobiwan, ma gi pasi na atibron; bika Buku skrifi: ’Refensi na fu mi; mi wani pai baka, Yehovah e taki’” (Romeini 12:18, 19). Fudi ala libisma ras komoto fu na fosi libismapaar èn Gado ne e teki partij, meki dati ini na kristen gemeente presi no de gi heimemre fu ras nanga nationaliteit. — Tori fu den Apostel 10:34, 35; 17:26; Romeini 10:12; Efese 4:1-3.
Tan hari kon ini yu „loktu” di e gi libi
16. San sa yepi wi fu no meki na yeye fu na grontapu disi abi krakti tapu wi?
16 Wi ben taki fu den moro prenspari pisi fu na „loktu” ofu na yeye fu na grontapu disi di e tyari dede kon. Na „loktu” disi e lontu wi èn e abi sowan druk tapu wi dati efu wi gi pasi dati wan leigi presi e gro kon ini wi yeyefasi, na pori „loktu” disi sa hari kon na ini nanga krakti fu furu na leigi presi dati. Efu nanga winimarki wi sa kakafutu gi na pori „loktu” disi moro furu e bepaal nanga na dipi fu wi lobi fu san de soifri, krin nanga regtvaardiki èn na tranga firi fu na no wan si di wi no wani si na ai san no de soifri, no de krin èn san de godelowsu. Wi sa tan hari na „yoisti loktu” go na ini, efu wi tan kweki na yoisti yeyefasi leki wan piki tapu na tiri fu Yehovah santa yeye. — Romeini 12:9; 1 Timóteus 1:7; Galacia 6:7, 8.
17. San mu du wantewante te wi si dati wan sani fu na „loktu” fu na grontapu disi e wai kon na wi sei?
17 Meki ini elk geval noiti a kon so fara dati wan sani fu na pori „loktu” fu na grontapu disi e kisi wan switi smeri gi yu. Na tiriman fu na „loktu” disi sabi precies san de fanowdu fu wroko na tapu den zintuig èn meki wan lostu opo kon ini wi di nofotron e tyari wi go na sondu (Yakobus 1:14, 15). Tan na ini na pisi pe „sma di no e smoko” de, Yehovah yeye paradijs. Te yu e si dati wan pisi fu na „loktu” fu na grontapu disi e wai kon na yu sei, komoto na en pasi dan. Drai baka gi en soleki yu ben sa tan farawe fu vergif di e tyari dede kon. „Luku fu dat’ede bun, fa yu e waka, no leki lawman, ma leki koniman, bai gi yusrefi na ten di yoisti, fudi den dei de godelowsu. No de moro langa fu dat’ede onredelijk, ma tan si san de a wani fu Yehovah.” — Efese 5:15-17.
18. San sa de na yeye fu den sma di sa libi na tapu na grontapu di kon krin?
18 A de a wani fu Gado dati wi dini en leki sma di e kibri wi soifri retifasi. Disi sa wani taki libi na ini en nyun seti fu sani, di de now bun krosbei. Fa a sa de wan switi sani di e gi kowru-ati fu hari pikinso loktu ini yu! Na ini dati doti di e tyari dede kon no sa de na ini, ma sa de na soifri loktu di e hori sma libi. Na so a sa de nanga na letterlijk loktu, èn san de moro prenspari de nanga na yeye fu den sma di abi na grani fu libi tapu wan grontapu di kon krin. Den sa abi wan sakafasi yeye fu gi yesi èn fu leri sani. A „loktu” fu a owru grontapu disi, di furu nanga opruru èn pori èn godelowsu sani, sa komoto na pasi. — Openbaring 21:5-8.
19. Suma sa psa go libilibi na ini Yehovah nyun seti?
19 Te na ini Armageddon Yehovah tyari wan kaba kon na a doti di sma e doti sani èn den sma di e doti den sani, dan seiker wi no wani de a mindri den sma di e hari na „loktu” fu na seti disi kon ini wi. Fa a sa de wan prisiri te na owru grontapu psa gwe èn na ’tiriman fu na loktu’ sroto na ini a peti di no abi bgron. Ibriwan sma di lobi Yehovah èn e tan lobi san krin, fatsunlek nanga regtvaardiki, sa mag fu tan libi ini na grontapu dati. Yehovah wani den drape èn sa yepi den nanga yepi fu en yeye. A sa gi den tego libi na ini wan krin èn gesontu nyun seti. Meki wi sorgu dati na grani disi no komoto na wi anu fudi wi e hari na „loktu” fu na owru seti disi di e tyari dede kon na ini wi!
Fa yu ben sa piki?
◻ Na sortu fasi wan bigi-aisma e tron wan sma di e anbegi kruktu gado?
◻ Fa na loktu fu na grontapu disi ben sa kan abi krakti tapu na gwenti fu yu fu taki?
◻ Sortu yeye kristen wrokoman mu sori te den e du grontapu wroko?
◻ Fa yu kan tan farawe fu en fu kon ondro na krakti fu na yeye fu na grontapu disi ini a tori fu nyanyan, nanga dringi nanga prisiri?
◻ Sortu yeye ini a tori fu ras nanga nationaliteit no mag kon na inisei fu na kristen gemeente?
[Prenki na tapu bladzijde 7]
Yu osofamiri tranga nofo na yeyefasi fu kakafutu gi na „loktu” fu na grantapu disi?
[Prenki na tapu bladzijde 8]
Efu wi e du sani leki „a de gi Yebovah”, dan na gridi èn lesi „loktu” fa a grontapu disi no sa abi krakti tapu wi.