Yu kan puru bergi fu den presi
LEKI fa a nyunsu ben de de dan libisma ben tanapu na 29 mei 1953 fu na fosi tron tapu na moro hei bergi-ede fu grontapu—na Mount Everest, 8848 meter tapu fu na watra fu se. Nanga na yepi fu moro 450 man Edmund Hillary fu Nyun-Zeeland nanga Tenzing Norgay, wan Sherpa fu Nepal, ben man fu wini den kefar fu grati ijs, sneeuw di e breni yu èn na mankeri fu suurstof èn den ben doro na ede fu den aiti nanga afu kilometer marki.
Fu kren go na a ede fu bun hei bergi de seiker wan aparti du. Toku a de noti te yu teki en gersi nanga san Yesus ben taki gi en disipel: „Fu tru, mi taigi unu: Efu unu ben abi bribi leki a bigi fu wan mosterdsiri, yu ben kan taigi a bergi disi: ’Puru yusrefi fu dya go na drape’, èn a ben sa puru ensrefi, èn noti ben sa de wan sani di no kan gi yu.” Tyari dati kon pikinso na yu fesi: no fu kren wan bergi, ma fu puru wan bergi fu en presi! — Mattéus 17:10.
A ben teki bribi agersi nanga wan pikin mosterdsiri, wan sani di den ben de bekenti nanga en srefsrefi. Aladi wan pikin mosterdsiri de wan fu den moro „pikinwan” fu ala siri, toku a kan gro baka wantu mun kon tron wan prani di de leki wan bon (Mattéus 13:31, 32). Na sofasi Yesus ben meki kon a krin san wan pikinso bribi no ben sa man fu kan du efu a ben kisi kweki èn nyanyan a yoisti fasi — na sani di ben gersi taki no ben kan ben sa de wan sani di kan.
Ma sortu bergi Yesus disipel ben sa kan puru fu en presi te den ben sa kweki so wan bribi kba? Netso leki wan letterlek bergi kan de kefarlek bigi, na so hendri di yu kan teki gersi nanga wan bergi kan tapu a go-na-fesi fu wi na ini Yehovah dienst. San den „bergi” dati kan de èn fa wi kan „puru den fu den presi”?
Na apostel Paulus de wan eksempre fu wan kristen di ben miti nanga furu hendri tapu en pasi. Na ini 2 Korinte 6:4-10 èn 2 Korinte 11:23-28 yu kan leisi san a ben miti alamala: pina, fonfon, dungru-oso, boto di ben broko sungu èn bun furu tra ongoloku sani. Boiti ala den sani dati dan yu ben abi ete na agersi „maka na ini na skin” dati, kande wan problema nanga en ai (2 Korintesma 12:7; Tori fu den apostel 14:15). Fa a ben si kans fu wini den hendri di ben kan teki gersi nanga bergi èn nanga winimarki du na sani san a wani fu Gado ben abi gi en? „Gi ala sani mi abi tranga nanga yepi fu en di e gi mi krakti”, Paulus ben skrifi. Disi ben de „sodati na krakti di psa san de normaal, ben sa de fu Gado èn no fu wisrefi” (Filipi 4:13; 2 Korintesma 4:7). Paulus ben abi sobun wan fertrow sondro kondisi na ini Yehovah makti fu gi en tranga tapu muilek momenti. A ben abi bribi.
Puru bergi fu en presi na ini a ten disi
Yu ben sa wani sote fu meki na dienst fu yu gi Yehovah kon moro bigi? Netso leki den hondrodusundusun sma di ben poti densrefi ini den grupu fu furuten preikiman (pionier) di e kon moro bigi, na so kande yu e frustan na trangafanowdufasi fu na ten èn yu e denki kande seryusu fu meki yu diniwroko kon moro bigi. Ma wan hendri di gersi taki yu no man kren abra en èn yu kan teki gersi nanga wan bigi bergi e opo kon afesi yu? Efu dati de so, dan yu kan puru bergi fu en presi? Dusundusun sma ben du dati di den ben abi muiti fu meki a dienst fu den gi Yehovah kon moro bigi. Dyaso soso wantu fu den ondrofeni fu den e kon.
Wan yongu sisa di ben de a moro bun studenti fu en klasse èn di ben de leti na fesi fu na eindexamen, ben wani go pionier, ma a bergi fu en ben de dati a no ben kan kisi nowan wroko. A e ferteri:
„Mi eigi negatief denki èn tweifri fu mi pionierwroko ben de wan hendri di mi ben mu wini. Dati mi ben broko mi ede sote dati mi ben feni wan wroko bifo mi ben go pionier, ben wani taki mi no ben fertrow dorodoro tapu Yehovah nanga en makti fu sorgu gi den sma di e poti en anbegi tapu a fosi presi. Mi ben tan denki nomo: ’Mi mu feni fosi wan wroko, èn dan mi e aksi fu de pionier.’ Mi no ben pionier; te yu luku en bun mi ben lasi diri ten. Ma wan fu den gemeente owruman ben sori mi a tapu olanga mi e wakti fu meki wan bigin nanga na pionierwroko, omoro moi herideiwroko ben sa go luku gi mi, fudi noti ben de di ben kan tapu mi fu teki den.”
San na sisa ben du? „Mi ben begi sondro fu stop na Yehovah efu en santa yeye ben wani tyari mi du nanga denki.” Bakadi na sisa disi ben meki eindexamen a ben go na ini na yepipionierwroko èn baka dati na ini na gewone pionierwroko. Syatuten a baka a ben feni grontapu wroko di fiti èn di ben kan tyari kon ini akruderi nanga en pioniersschema.
Wan owruman di en uma ben de na ini na pionierwroko èn di ben mu kweki tu pikin, ben feni taki a ben mu du moro leki fu ondrow en osofamiri wawan na monisei. Gi son sma di ben luku a ben gersi taki den omstandigheid di ben hori en fu no de ini na pionierwroko ben de wan sani di no kan wini èn toku a ben abi na winsi fu meki en diniwroko kan moro bigi. San ben mu kenki?
„Mi denki taki misrefi ben de a moro bigi hendri di mi ben mu wini”, a e taki. „Mi ben feni alaten na velddienst switi, èn te mi ben taki nanga den sma di ben de na ini na furuten dienst èn ben si den blesi fu den, mi ben si taki na tumsi moi yeye di den ben e sori ben wroko leki wan faya di e leti wan tra sani. Mi ben si misrefi kaba tapu wan bun dei na ini na furuten dienst. Na problema nanga mi denki ben de taki pionierwroko ben tron wan sani pe mi ben denki nomo na ini. Ma mi no ben poti noiti wan datum gi misrefi pe mi ben wani meki sote a marki disi kon tru.”
Bakadi a ben luku na afersi na ini begi, dan a brada disi ben wroko go now na a marki fu en fu furuten dienst. A ben taki nanga en chef na en wroko, ben tyari en plan kon na krin èn a ben aksi efu a ben kan wroko moro mendri yuru ini wan wiki. Ma ini na wrokope noiti ete a ben psa taki wan sma ben aksi fu so wan sortu wrokoschema.
A e go moro fara: „Mi chef ben tapu nanga na takmakandra nanga na mededeling dati san a ben aksi fu kisi wan syatu wrokoschema seiker no ben sa teki. Mi ben de pikin moro seiker taki na piki ben sa de negatief efu na bosroiti ben didon fu en wawan. Èn sobun na pasi di ben mu kisi fu a de so ben sa kon wawan nanga na yepi fu Yehovah. Wan nanga afu wiki a baka mi nyun schema den ben feni bun fu a sei fu a kantoro driktoro. Bakadi mi ben gi mi baas tangi, mi ben waka komoto fu na zaak go na mi oto, gi Yehovah tangi bika mi furuten dienst ben kon tru.”