Constantijn dray en libi — Go na san?

A TAKI di den taki, taki keysri Constantijn fu Rome ben dray en libi teki bribi ben wiki na belangstelling fu studenti fu fasi fu anbegi. Leki fa en srefi ben taki dan na hèyden, Constantijn, ben si na a mofoneti fu wan fu den feti di a ben wini na ini 312 G.T. wan fisyun fu wan kroysi nanga den wortu: „Go èn wini na ini na marki disi.” Syatu a baka dati a ben „dray en libi teki bribi” (ini 313 G.T.) èn ben meki wan kba kon na a frufolgu fu kresten na ini na kownukondre fu Rome. Constantijn ben gi tranga taki na fasi fu krestendom di ben de na a ten dati ben tron na fasi fu anbegi fu Lanti, èn a ben kon srefi a mindri den trobi di ben de na inisey fu kerki. Ma a ben du sani di ben meki sma degedege na a dray di a ben drai en libi teki bribi, èn pas so wan 24 yari a baka, leti bifo a dede fu en, a teki dopu.

Ini wan artikel na ini Bible Review na nimusmaticus nanga doctoraal studenti teyologi Stanley A. Hudson ben tyari kon na krin fa den moni di ben meki na a ten fu na tiri fu Constantijn ben tyari wan tu moy bodoy kon a krin fu na tori disi. Te na a ten fu Constantijn a ben de na gwenti taki moni fu Rome ben abi den prenki fu pôpi gado fu Rome. Ma Hudson ben fruteri taki baka di Constantijn dray en libi teki bribi dan moro nanga moro tori fu hèyden no ben kon a fesi — nanga wan sani di yu kan puru a mindri. Moni nanga tapu dati Sol, na songado — a fesi fu dati ben de na pôpi sani fu Constantijn — den ben meki bun furu srefisrefi. Fu san-ede?

Hudson ben taki fu tu sani di kan. Ini na fosi presi a kan taki na dray libi teki bribi fu Constantijn ben de safrisafri — ala di a ben abi wan dramatisch fisyun. A kan tu te yu luku en bun taki Constantijn ben bruya Sol èn Yeyses nanga makandra. Syncretisme (na combinatie fu difrenti fasi fu bribi) de srefi na ini wi ten wan sani di no de ongewoon. Na so fu eksenpre na ini Latino-Amerika den e gi grani te now ete na a precolombia umagado Pacha-Mama nanga Tonantzin ondro na nen fu Wenke Mariya. Na a srefi fasi a kan taki Constantijn ben anbegi Sol ondro na nen fu Yeyses.

So wan sortu syncretisme ben sa kan fru-klari san-ede 25 december, ’na kobortu dey fu na son di sma no kan wini’, den ben teki leki na dey fu hori na kobortu fu Yeyses. A ben sa kan yepi wi tu fu frustan fu san-ede tapu wan moni di ben meki fu memre a dede fu Constantijn, den wortu tanapu „DV Constantinus” („Constantijn wan gado”). Disi e meki wi si taki Constantijn ala di a ben dray en libi teki bribi èn te fu kba ben teki dopu sma ben si en leki wan gado, neleki den hèyden keysri na en fesi.

[Sma di abi a reti foe a prenki]

The Metropolitan Museum of Art. Legaat van mevr. F. F. Thompson, 1926 (26.229)