„Na pisiten fu bigi-ay”

EFU libisma abi muyti fu rutu gewoon frikowtusiki puru, o bigi na tyans de dan taki a sa rutu bigi-ay puru, wan siki di de furu tron moro dangra?

Bigi-ay nanga prakseri yu srefi nomo de sani di yu no abi fu leri srefi — a de krin taki den de kba fu sensi den moro fruku pikin-nengre yari. Efu yu e luku fa tu nyofi pikin e prey nanga den preysani fu den, dan yu kan si dati.

Bigi-ay fu aparti sma de furu tron fu si èn a ogri nofo kba, ma te a e go fu nationaal ofu internationaal bigi-ay, dan milyun milyun sma e ondrofeni den takru bakapisi fu en. Teki fu eksenpre na internationaal bisnis na ini takru tabaka nanga puyri. Leki fa wan Spanyoro tijdschrift e taki dan disi de a moro bigi bisnis fu grontapu — a bun gi 300 milyard Amerkan dala wan yari. Nanga na fowtu kobroyki fu takru tabaka nanga puyri dan milyun milyun libi e ruwineri èn bun furu libi e lasi gwe biten. San na a rutu fu na kon moro furu fu na bisnis na ini takru tabaka nanga puyri? Sondro degedege a de bigi-ay.

Na koranti World Press Review e meki na buweygi disi fu ati, bigi-ay kon bun a fesi. A e teki wan pisi fu na koranti fu Cambio 16 na ini Madrid, pe na dyaranti e gi taki „soso 10 te 20 procent fu ala na wini fu na seri fu takru tabaka nanga puyri e go na den kondre di e meki den. Ete wan 10 procent e go na ini na sistema fu na bisnis di no mag fu lanti fu di a e poti go baka na ini den laboratorium, sani fu tyari den so leki oto, boto nanga so moro fara nanga fetisani. . . . A pisi di tan abra e kon na ini den kondre di e kobroyki den èn na tapu bankrekening dorosey fu na anu fu belasting.”

Disi e sori taki a no tru taki pina de a rutu fu bigi-ay, taki bigi-ay de soso wan fasi di den pôtiwan ofu den sma di den hori a baka abi. Bigi-ay de krin wan swakifasi fu libisma, di panya na ala sey èn di de na ini ala kontren fu a libimakandra, so srefi na den sma di no de mofina srefisrefi. Wan aparti fasi fu bigi-ay de taki a de so verradelijk — srefi sma di te yu taki en leti de tevrede nanga a libi fu den sa sori bigi-ayfasi efu sondro fu fruwakti den e kisi na okasi fu dati.

Na koranti skrifiman Meg Greenfield e kragi: „Yu abi fu naki koranti opo na sortu dey nomo di yu wani èn yu e leysi fu den sma di den poti fu ondrosuku sani èn den spesrutu fiskari nanga degedege plan, na oneerlijkheid nanga na bidrigifasi nanga kori, èn a de wan sani di e meki yu lasi ati srefisrefi. Srefi awinsi sonwan fu den kragi di ben tyari kon na fesi no ben de so èn awinsi sma meki trawan moro bigi leki fa a de, dan ete a de gi mi krin taki libisma ala ten baka du sani èn sondro fu kisi strafu ben mag du sani di noyti pasi ben mag gi fu dati. . . . So fara wi kon now kba: srefi furu fu na denki di wi e denki na den afersi fu tra sma fosi, de a prisiri di wi e prisiri wi srefi, bigi-ayfasi.”

O fara a panya go?

Bigi-ay no de wan nyun sani a mindri libisma, ala di leki wan bakapisi fu den problema fu na libi na ini na di fu twenti yarihondro disi sondro degedege a kon moro furu. Bigi-ay panya now so bigi taki den tinyari fu den yari aytitenti kisi wan nen na ini wan redactioneel artikel fu The Christian Century di leki fa na artikel disi e taki e fiti na den nen leki „Na pisiten fu broko-ede” gi den yari feyfitenti ofu „Na mi-pisiten” gi den yari seybitenti. A e kari den yari aytitenti „Na pisiten fu bigi-ay”!

Now wan sma kan si bigi-ay na ibri kontren pe libisma e kon makandra — na wrokope, na skoro èn na ini na gemeenschap ini algemeen. A e abi en pori krakti na ini bisnis, politiek, èn srefi na ini den bigi relisi fu na grontapu.

A de moro furu tron leki noyti taki bigi-ay e gro kon tron bidrigifasi ofu fufuru di lanti no gi pasi. The Canberra Times e gi Australiya fu eksenpre na degedege grani fu teki na fosi presi tapu a kontren fu fufuru na ini oto verzekering. Na Australiya Law Society Journal gersi taki a e hori baka gi disi te a e fruklari: „Bidrigi claims/fruklari fu na sey fu sma di verzeker e kostu vezekeringmaatschappij, nanga sma di verzeker indirect, milyun milyun dala wan yari”. A tijdschrift e taki moro fara taki, „a de wan moro seryusu problema di e kon nomo, spesrutu tapu a kontren fu brand-, havenfufuru-, oto- nanga verzekering fu ala sani na ini na oso”.

So bun a de wan sani fu frustan heri bun taki furu sma e spotu na a prakseri taki bigi-ay oyti sa rutu puru. Den e denki nomo taki bigi-ay ala ten sa tan a mindri wi èn taki wan grontapu sondro bigi-ay de soso wan dren di no kan.

Bigi-ay sa puru a pasi

Tapu a gron fu san den wortu di taki dya na tapusey èn di gersi taki den no kan, kan feni presi? A abi na fondamenti taki wan libifasi sondro bigi-ay de wan tru sani kba. Ala di wi no kan kari na kontru disi wan volmaaktiwan, toku a e sori san yoysti leri èn wan yoysti buweygi fu ati kan du. Na ini na tra artikel di e kon sa tyari kon na krin fa now precies wan heri grontapu sondro bigi-ay kan.