Tyari kon na yu fesi wan grontapu sondro bigi-ay
YU KAN tyari kon na yu prakseri wan grontapu pe libisma e wroko makandra na presi fu strey nanga makandra? Pe sma e handri nanga trawan so leki den srefi ben sa wani sote taki tra sma handri nanga den? Disi na den marki fu wan grontapu sondro bigi-ay. Fa disi ben sa de wan tumusi moy grontapu! A sa kon oyti wan ten? Iya, seyker. Ma fa bigi-ay, di de so dipi na ini na libismafamiri sa kan puru a pasi?
Fu kisi na piki na tapu disi dan wi musu frustan fosi fa bigi-ay du kon. Na beybri e sori taki bigi-ay no ben de ala ten wan marki fu na libismafamiri. Na profeyti Moses e memre wi, taki biginbigin no wan swakifasi so leki bigi-ay ben de fu feni na ini na fosi libisma, na volmaakti kriyaturu fu wan Mekiman di no wan bigi-ay de na en: „Na Stonbergi, volmaakti na ini en aktiviteit, bika ala en pasi na geregteghèyt.” Fa bigi-ay du kon dan? Na fosi libisma paar gi pasi taki na eygifasi disi ben gro kon na ini den — Eva di nanga bigi-ay ben luku na san a ben sa kisi efu a ben sa nyan fu na froktu di Gado ben taygi den fu no nyan, Adam di nanga bigi-ay no ben wani lasi en moy uma. Moses ben taki moro fara ete, ini wortu di ben de so srefi gi Adam nanga Eva: „Den ben handri fu dén sey na wan porifasi; den no de en pikin, na mankeri de na den srefi.” — Deuteronomium 32:4, 5; 1 Timoteyus 2:14.
Krosibey fu na ten fu na frudu di ben kon na a heri grontapu ini Noa dey dan bigi-ay nanga syen lostu ben gro kon so bigi taki „na takru fasi fu libisma ben de psa marki na grontapu èn . . . ibri firi fu prakseri fu den ati ben de ala ten nomo takru”. — Genesis 6:5.
Na bigi-ayfasi disi di moro den libisma e go doro te now ete èn a gersi taki a doro trutru en heymarki na ini na disiten bigi-ay libimakandra di no de nanga tangi.
Puru bigi-ay nanga yepi fu leri
So leki fa bigi-ay gro a mindri libisma, na so a tra sey fu a tori kan tu. Sma kan wini bigi-ay. Ma yoysti leri nanga yoysti kweki de fanowdu gi disi, nanga fasti libilin ofu gronprakseri di wan sma musu waka na den baka. Disi kande mag gersi leki yu kan bribi disi, ma suma kan gi so wan sortu leri èn sorgu taki san wan sma leri a e poti tu go na ini en libi — efu a de fanowdu srefi fu dwengi en fu du dati?
Na sortu leri disi musu kon fu wan presi di en srefi de fri fu bigi-ay. Tra sani no mag de na ini na tori èn so srefi na fruwakti no musu de fu kisi wan sani baka fu di so wan leri gi. Boyti fu dati, sma musu kisi leri fu na waarde nanga na man di yu man fu poti ini yu libi na du fu sani sondro fu prakseri yu srefi nomo èn so srefi den musu kisi fu si fa dati musu psa. Na studenti musu kisi a overtoygi taki so wan libifasi no wwan kan, ma taki a moro bun fu a teki en, nanga winimarki gi en srefi èn den sma ini en birti.
Soso na Gado fu heymel kan gi na sortu fu leri disi, bika sortu libisma ofu sortu organisâsi na grontapu ben sa abi den eygifasi nanga background di de fanowdu? No wan sma bun fu gi a leri disi èn dati de tapu na gron fu na beybri waarheid di e kon now: „Ala sma sondu èn no e doro na glori fu Gado.” — Rome sma 3:23.
Koloku taki Yehovah, na Gado fu heymel, e gi so wan leri na ini en skrifi leribuku ofu anubuku, na beybri. En Manpikin, Yeyses Krestes, ben sori di a ben de na grontapu leki libisma taki a ben de wan fesiman fu na sortu fu leri disi. Afu pasi fu en barinen Bergipreyki a ben taki fu wan libifasi di moro furu fu den sma di ben e arki, ben sa fruwondru fu yere, fu di a leri ben sori fu du sani srefi gi wan sma feyanti ofu gensman sondro fu prakseri en srefi nomo. Yeyses ben taki: „Tan lobi yu feyanti èn tan begi gi den di e frufolgu yu, so taki yu mag sori taki yu de manpikin fu yu Tta, di de na ini den heymel, bika a e meki en son opo tapu den ogri sma èn den bun sma èn e meki alen fadon tapu regtfardiki sma nanga onregtfardiki sma. Bika efu yu e lobi den sma di e lobi yu, sortu payman yu abi dan? Den belastingman no e du a srefi tu?” — Mateyus 5:44-46.
Na wroko fu Yeyses na grontapu ben abi leki marki fu skoro leriman di no e prakseri den srefi nomo, so taki den fu den sey ben sa kan gi leri na tra sma ini na libifasi disi di bigi-ay no de wan pisi fu en. Wan pisiten baka Yeyses dede nanga opobaka na apostru Paulus ben tron wan fu den leriman disi. Na ini difrenti fu en brifi di skrifi ondro krakti fu santa yeye Paulus ben gi tranga fu puru bigi-ay. A ben skrifi fu eksenpre gi den Efeysiya sma: „Meki hurudu nanga ala sortu doti libi ofu bigi-ay no kon srefi a unu mindri fu taki fu den, so leki a fiti santawan .” — Efeysiya sma 5:3.
Na so Yehovah Kotoygi na ini na ten disi e leri mansma nanga umasma fa den kan dwengi den bigi-ay fasi fu den. Baka wan pisiten dan den sma disi tu e doro den marki fu go èn leri tra sma na ini den sortu pasi disi ini a dini fu Gado.
Beybri waarheid abi krakti tapu sma
Ma yu ben sa kan poti na aksi: ’Onvolmaakti libisma di abi bigi-ay srefisrefi, kan puru na eygifasi disi trutru na ini a sma di den de?’ Iya, dati kan. A no de fu taki, taki a no na wan volmaakti fasi, ma na ini wan aparti marki. Meki wi go luku pikinso dya wan eksenpre.
Na ini Spanyorokondre wan sma ben e libi di ben lobi fu fufuru. En oso ben lay nanga sani di a ben fufuru. Ne a ben bigin studeri na beybri nanga Yehovah Kotoygi. Leki wan bakapisi fu disi en konsensi ben bigin fon en, èn fu dati-ede a ben teki a bosroyti fu gi den eyginari den fufuru sani baka. A ben go na en fositen basi èn ben fruteri taki a ben fufuru wan nyun wasmasyin fu en. Na basi ben fruwondru sote fu en fasi di kenki, taki a ben teki na bosroyti fu no meki a tori go na skowtu, ma fu meki na fositen fufuruman pay soso na prèys fu na wasmasyin.
Dan na fufuruman di ben dray en libi ben teki a bosroyti fu fisiti ala tra sma di a ben kan memre taki a ben fufuru den èn fu gi den fufuru sani baka. Ibri sma di a ben fisiti, ben taki nanga fruwondru taki a ben kenki en fasi srefisrefi fu di a ben poti beybri gronprakseri na ini en libi.
Now a ben kon tanapu na fesi wan trutru muylekhèyt. A ben abi te now ete sani na ini en oso di a no ben sabi suma ben abi den. Baka di a begi Yehovah, a ben go na a edekantoro fu skowtu èn ben tyari siksi stereo radiyo go di a ben fufuru na ini oto. Den skowtu ben fruwondru, fu di a no ben de kwetikweti a mindri den sma di de ini skowtu buku. Den ben teki a bosroyti taki a ben musu pay soso wan butu èn ben musu koti wan syatu strafu-oso strafu.
Na fositen fufuruman disi abi now wan krin konsensi, fu di a dray baka gi en libi fu ogridu nanga bigi-ay èn moksi en srefi na a gemeente fu Yehovah Kotoygi di de na a heri grontapu.
Makriki wi ben kan gi dusundusun fu den sortu eksenpre disi. Ala di den sma disi di tyari den sortu kenki disi kon na ini den libi de pikinso sma fu den sma di e libi a grontapu, dan fu di furu sma du disi, meki disi e sori fa a sabi nanga a poti na ini wan sma libi fu beybri gronprakseri de wan krakti di e wroko bun tapu sma.
Te den yari e psa gwe, dan moro nanga moro sma e teki na libifasi disi. Na ini moro leki 60.000 gemeente fu Yehovah Kotoygi na a heri grontapu beybri leri e gi. Den Kotoygi no e fruwakti now fu kenki na heri grontapu èn fu puru bigi-ay a mindri den milyard milyard sma di e libi now. Toku den beybri profeytitori e sori taki now heri esi ibriwan sma sa libi wan libi di de fri fu bigi-ay!
Wan nyun grontapu sondro bigi-ay
Na ini na nyun grontapu di e kon presi no sa de gi bigi-ay nanga a prakseri fu yu srefi nomo. Na apostru Petrus e gi wi na dyaranti taki regtfardikifasi no wwan sa de wan marki fu den „nyun heymel”, ma so srefi fu na „nyun grontapu” (2 Petrus 3:13). Bigi-ay de fu dati-ede wan fu „den fositen sani” di, makandra nanga siki, sari èn srefi dede, psa gwe.— Openbaring 21:4.
So bun hori deki-ati efu bigi-ay nanga a libifasi fu prakseri yu srefi nomo, di e kon moro ogri èn di de fu si ala sey lontu wi, e tergi yu! Bigin now fu libi gi na nyun grontapu di e kon, èn di dyonsro sa de wan trutru sani. Feti nanga yepi fu Gado na baka fu puru bigi-ay ini yu eygi libi. Teki prati fu yepi trawan fu si sortu winimarki wan sma kan kisi now te a e libi wan kresten libi. Poti yu bribi nanga frutrow na ini na pramisi fu Yehovah Gado taki bigi-ay heri esi sa de a mindri den furu sani di no switi èn di ’no sa tyari kon agen na ini na prakseri, èn no sa opo kon na ini na ati’. — Yesaya 65:17.
[Prenki na tapoe bladzijde 5]
Yeyses ben taki fu wan libifasi di e meki a no prakseri fu yu srefi nomo go a fesi èn no bigi-ay
[Prenki na tapoe bladzijde 7]
Dyonsro — wan grontapu sondro bigi-ay