Yongu sma di e dini Gado

YU E feni en ongewoon taki bunbun yongu sma e teki den ten, fu kon na yu doro fu taki fu Gado sondro fu kisi pai? A e sori wan fruwondru sani ini wan geslakti pe a mankeri fu bribi e gro, taki pikin e go makandra nanga den papa nanga mama fu fruteri trawan fu den tumusi moi beibri pramisi fu wan koloku tamara?a

Na ini moro furu fu den moro leki 60.000 gemeente fu Yehovah Kotoigi di de na a heri grontapu, yu sa feni furu yongu sma. Den no e go na wan ala wiki sonde skoro ofu skoro pe den e gi leri fu Gado. Na presi fu dati, den yongu sma disi e nyanbun fu den gemeente konmakandra èn e abi srefi wan prati na den. Den pikinwan mag gi eenvoudig piki. Den moro bigi pikin e teki prati na a teyokrasia diniwroko skoro. Furu tini e kobroiki skoro fakansi fu yepi den konpe sma fu leri sabi Gado èn den tumusi moi pramisi fu en gi a tamara.

Fu taki en leti, nyun sani no de na a sortu wroko disi di den yonguwan e du. A beibri e fruteri fu kotrow yonkuman nanga wenke, so srefi yonguwan nanga nyofi pikin, di ben gi wan tumusi moi eksenpre ini na dini di den ben e dini Gado.

Na beibribuku fu den Psalm ben taki na fesi fu wan „konpani fu yonkuman” di ben sa abi so wan kowru-ati èn ben sa de so furu leki „dowdropu” na ini a wroko fu Gado. A ben fruteri so srefi fu „yonkuman” nanga „nyun-wenke” di ben sa prèise a nen fu Gado (Psalm 110:3; 148:12, 13). Leki fa a sori dan wantu yongu sma ben de a mindri den wan di ben de drape di a santa yeye fu Gado ben kanti na tapu den bribiwan na a penkstri fu 33 G.T. A dei dati so wan 3000 sma ben teki a wortu èn ben kisi dopu. Na apostru Petrus ben taki taki a fruwondru sani disi di ben psa ben de wan kontru fu a profeititori fu Yowel: „Den manpikin nanga umapikin fu unu sa taki profeititori èn den yonguman fu unu sa si fisyun èn den owruman fu unu sa dren dren.” — Tori fu den Apostru 2:4-8, 16, 17, 41.

Moro beibri eksenpre de ete fu sma di ben dini Yehovah na ini den yongu yari, sma so leki Samuwel, a regtfardiki kownu David, den beibri profeiti Yeremia nanga Daniël di sma sabi bun, èn so srefi a kotrow Timoteyus. A uitgave disi abi dri artikel di e taki fu wantu fu den beibri eksenpre disi. Den artikel dati o sori yu fu san-ede yonguwan, èn so srefi den moro owruwan, e teki a dienst fu Yehovah seryusu èn fu san-ede den e gi so meni ten fu yepi den konpe sma fu den fu du a srefi.

[Foetoewortoe]