Tan suku na Kownukondre nanga Gado regtfardikifasi
„Tan suku dan fosi na Kownukondre nanga en regtfardikifasi, èn ala den tra sani disi den sa gi yu na tapu.” — MATEYUS 6:33.
1, 2. Ini san den sabiman fu Buku nanga Fariseiman kenki den du di tapu den srefi ben de bun sani, èn sortu warskow Yeises ben gi den bakaman fu en?
DEN sabiman fu Buku nanga den Fariseiman ben suku regtfardikifasi na den eigi fasi, san no ben de a fasi fu Gado. No dati wawan, ma te den ben du sani di fu den srefi ben de bun, dan den ben meki den tron wan hoigri fasi fu du sani fu sma ai ben kan si. Den no ben dini Gado, ma den eigi sosofasi. Yeises ben warskow en disipri gi so wan komedie: „Luku bun fu unu no e du unu regtfardikifasi na fesi fu libisma fu den kan si unu; noso unu no sa abi wan paiman na unu Tata, di de na ini hemel.” — Mateyus 6:1.
2 Yehovah e warderi den sma di e gi na den pôtiwan — ma no den sma di e gi na a fasi fu den Fariseiman. Yeises ben warskow en disipri fu no du leki den: „Fu dati-ede te unu o gi sari-ati presenti, dan no tronpeti en go na yu fesi, so leki den hoigriman e du na ini den snoga èn na den strati, so taki libisma ben sa gi den grani. Fu tru, mi e taigi unu: Den abi ala sani fu den paiman kba.” — Mateyus 6:2.
3. (a) Na sortu fasi den sabiman fu Buku nanga den Fariseiman ben kisi den paiman krinkrin fu na gi di den ben gi sani? (b) Fa Yeises ben si a gi fu sani tra fasi?
3 Na Griki wortu fu ’den abi ala sani kba’ (a·peʹkho) ben kon furutron na tapu kwitantie. Taki den wortu e kobroiki ini na Bergipreiki e sori a tapu, taki „den kisi den pai”, dati wani taki, „den teken na kwitantie fu a pai fu den di den kisi: na reti fu den fu kisi den pai kon tru, precies neleki den ben gi wan kwitantie fu dati kba” (An Expository Dictionary of New Testament Words, by W. E. Vine). Pramisi ini na tori fu presenti gi pôti sma ben feni presi na fesi sma na strati. Na ini den snoga den ben meki den nen bekenti fu den wan di ben gi sani. Den wan di ben gi furu moni, ben kisi spesrutu grani fu di den ben mag sidon na sei den rabbi te dienst ben e hori na ini na snoga. Den ben gi sani fu meki libisma kan si den; libisma ben si den èn ben gi den grani; fu dati-ede den ben kan teken na kwitanti fu na pai di den ben kisi fu na gi di den e gi sani, taki „Ala sani pai”. Fa Yeises ben si sani tra fasi! Gi sondro fu sma sabi; dan unu Tata, di e luku sondro fu sma sabi taki a e luku, sa pai unu baka fu dati’. — Mateyus 6:3, 4; Odo 19:17.
Begi di Gado feni bun
4. Fu san-ede den begi fu den Fariseiman ben meki Yeises kari den hoigriman?
4 Yehovah e warderi begi di e seni go na en — ma no so leki fa den Fariseiman ben begi. Yeises ben taigi en bakaman: „Te unu e begi, unu no musu de leki den hoigriman, bikasi den lobi fu e tanapu begi na ini den snoga èn na den uku fu den bradi strati fu meki sma si den. Fu tru, mi e taigi unu: Den abi ala sani fu den paiman kba” (Mateyus 6:5). Den Fariseiman ben abi furu begi di den ben musu begi ala dei, na spesrutu ten èn awasi pe den ben de. Fu taki en leti den ben musu taki den begi disi te no wan tra sma ben de drape. Ma fu espresi den ben sorgu, te a yuru fu begi ben doro, taki den ben de „tapu den uku fu den bradi strati”, pe sma di ben e waka psa fu fo difrenti sei, ben kan si den bun.
5. (a) Sortu tra du ben meki Gado no ben yere den begi fu den Fariseiman? (b) Sortu sani Yeises ben poti na a fosi presi na ini a moderi begi fu en, èn sma na ini na ten disi e agri nanga dati?
5 Ini a sori fu falsi santafasi ’den ben sa taki langa begi fu bidrigi sma’ (Lukas 20:47). Wan leri di gi abra nanga mofo ben taki: „Den vroom man fu owruten ben abi na gwenti fu wakti wan yuru bifosi den ben taki na Tefillah [begi]” (Misjnah). Na a ten dati dan ala sma seiker ben sa si na vroomfasi fu den èn fruwondru fu disi! Den sortu begi disi no ben go moro hei leki den eigi ede. Yeises ben taki fu den begi te den ben de den wawan, sondro fu taki den wortu fu a begi ala tron baka, san ben de fu soso èn a ben gi den wan eenvoudig moderi (Mateyus 6:6-8; Yohanes 14:6, 14; 1 Petrus 3:12). Na ini na moderi begi fu Yeises den moro prenspari sani ben kisi na fosi presi: „Wi Tata na hemel, meki yu nen kon santa. Meki yu kownukondre kon. Meki yu wani psa” (Mateyus 6:9-13). Pikinso sma na ini a ten disi sabi Gado nen, lastan taki den wani meki a kon santa. Na so wan fasi den e meki a tron wan gado sondro nen. Meki Gado Kownukondre kon? Furu sma e denki taki a de dyaso kba, na inisei fu den. Kande den e begi fu en wani musu du, ma moro furu fu den e du den eigi wani. — Odo 14:12.
6. Fu san-ede Yeises ben krutu den faste fu den dyu leki sani di no abi waarde?
6 Faste na wan sani di Yehovah e teki — ma no so leki fa den Fariseiman ben du en. Neleki na ini na kofal fu na gi fu presenti na mofinawan èn fu a begi fu den sabiman fu Buku èn Fariseiman, na so Yeises ben trowe so srefi na faste fu den leki wan sani di no abi waarde. „Te unu e faste, stòp fu poti wan sari fesi so leki den hoigriman, bika den e meki wan fesi, so taki a sa gersi gi sma taki den e faste. Fu tru, mi e taigi unu: Den abi ala sani fu den paiman kba” (Mateyus 6:16). Na ini den leri fu den di gi abra nanga mofo ben tanapu taki den Fariseiman no ben musu wasi èn salfu den srefi te den ben e faste, ma taki den ben musu lobi asisi na tapu den ede. Te den dyu no ben e faste, den ben wasi den srefi geregeld èn ben frifi den skin nanga oli.
7. (a) Fa den bakaman fu Yeises ben musu tyari den srefi te den ben e faste? (b) Sortu faste Yehovah ben wani ini na ten fu Yesaya?
7 Na ini na tori fu faste Yeises ben taigi den bakaman fu en: „Frifi yu ede nanga oli èn wasi yu fesi, so taki a no kan go gersi taki yu e faste gi libisma, ma gi yu Tata” (Mateyus 6:17, 18). Ini a ten fu Yesaya dan dyu di ben fadon komoto na bribi ben e prisiri nanga a faste fu den, ben e boigi den sili na ini sarifasi èn ben e boigi den ede èn ben e sidon na ini saka nanga asisi. Ma Yehovah ben wani fu den ben lusu den wan di ben kisi kwinsi, fu den ben gi den wan di abi angri nyanyan, èn fu den ben gi den wan di no abi dak na tapu den ede wan tanpresi èn fu den ben weri krosi gi den wan di de nanga sososkin. — Yesaya 58:3-7.
Tyari hemel gudu kon makandra
8. Fa a du kon taki den sabiman fu Buku nanga Fariseiman ben lasi na ai fa den ben kan meki Gado feni den bun, èn sortu gronprakseri di Paulus ben tyari bakaten kon na krin den no ben si?
8 Na ini a feti di den ben e feti baka regtfardikifasi dan den sabiman fu Buku nanga Fariseiman ben lasi na ai fa den kan meki Gado feni den bun èn den ben poti den prakseri soso na tapu a prèise di libisma musu prèise den. Den ben meki den leri fu libisma teki den krinkrin abra so taki den ben poti na skrifi Wortu fu Gado na wan sei. Den ben poti den ati tapu grontapu posisi na presi fu hemel gudu. Den ben afrontu na eenvoudig waarheid di wan Fariseiman di ben drai tron wan kresten, ben skrifi yari baka dati: „Awasi san unu e du tu, du unu wroko nanga heri unu sili leki gi Yehovah èn no gi libisma, bika unu sabi taki na fu Yehovah unu sa kisi na gudu leki wan reti pai.” — Kolose sma 3:23, 24.
9. Sortu kofar kan de gi grontapu gudu, ma san sa kibri tru gudu?
9 Yehovah abi belangstelling ini na gi di yu e gi yu srefi fu dini en, no ini na bank rekening fu yu. A sabi taki yu ati de pe yu gudu de. Frustu nanga motu kan pori yu gudu? Fufuruman kan diki boro psa tokotoko skotu èn fufuru en? Ofu, ini a nyunmodo ten disi pe sani e kenki na ekonomia sei, inflatie (a kon diri fu sani) kan meki a krakti fu en fu bai sani kon moro mendri ofu wan bankroet fu bank kan meki a saka kon de noti? Den ogridu di e kon moro nanga moro sa meki den fufuru yu gudu? No efu a poti na ini hemel. No efu yu ai — wan lanpu di e meki yu heri skin e kisi leti — de soifri, èn poti soso na tapu Gado kownukondre nanga en regtfardikifasi. Gudu abi wan fasi fu e lasi gwe makriki. „No weri yu skin fu kisi gudu. No frutrow tapu yu eigi frustan. Yu meki yu ai fadon a tapu pikinso, ala di a no de noti? Bika sondro mankeri a e meki frei gi en srefi neleki di fu wan aka èn e frei gwe na hemel” (Odo 23:4, 5). Fu san-ede gudu ben sa meki yu lasi sribi? „Na abi fu sani psa marki fu na guduman, no e gi en pasi fu sribi” (Preikiman 5:12). Prakseri na warskow fu Yeises: „Yu no kan dini Gado nanga Gudu leki srafu.” — Mateyus 6:19-24.
Bribi di e puru broko-ede
10. Fu san-ede a de so prenspari fu yu poti bribi na ini Gado èn no na ini sani di yu abi na skinfasi, èn sortu rai Yeises ben gi?
10 Yehovah wani taki yu bribi na ini en, èn no na ini sani di yu abi na skinfasi. „Sondro bribi [sma] no kan prisi en kwetikweti, bika na sma di e kon na Gado musu bribi taki a de èn taki a e tron na sma di e pai den wan di e suku en seryusu” (Hebrew sma 11:6). Yeises ben taki: „Awinsi wan sma abi psa marki, en libi no e kon fu den sani di a abi” (Lukas 12:15). Milyunmilyun moni na tapu bank no kan sorgu taki fokofoko di siki e tan wroko ofu taki wan ati di weri e tan pompu. „Fu dati-ede mi e taigi unu”, so Yeises ben go moro fara ini en Bergipreiki: „Stòp fu broko yu ede fu yu sili ini a tori fu san yu sa nyan ofu san yu sa dringi ofu fu yu sili ini na tori fu san yu sa weri. A sili no wani taki moro leki nyanyan èn na skin moro leki krosi” — Mateyus 6:25.
11. Pe Yeises ben feni furu fu den agersitori fu en, èn fa a ben sori disi na ini na Bergipreiki?
11 Yeises ben de wan meistri ini a fruteri fu agersitori. Ope a ben luku tu a ben feni den fu fruteri. A ben si wan uma e poti wan lanpu di ben leti na tapu wan kandratiki èn ben drai disi kon poti ini wan agersitori. A ben si wan herder e prati skapu fu bokoboko; a ben tron wan agersitori. A ben si pikin e prei na a pren fu wowoyo; a ben tron wan agersitori. Èn so a ben de ini na Bergipreiki. Ala di a ben e taki fu na broko-ede fu skin fanowdu, a ben si agersitori ini den fowru di ben e frei lontu èn den leilie di ben tapu den skoinsi sei fu den pikin bergi leki wan karpet. Den fowru e sai èn e koti nyanyan? Nono. Den leili e drai wan lolo meki titei èn e brei den titei kon tron krosi? Nono. Gado meki den; a e sorgu gi den. Ma yu warti moro leki den fowru nanga den leili (Mateyus 6:26, 28-30). A ben gi en Manpikin fu a bun fu yu, no fu a bun fu den. — Yohanes 3:16.
12. (a) Na agersitori fu den fowru nanga den bromki wani taki taki Yeises disipri no ben musu fu wroko? (b) San Yeises ben meki kon na krin ini na tori fu wroko nanga bribi?
12 Yeises no ben fruteri den bakaman fu en dyaso taki den no ben abi fu wroko fu sorgu gi nyanyan nanga krosi gi den srefi (Luku Preikiman 2:24; Efeise sma 4:28; 2 Tesalonika sma 3:2-10). Na a mofoyari mamanten dati den fowru ben wroko tranga fu krabu fu suku nyanyan, fu meki modo gi makandra, fu bow nesi, fu sidon na tapu eksi, èn fu gi den yonguwan fu den nyanyan. Den ben wroko, ma sondro fu broko den ede. Den bromki ben wroko tranga tu fu pusu den rutu fu den go na ini na gron fu suku watra nanga mineraal, èn fu seni den wiwiri fu den go na loktu fu kisi na leti fu na son. Den ben musu gro kon bigi èn gi bromki èn trowe den siri fu den bifosi den dede. Den ben e wroko, ma sondro fu e broko den ede. Gado e sorgu gi fowru nanga leili. ’A no sa sorgu dan moro furu gi unu, unu di abi wan pikin bribi?’ — Mateyus 6:30.
13. (a) Fu san-ede a ben fiti taki Yeises ben kobroiki wan markitiki fu wan el di a ben taki fu a meki kon moro langa fu wan sma libiten? (b) Fa, fu taki en so, yu kan meki yu libi kon moro langa nanga milyunmilyun kilometer di sma no man teri?
13 Sobun abi bribi. No broko yu ede. Broko-ede no sa kenki noti. „Suma fu unu fu di a e broko en ede”, so Yeises ben aksi, „kan poti wan el na en libiten?” (Mateyus 6:27) Ma fu san-ede Yeises e tyari wan trutru markitiki di e gi na langa — wan el — kon kruderi nanga, a marki fu ten na ini wan sma libiten? Kande fu di furutron na beibri e agersi na libiten fu libisma nanga wan waka, èn e kobroiki wortu leki „na pasi fu den sondari”, „a pasi fu den regtfardikiwan”, wan ’bradi pasi di e tyari sma go na pori’ èn ’wan smara pasi di e tyari wi go na libi’ (Psalm 1:1; Odo 4:18; Mateyus 7:13, 14). Broko-ede gi den ala dei fanowdu no kan meki wan sma libi kon pikinso moro langa srefi, „wan el” fu taki en so. Ma wan fasi de fu meki yu libi fu taki en so kon moro langa nanga milyunmilyun kilometer di sma no kan teri. No fu di unu e broko unu ede èn e taki: „San wi sa nyan?” ofu „San wi sa dringi?” ofu: „San wi sa weri?”, ma fu di wi abi bribi èn fu di wi e du san Yeises e taigi wi fu du: „Tan suku dan fosi na kownukondre nanga en regtfardikifasi, èn ala den tra sani disi den sa gi unu a tapu.” — Mateyus 6:31-33.
Kisi Gado Kownukondre nanga En regtfardikifasi
14. (a) San na a thema fu na Bergipreiki? (b) Na tapu sortu fowtu fasi den sabiman fu Buku nanga Fariseiman ben suku na Kownukondre nanga regtfardikifasi?
14 Ini na fosi prakserilin fu en Bergipreiki Yeises ben taki fu na kownukondre fu hemel leki wan sani di ben de fu den sma di sabi den yeye nowtu. Na ini a di fu fo prakserilin, a ben taki taki den wan di e angri èn e dreiwatra fu regtfardikifasi, bere ben sa furu. Dyaso Yeises e poti a Kownukondre nanga Yehovah regtfardikifasi na a fosi presi. Den sani disi de na thema fu na Bergipreiki. Den de na piki tapu den nowtu fu na heri libismafamiri. Ma nanga yepi fu san sma kan kisi Gado kownukondre nanga en regtfardikifasi? Fa wi e tan suku den? No na a fasi fa den sabiman fu Buku nanga Fariseiman ben du disi. Den ben suku na kownukondre nanga en regtfardikifasi nanga yepi fu na Wet fu Moses, di so leki fa den ben taki ben abi den leri di gi abra nanga mofo na ini en, fu di den ben bribi taki Yehovah ben gi Moses na skrifi Wet èn den leri di gi abra nanga mofo, na a bergi Sinaï.
15. (a) Oten, so leki fa den dyu ben taki, den leri fu den di gi abra nanga mofo ben feni den bigin, èn fa den ben opo den poti moro hei leki na skrifi Wet fu Moses? (b) Oten den leri disi di ben gi abra nanga mofo ben feni den bigin trutru, èn sortu krakti den ben abi tapu na Wet fu Moses?
15 Den leri fu den ini a tori disi ben taki: „Moses ben kisi na Wet [futuwortu: „Na ’Wet di gi nanga mofo’”] fu Sinaï èn ben gi den na Yosuwa, èn Yosuwa na den owruman èn den owruman na den Profeiti; èn den Profeiti ben gi den na den man fu na Bigi Snoga.” Baka wan pisiten dan a Wet fu den di ben gi abra nanga mofo ben poti moro hei srefi leki na skrifi Wet: „[Efu] a du sondu na den wortu fu na [skrifi] Wet a no fowtu,” ma efu „a e poti sani a tapu den wortu fu den sabiman fu Buku [den leri di gi abra nanga mofo], dan a fowtu” (Misjna). Den leri di gi abra nanga mofo no ben feni den bigin na Sinaï. Te yu luku en bun dan den ben bigin so wan tu yarihondro bifo Krestes. Den ben poti sani a tapu ofu ben puru sani fu na skrifi Wet fu Moses èn ben meki dati kon lasi krakti. — Teki gersi Deuteronomium 4:2; 12:32.
16. Fa Gado regtfardikifasi e du kon gi na libismafammiri?
16 Gado regtfardikifasi no e kon nanga yepi fu na Wet ma aparti fu na Wet: „Nanga yepi fu den wroko fu na wet nowan skin fu meti sa kon fruklari regtfardiki na en fesi, bika nanga yepi fu na wet a soifri sabi fu sondu de. Ma now aparti fu na Wet, Gado regtfardikifasi kon na krin, di na Wet nanga den Profeiti e kotoigi fu en, iya, Gado regtfardikifasi nanga yepi fu bribi ini Yeises Krestes” (Rome sma 3:20-22). Gado regtfardikifasi e kon sobun nanga yepi fu bribi ini Krestes Yeises — fu disi ’na Wet nanga den Profeiti ben kotoigi’ psa marki. Den profeititaki di e go fu na Mesiyas ben kon tru ini Yeises. Yeises ben meki so srefi na Wet kon tru; a Wet ben puru na pasi fu di a ben kon spikri poti na a pina-udu fu en. — Lukas 24:25-27, 44-46; Kolose sma 2:13, 14; Hebrew sma 10:1.
17. So leki na apostru Paulus ben taki dan fa den dyu ben tan misi fu leri sabi na regtfardikifasi fu Gado ?
17 Fu dati-ede na apostru Paulus ben skrifi fu den dyu di ben misi fu suku regtfardikifasi: „Bika mi e kotoigi fu den taki den abi faya gi Gado; ma no akruderi soifri sabi; bika fu di den no ben sabi na regtfardikifasi fu Gado, ma ben pruberi fu tyari den eigi regtfardikifasi kon, meki den no ben saka den srefi na ondro na regtfardikifasi fu Gado. Bika Krestes de na kba fu na Wet, so taki ibri sma di e sori bribi, kan kisi regtfardikifasi” (Rome sma 10:2-4). Paulus ben skrifi tu fu Krestes Yeises: „Na wan di no ben sabi sondu, a meki kon de sondu gi wi, so taki nanga yepi fu en wi ben sa tron Gado regtfardikifasi”. — 2 Korente sma 5:21.
18. Fa den dyu bakaman fu leri di gi abra nanga mofo, den Griki filosoofman èn „den wan di den ben kari” ben si „wan Krestes di ben anga na a postu”?
18 Den dyu ben si wan Mesiyas di ben e dede leki wan swaki sma di no ben de noti. Den Griki filosoofman ben spotu so wan Mesiyas leki wan law sani. Toku a de leki fa Paulus ben fruklari: „Den dyu e aksi fu wan marki èn den Griki e suku koni, ma wi e preiki wan Krestes di anga na a postu, gi den dyu wan reide fu naki futu fadon, ma gi den nâsi wan law sani; ma gi den wan di den ben kari, dyu sobun leki Griki sma, Krestes, na krakti fu Gado èn na koni fu Gado. Bika wan law sani fu Gado moro koni leki libisma, èn wan swaki sani fu Gado moro tranga leki libisma” (1 Korente 1:22-25). Krestes Yeises na wan sori fu na krakti nanga koni fu Gado èn na sani di Gado e kobroiki fu meki den sma di e gi yesi kisi regtfardikifasi nanga têgo libi. „Na ini nowan tra sma moro frulusu [de], bika nowan tra nen na ondro hemel no ben gi na mindri libisma di wi musu kisi frulusu nanga yepi fu en.” — Tori fu den Apostru 4:12.
19. San na tra artikel sa sori?
19 Na tra artikel sa sori taki, efu wi wani lon komoto gi na pori èn kisi libi fu têgo, taki wi musu tan suku Gado Kownukondre nanga en regtfardikifasi. Disi no musu du wawan fu di wi e arki Yeises wortu ma so srefi fu di wi e du san a e taki.
Overzicht aksi
◻ San den sma di ben feti fayafaya gi na dyu relisi ben meki den presenti fu den fu sari-ati, den begi fu den nanga den faste di den ben faste, tron?
◻ Pe na a presi di no abi kofar, fu poti yu gudu?
◻ Fu san-ede wi no musu broko wi ede nanga wi fanowdu na skinfasi?
◻ Sortu fowtu sani den dyu ben taki fu na bigin fu den leri fu den di gi abra nanga mofo?
◻ Nanga yepi fu san na Kownukondre fu Gado nanga en regtfardikifasi e kon?
[Prenki na tapoe bladzijde 12]
Den Fariseiman ben lobi fu tanapu begi na den uku fu den strati pe sma ben kan si den