Feti alaten a baka lobi boen-atifasi
„En di e feti a baka regtfardikifasi nanga lobi boen-atifasi sa feni libi, regtfardikifasi nanga glori.” — ODO 21:21.
1. Foe san-ede wi kan froewakti taki denwan di e meki Gado jeje e tjari den, e sori boen-atifasi èn switifasi?
JEHOVAH abi boen-atifasi èn e firi sari gi sma. A de „wan Gado nanga sari-ati èn boen fasi, di e teki langa foe kisi atibron èn di abi lobi boen-atifasi èn waarheid pasa marki” (Exodus 34:6, 7). Foe dati-ede a no moeilek foe froestan taki na froktoe foe en santa jeje abi lobi èn boen-atifasi èn switifasi na ini. — Galasia sma 5:22, 23.
2. Sortoe eksempel wi sa loekoe now?
2 Denwan dati di Jehovah santa jeje noso wroko krakti e tjari den, e sori den froktoe foe en, boen-atifasi èn switifasi. Den e sori lobi boen-atifasi ini den matifasi foe den nanga tra sma. Foe troe den e waka baka na eksempel foe na apostel Paulus, èn e rikomanderi densrefi leki dinari foe Gado „nanga boen-atifasi” èn na ini tra fasi (2 Korente sma 6:3-10). Na jejefasi foe den foe de nanga switifasi, foe firi sari gi sma, foe gi sma pardon, de ini akroederi nanga na sma di Jehovah de, di abi „lobi boen-fasi pasa marki” èn di na Wortoe foe en abi foeroe eksempel foe boen-atifasi èn switifasi (Psalm 86:15; Efeise sma 4:32). San wi kan leri foe wan toe foe den disi?
Boen-atifasi e meki wi no soekoe wi eigi boen nomo èn e meki wi teki sma na wi oso
3. Fa Abraham ben de wan eksempel ini a sori foe boen-atifasi, èn sortoe deki-ati Paulus e gi ini a tori disi?
3 Na famiri-edeman Abraham (Abram) — „na mati foe Jehovah” èn ’na tata foe ala sma di abi bribi’ — ben gi wan toemoesi moi eksempel ini a sori foe boen-atifasi (Jakobus 2:23; Rome sma 4:11). En nanga en famiri, so srefi en bradapikin Lot, ben gowe libi na Kaldew foto Ur èn tapoe a komando foe Gado den ben go na ini Kanan. Ala di Abraham ben de na moro owroe man èn na ede foe na famiri, a ben sori switifasi èn no ben prakseri en eigi boen nomo di a ben gi pasi foe Lòt teki den moro boen wèigron, ala di ensrefi ben teki san ben tan abra (Genesis 13:5-18). Na srefi sortoe boen-atifasi kan boeweigi wi foe gi pasi foe tra sma abi winimarki foe na lasi foe wi. Na sortoe boen-atifasi èn switifasi disi di no e soekoe en eigi boen nomo de ini akroederi nanga na rai foe na apostel Paulus: „Meki ibri sma no tan soekoe en eigi boen, ma di foe na tra sma.” Paulus srefi ’ben plisi ala sma ini ala sani, no foe soekoe en eigi boen ma di foe foeroe sma, so taki den kan kisi froeloesoe’. — 1 Korente sma 10:24, 33.
4. Sortoe pai Abraham nanga Sara ben kisi foe di den sori switifasi ini a vorm foe a teki di den ben teki sma na den oso?
4 Son leisi switifasi e teki na vorm foe na teki di joe e teki sma na joe oso, foe di joe ati e poesoe joe foe doe so. Abraham nanga en wefi Sara ben sori switifasi foe teki dri freimde sma di ben e pasa wan dei, na den oso. Abraham ben dwengi den foe tan wan pisiten, ala di en nanga Sara ben meki esi foe sreka wan toemoesi boen njanjan gi den fisitiman. A ben kon a krin taki den freimde sma dati ben de engel foe Jehovah, èn wan foe den ben tjari na pramisi kon, taki owroe Sara di no ben abi pikin ben sa kisi wan manpikin (Genesis 18:1-15). Fa dati ben de wan pai gi na teki di den ben teki sma na den oso na wan switi fasi!
5. Na sortoe fasi Gajus ben sori boen-atifasi, èn fa wi kan doe so wan sani?
5 Wan fasi fa ala kresten kan sori boen-atifasi na foe teki sma na den oso (Rome sma 12:13; 1 Timoteus 3:1, 2). Ini akroederi nanga disi den dienstknekti foe Jehovah na wan switi fasi e teki opziener di e rèis na den oso. Disi e meki wi prakseri foe na boen-atifasi di na kresten Gajus ben sori ini na fosi jarihondro. A ben doe „wan getrow wroko” ini a teki di a ben teki brada di ben e tjari wan fisiti, na en oso — èn den ben de „freimde sma” di a no ben sabi a fesi (3 Johanes 5-8). Moro foeroe wi sabi denwan di wi kan teki na wi oso na wan switi fasi. Kande wi e si taki wan jeje sisa e firi broko-saka. Kande en trowpatna de wan sma di no de na bribi noso srefi wan sma di sluit uit. Fa dati de wan okasi foe sori switifasi, foe di wi e gi en wan kari son leisi foe kon èn njanboen foe jeje demakandra èn foe njan makndra nanga wi osofamiri! Ala di wi no man foe gi wan fesa-njanjan, dan wi osofamiri seiker sa abi prisiri foe sori switifasi gi so wan sisa. (Teki gersi Odo 15:17.) Èn seiker a sa sori tangi gi disi nanga en mofo noso na ini wan switi brifi.
6. Fa Lydia ben sori boen-atifasi, èn foe san-ede a de prenspari foe sori warderi gi doe foe switifasi?
6 Baka di na oema Lydia, di ben gi ensrefi ini a dini foe Gado, ben teki dopoe, „a ben taki, ala di a ben aksi nanga tranga: ’Efoe oenoe [Paulus nanga en kompe] ben feni taki mi de getrow na Jehovah, kon na ini mi oso èn tan dja.’ Èn a ben dwengi wi foe kon”, Lukas ben taki moro fara. Sondro degedege den ben warderi na boen-atifasi foe Lydia (Tori foe den Apostel 16:14, 15, 40). Ma foe misi foe sori warderi kan broko wan sma saka. Na wan okasi wan sisa foe aititenti jari, di ben abi pikinso krakti èn moni, ben wroko foe sreka wan njanjan gi wan toe fisitiman. A ben firi broko-saka spesroetoe di wan jongoe man no ben seni piki srefi taki a no ben kan kon. Na wan tra okasi toe sisa ben misi foe go na wan njanjan di wan jongoe oema ben sreka spesroetoe gi den. „A ben ati mi sote”, a ben taki, „foe di no wan foe den ben frigiti en. . . . A betre mi ben jere taki den ben frigiti foe kon njan, ma na presi foe dati no wan foe den sisa ben abi nofo switifasi noso lobi foe bèl mi.” Na froktoe foe na santa jeje, switifasi, sa boeweigi joe foe abi warderi èn foe hori tra sma na prakseri ini den srefi sortoe situwâsi disi?
Boen-atifasi e meki wi hori tra sma na prakseri
7. Sortoe penti den e agersi, di abi foe doe nanga boen-atifasi, nanga a moeiti di den ben doe foe hori densrefi na den winsi foe Jakob ini a tori foe en beri?
7 Boen-atifasi moesoe meki wi hori tra sma èn den joisti winsi foe den na prakseri. Foe agersi na penti disi: Jakob (Israèl) ben aksi en manpikin Josef foe sori lobi boen-atifasi gi en foe no beri en na ini Egipti. Ala di disi ben aksi foe tjari na skin foe Jakob boen fara, tokoe Josef èn den tra manpikin foe Jakob „ben tjari en go na ini a kondre Kanan èn ben beri en na ini na bergi-olo foe na gron foe Machpela, abrasei foe Mamre, na gron di Abraham ben bai foe Efron na Hethiet sma foe abi wan beripe” (Genesis 47:29; 49:29-31; 50:12, 13). Ini akroederi nanga na eksempel dati, dan lobi boen-atifasi no moesoe boeweigi wi foe hori wisrefi na den seti foe beri, di de ini akroederi nanga den Boekoe, èn di wan kresten famiri memre e winsi foe abi?
8. San na kefal foe Rakab e leri wi foe a doe di wi moesoe doe wan sani baka gi na boen-atifasi èn switifasi di sma e sori wi?
8 Te tra sma e sori lobi boen-atifasi gi wi, dan wi no moesoe sori warderi noso doe wan sani baka? Seiker wi moesoe doe dati. Rachab na hoeroe ben sori boen-atifasi foe di a ben kibri den spion foe Israèl. Foe dati-ede den Israèl sma ben sori lobi boen-atifasi foe di den ben kibri en nanga en osofamiri di den ben gi na foto Jericho abra na pori (Josua 2:1-21; 6:20-23). Fa dati de wan toemoesi moi eksempel di e sori taki wi moesoe doe wan sani baka gi na boen-atifasi di sma e sori gi wi, foe di wi e hori tra sma na prakseri èn abi switifasi wisrefi!
9. Foe san-ede joe ben sa taki dati a de joisti foe aksi wan sma foe sori lobi boen-atifasi gi wi?
9 Ini a tori dati, a de joisti foe aksi wan sma foe sori lobi boen-atifasi gi wi. Jonathan, na manpikin foe na fosi kownoe, Saul, ben doe disi. Jonathan ben aksi en lobi mati David, di ben de moro jongoe, foe sori lobi boen-atifasi gi en nanga en osofamiri (1 Samuèl 20:14, 15; 2 Samuèl 9:3-7). David ben memre disi di a ben teki refensi gi den Gibeon sma, di Saul ben doe ogri nanga den. Foe di David ben e prakseri „na sweri foe Jehovah” a mindri en nanga Jonathan, meki a ben sori lobi boen-atifasi foe di a ben kibri na libi foe Mefiboseth, na manpikin foe Jonathan (2 Samuèl 21:7, 8). Wi e ’meki wi Ija wani taki Ija’ toe? (Jakobus 5:12). Èn efoe wi na gemeente owroeman, wi e firi sari dan na wan srefi fasi te kompe bribiman abi lobi boen-atifasi fanowdoe?
Boen-atifasi e meki banti kon moro tranga
10. Fa na lobi boen-atifasi foe Rut ben kisi blesi?
10 Lobi boen-atifasi e meki famiri banti kon moro tranga èn e tjari moro kolokoe kon. Disi ben kon a krin ini a kefal foe na Moab oema, Rut. A ben wroko tranga leki wan sma di ben tjari karoe kon makandra di den kotiman ben libi ini na gron foe na owroe Boaz krosibei foe Bethlehem, foe sorgoe gi njanjan gi ensrefi èn en manmama di ben de wan weduwe èn di ben pôti (Rut 2:14-18). Baka ten Boaz ben taigi Rut: „Joe ben sori joe lobi boen-atifasi moro betre ini a lasti kefal leki ini a fosi kefal, foe no waka baka den jongoe man, efi den pôti noso goedoe” (Rut 3:10). Ini a fosi kefal Rut ben sori lobi boen-atifasi gi Naomi. „Ini a lasti kefal” na Moab oema ben sori lobi boen-atifasi foe di a ben wani foe trow nanga na owroe Boaz foe opo wan nen gi en masra di dede èn gi na owroe Naomi. Nanga jepi foe Boaz, Rut ben tron na mama foe na granpapa foe David, Obed. Èn Gado ben gi en na „volmaakti pai” foe de wan afo foe Jesus Krestes (Rut 2:12; 4:13-17; Mateus 1:3-6, 16; Lukas 3:23, 31-33). Fa na lobi boen-atifasi foe Rut ben wani taki blesi gi en nanga en famiri! Na ini a ten disi, blesi, kolokoe èn a kon moro tranga foe famiri banti so srefi de na bakapisi te lobi boen-atifasi e gro fajafaja na ini oso pe den e gi densrefi ini a dini foe Gado.
11. Sortoe bakapisi na boen-atifasi foe Filemon ben abi?
11 Boen-atifasi e meki den banti ini a gemeente foe Jehovah pipel kon moro tranga. Sma ben sabi na kresten man Filemon foe a sori di a ben sori lobi boen-atifasi gi kompe bribiman. Paulus ben taigi en: „Mi e taki tangi na mi Gado ala ten te mi e taki foe joe ini den begi foe mi, foe di mi tan jere foe joe lobi èn bribi di joe abi gi Masra Jesus èn gi ala den santawan . . . Na lobi foe joe ben gi mi prisiri èn ben trowstoe mi, bikasi den safoe lobi foe den santawan ben kisi kowroe-ati nanga jepi foe joe, brada” (Filemon 4-7). Den Boekoe no e taki fa den safoe lobi foe den santawan ben kisi kowroe-ati nanga jepi foe Filemon. Ma a moesoe de taki a ben sori lobi boen-atifasi gi kompe salfoewan na difrenti fasi san ben sori taki a ben kowroe den ati, èn disi sondro degedege ben meki den banti a mindri den kon moro tranga. Den srefi sortoe sani disi e pasa te kresten e sori lobi boen-atifasi ini a ten disi.
12. Sortoe bakapisi na boen-atifasi di Onesiforus ben sori ben abi?
12 Na boen-atifasi foe Onesiforus so srefi ben abi boen bakapisi. „Meki Masra abi sari-ati gi na osofamiri foe Onesiforus,” Paulus ben taki, „bikasi foeroetron a ben tjari kowroe-ati gi mi, èn a no ben sjen foe mi boei. Kontrari foe dati, te a ben pasa taki a ben de na ini Rome, a ben soekoe mi fajafaja èn ben feni mi. Masra moesoe gi en pasi foe feni sari-ati foe Jehovah na a dei dati. Èn ala den wroko di a ben doe na ini Efeise joe sabi boenboen” (2 Timoteus 1:16-18). Efoe wi e meki moeiti wisrefi foe sori lobi boen-atifasi gi kompe bribiman, wi sa de kolokoe èn sa meki den banti foe brada lobi ini na kresten gemeente kon moro tranga.
13, 14. Fa na gemeente foe Filipi ben de wan eksempel, èn san Paulus ben doe tapoe na boen-atifasi foe en?
13 Te wan heri gemeente e sori lobi boen-atifasi gi kompe bribiman, dan disi e meki a banti a mindri den kon moro tranga. So wan krosibei banti ben de a mindri Paulus nanga na gemeente na ini a foto foe Filipi. Foe taki en leti, dan wan reide foe san-ede a ben skrifi en brifi gi den Filipi sma ben de foe sori tangi gi a boen-atifasi èn jepi foe den na skinfasi. A ben skrifi: „Na a bigin foe meki a boen njoensoe bekènti, di mi ben gowe foe Macedonië, no wan gemeente ben teki prati nanga mi ini na afersi foe gi èn kisi sani, boiti joe wawan, bikasi srefi na ini Tesalonika joe ben seni wan sani gi den fanowdoe foe mi, wan leisi so boen leki wan di foe toe leisi. . . . Mi abi ala sani dorodoro èn mi abi sani pasa marki. Mi abi foeroe, now di Epafroditus ben gi mi den sani di joe ben seni, wan switi smeri, wan ofrandi di Gado teki èn di e plisi en.” — Filipi sma 4:15-18.
14 A no de wan froewondroe sani taki Paulus ben memre ini den begi foe en den Filipi sma, di ben abi switifasi! A ben taki: „Ibri ten te mi e prakseri oenoe mi e taki Jehovah tangi ala ten ini ibri tranga begi foe mi gi oen alamala, ala di mi e seni mi tranga begi nanga prisiri, foe na bijdrage ede di oenoe ben gi na a boen njoensoe foe sensi na fosi dei te leki na momenti disi” (Filipi sma 1:3-5). Na sortoe boen-ati jepi disi, sondro foe gridi, gi na Kownoekondre preikiwroko, noiti sa meki wan gemeente kon pôti. Baka di den Filipi sma na wan boen-ati fasi ben doe san den ben kan doe ini a tori disi, dan Paulus ben gi den na djaranti: „Mi Gado foe en sei doronomo sa gi den sani di joe abi fanowdoe na a marki foe en goedoefasi ini glori, nanga jepi foe Krestes Jesus” (Filipi sma 4:19). Ija, Gado e pai boen-atifasi nanga a lobi di wan sma lobi foe gi sani. En Wortoe e taki: ’Ibri sma, awansi sortoe boen a e doe, sa kisi disi baka foe Jehovah.’ — Efeise sma 6:8.
Te oema sma e sori boen-atifasi
15, 16. (a) Fa sma ben memre na boen-atifasi foe Dorkas, èn san ben pasa di a ben dede? (b) Fa boen-ati kresten oema e doe boen pasa marki ini a ten disi?
15 Na lobi boen-atifasi foe na disipel Dorkas (Tabita) foe Jope no ben tan sondro foe kisi pai. „A ben doe boen èn ben gi sari-ati presenti pasa marki”, èn di ’a ben kon siki èn ben dede’, den disipel ben seni kari Petrus na ini Lyda. Di a ben doro „den ben tjari en go na ini a tapoesei kamra; èn ala den weduwe ben kon tanapoe na en sei, ala di den ben e krei èn ben e sori foeroe ondrokrosi èn tapoesei krosi di Dorkas ben meki di a ben de ete nanga den”. Prakseri fa a ben de: Weduwe nanga sari èn watra-ai ben taigi na apostel o boen Dorkas ben de èn ben sori en den krosi leki boeweisi foe en lobi èn boen-atifasi. Di Petrus ben seni ala sma gowe, a ben go na tapoe en kindi ini begi èn ben drai loekoe na skin. Arki! A ben taki: „Tabitha, opo!” Èn loekoe! „A ben opo en ai èn di a ben si Petrus, a ben go sidon leti-opo. Petrus ben langa en anoe gi en èn ben meki a opo èn ben kari den santawan èn den weduwe èn ben presenteri en libilibi a den” (Tori foe den Apostel 9:36-41). Fa dati ben de wan blesi foe Gado!
16 Disi ben de na fosi opobaka, di den ben skrifi foe en, èn di wan apostel foe Jesus Krestes ben doe! Èn den situwâsi di ben tjari go na a toemoesi moi wondroe disi, ben abi den roetoe ini boen-atifasi. Soema kan taki dati Dorkas ben sa opo kon a libi efoe a no ben doe boen sani èn ben gi sari-ati presenti pasa marki — efoe a no ben abi lobi boen-atifasi pasa marki? No wawan Dorkas èn den weduwe dati ben kisi blesi ma na wondroe foe na opobaka foe en ben gi wan kotoigi di ben gi glori na Gado. Ija, „a sani disi, sma ben kon sabi ini heri Jope, èn foeroe ben tron bribiman foe Masra” (Tori foe den Apostel 9:42). Ini a ten disi boen-ati kresten oema so srefi e doe boen pasa marki — kande ini a meki di den e meki krosi gi kompe bribiman, ini a sreka di den e sreka njanjan gi den owroe sma a wi mindri, ini a teki di den e teki tra sma na den oso (1 Timoteus 5:9, 10). Fa disi de wan kotoigi gi sma di e loekoe! Èn moro leki dati, fa wi de kolokoe taki na gi di den e gi densrefi ini a dini foe Gado èn lobi boen-atifasi e boeweigi na ’bigi legre [disi] foe oema sma foe froeteri na boen njoensoe’ foe gi glori na wi Gado, Jehovah! — Psalm 68:11.
Tan feti a baka lobi boen-atifasi
17. San skrifi na ini Odo 21:21, èn fa den wortoe dati abi foe doe nanga aparti sma di e gi densrefi ini a dini foe Gado?
17 Ala denwan di e winsi foe Gado feni den boen moesoe feti a baka lobi boen-atifasi. „En di e feti a baka regtfardikifasi èn lobi boen-atifasi sa feni libi, regtfardikifasi èn glori”, wan koni odo e taki (Odo 21:21). Wan sma, di e gi ensrefi ini a dini foe Gado, fajafaja e feti a baka na regtfardikifasi foe Gado, èn ala ten e meki den markitiki foe Gado tiri en (Mateus 6:33). A e tan foe sori loyaal lobi, noso lobi boen-atifasi gi tra sma na skin fasi èn spesroetoe na jeje fasi. Na so fasi a e feni regtfardikifasi bikasi na jeje foe Jehovah e jepi en foe libi na wan regtfardiki fasi. Foe taki en leti, dan a e ’weri regtfardikifasi’ neleki fa na man Job ben doe di ben gi ensrefi ini a dini foe Gado (Job 29:14). So wan sma no e soekoe en eigi glori (Odo 25:27). Na presi foe dati, a e kisi sortoe glori toe di Jehovah e gi en pasi foe a kisi, kande ini a vorm foe na respeki foe kompe libisma, di Gado e boeweigi foe den handri boen nanga en, foe di ensrefi e sori lobi boen-atifasi gi den. Moro fara denwan di na wan loyaal fasi e doe na wani foe Gado sa feni libi — no soso wan toe jari di e pasa esi-esi ma foe têgo.
18. Foe san-ede wi moesoe feti a baka lobi boen-atifasi?
18 Foe dati-ede, meki ala sma di lobi Jehovah Gado tan feti a baka lobi boen-atifasi. Na eigifasi disi e meki Gado èn tra sma lobi wi. A e meki wi lobi teki sma moro na wi oso èn e meki wi hori tra sma na prakseri. Boen-atifasi e meki den banti ini na osofamiri èn ini na kresten gemeente kon moro tranga. Sma e warderi èn abi dipi respeki gi oema sma di e sori lobi boen-atifasi. Èn ala sma di e feti a baka na toemoesi moi eigifasi disi e tjari glori na a Gado foe lobi boen-atifasi, Jehovah.
Fa joe ben sa piki?
◻ Fa Abraham ben de wan eksempel ini a sori foe boen-atifasi èn switifasi?
◻ San na kefal foe Rakab e leri wi foe a doe di wi moesoe doe wan sani baka gi na boen-atifasi di sma e sori wi?
◻ Fa na gemeente foe Filipi ben sori boen-atifasi?
◻ Fa boen-ati kresten oema e doe boen pasa marki ini a ten disi?
◻ Foe san-ede wi moesoe feti a baka lobi boen-atifasi?