Loekoe boen nanga falsi profeiti!
WAN trowpaar foe Brasionkondre ben go didon foe sribi a neti di den ben jere foefoeroeman e broko den oso kon na ini. Na trowpaar ben man foe jepi densrefi foe djompo na a fensre foe a sribikamra èn go kari skowtoe. Ma san a ben ondrofeni ben seki a oema so te taki a no ben man sribi na ini a oso èn a ben abi foe go na en mama oso.
Iniwan sma soema oso den ben broko go na inisei ofoe soema den ben foefoeroe na wan ofoe tra fasi, sabi a situwâsi disi di e gi pen. So wan ondrofeni kan meki joe senwe trobi joe, èn moro nanga moro sma e pina na a fasi disi. Ma, fa a no fa, tokoe wan fasi foe foefoeroe de di de krinkrin moro serjoesoe.
San na a serjoesoe fasi disi foe foefoeroe, èn soema de den foefoeroeman? Jesus Krestes ben gi wi wan toe bodoi foe a tori disi di a ben taki foe wi ten, èn a ben taki: „Foeroe falsi profeiti sa opo kon èn kori foeroe sma” (Mateus 24:11). Na sortoe fasi falsi profeiti de foefoeroeman? San den e foefoeroe? Na foefoeroe foe den abi foe doe nanga a profeteri di den e profeteri. So boen foe kan froestan na tori krinkrin, a de fanowdoe foe sabi fosi san a wani taki foe profeteri ini akroederi nanga a bijbel.
San a wani taki foe profeteri
Te joe e denki foe san na profeteri, kande na fosi sani di joe e kisi na prakseri na froeteri a fesi foe san sa pasa ini a ten di e kon. Disi ben de foe troe wan pisi foe a wroko foe Gado profeiti foe owroeten, ma dati no ben de a wroko foe den na a fosi presi. Leki eksempel, di den ben taigi na profeiti Esekièl „foe” profeteri gi a winti”, dati ben wani taki soso dati a ben moesoe tjari den komando foe Jehovah kon na doro (Esekièl 37:9, 10). Di Jesus ben de a fesi kroetoe na den priester, den ben spiti na en tapoe èn naki en, èn a spotoefasi den froefolgoeman foe en ben taki: „Profeteri gi wi, joe Krestes. Soema na a sma di ben naki joe?” Den no ben e aksi Jesus foe a froeteri a fesi foe san sa pasa na a ten di e kon. Den ben e tjalensi en foe kon sabi nanga a krakti foe Gado soema ben de a sma di ben naki en.—Mateus 26:67, 68.
A de so taki, a moro prenspari prakseri di den wortoe foe na fosi bijbel tongo di den poti abra nanga „profeteri” noso „profeititaki” e tjari kon abra, te joe loekoe en boen, na foe froeteri fa Gado e denki foe wan afersi noso, so leki fa a boekoe Tori foe den Apostel ben poti en, foe froeteri „foe den bigi wroko foe Gado” (Tori. 2:11). Na a fasi disi falsi profeiti e foefoeroe foeroe sma.
Soema, joe denki na den falsi profeiti, èn san den e foefoeroe? Foe kan piki den aksi disi, meki wi go loekoe baka ini a historia foe a nâsi Israèl na ini a ten foe Jeremia. Wi sa doe disi ini a tra artikel.