Fa bribi kan jepi den sikiwan

DEN tori ini bijbel foe den meki kon betre na wan wondroe fasi foe sma, e gi wi a seikerfasi dati Gado e broko ede nanga a boen foe wi èn den e sori en makti foe dresi sma. Foe di den meki kon betre disi, na wondroefasi, ben gi Gado glori èn ben tjari so meni prisiri, a de reidelek foe aksi: A presenti foe meki sma kon betre nanga jepi foe santa jeje e wroko ete?

A piki tapoe na aksi dati na nôno — èn a reide kan froewondroe son sma. Den meki kon betre dati na wondroefasi ini a fosi jarihondro doro a marki foe den. The Illustrated Bible Dictionary e taki na wan joisti fasi: „A marki foe den wondroe foe meki sma kon betre ben de na relisifasi, no na datra fasi.” San ben de wan toe foe den relisi marki di den wondroe dati ben moesoe meki kon troe?

Wan sani de seiker, den wondroe foe meki sma kon betre di Jesus ben doe, ben dini a marki foe meki sma kon sabi en leki a Mesias. Èn baka en dede, den ben jepi foe boeweisi taki Gado blesi ben de na tapoe a njoen kresten gemeente (Mateus 11:2-6; Hebrewsma 2:3, 4). Moro fara, den ben sori taki a pramisi foe Gado foe meki a libisma famiri kon betre baka ini a njoen grontapoe, sa kon troe. Den e meki wi bribi kon moro tranga taki a ten sa kon troetroe te „no wan sma di e libi drape sa taki: ’Mi siki.’ Den sma di e libi ini a kondre sa de den wan di kisi pardon foe den fowtoe” (Jesaja 33:24). Di den ben doro den fosi jarihondro marki disi kaba, dan wondroe no ben de fanowdoe moro langa.

A de moi foe si taki den fosi jarihondro disipel foe Jesus srefi ben pina foe siki di no ben meki kon betre na wan wondroefasi. Disi na ete wan boeweisi taki a meki di Jesus, so boen leki den apostel foe en, ben meki sma kon betre na wan wondroefasi ben de foe leri sma den prenspari waarheid, no foe gi datra jepi. Di Paulus ben rikomanderi Timoteus wan dresi gi den foeroe leisi di Timoteus ben siki, dan na apostel ben taki foe a gebroiki foe win leki dresi, no foe a meki kon betre nanga jepi foe begi. Paulus, di ben doe wondroe foe meki sma kon betre, no ben kisi froeloesoe foe a „maka ini en skin” di ben tan „naki” en — 2 Korentesma 12:7; 1 Timoteus 5:23.

Di den apostel ben dede, a presenti foe man meki sma kon betre ben lasi gowe. Paulus ensrefi ben meki bekènti taki disi ben o feni presi. Di a ben agersi a kresten gemeente nanga wan beibi, Paulus ben taki: „Di mi ben de wan njofi pikin, mi ben e taki leki wan njofi pikin, mi ben e prakseri leki wan njofi pikin, mi ben e meki plan leki wan njofi pikin; ma now di mi tron wan man, mi poeroe den fasi foe wan njofi pikin.” A prakseri foe na agersi tori disi ben de taki den wondroe presenti foe a jeje ben de wan pisi foe den pikin-nengre jari foe a kresten gemeente. Den ben de „den eigifasi foe wan njofi pikin”. Dati ede a ben taki: „Den [wondroe presenti] sa den poeroe.” — 1 Korentesma 13:8-11.

Bribi kan jepi wi te wi e kon siki?

Ma, srefi efoe wi no e froetrow tapoe a meki kon betre nanga jepi foe begi, dan seiker a e fiti foe begi Gado foe a jepi wi te wi e siki. Èn foe troe, noti no fowtoe te trawan e begi foe na boen foe wi. Ma den begi moesoe taki foe troe sani èn moesoe de akroederi a wani foe Gado (1 Johanes 5:14, 15). No wan presi ini bijbel wi e kisi a komando foe begi gi a meki kon betre foe sma nanga jepi foe begi.a Na presi foe dati, wi e begi foe Jehovah horibaka gi wi na wan lobifasi, te wi de ini den tesi di siki e tjari.

Bijbel e sori foe san getrow sma kan begi te den siki, te a e taki: „Jehovah srefi sa asisteri en na tapoe wan siki bedi; joe sa kenki na heri siki bedi foe en seiker na a ten foe a siki foe en” (Psalm 41:3). Foe denki dipi foe Gado Wortoe sa jepi den wan di e pina foe siki na emotioneel fasi. A psalm singiman ben skrifi: „Joe eigi lobi switifasi, o Jehovah, ben tan e asisteri mi. Te den ongorostoe prakseri foe mi ben kon de foeroe na inisei foe mi, dan a ben de den trowstoe foe joe di ben bigin boboi mi sili.” — Psalm 94:18, 19; loekoe so srefi 63:6-8.

Boiti dati, wi moesoe sori wan gesontoe prakseri ini afersi di abi foe doe nanga wi gesontoe èn bijbel e gi wi rai foe a tori disi. A moro boen foe libi akroederi den gronprakseri foe bijbel dan foe go gebroiki drugs na wan fowtoe fasi, go smoko, go dringi hebi, noso foe go njan pasa marki èn dan te joe e siki, joe e lasi ala howpoe èn e drai go na sma di e meki trawan kon betre nanga jepi foe begi. Foe begi foe wan wondroe te siki naki joe a no wan sani di e kon na a presi foe wan koni fasi foe tjari joesrefi foe lon gowe gi siki di joe ben kan tan farawe foe en, so leki foe di joe e njan njanjan di de boen gi joe skin, efoe a de foe kisi, noso foe di joe e soekoe boen datra jepi pe dati man.

Gado Wortoe e gi wi a deki-ati toe foe kweki gesontoe mentaal fasi di kan de boen gi na gesontoe foe wi na skinfasi. A boekoe foe Odo e gi na rai: „Wan tiri ati de a libi foe den inisei pisi foe a skin, ma djaroesoe na pori gi den bonjo.” „Wan ati di e prisiri e doe boen leki wan dresiman, ma wan jeje di e sari e drei den bonjo” (Odo 14:30; 17:22). Te wi e begi foe santa jeje foe kweki wan tirifasi èn prisiri ini wi, kan abi soso boen bakapisi tapoe wi gesontoe na skinfasi. — Filipisma 4:6, 7.

Fa a de nanga a meki kon betre foe sma nanga jepi foe begi?

A no de foe taki dati srefi efoe wan sma e libi wan gesontoe libi leki fa en situwâsi e gi pasi foe dati, dan tokoe siki kan naki en. San a moesoe doe dan? A de wan ogri sani foe go na wan sma di e meki trawan kon betre nanga jepi foe begi, nanga a howpoe foe kon betre? Ija, a de wan ogri sani. Njoen modoten sma di e meki trawan kon betre nanga jepi foe begi, wawantron e doe dati sondro foe aksi moni. Èn foe gi moni na wan sma di e meki trawan kon betre nanga jepi foe begi ala di a moni dati ben kan gebroiki foe datra jepi ben kan abi pina nanga lasi leki bakapisi. Boiti dati, foe san ede joe ben sa gi moni na sma di e meki gebroiki foe na bribi di sma e bribi sani esi-esi?

Son sma kan taki-go-taki-kon: ’Foe troe, a meki kon betre nanga jepi foe begi moesoe abi wan pikinso waarde awansi wan pikin persent foe den wan di e go na den „dresiman” e kon betre. Ma joe kan taki-go-taki-kon efoe den sma di e meki trawan kon betre nanga jepi foe begi, troetroe e meki ala sma betre foe têgo. Na Encyclopædia Britannica e erken: „Te joe e loekoe en boen dan pikinso ondrosoekoe ben doe tapoe a kontren foe den foeroe reide di wi no sabi, foe meki sma kon betre nanga jepi foe begi.

Srefi efoe a sori taki wan pikin nomroe e meki kon betre, dan tokoe disi a no wan boeweisi taki santa jeje de na wroko. Ini en Bergi Preiki, Jesus ben taki: Foeroe sma sa taki a dei dati, ’Masra, Masra, wi no ben taki profeititori ini joe nen èn ben poeroe ogri jeje ini joe nen èn ben doe foeroe krakti wroko? Èn tokoe mi sa meki den bekènti sondroe foe kibri wan sani: Mi no ben sabi oenoe noiti! Komoto na mi, oenoe wrokoman foe kroektoedoe” (Mateus 7:22, 23). Jesus ben taki toe, dati spesroetoe sma, di Gado no ben feni boen so srefi, ben sa kari sma prakseri poti tapoe densrefi nanga jepi foe marki: „Bika falsi krestes nanga falsi profeiti sa opo di sa doe bigi marki nanga bigi wondroe foe, efoe dati man, kori srefi den wan di den ben teki te foe kaba” (Mateus 24:24). Foe troe, wi kan fiti den wortoe dati na den njoen modoten sma di e meki trawan kon betre nanga jepi foe begi, ini a ten disi, nanga a dramatis fasi fa den e hori den konmakandra, a doronomo aksi foe den foe moni èn a taki di den e taki dati den meki sma kon betre na wan wondroefasi.

Den sortoe sma dati no e waka ini den foetoe stap foe Jesus. Na baka soema den e waka dan? Na apostel Paulus e gi wi wan idea te a e taki: „Satan ensrefi e tan kenki ensrefi ini wan engel foe leti. Dati ede, a no de wan bigi sani efoe en dinari toe e tan kenki densrefi ini dinari foe regtfardikifasi. Ma na kaba foe den sa de akroederi den wroko foe den” (2 Korentesma 11:14, 15). Efoe sma di e meki trawan kon betre nanga jepi foe begi no e doe den sani san den e taki dati den man doe, dan den na koriman di e waka a pasi foe Satan „di e kori na heri grontapoe pe sma e libi” (Openbaring 12:9). Ma san efoe, ini wan toe kefal, den e meki sma kon betre? Wi no moesoe kon si now taki den „krakti wroko” foe den abi bakapisi nanga a makti foe Satan nanga den ogri jeje foe en. Ija, dati moesoe de a kefal!

A ten foe kon betre troetroe

Den wondroe fasi fa Jesus ben meki sma kon betre, a ben doe nanga jepi foe a santa jeje foe Gado. Den ben sori taki Gado abi na prakseri foe loesoe ala den problema, di libisma abi nanga den gesontoe, na tapoe a joisti ten foe en. Jehovah e pramisi „foe dresi den nâsi” (Openbaring 22:2). Èn a no sa dresi siki wawan ma a sa poeroe dede. Johanes ben froeklari taki Jesus ben kon „so taki ibriwan sma di e sori bribi ini en, no ben sa go pori, ma ben sa abi têgo libi” (Johanes 3:16). Fa dati sa de wan toemoesi boen meki kon betre! Jesus sa meki sma kon betre baka neleki den wan di den ben skrifi foe den ini bijbel, ma na wan krinkrin moro bigi fasi. Srefi den dedewan a sa opo baka! (Johanes 5:28, 29) Oten disi sa feni presi?

Ini Gado njoen grontapoe, di, akroederi ala boeweisi, de krosibei. A njoen grontapoe dati, foe san den o bariwroko baka te a takroe fasi foe a seti foe sani disi poeroe foe têgo, sa de wan troetroe blesi gi a reti-ati libisma famiri. A sa de wan grontapoe sondro pina. „Gado sa figi poeroe ala watra-ai na den ai, èn dede no sa de moro, no sari, no krei, no pen sa de moro. Den fosi sani pasa kaba” (Openbaring 21:4). Fa dati de tra fasi leki den sani di wi e si lontoe wi ini a ten disi!

Dati ede, ini kefal foe siki, begi Gado foe a hori baka gi joe. Èn efoe joe siki noso gesontoe, leri fa têgo libi sondro siki sa de wan sani di sa man troetroe. Bow joe bribi ini a pramisi disi, foe Gado, di joe kan froetrow, foe di joe e studeri den foeroe sani di e sori tapoe dati ini bijbel. Leri fa Gado en pramisi ini a tori disi e doro en kontroe akroederi en eigi ten di a poti. No tweifri, bika Gado Wortoe e gi wi a djaranti: „Foe troe a sa swari dede foe têgo èn a Soeverein Masra Jehovah seiker sa figi den watra-ai foe ala sma fesi.” — Jesaja 25:8.

[Foetoewortoe]

[Prenki na tapoe bladzijde 7]

Den sma di Jesus ben meki kon betre na wan wondroefasi, ben meki a marki foe den kon troe