A betre di a libisma famiri o kon betre nanga wan wondroe, de krosibei
„NOITI ete wi ben si so wan sani.” Na so den sma ben taki di den ben si a dresi di Jesus ben betre wan lanman wantewante nanga wan wondroe (Markus 2:12). Jesus ben dresi so srefi den breniwan, den babaw-wan èn den malengriwan, èn den bakaman foe en ben doe dati toe. Nanga sortoe krakti Jesus ben doe dati? Sortoe ròl bribi ben prei? Sortoe bodoi den ondrofeni disi na ini a fosi jarihondro e gi foe a dresi di sma e dresi trawan nanga wan wondroe na ini a ten disi? — Mateus 15:30, 31.
„A bribi foe joe meki joe kon betre”
Sma di e dresi trawan nanga jepi foe begi nanga bribi na ini a ten disi, lobi foe taki den wortoe di Jesus ben taigi wan oema di ben e pina 12 jari langa foe a lasi di a ben lasi broedoe èn di ben kon na en foe kan kon betre: „A bribi foe joe meki joe kon betre” (Lukas 8:43-48). Den wortoe foe Jesus e sori taki a betre di na oema ben kon betre, ben anga foe a bribi foe en? Dati ben de wan eksempre gi a „dresi di sma e dresi trawan nanga jepi foe begi nanga bribi”, soleki fa sma e doe dati na ini a ten disi?
Te wi e leisi a bijbel verslag finifini, wi e si taki na ini moro foeroe foe den okasi, Jesus nanga den disipel foe en no ben aksi foe den siki sma taki den ben moesoe froeklari fosi taki den abi bribi, bifo den ben dresi den. Na oema di wi ben kari na tapoesei, ben kon na en baka èn, sondro taki a taigi Jesus wan sani, ben fasi en krosi na wan kibri fasi èn „wantewante a no ben e lasi broedoe moro”. Na wan tra okasi Jesus ben dresi wan man di ben de nanga den sma di ben kon foe aresteri en. A ben dresi srefi wan man di no ben sabi srefisrefi soema Jesus ben de. — Lukas 22:50, 51; Johanes 5:5-9, 13; 9:24-34.
San na a ròl di bribi ben prei dan? Di Jesus nanga den disipel foe en ben de na ini a distrikt foe Tirus nanga Sidon, wan oema foe Foenisia ben kon èn ben bari: „Abi sari nanga mi, Masra, Manpikin foe David. Wan ogri jeje de na mi oemapikin tapoe na wan ogri fasi.” Prakseri fa a no ben abi howpoe moro di a ben begi: „Masra, jepi mi!” Nanga foeroe sari na ati Jesus ben piki: „O oema, a bribi foe joe bigi foe troe; meki a pasa soleki fa joe winsi.” Èn en oemapikin ben kon betre „na a joeroe dati” (Mateus 15:21-28). A de krin, bribi ben abi foe doe nanga a tori, ma a bribi foe soema? Loekoe taki Jesus ben prèise a bribi foe a mama, no di foe a siki pikin. Èn bribi na ini san? Nanga a kari di na oema ben e kari Jesus leki „Masra, Manpikin foe David”, a ben erken na poebliki taki Jesus ben de a pramisi Mesias. A no ben de nomo wan wortoe foe bribi na ini Gado, noso bribi na ini a krakti foe a sma di e meki a kon betre. Di Jesus ben taki, „a bribi foe joe meki joe kon betre”, a ben wani taki dati sondro bribi na ini en leki a Mesias, den sma di ben pina no ben sa kon na en foe kon betre.
Foe den bijbel eksempre disi wi kan si taki a betre di Jesus ben meki sma kon betre, ben de heri tra fasi leki den sani di wi e si foeroe na ini a ten disi noso foe den sani di sma e froeklari taki den kan doe. Den ipi sma no ben meki opo-opo — e bari, e singi, e bari krei, e flaw, èn go so moro fara — èn Jesus no ben rigeri na wan fajafaja fasi. Boiti dati, noiti a ben de so, taki Jesus no ben man dresi den swakiwan foe di a ben gi falsi reide taki den no ben abi bribi noso taki na ofrandi foe den na moni sei no ben bigi nofo.
Kon betre nanga a krakti foe Gado
Fa a betre di Jesus nanga den disipel foe en ben meki sma kon betre, ben feni presi? „A krakti foe Jehovah ben de drape gi en foe man dresi sma”, bijbel e piki (Lukas 5:17). Na baka a dresi di a ben dresi wan sma, Lukas 9:43 e taki: „Den alamala ben froewondroe foe a kefalek bigi krakti foe Gado.” A e fiti foe taki Jesus no ben poti prakseri na tapoe ensrefi leki a sma di ben dresi trawan. Na wan okasi, a ben taigi wan man di a ben fri foe na ogri di ogri jeje ben doe en: „Go na oso na den famiriman foe joe, èn froeteri den ala sani di Jehovah doe gi joe èn foe a sari-ati di a ben sori joe.” — Markus 5:19.
Foe di Jesus nanga den apostel foe en ben dresi sma nanga a krakti foe Gado, a de makriki foe si foe san ede a no ben de ala ten fanowdoe taki a sma di ben kon betre, ben moesoe abi bribi foe kon betre. Ma, a ben de fanowdoe taki a sma di ben dresi trawan ben moesoe abi wan tranga bribi. Foe dati ede, di den bakaman foe Jesus no ben man poeroe wan spesroetoe tranga ogri jeje, Jesus ben taigi den foe san ede: „Bika oenoe no abi nofo bribi.” — Mateus 17:20.
A marki foe a betre di sma ben kon betre nanga wan wondroe
Ala di Jesus ben dresi foeroe sma na ini a heri pisi ten foe en diniwroko na grontapoe, a no ben feti na a fosi presi na baka wan ’diniwroko foe dresi sma’. A dresi di a ben dresi sma nanga wan wondroe — gi san noiti a ben aksi sma wan pai noso ben begi iniwan bijdrage — ben de na tapoe a di foe toe presi foe a sani di ben de prenspari gi en, namkoe foe „preiki a boen njoensoe foe a kownoekondre” (Mateus 9:35). A verslag e taki dati na wán okasi „a ben ontfanga den na wan switi fasi èn ben bigin taigi den foe a kownoekondre foe Gado, èn a ben dresi den wan di ben abi dati fanowdoe” (Lukas 9:11). Na ini den Evangelie tori sma ben kari Jesus foeroetron „Leriman”, ma noiti leki „Dresiman”.
Ma foe san ede Jesus ben dresi sma nanga wan wondroe? Moro foeroe a ben de foe boeweisi taki a ben de a pramisi Mesias. Di na wan fasi di no joisti den ben poti Johanes a Dopoeman na strafoe-oso, a ben wani de seiker taki a ben doe san Gado ben seni en foe doe. A ben seni den eigi disipel foe en go na Jesus èn a ben aksi: „Joe na a Sma di e Kon, noso wi moesoe froewakti wan tra sma?” Loekoe san Jesus ben taigi den disipel foe Johanes: „Go, èn taigi Johanes san oenoe e jere èn e si: Den breniwan e si baka èn den malengriwan e waka, den gwasiman e kon krin èn den dofoewan e jere, èn den dedewan e kisi wan opobaka èn na den pôtisma den e froeteri a boen njoensoe.” — Mateus 11:2-5.
Ija, a troetori taki Jesus no ben dresi sma wawan ma ben doe tra wondroe wroko toe di ben skrifi na ini den Evangelie tori, ben boeweisi krinkrin taki en na „a Sma di e Kon”, a pramisi Mesias. A no ben de fanowdoe taki wan sma ben moesoe „froewakti wan tra sma”.
Kon betre nanga wondroe na ini a ten disi?
Wi moesoe froewakti dan, taki Gado sa boeweisi a krakti foe en nanga jepi foe a dresi di a e dresi sma na ini a ten disi? Nôno. Nanga den wondroe wroko di Jesus ben doe nanga a krakti foe Gado, a ben boeweisi krinkrin taki a ben de a Mesias di Gado ben pramisi ben o kon. Den wondroe wroko foe Jesus skrifi na ini bijbel so taki ala sma kan leisi en. A no de fanowdoe taki Gado moesoe boeweisi a krakti foe en foe doe den sani disi ibritron baka gi ibri libisma geslakti.
A de prenspari foe si taki a betre di sma ben kon betre èn den tra wondroe wroko di sma ben doe, no ben overtoigi ala sma. Srefi wan toe sma di ben si den wondroe foe Jesus, no ben bribi taki a ben abi a jepi foe en hemel Tata. „Ala di a ben doe so foeroe marki na den fesi, den no ben e poti bribi na ini en” (Johanes 12:37). Dati na foe san ede, na baka di na apostel Paulus ben taki foe den difrenti presenti foe doe wondroe — profeteri, taki na ini tongo, a betre di sma e meki trawan kon betre, èn go so moro fara — di Gado ben gi den difrenti memre foe a fosi jarihondro kresten gemeente, na apostel ben taki nanga jepi foe a santa jeje foe Gado: „Awansi presenti foe profeteri de, den sa kon na wan kaba; awansi tongo de, den sa tapoe den; awansi sabi de, a sa kon na wan kaba. Bika wi abi afoe sabi èn wi e profeteri afoe nomo; ma te a sani di de dorodoro kon kaba, dan a sani di de afoe nomo sa kon na wan kaba.” — 1 Korentesma 12:28-31; 13:8-10.
A no de foe taki, bribi na ini Gado de prenspari gi a boen foe wi. Ma, te a bribi foe wan sma abi en gron na tapoe falsi pramisi taki a sa kon betre, dan dati sa meki a lasi-ati nomo. Moro fara, foe a ten foe a kaba, Jesus ben gi a warskow disi: „Falsi Krestes nanga falsi profeiti sa opo kon èn den sa doe bigi marki nanga wondroe so taki den, efoe dati man, kan kori srefi den wan di a froekisi” (Mateus 24:24). Boiti taki sma ben sa de di e doe neleki den man dresi trawan èn sma di ben sa bedrigi trawan, so srefi a krakti foe ogri jeje ben sa de foe si. Leki wan bakapisi foe dati, a no moesoe froewondroe wi taki sma ben sa taki foe dangra sani di ben feni presi, èn den sani disi no de wan fondamenti srefisrefi foe abi opregti bribi na ini Gado.
Foe di no wan sma na ini a ten disi e dresi sma na a fasi fa Jesus ben doe dati, a de so dan taki wi e lasi wan sani? Kwetikweti. Te joe loekoe boen, den sma di Jesus ben meki kon betre, ben kan kon siki baka. Den alamala ben kon owroe èn dede. A wini di den ben kisi foe di den ben kon betre, ben de gi wan sjatoe pisi ten nomo. Tokoe, a dresi di Jesus ben dresi sma nanga wan wondroe, wani taki wan sani foe têgo foe di den de wan prenki foe blesi di e kon na ini a ten di de na wi fesi.
Foe dati ede, na baka di den ben e studeri a Wortoe foe Gado, bijbel, Alexandre nanga Benedita, di wi ben kari bifo, no ben bribi moro na ini a disiten fasi fa sma e dresi trawan nanga begi èn nanga bribi èn nanga jepi foe afkodrei. Tokoe den abi na overtoigi taki a betre di wan sma e kon betre nanga wondroe, no de sani di ben pasa fositen nomo. Foe san ede den abi na overtoigi disi? Neleki miljoenmiljoen sma na heri grontapoe, den e froewakti den blesi foe a kon di sma sa kon betre na ondro Gado Kownoekondre. — Mateus 6:10.
Siki nanga dede no de moro
Soleki fa wi ben si na fesi, a moro prenspari marki foe Jesus en diniwroko no ben de foe dresi den sikiwan èn foe doe tra wondroe wroko. Na presi foe dati, a ben meki a preiki foe a boen njoensoe foe Gado Kownoekondre de en moro prenspari wroko (Mateus 9:35; Lukas 4:43; 8:1). A Kownoekondre dati na a wrokosani di Gado sa gebroiki foe dresi a libisma famiri nanga wan wondroe èn poeroe ala ogri di sondoe nanga onvolmaaktifasi tjari na tapoe a libisma famiri. Fa èn o ten a sa doe den sani disi?
Di a ben e loekoe foeroe hondro jari na fesi, Krestes Jesus ben gi en apostel Johanes wan profeitis fisjoen: „Now a ten doro foe a froeloesoe nanga a krakti nanga a kownoekondre foe wi Gado nanga a makti foe en Krestes!” (Openbaring 12:10) Ala den boeweisi e sori taki foe sensi 1914 a bigi gensman foe Gado, Satan, trowe go na a birti foe grontapoe, èn a Kownoekondre e wroko now leki wan sani di de troetroe! Jesus poti leki Kownoe foe a Mesian Kownoekondre èn a de klariklari now foe tjari bigi kenki kon na grontapoe.
Heri esi, a hemel tirimakti foe Jesus sa tiri wan regtfardiki njoen libisma libimakandra, troetroe „wan njoen grontapoe” (2 Petrus 3:13). Fa a situwâsi sa de na a ten dati? Djaso wi kan fringi wan kefalek moi ai: „Mi ben si wan njoen hemel èn wan njoen grontapoe; bika a fosi hemel èn a fosi grontapoe ben pasa gowe . . . Èn [Gado] sa figi poeroe ala watra na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba”. — Openbaring 21:1, 4.
Joe kan prakseri fa a libi sa de te a libisma famiri sa kon betre nanga wan wondroe? „No wan sma di e libi drape sa taki: ’Mi siki.’ Den sma di e libi na ini a kondre sa de den wan di sa kisi pardon foe den fowtoe foe den.” Ija, Gado sa doe sani di den man di e dresi sma nanga begi èn nanga bribi, noiti no ben man doe. „A seiker sa swari dede foe têgo.” Foe troe, „a Soeverein Masra Jehovah troetroe sa figi den watra-ai poeroe foe ala fesi”. — Jesaja 25:8; 33:24.
[Prenki na tapoe bladzijde 7]
Na ondro Gado Kownoekondre a libisma famiri sa kon betre nanga wondroe